‘To Iehova Lau Lalokau Henia Lasi!’

BOB be do mero maragi neganai ena sinana be Iehova ena witness hahine ta ai ia lao. Lagani momo lalodiai ia ese sinana ia bamoa Kingdom Hall dekenai idia lao neganai bona haroro gaukara dekenai danu, to ia be do bapatiso lasi. Sisina ia bada neganai, witness taudia dekenai hebou karana ia rakatania. Kara dika ta ta ia karaia ia lao bona ena mauri ia hadikaia momokani. Ena be ia be do ia gwau gau momo ia diba idia be momokani Bible dekenai to unai gaudia be idia hegeregere lasi idia veria lou Iehova ena orea dekenai. Dahaka dainai Bob ena hemami be unai bamona?

Mani haheitalai ta ita laloa. David be Iehova ena hesiai gaukara tauna ta lagani haida lalodiai. Nega haida henanadai haida idia vara ena lalona dekenai, Bible ena hahediba herevadia dekenai, to ia be nega ibounai inai daradara ia hamaoromaoroa, inai gadara gauna ta ladana Jigsaw Puzzle bamona, tau ta be do ia hesiku kava lasi bema kahana tamona o kahana rua be ia atoa neganai idia maoromaoro lasi bona gabu korikori dekenai ia atodia lasi. Ia be Iehova dekenai ia tabekau diba maoromaoro ia abia totona. To nega sisina murinai David be ia laloa unai bamona karana be do ia karaia diba lasi. Haroro gaukara ia hadokoa, bona nega sisina murinai hereva momokani ia rakatania. Dahaka ese ena lalohadai ia haidaua?

Momokani inai be mai lalohisihisi bada gauna, bema ita lalokau henidia taudia be mauri ena heau helulu dalana idia rakatania. To momokani ita be mai iseda ura ibounai danu ita ura idia ita durudia. (2 Korinto 12:15; Galatia 5:7) To dahaka gau ese taunimanima ia hamorudia hereva momokani dekenai? Bona dahaka be do ita karaia bona inai taudia ita durudia idia lou mai ena heau helulu dalana dekenai? Bona taunimanima ta be dahaka do ia karaia bema unai ura dika ia bada iena lalona dekenai?

Kudou, Lalona ena Mamina, bona Abidadama

Gau badana ta be ia noho inai hereva momokani idia rakatania taudia dekenai. Ita gwau lasi idia momo edia mauri idia haidaua badina idia laloa inai be hereva momokani lasi. Lasi, to momo idia gwau, “Lau diba inai be hereva momokani to . . .  ” o, “bema hereva momokani ta ia noho lau diba inai be hereva momokani.” Idia momo idia hamomokania Bible ese idia herevalaia gaudia be momokani. To idia gaukara goada lasi dainai idia manoka hereva momokani dekenai. Iakobo ia gwau: “abidadama mai ena kara namodia lasi, be mase gauna.”​—Iakobo 2:26.

Momokani ita gwau lasi abidadama be aonega sibona ita abia o ita hamomokani gau ta be momokani. Ia be lalohadai gaukaralaia dalana lasi, to haheitalai dalanai abidadama be kudou dekenai ia vara, badina Bible ese ita hamaoroa: “Kudouna ena abidadama dekena amo Dirava vairanai do ita maoromaoro.” (Roma 10:10) Bona Bible ese ia hahedinaraia goevagoeva kudou ese kerere ia havaraia bona murinai ta ese hereva momokani ia rakatania neganai. Paulo ese ita ia hadibaia, ia gwau: “Lauegu varavara taudia e, do umui naria namonamo, umui ta ese ia laloa kerere, iena abidadama be lasi, vadaeni Mauri Diravana do ia rakatania garina.”​—Heberu 3:12.

Kudou be gau badana hamomokania totona, mani ita ese Diane ena hereva ita kamonai henia. Ia be ia manoka Iehova ena orea dekenai. Ena Keristen tadikaka ese ia idia durua toho neganai, maoromaoro ia gwau, “Do lau giroa lou lasi Iehova dekenai. Lau lalokau henia lasi.” Ia diba gau tamona ese ia do ia durua bona Iehova kahirakahira dekenai do ia lao, unai gauna be ena lalokau korikori Iehova totona. Guna unai lalokau karana amo sibona ena mauri ia henia Iehova dekenai. To gau ta ese ia karaia dainai unai lalokau karana be ia mamia lasi. Bema unai lalokau be lasi ia diba ena be do ia gaukara goada to unau gaukara be anina lasi Iehova dekenai ia giroa lou neganai. To edena bamona ta ese unai lalokau bada karana ia haboioa diba?

Paulo ese ia gwauraia bamona, “Ta ese ia laloa kerere, iena abidadama be lasi.” Nega haida abidadama lasi karana ia vara badina ita ese iseda kudou ena dala ita kehoa Iehova ia ura lasi karadia ita ura henidia totona. Kudou be ia parara dainai Iehova dekenai ia be hegeregere lasi. Bema idia diba edia kara be ia maoro lasi Iehova dekenai, bona idia ura lasi edia kara kereredia idia hamaoromaoroa dainai ‘mauri Diravana idia rakatania.’ (Genese 3:​8-10. itaia.) Idia helalo-kerehai lasi dainai kudou dikana ese ta ia doria Iehova bona ena ura ia rakatania edia mauri lalonai. Unai dainai abidadama lasi tauna ese hereva momokani ia rakatania.

Nega haida, ta be sibona ena lalona ena mamina ia hahisihisia garina, ia ese ena kudou ia hakaua kerere dalana ia abia dae bena hereva momokani ia hakoikoia bona ia rakatania. Bema ia sibona ia laloa ena abidadama be ia kerere, ia laloa ia hegeregere lasi unai abidadama ena kara ibounai ia karaia. Unai bamona taudia ese edia lalohadai namona idia rakatania neganai, ‘ia be hegeregere vanagi be davara dekenai ia mutu bamona.’​—1 Timoteo 1:19.

Momokani ta ese hereva momokani ia rakatania ma gau haida karaia totona. To kahirakahira nega ibounai ia be kudou dekenai kerere ia vara. Unai dainai Bible ese ita ia hadibaia: ‘Kudou be ita naria namonamo badina be iena amo mauri ita abia.’​—Hereva Lada-isidia 4:23.

Edia Abidadama Ia Goada Lou Diba

Bema ita hahedinaraia iseda lalohadai kerere amo iseda abidadama ita haboioa, do ita goada. To gau ginigunana be ita gaukara goada Iehova dekenai ita hetura momokani. England dekenai pioneer mero ta ladana Steve ena ekspiriens ese inai ia hahedinaraia goevagoeva.

Ena be Steve be hereva momokani dekenai ia moru lasi, to nega ta ia laloa ena mauri be anina lasi bona hereva momokani dekenai ia daradara. Taunimanima haida ia haroro henidia neganai ena hereva be anina lasi ia dekenai bamona. Bona ia be ena tadikaka lauma dalanai danu idia kiki hebou neganai, ena mamina be ia dika hegeregere ia be tadikaka ta lasi bamona.

Mai moale danu Steve ese sibona ena kerere ia itaia diba, ia gwau: “Lau be gau ta lau daradaralaia neganai, sibogu egu aonega ai lau karaia lasi, hegeregere ma gabu haida dekenai taunimanima ese haere maoro do idia henigu bamona.” (Roma 7:18 itaia.) Lasi, to ia sibona ia diba ena kudou ia tahua namonamo bona unai ura dikana hereva momokani amo ia hakaua siri gauna ia kokia be namo. Ia gaukara goada hamatamaia bona ena lalokau Dirava dekenai bona ena abidadama be ia hamomokani ena hereva dekenai. Hari Steve mai moale danu misinari gaukara ia karaia noho.

Edena Bamona Ma Haida Idia Heduru Diba

Haida ese hereva momokani idia rakatania vadaeni taudia eiava idia ura rakatania gwauraia taudia ese Steve ia itaia gaudia idia itaia goevagoeva lasi. Momokani, nega haida taunimanima ese inai lauma gaudia idia itaia lasi dainai, hereva momokani dalana amo idia moru momokani. Unai neganai Keristen tadikaka idia heduru diba. (Roma 15:1; Galatia 6:1) To edena bamona unai ita karaia namonamo?

Momokani, unai be hegeregere lasi bema ita hamaorodia o ita hagoadadia do idia lou mai hereva momokani dekenai. Unai hekwakwanai karadia ita hamaoromaoro bona ita kokidia guna be namo. Namona be mai iseda goada ibounai ida unai manoka tauna ita durua. Mai momokani ida, to manau dalana ai kudou amo umui hereva hereva hebou bena reana do ia durua diba. Bona inai siri haida oi gaukaralaia diba, hegeregere 1 Timoteo 1:​19, Heberu 3:​12, bona Ieremia 17:​9, 10, inai siri haida ese reana do idia durua ena kudou do ia tahua namonamo totona bona reana do ia itaia ‘Mauri Dirava dekena amo’ dahaka gau ese ia hakaua siri.

Unai kerere gaudia ita itaia neganai, namona be ita hamaoromaorodia haraga be gau badana. Kudou gorere tauna ia mauri totona ia be hisihisi ia abia guna gabeai doketa ese ia gaukaralaia. Unai be hegeregere ita eda kudou lauma dalanai bamona. Ura dikadia, bona lalohadai dikadia ita kokidia haraga bema ita mamia unai kara be do ia vara neganai. Lauma dalanai ia goada Keristen tadikaka ese lauma dalanai ia manoka tadikaka ia durua dalana be idia guriguri hebou bona Bible idia stadilaia hebou bema elda tadikaka ese gwaumaoro idia henia neganai. Unai dala sibona amo manoka tauna ena kudou do ia veria bona ia ese Iehova do ia lalokau henia lou diba. Hereva Lada-isidia 2:1-5.

Inai kara be ia momokani Diane ena kara dekenai. Lo Keristen tadikaka danu idia herevahereva neganai unai ese ia durua dahaka do ia karaia Iehova dekenai ena lalokau karana do ia habadaia lou. Ia diba Iehova do ia dibaia lou haraga be gau badana. Diane ese heduru ia abia dae. Lagani ta lalonai Bible ia stadilaia murinai Diane bona ena adavana be hereva momokani dalanai idia goada lou bona Iehova idia hanamoa bada haroro gaukara lalonai.

Momokani lalokau be mai ena kara dainai Iehova ena ura ita karaia, bona ena lalokau karadia ita mamia neganai ita ia durua bada. Momokani, gaukara goada ese tau ta ena kudou ia durua bena ena lalokau karana Iehova dekenai ia abia lou. (Salamo 34:8) Inai ese reana ita do ia durua dala maoro amo iseda ura dikadia bona kudou ena lalohadai dikadia ia koua diba. Inai tuari ibounai lalonai ita kwalimu totona namona be Iehova ena badinai ita raka lao be gau badana. (Hereva Lada-isidia 23:26; 1 Petero 2:​1-3) Kudou ia namo lou neganai, ura namo ia vara bona ia ura ma haida ia durudia danu. Momokani bema ta ia goada lou namona be ita durua haroro gaukara ia karaia totona, “badina be iseda kudouna ena abidadama dekena amo Dirava vairanai do ita maoromaoro, bona inai abidadama be iseda uduna dekenai ita gwauraia hedinarai, be maoro do ita davaria.”​—Roma 10:10.

Bema daika idia laloa idia be Iehova idia lalokau henia lasi, mauri lao henia dalana be daudau herea bona mai hekwarahi bada danu. To momokani Steve bona Diane edia haheitalai karana amo ia hahedinaraia kudou be ia giroa diba bona kara maoromaoro ia karaia diba. Momokani lauma dalanai ita namo lou bema Iehova ena lauma helaga, bona ena ura ita karaia bona iena orea danu ita gaukara hebou neganai do ita namo. Ita be iseda lalona ena helaro ibounai amo bona iseda guriguri amo unai bamona taudia ita durudia bona Iehova do idia moalelaia bona mai edia kudou ibounai danu Iehova do idia tomadiho henia bona idia lalokau henia.​—Mareko 12:30; 1 Korinto 13:8; 3 Ioane 1-4.