Basileia Haroro Ripoti
“Tanobada ena Anina Ia Mage Vadaeni” Burma Dekenai
◻ BURMA (hari ladana matamatana idia henia, Myanmar) be hairai gabuna bona unuseniai sivarai namona idia harorolaia taudia be 1,500 idia hanaia. Vanegai edia hebouhebou be Burma Lushai bona Haka Chin gadodia ai idia karaia, bona idia hebou taudia iboudiai be 2,273. Henunai ai torea ekspiriens ese idia hahedinarai mamoe bamona taudia momo be Basileia ena sivarai idia ura kamonai henia, bona matahanai amo Ioane ese ia itaia gauna ia hamomokania: “Tanobada ena anina ia mage vadaeni.”—Apokalupo 14:15.
Dinam Dekenai Ia Vara
◻ Matupi dekenai ruma ta ruma ta gaukarana ia karaia neganai, special pioneer ta ese sikuli merona ida idia kiki hebou, ia ura hel ena anina ia diba. Pioneer tauna be Bible ena amo ia hadibadia hel be taunimanima edia mase gabuna, unai sivarai ia kamonai neganai ia hoa. Bona ia gava badina unai sivarai be ena varavara taudia Dinam hanua dekenai ia ura hadibadia. Sikuli holide ia abia neganai, ena hanua dekenai ia giroa lao bona hel ena anina korikori ia hadibadia. Iena ihana ia ura hereva ma haida ia kamonai, unai dainai unai mero ia bamoa Matupi dekenai ia giroa lao neganai, ia ura pioneer tauna ia hereva henia. Pura momo Matupi dekenai ia noho bona pioneer tauna ida idia stadi. Gabeai, Matupi dekenai ma ia lao neganai, pioneer taudia ia noidia goadagoada ena hanua do idia vadivadi henia totona, badina ia gwau unuseniai idia ura kamonai taudia be momo. Mai moale danu unai pioneer taudia toi idia ura lao. Hora 12 murinai Dinam hanua dekenai idia ginidae.
Pioneer taudia idia ginidae dinanai hanua taudia ese edia mase ta idia guria gwauraia, unai dainai kahirakahira hanuadia edia taunimanima danu idia noho, unai dainai Bible ena hel ena anina idia kamonai henia diba. Vadivadi taudia idia mai neganai hanua taudia iboudiai idia heau lao itadia totona. Bona Bible idia stadilaia adorahi kahana 7.00 okoloka ia lao 11.00 okoloka hanuaboi. Mai ena hebogahisi hanua tauna ese edia kiki ia hadokoa 11 okoloka dekenai unai pioneer taudia do idia mahuta totona. Bona dabai idia toreisi negana Bible ma idia kikilaia 7.00 okoloka amo ia lao 10 okoloka hanuaboi, aniani neganai sibona kiki idia hadokoa. Pioneer taudia ese hanua idia rakatania gwauraia neganai, mamoe bamona hanua taudia idia noidia gabeai do idia giroa mai bona idia ida ma idia noho totona. Unai bamona kamonai taudia dekenai, mai anina bada Basileia sivaraina namona harorolaia gaukarana be moale maduna ta. Momokani, “tanobada ena anina ia mage vadaeni” Burma dekenai!
Idia Negea Bukana amo Hereva Momokani Ia Abia
◻ Burma dekenai tau ta ese ena turana ia vadivadi henia, ena turana ese buka bona niuspepa gunadia ia hoihoilaidia, bona unai pepa lalodiai kopina lasi buka ta ia itaia. Ia abia bona ia duahia hamatamaia. Bona mai lalona ibounai ia duahia noho. Ia be Watch Tower Society ena buka ta, ena ladana be Hadibaia Tauna Badana Ita Kamonai Henia. Gabeai Society ena branch opesi dekenai toretore ia siaia buka ma haida ia abidia totona. Branch opesi taudia ese pioneer ta idia siaia ia dekenai. Bona stadi ia hamatamaia ia dekenai, bona stadi haida murinai, ia diba ia kamonai henia gaudia be hereva momokani, bona ena mauri ia hagoevaia hamatamaia, kara dika karadia ia rakatanidia bona daudau lasi murinai ena Hindu kaivakuku ia negedia. Bena murinai, ia bona ena vara guna natuna kekenina be Iehova dekenai gwauhamata idia karaia bona bapatiso idia abia. Hari ia be regular pioneer gaukara ia karaia.
Momokani, Burma dekenai “uiti ena anina abia negana ia ginidae vadaeni, to utua taudia be momo lasi.”—Mataio 9:37, 38.