Oi Ura Dirava Oi Kamonai Henia?

BIBLE ita duahia neganai, kara haraga ita lalo-parara Keristen taudia ginigunadia edia nega lalonai taunimanima edia kara, bona iseda nega lalonai taunimanima edia kara momo be idia hegeregere. Israel besena kahirakahira dekenai idia noho hanua taudia edia kara be idia dika, sihari kava bona henaohenao karadia idia karaia bada, nega momo sihari kava be edia tomadiho karana ta. Ogogami taudia edia mauri be namo lasi, politikol kara dekenai hekwakwanai idia noho. Lagani 66 C.E. ai, Israel bese bona Roma bese idia tuari heheni. Unai nega be hari inai nega hegeregerena, taunimanima be heduru idia abia be namo.

Tomadiho karana dekenai, unai nega karadia be hari inai nega idia vara karadia hegeregerena. Iuda tomadiho gunalaia taudia be koikoi taudia. (Mataio 23:15; Luka 20:​46, 47) Iuda lasi besedia lalonai, taunimanima edia lalohadai tomadiho karana dekenai be idauidau, haida idia kikirilaia, haida be mai gari danu idia abia dae, dika idia abia garina, haida be mai edia lalona ibounai danu sibodia edia tomadiho idia abia dae auka masemase. (Kara 14:​8-13; 19:​27, 28 danu oi hahegeregerea.) Idia haginia Keristen kongregesen matamatana lalonai danu, hekwakwanai idia vara. Lagani 100 C.E. dokonai, aposetolo Ioane ese idia ia sisiba henia, ia gwau: “Koikoi taudia momo be tanobada gabu ibounai dekenai idia loaloa noho.” (2 Ioane 7) Oibe, idau negai danu, tomadiho orea dekenai koikoi taudia ese sisiba dikana idia herevalaia. To heduru abia dalana namona ta ia noho.

Bema Unai Neganai Oi Noho Iesu ena Hereva Oi Kamonai Henia, A?

Unai nega lalonai Iesu ese sisiba namona ia henia taunimanima dekenai. Sisiba ia henia dalana be namo herea momokani, badina Bible lalonai ia gwau: “Taunimanima ese iena hadibaia hereva dekenai idia hoa bada.” (Mataio 7:28) To taunimanima momo be iena hereva idia hakala henia momokani lasi. Iesu be hoa karadia momo ia karaia bona Dirava ia ura henia mauri dalana bona karana ia haheitalaia goevagoeva. To, mai edia sikuli bada tomadiho gunalaia taudia ese iena hereva ena namo idia dadaraia. Dahaka dainai?

Unai idia karaia ena badina badana be, idia ura lasi ena hereva idia gwauraia maoro. Idia haida ese Iesu idia ura henia lasi badina ia be Nasareta tauna dainai. Ma haida ese idia dadaraia badina edia sikuli ta dekenai ia lao lasi bona lohia taudia edia bese amo ia vara lasi. (Ioane 1:46; 7:​12, 15, 47, 48) Ma danu, nega haida Iesu ese taunimanima idia ura kamonai henia herevana ia gwauraia lasi. Ia be hereva momokani sibona ia herevalaia, bona nega momo ena hereva dainai Farisea taudia idia badu henia. (Mataio 15:​12-14) Vadaeni, lagani toi mai kahana ia haroro murinai, Iuda tomadiho gunalaia taudia ese dala idia kehoa idia hamasea totona. (Luka 23:​20-35) Heduru bada idia reaia unai, badina “mauri hanaihanai herevadia be [Iesu] dekenai idia noho”!​—Ioane 6:68.

Bema unai nega lalonai Ierusalem dekenai oi noho, oi danu be unai tomadiho gunalaia taudia bona hutuma bada taudia edia kara oi abia dae, a? Eiava emu lalona oi kehoa Iesu ena hereva ena anina korikori oi lalo-pararalaia totona, a? Bema emu lalona oi kehoa, oi be hegeregere Iesu ena laolao dekenai ia davaria hahine namona ta bamona.

Ia Hakala Hahinena

Iesu ese unai hahine ia davaria Samaria dekenai ia laolao neganai. Ia be ranu guri badinai ia helai ia laga-ani totona, unai hahine ia mai ranu utua totona. Ena ladana ita diba lasi, to Bible ena sivarai ia gwau ena be Iesu ia hesiku, to nega ia atoa unai hahine dekenai tomadiho karana ia herevalaia totona.​—Ioane 4:​5-15.

Badina be momo dainai bema unai hahine ia ura ia be mai ena dala Iesu ena hereva ia dadaraia. Iena tomadiho orea be idau​—Samaria taudia edia tomadiho bona Iuda taudia edia tomadiho karaia dalana be idia idau. Danu, Iuda taudia ese Samaria taudia idia tura henidia lasi, idia laloa idia be namo lasi. Ma danu, Iuda tatau be idia diba lasi hahine ta idia hereva henia diba lasi. (Ioane 4:​9, 27) Danu, unai Samaria hahine be ariara hahine, bona Iesu ese iena kerere ia gwauraia hedinarai neganai ia badu diba.​—Ioane 4:18.

To, ia badu lasi. Iesu ese aonega dalana amo ia hereva henia, bona ena lalona ia veria dainai, unai hahine ese henanadai namodia ia henia. Idia kiki noho lalonai, unai hahine be tomadiho karana korikori, Iuda bona Samaria taudia idia hepapahuahulaia gauna, ia herevalaia. Mai hebogahisi bona mai momokani ida Iesu ese ena henanadai ia haerelaia, ia gwau: “Umui ese umui tomadiho henia tauna be umui diba lasi. Ai be ai tomadiho henia tauna be ai diba.” (Ioane 4:​19-22) To unai hahine ia badu lasi. Ena lalona ia kehoa hereva ma haida do ia kamonai henia totona.

Unai dainai Iesu ese mai anina bada herevana ta ia kikilaia, ia gwau: “To nega ta do ia mai, bona harihari ia ginidae vadaeni, tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho. Dirava be Lauma, bona do idia tomadiho henia taudia ese lauma bona momokani dekena amo do idia tomadiho henia.” (Ioane 4:​23, 24) Murinai, unai lalona ia kehoa hahinena ese ena moale ia hahedinaraia, ia kamonai herevadia be ena dekena taudia iboudiai ia hadibaia. Vadaeni, idia danu, Iesu dekenai idia lao, sivarai ma haida idia kamonai henia totona.​—Ioane 4:​39-42.

Unai sivarai amo dahaka ita diba? Ita diba gauna be inai, bema ita noholaia gabuna dekenai taunimanima be idia hepapahuahu kopina be idauidau dainai, bese be idauidau dainai, eiava tomadiho be idauidau dainai, dahaka do ita karaia bema kopina idau tauna, bese idau tauna eiava tomadiho idau tauna be ita dekenai ia mai neganai? Ita kiki hebou neganai bema iseda kerere ta ia hedinarai, hereva hebou karana ita koua, a? Eiava, ita be Samaria hahine bamona, do ita ura kikilaia noho, a?

Bema Unai Neganai Oi Noho Paulo ena Hereva Oi Kamonai Henia, A?

Keristen ginigunadia edia nega lalonai aposetolo Paulo be sisiba namona ia henia danu. To nega ta Paulo danu be ena lalona ia koua bamona. Ia sibona ena kerere ia gwauraia hedinarai, ia gwau: “Momokani, gunaguna lau ese Keriso lau hereva dika henia, lau dagedage henia bona iena ladana lau hadikaia. To Dirava ese lau ia bogahisihisi henia, badina be abidadama lau do diba lasi, bona lauegu kara ena dika lau do diba lasi dainai.” (1 Timoteo 1:13) Ena be unai bamona ia karaia, to hereva momokani Iesu Keriso dekenai ia abia dae bona sibona ena lalohadai ia koua. Iena haheitalai namona ese ia hahedinaraia Bible ena hereva momokani ese ita ia durua diba bema “tanobada ena siahu” gaudia ese iseda kudouna idia hadikaia, bona iseda mauri idia hadikaia gwauraia neganai.​—2 Korinto 10:4.

Keristen tauna ta ai ia lao neganai, Paulo ese ia kamonai henia sivarai namona be gari lasi dekenai ia harorolaia. Ia davaria taudia momo be sivarai namona dekenai edia lalona idia koua bamona, hegeregere guna ia karaia bamona​—to momo idia kamonai danu. Berea dekenai, Greece ena mirigini kahanai, ia ese manau taudia, sisiba kamonai henia taudia namodia ia davaria, edia kara be haheitalai namona. Unai taudia idia lalo-parara Paulo ia gwauraia herevadia be hereva momokani. Unai dainai, “hereva idia kamonai bona idia ura henia danu.” Edia lalona idia koua lasi, bona hereva idia abia dae kava lasi danu. Idia ese “dina ibounai Buka Helaga idia tahua, inai hereva ia momokani eiava lasi” idia diba totona. (Kara 17:11) Idia kamonai henia herevadia idia ura henia bada, to idia abia dae kava lasi, badina Bible dekenai idia hamomokania guna bona gabeai idia abia dae.

“Hereva Ibounai Do Umui Laloa Namonamo”

Iseda nega lalonai, Iehova ena Witness taudia be nega bada herea lalonai Basileia ena sivarai namona idia harorolaia edia dekena taudia dekenai, idau tomadiho taudia unai. To unai taudia ese Witness taudia idia abia dae, a? Taunimanima momo be mai moale danu idia abidia dae. To haida ese Witness taudia idia dadaraia danu, bona idia mai vadivadi henidia dainai haida idia badu.

Iehova ena Witness taudia idia ura taunimanima dekenai Bible ia gwauraia “Sivarai Namona” do idia kikilaia, to madi idia badu dainai unai sivarai idia reaia. (Mataio 24:14) Ma danu, idia ese taunimanima idia hagoadadia Paulo ena lalohadai idia abia totona, ia gwau: “Hereva ibounai do umui laloa namonamo Dirava dekena amo ia mai eiava lasi, hereva namodia do umui dogoatao momokani.” (1 Tesalonika 5:21) Ena be taunimanima ta be mai goada danu gau ta ia abidadama henia, to namona be Berea taudia bona Samaria hahine edia kara ia tohotohoa bona ena lalona ia koua lasi; namona be ena lalona ia kehoa noho ma haida danu Dirava ena hereva idia kikilaia hebou totona.

Dahaka Dainai Lalona Ia Kehoa Noho be Namo?

Moale gauna ta be, lagani ta ta ibounai lalonai taunimanima tausen momo ese edia lalona idia kehoa sivarai idia kamonai henia totona. Idia momo be Bible ena aonega herevana idia diba, bona unai hereva ese ia durudia, edia mauri dalana idia haidaua totona. Guna, idia haida edia kara be Janet bamona, ia be hahine matamatana ta, bona lagani momo lalonai ia ese drag bona kekero muramura ia inua, bona sibona ena mauri ia hadokoa toho. To hari, Janet be moale Keristen hahinena ta. Bible ia stadilaia neganai, unai ese ia durua goada ia abia Paulo ena sisiba ia badinaia totona, ia gwau: “Tauanina bona lauma hamiroa karadia ibounai do ita hadokoa, bona iseda mauri ita hagoevaia be namo.”​—2 Korinto 7:1.

Vernon be kekero muramura inua karana ia hadokoa diba lasi, bona edia headava be kahirakahira idia hadokoa. To Bible ena sisiba ia badinaia dainai, ia ese goada ia abia inuinu karana ia hadokoa totona bona ena hahine dekenai ia maino karaia lou diba. (1 Korinto 6:11) Debra be kopi idau taudia ia dadaraia. To Bible ia stadilaia bona Keristen taudia ia bamoa neganai, heduru ia abia ena lalohadai ia haidaua totona. (Kara 10:​34, 35) Bona hoa sivaraina be inai: Netherlands dekenai ariara hahine ia gwau ia ura Iehova ena Witness taudia ida Bible do ia stadilaia. Bona daudau lasi murinai, bapatiso ia abia bona Keristen ena kara goeva ia karaia, bona ena natudia naridia maduna ia huaia namonamo.

Unai bamona haheitalai namodia momo herea idia vara taunimanima ese Bible ena sivarai idia kamonai henia neganai. Edia mauri dalana ia hanamoa, guna idia laloa unai mauri namona do idia abia diba lasi. To mai anina bada gauna be inai, idia ese turana karana Dirava dekenai idia abia, bona mai goada danu inai bamona idia guriguri henia diba, “Aiemai Tamana e, guba dekenai oi noho.” (Mataio 6:9) Bona danu, dina vairai totona helaro namona idia abia, bona Iesu ena hereva idia hamomokania, ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu, oi ese oi siaia tauna.”​—Ioane 17:3.

Iehova ena Witness taudia be edia haroro gaukara amo idia ura unai bamona sivarai idia kikilaia edia dekena taudia dekenai. Reana, daudau lasi murinai oi do idia vadivadi henia lou. Idia mai neganai emu lalona do oi kehoa edia hereva do oi kamonai henia totona, a?

[Picture on page 7]

Samaria hahine ese sibona ena lalohadai idauna ia koua bona ena lalona ia kehoa Iesu ena hereva ia kamonai henia totona. Oiemu lalona do oi kehoa ia karaia bamona, a?