Taravatu Hereadaena be Dahaka?

“LAUEGU dekena tauna lau hahekwarahia lasi. Dahaka, dahaka idia ura idia karaia, idia karaia diba. To bema kerere ta ia vara, do lau durua diba.” Unai be oiemu lalohadai, a? Kara dika ta ia vara neganai, reana taunimanima ese hebogahisi idia hahedinaraia, bona edia kara dainai taunimanina momo idia hoa. To unai be hegeregere, a?

Bema oi be sina eiava tama ta, sedira oiemu natuna oi hamaoroa ena turadia do ia haheura henidia lasi. Ita momo ita diba, ita maragi neganai unai taravatu ita badinaia lasi dainai kerere ta ia vara. Io ita momo be inai hereva ita diba, Asia ena aonega tauna Confucius ia gwau: “Dahaka oi ura lasi oi dekenai ia vara, ma haida dekenai oi karaia lasi.” To unai hereva dekenai oi lalo-parara, eiava lasi? Unai be Taravatu Hereadaena ena dala hegeregerena lasi bona ena anina be namo momokani lasi, ani?

Taravatu Namona

Buka ta, Webster’s New Collegiate Dictionary, ese “Taravatu Hereadaena” inai bamona ia herevalaia, ia be “mauri ena taravatu goevadaena [Mataio] 7:12 bona [Luka] 6:31 dekenai idia torea, ia gwau, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” Mani henuna dekenai ia noho maua oi itaia bona oi laloa edena bamona Bible idauidau ese Mataio karoa 7, siri 12 ena anina idia hahedinaraia.

Mani oi itaia, ena be edia hereva dalana be idauidau, to edia anina be tamona, taravatu namona idia herevalaia. Hegeregere guna Iesu be Ororo dekenai ia haroro, ia gwau: “Umui noinoi, vadaeni do ia henia umui dekenai. Umui tahua, vadaeni do umui davaria. Umui pidipidi, vadaeni iduara do ia kehoa umui dekenai. Badina be noinoi taudia ibounai be do idia abia. Tahua tauna ese do ia davaria. Pidipidi tauna dekenai be iduara do ia kehoa.” (Mataio 7:​7, 8) Noinoi, tahua bona pidipidi karadia ese anina namodia ia havaraia. “Unai dainai,” Iesu ma ia hereva, ia gwau: “Gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.”​—Mataio 7:12.

Bible ia hahedinaraia Iesu ena aposetolo taudia be unai taravatu idia badinaia edia mauri lalonai. (Roma 15:2; 1 Petero 3:11; 3 Ioane 11) To madi, hari inai tanobada lalonai, sibodia idia gwauraia Keristen taudia bona Keristen lasi taudia edia mauri ese ia hahedinaraia idia be unai taravatu maorona idia badinaia lasi. Vadaeni, edia kara dainai unai taravatu be siahu lasi, a? O sedira ia be gunana bona anina lasi, a?

[Box on page 3]

“Taunimanima dekenai kara ibounai do oi karaia hegeregerena oi ura oi dekenai do idia karaia bamona.”​—The Holy Bible, R.A. Knox ese ia hahanaia.

“Taunimanima do oi kara henidia hegeregere oi dekenai bamona idia karaia.”​—The New Testament in Modern English, J. B. Phillips ese ia torea.

“Dahaka, dahaka oi ura taunimanima be oi dekenai do idia karaia bona oi totona do idia karaia gaudia, unai hegeregerena idia dekenai bona idia totona do oi karaia.”​—The Amplified New Testament.

“Kara ibounai do oi karaia taunimanima dekenai, oi ura oi dekenai do idia karaia bamona.”​—The New Testament in the Language of Today, W. F. Beck ese ia torea.

“Gau ibounai dekenai, oiemu dekena taudia do oi kara henia, oi ura oi idia kara henia hegeregerena.”​—The Four Gospels, E. V. Rieu ese ia torea.

“Oi gaukara goada haida oi kara henidia, oi ura idia ese oi do idia kara henia bamona.”​—The New Testament, C. B. Williams ese ia torea.