Kopina Toana Sibona Oi Itaia, A?

HEINZ be mero matamata ta, bona ia badu dikadika dainai, dala ia tahua badina ia ura ena heubu tamana ia alaia mase gwauraia. To ena lalona ia goada lasi, unai kara ia karaia totona. Lagani haida murinai dala ia tahua sibona hamasea totona, to unai ma ia karaia lasi danu. Henaohenao karana ia karaia bona drag ia hoihoilaia dainai dibura ruma dekenai idia atoa. Murinai ena headava ia dika.

To, harihari Heinz be drag ia ania lasi. Ia be kara maoromaoro dalanai ia noho. Ia be mai moale danu ena adavana danu ia noho bona ena kara ena heubu tamana dekenai be namo danu. Dahaka ese ena kara ia haidaua? Iehova ena Witness taudia danu Bible idia stadilaia hamatamaia dainai. Bona sisina sisina ena mauri ia haidaua.

Guna, Heinz idia diba taudia be Heinz idia itaia neganai idia laloa ia be do ia namo lou diba lasi tauna ta. To Iehova ese Heinz ena kara dika davana ia henia haraga lasi. Dahaka dainai? Ena badina be: “Taunimanima ese idia itaia lasi gaudia, Dirava ese ia itaia, badina matana sibona taunimanima ese gau haida idia itaia; to Iehova ese taunimanima edia kudou ia itaia.”​—1 Samuel 16:7.

Unai ia hahedinaraia taunimanima edia lalohadai bona Dirava ena lalohadai be idia idau. Ita ese taunimanima be ena tauanina ena murimuri toana amo ita hahemaoro henia. Danu ita gwau “ita itaia guna gauna be ita laloatao noho.” Unai anina be, taunimanima edia kara toana ita itaia dainai ita hahemaoro henidia. To Dirava, ese taunimanima edia kudouna ia diba dainai, edia toana ia laloa lasi, to ia hahemaoro maoromaoro diba. Unai dainai Ia ese ena natuna Iesu Keriso ia siaia mai tanobada dekenai “taunimanima ibounai ese mauri [hanaihanai] do idia davaria, bona hereva momokani do idia diba” totona. (1 Timoteo 2:4) Unai dala amo, Keristen bapatiso idia abia taudia be “Dirava ena gaukara” idia karaia noho, idia ese Basileia ena sivarai namona be taunimanima ibounai idia hadibaia noho. (1 Korinto 3:9) To, Keristen taudia be gau haida do idia diba lasi​—hegeregere idia ese taunimanima be edia kudou dekenai dahaka idia lalohadailaia idia diba lasi. Unai dainai namona be ta ena kahana ta dekenai idia gini lasi, bona ena tadikaka ta ena toana o ena kara dainai idia gwauraia dika lasi.

Iesu ena tadina Iakobo be ia diba hekwakwanai idia vara ena badina, Keristen taudia edia kongregesen ginigunana dekenai. Ia gwau: “Lauegu varavara e, ita be Lohiabada Iesu Keriso ita abidadama henia noho. Ia be guba namo herea ena Lohiabada momokani. Unai dainai namo lasi toana namo eiava dagi bada taudia do umui laloa bada, to ogogami bona dagi lasi taudia do umui laloa maragi. Unai be maoro lasi. Sedira kohu momo tauna ta mai ena imana kwakikwakina rini, golo gauna, bona mai ena dabua namodia danu emui dubu dekenai ia raka vareai. Ma ogogami tauna ta, mai ena dabua dikana be emui dubu do ia raka vareai danu. Sedira dabua namona tauna do umui hereva henia, do umui gwau, ‘Mani emu kara, inai helai gauna namona dekenai do oi helai.’ To ogogami tauna dekenai do umui hereva henia, do umui gwau, ‘Unuseniai do oi gini noho, o foloa dekenai do oi helai, lauegu aena badinai. . . . Unai bamona umui karaia neganai, umui be mai emui kerere. Emui kerere be inai: maka tamona dekenai taunimanima umui kara henidia lasi, to mai emui laloa maoromaoro lasi danu taunimanima edia toana sibona umui itaia.’ ” Unai hereva ia hahedinaraia hegeregerena, taunimanima be Kingdom Hall dekenai idia vareai matamaia taudia edia toana sibona ita itaia dainai, reana nega haida idia dekenai ita laloa kerere, ani?​—Iakobo 2:​1-4.

Iesu ese Haheitalai Ia Karaia

Iesu ese taunimanima ia itaia neganai ia diba idia be mai edia kara dika, to danu ia diba bema heduru idia abia bona edia lalona idia hegeregere neganai, unai kudou namo taudia be idia helalo-kerehai diba. Unai dainai ‘sibona ena mauri ia henia, taunimanima ibounai hamauria totona.’ (1 Timoteo 2:6) Iena haroro gaukara lalonai, kudou-namo taudia ia dadaraia lasi, to idia ia durua toho. Taunimanima ia kara henidia neganai hekokoroku karana ia hahedinaraia lasi, sibona ia habadaia lasi.​—Luka 5:​12, 13.

Farisea taudia edia kara be inai bamona idia torea, ia gwau: “Farisea orea edia taravatu hadibaia taudia ese Iesu idia itaia, ia aniani takisi abia taudia bona kara dika taudia danu, vadaeni idia ese ena diba tahua taudia idia nanadaia, idia gwau, ‘Badina dahaka ia be takisi abia taudia bona kara dika taudia nega tamona idia aniani?’ Edia hereva Iesu ia kamonai, ia gwau, ‘Doketa ia mai lasi goada taudia dainai, to gorere taudia dainai ia mai. Lau mai lasi kara maoromaoro taudia boiria totona, to lau mai be kara dika taudia boiria totona.’ ”​—Mareko 2:​16, 17.

Ita gwau lasi Iesu ese edia koikoi karadia bona edia kara dika ia hanamodia. Lasi, to ia diba taunimanima ese kara dika idia karaia diba edia mauri lalonai, reana idia diba lasi unai be kara dikana ta, eiava reana edia lalona ia goada lasi unai kara dika koua totona. Unai dainai ia ese lalo-parara ia hahedinaraia, “ia hebogahisi idia dekenai, badina idia be mamoe hegeregere, bona naria tauna lasi.” (Mareko 6:34) Mai ena lalokau ida ia ese edia kara dika haida bona edia kudou-namo ia lalo-pararalaia.

Ia ese aposetolo taudia edia kara ia tahua neganai, Iesu ese edia toana ia laloa bada lasi. Idia be kara dika taudia dainai nega momo idia kerere, to Iesu be kara maoromaoro momokani tauna dainai, ia ese idia ia gwaugwau henia momo lasi idia ese edia kara dika maragidia idia hamaoromaoroa totona. Iesu ese ena hahediba taudia ia kara henidia neganai, ia ese edia kara toana sibona ia laloa lasi. Ia diba edia lalohadai be namo, eiava edia kudou be maoro. Namona be heduru bona hahegoada idia abia; Iesu ese taunimanima ia durudia bona ia hagoadaia neganai ena heduru ia hamaragia lasi. Iesu be taunimanima ia itaia be hegeregere Dirava ese taunimanima ia itaia bamona. Ita ura ena kara namona ita tohotohoa, eiava?

Oi “Kota Henia Mai Maoromaoro Danu” Eiava?

Nega ta, sibodia idia gwauraia kara maoromaoro taudia be Iesu dekenai idia badu, badina Iesu be Sabati dinana dekenai hoa karana ta ia karaia, ia ese tau ta ia hanamoa dainai. Ia ese ia hamaorodia, ia gwau: “Gau edia toana sibona dekena amo do umui kota henia lasi, to do umui kota henia mai maoromaoro danu.” Dahaka dainai idia moale lasi Iesu ese mero ia “hanamoa momokani” neganai, bona idia ‘badu dikadika’ idia itaia ia be sabati ena taravatu ia makohia neganai? Kopina ena kara toana dekenai idia hahemaoro henia neganai, sibodia edia lalohadai dikana idia hahedinaraia momokani. Idia hahedinaraia edia hahemaoro be hekokoroku dekenai idia karaia bona unai hahemaoro karana be ia maoro lasi.​—Ioane 7:​23, 24.

Edena bamona ita danu unai bamona kara kerere do ita karaia diba? Bema ia helalo-kerehai tauna ta ia lou mai kongregesen dekenai, eiava murimuri kara dika momokani tauna ta ese hereva momokani ia tahua noho bona lauma ena hahenamo ia abia matamaia, reana ita be moale toana ia dekenai ita hahedinaraia lasi. Nega haida taunimanima dekenai ita laloa kerere badina edia dabua be ia idau eiava edia iduari ia idau dainai, reana ita gwau unai bamona taudia be Witness taudia ai do idia lao diba lasi. To, guna hippie taudia bona mauri dala idauna idia abia dae taudia be gabeai Iehova ena Keristen Witness taudia ai idia lao. Unai bamona taudia be edia mauri dalana idia do haidaua noho lalonai, namo lasi edia kopina “toana sibona [ita] itaia,” to namona be edia kudou namona ita laloa.

Iesu ena haheitalai namona hegeregerena, namona be unai bamona taudia totona ita guriguri, bona dala namona amo ita durudia lauma dalanai Keristen goada taudia ai do idia lao totona! Nega haida unai taudia edia kara ita itaia neganai idia do ita moalelaia be ia auka sisina. To bema Keriso dekena amo Iehova be ia dekenai unai bamona taudia ia boiria mai, namo lasi unai taudia ita dadaraia ita laloa idia be namo lasi dainai, ani? (Ioane 6:44) Taunimanima ta ena kudouna ita diba lasi bona ena kara ena badina ita diba lasi neganai, to ita sibona ita laloa bada dainai unai tauna do ita hahemaoro henia kerere, reana gabeai hahemaoro dikana do ita abia diba.​—Mataio 7:​1-5 oi itaia.

Namo lasi orea dekenai idia vareai matamata taudia ita hahemaoro henia, to namona be haheitalai namodia amo idia ita hagoadaia bona idia ita durua. To idia kamonai matamaia taudia dekenai hebogahisi ita hahedinaraia neganai, namo lasi unai taudia ita laloa bada badina tanobada taudia vairanai edia dagi ia bada dainai. Unai be taunimanima haida dadaraia karana unai. Danu unai anina be lauma dalanai ita do goada lasi. Bema unai bamona tauna dekenai ita hahedinaraia ita laloa bada, unai bamona kara ese unai tau do ia durua ia manau totona, a? Reana lasi, to do ita hahemaraia, ani?​—Levitiko 19:15.

Namo Lasi Taunimanima Dekenai Dirava Ia Tahua Lasi Gauna Ita Tahua

Ita ese taunimanima edia toana ita itaia neganai, idia edia kara ena anina sisina sibona ita diba, to Iehova be edia kudou ibounai ia itaia diba. (1 Sisiga 28:9) Bema unai ita abia dae neganai, Farisea taudia edia lalohadai kererena do ita karaia lasi, idia be sibodia idia gwau idia be kara maoromaoro taudia, bona ita be ita ura lasi kamonai matamata taudia do ita doria ita taunimanima ese ita havaraia taravatu o lalohadai ta do idia badinaia totona. Bema ita ese taunimanima ita itaia Iehova ese idia ia itaia hegeregerena, vadaeni namo lasi taunimanima dekenai Dirava ia tahua lasi gauna ita tahua. Ita be “Buka Helaga ena hereva do [ita] badinaia.” (1 Korinto 4:6) Inai be mai anina bada Keristen elda taudia dekenai.​—1 Petero 5:​2, 3.

Unai do ita haheitalaia dabua dekenai. Bible ena taravatu​—Dirava ena taravatu—​be Keristen taudia edia dabua idia goeva bona edia toana be idia namo, bona “mai manau bona mai hemataurai danu” idia karaia. (1 Timoteo 2:9; 3:2) Kongregesen ta ena elda taudia haida be “Buka Helaga ena hereva [idia] badinaia” lasi, to idia ese unai hereva idia hanaia, hegeregere lagani haida ia lao vadaeni, unai elda taudia ese platfom dekenai hereva idia henia tadikaka dekenai idia hamaorodia siedi kurokuro sibona idia karaia, hereva idia henia neganai, ena be dabua edia kala idauidau be unai gabu dekenai idia karaia be maoro. Bema tadikaka ta be mai ena kala seidi ta ia karaia neganai, idia ese seidi kurokuro ta idia henia Kingdom Hall dekenai ia ginidae neganai. Namona be ita naria namonamo, namo lasi tadikaka ita doria ita laloa gaudia haida ia karaia totona, unai be maoro lasi! Paulo ena sisiba danu be namo herea, ia gwau: “Emui manau bona manada kara taunimanima ibounai edia vairanai do umui hedinaraia”!​—Filipi 4:5.

Bema Murimuri Toana Ita Laloa Lasi Neganai Anina Namona Do Ia Havaraia

Bema ita abia dae ita ese taunimanima edia kudouna ita itaia diba lasi, unai ese ita do ia durua ma haida danu do ita turana henia namonamo Keristen kongregesen lalonai bona murimurinai danu. Bona unai ese ita do ia durua taunimanima haida dekenai laloa maoromaoro do ita abia bona edia kara do ita henanadailaia lasi, “badina be ita danu gunaguna ita be mai kavakava, mai kamonai lasi, bona mai kerere danu. Ura dikadia bona tauanina ena moale gaudia idauidau ese ita idia koia.” (Tito 3:3) Bema unai ita diba namonamo neganai, ita be mai iseda lalona ibounai danu taunimanima ibounai dekenai do ita haroro henidia, ena be haida edia toana dainai ita laloa idia be hegeregere lasi. Hereva momokani idia ura o idia ura lasi be idia sibodia edia maduna. To iseda maduna be ita haroro taunimanima ibounai dekenai.

Heinz bamona, Iehova ena Witness taudia momo herea idia moale bada herea, badina Keristen kongregesen dekenai idia vareai neganai tadikaka bona taihu idia hanamodia dainai. Idia ese kopina ena toana idia laloa lasi, bona guna idia itaia gauna dainai idia hahemaoro henia kerere lasi dainai.

Mani Frank ita laloa, Germany dekenai, Sunday ta ai ia be Iehova ena Witness taudia edia Kingdom Hall ta dekenai ia vareai. Atendan taudia ese dahaka idia itaia? Toana dikana tauna ta idia itaia, mai ena ade huina, ena hui ia lata, bona ena dabua idia miro, idia diba unai uhau be hanaihanai pab dekenai ia lao bona kuku ia ania​—unai tau be ia danu ia noho hahine bona edia hekapa beibi rua ia naridia lasi. To, hebou dekenai ia vareai neganai mai moale danu idia hanamoa. Edia kara dainai ia hoa bena murina pura dekenai ma ia giroa lao hebou dekenai. Ia giroa lao neganai dahaka idia itaia? Ena toana be ia namo bona ena dabua idia goeva. Pura ihatoina dekenai ia giroa lao neganai idia itaia kuku ania karana ia negea bona ena hahine bona natudia danu ia hakaua mai. Sunday namba 4 dekenai, idia itaia unai tau bona hahine be pepa idia abia hegaegae edia headava do idia hamaoromaoroa totona. Sunday namba 5 dekenai, idia itaia unai tau be tomadiho koikoi amo ia raka oho. Lagani 4 murinai, hari inai nega lalonai dahaka idia itaia? Iehova ena Witness tauna ta ia gwau, “unai ruma bese ena kara be ia namo momokani, ia be hegeregere orea dekenai ia noho lagani momo tadikaka ena kara bamona.”

Buka ena revareva reana ita diba lasi ena kopina toana dekena amo, eiava ruma ena lalona do ita diba lasi ena murimuri toana dainai. Unai hegeregerena, taunimanima ta ena kopina toana amo iena lalona korikori do ita diba lasi. Bema Keristen taudia ese taunimanima idia itaia Dirava ese idia ia itaia bamona, do idia hahemaoro henidia haraga lasi. Dirava ese taunimanima edia “lalona dekenai ia noho” gaudia ia itaia, bona unai ia karaia dainai ita tanikiu henia bada.​—1 Petero 3:​3, 4.