Taunimanima Ibounai ese Mauri Do Idia Davaria
1 Dirava ena hariharibada karana ese hahemauri dalana ia kehoa. Iehova ena ura be “taunimanima ibounai ese mauri do idia davaria, bona hereva momokani do idia diba.” (1 Tim. 2:3, 4) Dirava be iseda bese, noho dalana, diba, o toana dainai lasi, to Iesu ena mauri davalaia boubouna ita abidadama henia dainai ita ia abia dae. (Ioa. 3:16, 36) Ita be Dirava ena hesiai taudia dainai, namona be taunimanima edia toana ita laloa lasi; badina unai lalohadai ita abia neganai, Iehova ia ura ia abia dae taudia be reana do ita dadaraia.
2 Taunimanima Hahemaoro Henia Kava Lasi: Iehova be taunimanima ia inai henia kava lasi eiava edia toana ia laloa lasi, to edia lalona ia itaia. (1 Sam. 16:7) Danu, idia karaia diba gaudia ia itaia. Unai dainai, Dirava ia laloa idia ura ia idia hamoalea taudia be kohu namodia bamona. (Hag. 2:7) Vadaeni, ita ese ma haida ita laloa dalana be Dirava ese ia lalodia bamona, a?
3 Haroro dekenai ita davaria taudia haida edia toana dainai reana ita gari diba. Reana hemataurai lasi dabua eiava dabua mirodia idia hahedokilaia, eiava edia huina ia lata, eiava edia toana be rasta bamona. Ma haida be ita idia kara auka henia. Reana ita ura lasi nao taudia ita haroro henia, badina ita gari eiava ita laloa idia be iseda hereva do idia kamonai lasi. Unai bamona taudia ita hahemaoro henia kava lasi, ita gwau lasi idia be Iehova tomadiho henia taudia ai do idia lao lasi; to lalohadai maorona ita abia be namo, “badina be ita danu gunaguna ita be mai kavakava, mai kamonai lasi, bona mai kerere danu.” (Tito 3:3) Unai dainai, ita ura taunimanima ibounai ita haroro henia, herevana edia toana be namo lasi.
4 Keristani Taudia Ginigunadia Edia Haheitalai: Iesu Keriso be nega ia atoa taunimanima ese idia ura henia lasi taudia ia durudia totona, herevana taunimanima idia gwau unai bamona taudia be Dirava tomadiho henia taudia ai idia lao diba lasi. (Luka 8:26-39) Iesu be kara kereredia ia gwauraia namo lasi, to ia diba taunimanima be mauri dala kereredia idia badinaia diba. (Luka 7:37, 38, 44-48) Unai dainai, ia hahedinaraia idia ia laloa bada, “ia bogahisihisi idia dekenai, badina idia be mamoe hegeregere, bona naria tauna lasi.” (Mar. 6:34) Iena haheitalai ita tohotohoa diba, a?
5 Aposetolo Paulo be nadi amo idia hodoa, idia botaia, bona dibura ruma ai idia atoa. (Kara 14:19; 16:22, 23) To Paulo be unai kara ia lalohisihisilaia bona ia gwau bese haida dekenai ena nega ia halusia kava, a? Lasi. Ia diba bese haida huanai kudou-maoro taudia ia davaria diba, bona ena lalona ia hadaia unai bamona taudia do ia tahua totona. Iseda teritori ai idia noho taudia edia kastom bona mauri daladia danu be idauidau, to idia ita laloa dalana be Paulo ena bamona, a?
6 Ma Haida Welkam Henia Hari: Dirava ena taunimanima momo idia moale badina toana idia laloa lasi tadikaka bona taihu ese idia be kongrigeisen dekenai idia welkam henidia. Tau ta ena besoso bona kwarana huina be lata herea, bona dabua mirodia ia karaia be Germany ena Kingdom Hall ta dekenai ia vareai. Ena mauri sivaraina be dika. To, hebou dekenai tadikaka ese ia idia welkam henia. Ia be unai kara ia hoalaia dainai, wiki ta murinai ma ia giroa lou. Unai nega kwadogi lalonai, ia ese ena toana ia hanamoa, kuku ia rakatania, bona ena kekeni ida edia headava idia rejista. Gabeai, ia, ena adavana, bona edia natudia be Iehova idia hesiai henia hebou.
7 Namona be toana ia laloa lasi Diravana ena kara ita tohotohoa, bona taunimanima ibounai ita boiria Iehova ena hariharibada karana ena namo idia abia totona.
[Study Questions]
1. Dirava ese ita ia abia dae totona, dahaka ita karaia be namo?
2, 3. Ma haida be edia toana dainai ita hahemaoro henidia kava lasi totona, ita ia durua diba gauna be dahaka?
4, 5. Iesu bona Paulo edia haheitalai amo dahaka ita dibaia?
6. Kongrigeisen heboudia dekenai kamonai taudia be edena bamona ita kara henidia diba?
7. Toana ia laloa lasi Diravana be edena bamona ita tohotohoa diba?
[Blurb on page 3]
“Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.”—Kara 10:34, 35.