Duahia Taudia edia Henanadai

◼ Mataio 7:​13, 14 bona Luka 13:24 edia hereva dainai ita gwau diba toreisi lou ena nega lalonai danu taunimanima momo herea be tomadiho korikorina do idia dadaraia, a?

Lasi, unai siri be unai lalohadai idia hamomokania lasi. To unai siri edia anina bada be guba Basileia dekenai mauri abia karana idia gwauraia.

Iesu ena hereva Mataio 7:​13, 14 lalonai be ena Haroro Ororo dekenai ia harorolaia herevana ta. Ia gwau: “Iduara maragina dekenai do umui raka vareai. Badina be lahi gabuna [Gehena] ia lao dalana ena iduara ia bada bona ena dala danu bada herea. Bona taunimanima momo herea be unai dala dekenai idia raka vareai. To mauri gabuna ia lao dalana ena iduara ia maragimaragi, bona ena dala be ia auka. Unai dala idia davaria taudia be momo lasi.”

Unai nega lalonai Iesu ia harorolaia hereva momo edia anina be guba Basileia dekenai. Hegeregere, ena hereva hamatamaia dekenai, ia gwau: “Idia diba lauma gaudia idia tahua be namo taudia idia moale, badina idia diba Guba Basileia be idia edia.” (Mataio 5:​3, NW ) Ia gwau edia kudouna idia maoro taudia be “Dirava do idia itaia” bona “Guba Basileia be idia edia.” (Mataio 5:​8, 10) Unai haroro lalonai ena hereva ma ta dekenai Iesu be mase ia lao henia dala badana bona mauri ia lao henia dala maragina ia herevalaidia. Ma ia gwau: “ ‘Lohiabada e, Lohiabada e,’ [idia gwauraia] taudia momo be Guba Basileia lalonai do idia raka vareai lasi. To lauegu Tamana guba dekenai ia noho ena ura idia karaia taudia, idia sibona do idia vareai.”​—Mataio 7:​13, 14, 21.

Luka 13:24 ena hereva ena anina be unai bamona danu, unai karoa ibounai ena sivarai ese unai ia hamomokania. Iesu ese “Guba Basileia” ena haheitalai rua edia sivarai ia gwauraidia. Gabeai, idia henanadai ia dekenai, idia gwau: “Lohiabada e, mauri do idia abia taudia be momo, o haida sibona, a?” Iesu ia haere, ia gwau “Do umui raka goada, iduara maragimaragi dekena amo do umui raka vareai. Badina be lau hamaoroa umui dekenai, taunimanima momo do idia ura raka vareai, to idia be hegeregere lasi.” Iduara ia koua bona ia lokaia murinai “taunimanima momo” be idia noinoi do idia vareai totona. Idia be “dika karaia noho taudia,” unai dainai idia hegeregere lasi “Aberahamo bona Isako bona Iakobo bona peroveta taudia ibounai do [idia] itaia, Dirava ena Basileia lalonai.” Unai “taunimanima momo” idia laloa “Dirava ena Basileia” dekenai do idia vareai guna, to lasi, idia be gabeai idia mai. Reana unai anina be do idia vareai lasi.​—Luka 13:​18-30.

Unai karoa ibounai ena hereva ese ia hahedinaraia Iesu be Dirava ena guba Basileia vareai dalana ia gwauraia. Unai nega lalonai Iuda gunalaia taudia be nega daudau dagi badana idia abia vadaeni, bona mai edia dala Dirava ena Hereva idia duahia. Idia laloa lauma dalana dekenai idia taga momokani bona idia laloa Dirava ena matana dekenai idia be kara maoromaoro taudia, to idia laloa hanua taudia be unai bamona lasi, unai dainai idia lalodia bada lasi. (Ioane 9:​24-34) To, Iesu ia gwau bema takisi gogoa taudia bona ariara hahine be iena hereva idia abia dae bona edia kara dika amo idia helalo-kerehai neganai, idia be Dirava ena lalo-namo do idia abia diba.​—Mataio 21:​23-32; bona 16:​14-31 oi itaia danu.

Pentekoste 33 C.E. ai, guba dekenai vareai dalana ia kehoa neganai, bema hanua taudia be Iesu ena hahediba taudia ai idia lao, idia ia abia hidi diba lauma natudia ai do idia lao totona. (Heberu 10:​19, 20) Ena be taunimanima hutuma be Iesu ena hereva idia kamonai, to ia idia abia dae bona gabeai guba ena helaro idia abia taudia be momo lasi. To seri maragi taudia be lauma helaga amo idia horoa bona davana namona idia abia, be hegeregere guba dekenai Iakobo be Iehova (Aberahamo Badana) bona ena Natuna (Isako ia laulaulaia tauna) ida pata dekenai idia hekure neganai. Unai gau namona abia totona idia goada karaia be gau badana, to Iesu ena hereva idia kamonai taudia momo be idia ura lasi idia hekwarahi unai gau namona idia abia totona.

Unai sivarai rua ia gwauraia karoa ena hereva ibounai amo ia hedinarai Iesu ese (mauri ia lao henia dalana be maragi bona taunimanima momo lasi ia dekenai idia raka hahemauri do idia abia totona) ia gwauraia neganai, unai ena anina be Ia ese guba mauri ena helaro ia gwauraia bona unai taudia be Dirava ia abidia dae be gau badana. Ena be taunimanima momo be hereva momokani ena sivarai idia kamonai bona idia diba dahaka do idia karaia, to idia momo lasi ese idia abia dae bona idia abidadama henia.​—Mataio 22:14; 24:13; Ioane 6:​60-66.

Hari inai nega lalonai danu, ena be taunimanima be Bible ibounai idia abia diba, bona ia lalonai dina dokona ia perovetalaia herevadia idia guguru vadaeni, to idia momo be Keristen ena sivarai namona idia abia dae lasi bona Iehova ena hesiai gaukara idia karaia noho lasi. Unai be Iesu ia gwauraia tano idauidau ena parabole hegeregerena. Ia gwau haida be “Basileia ena sivarai” idia kamonai, to Satana ese idia hadoa gaudia do ia kokia. Ma haida be mai moale danu hereva idia abia dae, to gabeai hedibagani eiava dagedage idia mai dainai do idia moru. Bona ma haida edia abidadama kara do idia haboioa badina inai “tanobada ena laloa metau idauidau bona kohu ura henia dikadika ese Dirava ena hereva idia koua.”​—Mataio 13:​18-23.

Ita diba momokani Hahemaoro Dinana lalonai taunimanima edia kara do idia idau idia milion milion momo be idia toreisi lou neganai. Unai nega lalonai Satana be do ia noho lasi bona ia ese edia kudouna dekenai do idia hadoa hereva momokani ena uhena ia kokia diba lasi. Hari inai tanobada dikana ena dagedage karadia bona laloa metau gaudia do idia hekwarahilaidia lasi. To kara maoromaoro ena nega lalonai do idia hadibaia, Dirava ese ia havaraia hoa karadia ibounai do idia itaia, hegeregere mase taudia edia toreisi lou bona bese hanamoa karana do idia itaia danu. Momokani, reana idia haida be do idia ura lasi idia kamonai. (Ioane 11:​45-53 oi itaia danu.) To reana idia momo herea be hereva momokani ena anina do idia diba, do idia abia dae, bona hahemauri do idia abia.