Kahirakahira Tanobada Matamatana Do Ia Mai!

INAI tanobada ena hekwakwanai hanaia dalana dekenai taunimanima edia lalohadai be momo herea. Taunimanima momo idia gwau namona be taunimanima idia laloa heheni bona idia gaukara hebou, bona tanobada ibounai lalonai bese idauidau iboudiai be mai edia goada ida idia gaukara hebou. Haida idia laloa gau momo idia dika idia lao neganai, unai ese tanobada besedia do ia doridia, idia gaukara hebou totona bona gau badadia idia tahua guna bona idia naria namonamo diba tanobada matamatana idia havaraia totona. Idia laloa gavamani ese edia tuari gaudia hoia bona naria totona idia negea monidia do idia hamaragia momokani bona unai moni do idia gaukaralaia tanobada hadikaia karana idia koua totona. Bona State of the World 1990 ripoti lalonai ia gwau idia laloa “reana gavamani ese sibona edia tuari gaudia hoia bona naria totona moni momo do idia negea lasi, to idau, U.N. ena tuari oreana dekenai idia tabekau; unai orea idia hagoadaia bona idia habadaia vadaeni, bona ena siahu do ia hegeregere, U.N. memba besedia ta ta iboudiai do ia naria, ma bese ta ese ia dagedage henia neganai.”

To unai palani ese taunimanima idia ura henia dikadika gaudia, inai magasin ena rau ginigunadia dekenai ai torea gaudia, ia havaraia diba lasi. Taunimanima edia palani ese tanobada taudia edia kara dika bona mataganigani idia kokia diba lasi; idau bese taudia dadaraia karana bona bese idauidau idia hepapahuahu karana idia haorea diba lasi; taunimanima bogaraginai lalokau korikorina idia havaraia diba lasi. Bona gorere bona mase edia dokona idia gwauhamatalaia diba lasi. Unai lalohadai ese kara dikadia kokia dalana bona tomadiho idauidau edia hepapahuahu bona inai heheni karana kokia dalana ia gwauraia lasi. Bona tano marere, abata bona unai bamona tanobada dekenai idia vara gaudia idia kokia diba lasi momokani. Bese ta abia isi karana ese hekwakwanai ia havaraia diba, to unai kara idia kokia lasi. Unai dainai mai lalohisihisi danu ita diba taunimanima ese iseda hekwakwanai hanaia dalana namona idia do davaria lasi.

To, hekwakwanai hanaia dalana ta ia noho! Ia “koikoi diba lasi” Diravana ese taunimanima idia ura dikadika gaudia iboudiai ia gwauhamatalaia vadaeni. (Tito 1:2) Ia diba namonamo dahaka idia karaia be namo, bona iena aonega, iena siahu bona iena diba idia hegeregere iena ura ia hagugurua totona.​—Apokalupo 7:12; 19:1.

Dirava ena gwauhamata be inai: “Nega sisina murinai, kara dika tauna do ia noho lasi; ena gabu do oi tahua, to do oi davaria lasi. To manau taudia ese tanobada do idia abia, bona maino bada dainai do idia moale dikadika.”​—Salamo 37:​10, 11.

Edena bamona unai do ia vara? Isaia 11:9 ia haere ia gwau: “Idia ese tau ta do idia hahisia lasi eiava gau ta do idia hadikaia lasi egu ororo helagana lalonai; badina be tanobada ibounai be Iehova diba maorona amo dohore ia honudae, davara ia honudae hegeregerena.” Oibe, taunimanima iboudiai be “Iehova diba maorona” dekenai do idia hadibaia; bona idia ura lasi unai diba idia badinaia taudia do idia noho diba lasi, ma haida edia maino idia hadikaia totona. Iseda tanobada hairaina do idia hadikaia noho lasi.

Salamo 46:​8, 9 lalonai ia gwau: “Iehova ena gaukara umui itaia. . . . Tuari ia hadokoa ela bona tanobada dokona.” (Mika 4:​3, 4 itaia danu.) Tanobada ibounai lalonai maino ia noho totona, gau badana be bese idauidau idia hepapahuahu heheni karana idia hadokoa. Bese iboudiai do idia gaukara hebou namonamo, badina tanobada lalonai gavamani tamona sibona do ia noho​—Dirava ena gavamani. Bona iena gavamani be Basileia ta, “nega ta ai do idia hadikaia ore diba lasi gauna.” (Daniel 2:44) Danu, iena King be ia toreisi lou vadaeni bona ia mase lou diba lasi tauna Iesu Keriso. Kara maoromaoro bona kara namo amo do ia lohia.​—Isaia 9:​6, 7; 32:1.

To vaia edia kara taunimanima idia kara dika dainai, bona hisihisi, gorere, lalohisihisi bona mase do idia noho dainai unai noho namona do idia hadikaia, a? Lasi, badina unai gau danu do idia ore. Apokalupo 21:4 lalonai ia gwau: “Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” Iesu ena boubou dainai taunimanima edia kara dika, idia vara neganai idia abia gauna, ena davana do idia abia lasi, bona tanobada taudia do idia goevadae lou. (Roma 6:23; Efeso 1:7) Bona tanobada ena siahu karadia ia havaraia Tauna ese unai kara ia biagudia namonamo diba bona dala ia koua taunimanima do idia hadikaia lasi totona.​—Salamo 148:​5-8; Isaia 30:30.

Taunimanima ese gau haida idia naria bona idia nihilaia sibona, to Dirava ese unai gaudia do ia havaraia. To edena negai? Bible ena peroveta herevana ia hahedinaraia tanobada besedia idia “badu dikadika” bona taunimanima ese “tanobada idia hadikaia” neganai, gau haida do idia haidaua. (Apokalupo 11:18) Tanobada gunana ena dina gabedia lalonai “metau dikadia momo” do idia vara​—unai dainai tanobada ena kara ia dika ia lao, harihari ita itaia hegeregerena. (2 Timoteo 3:​1-5, 13) Bona Iesu ia perovetalaia unai gau do idia itaia taudia ese Dirava ena gwauhamata edia guguru negana do idia itaia danu.​—Mataio 24:​3-14, 32-34.

Bible lalonai unai gwauhamata idia torea vadaeni, namona be nega oi atoa unai gwauhamata oi sekea totona. Badina diba momo taudia bona Dirava ese inai hereva idia abia dae: Hari be nega namona tanobada ia matamata totona!