Christmas—Ia be Iesu Abia Dae Dalana, A?
IDAU NEGAI idia naria Mesia, Hahemauri Tauna, ena vara dinana be moale bada herea dinana. Aneru ta ese mamoe naria Betelehem taudia ia hamaorodia, ia gwau: “Umui gari lasi, hereva namona lau mailaia vadaeni, taunimanima ibounai idia moale totona. Badina be hari inai dina, Davida ena hanua dekenai, umui emui Hamauria Tauna ia vara vadaeni, Keriso Lohiabada unai.” Bena aneru milion momo be nega tamona guba amo idia boiboi bada idia gwau: “Atai momokani dekenai Dirava do ita hanamoa, bona tanobada dekenai be maino, Dirava ia moale henidia taudia ese inai maino do idia abia.” (Luka 2:10-14) Reana, taunimanima haida idia gwau Keristen taudia ese aneru idia tohotohodia be namo, bona aneru ese idia karaia hegeregerena namona be idia moale Keriso be tanobada dekenai ia mai dainai.
Inai be nega ginigunana lasi Bible ia hahedinaraia aneru ese edia moale dainai ane idia abia. Dirava ese tanobada ia karaia matamaia neganai, “daba hisiudia idia boiboi hebou mai edia moale danu, Dirava ena natudia iboudiai idia boiboi, ia idia hanamoa bada.” (Iobu 38:4-7) Inai ia vara dinana be Bible lalonai idia torea lasi. (Genese 1:1, 14-18) Ena be unai be moale bada negana, to Keristen taudia idia gwau lasi aneru be unai neganai idia boiboi bada dainai tanobada havaraia karana be lagani ta ta iboudiai idia moalelaia be namo, bona idia gwau lasi unai nega idia moalelaia totona Dirava idia tomadiho henidia lasi taudia edia moale dinana ta idia abia dae.
To Christmas idia moalelaia taudia ese Iesu ena vara dinana dekenai unai bamona idia karaia. Encyclopedia buka kahirakahira iboudiai amo bema ta oi kehoa bona “Christmas” ena hereva henunai ena anina oi duahia, ia hahedinaraia Iesu ena vara dinana be ta ia diba lasi. Bible ese Iesu ena vara dinana ia hahedinaraia lasi.
“Tuari Kibi Bema Idia Hiriria Namonamo Lasi Neganai”
Korinto kongregesen idia raka namonamo lasi dainai ia durudia neganai, aposetolo Paulo ese ia torea, ia gwau: “Dirava be ia ura lasi hereva kava bona heai, ia be maino Diravana.” Unai karoa lalonai ma ia hereva ia gwau, “Tuari kibi bema idia hiriria namonamo lasi neganai, daika ese tuari totona do ia hegaegae?” (1 Korinto 14:8, 33) Vadaeni, bema gau ibounai ia karaia namonamo Diravana ia ura Keristen taudia ese iena Natuna ena vara dinana tanobada dekenai idia moalelaia, kara dika taudia do ia gaukaralaia dina ta idia abia hidi kava bona tomadiho koikoi karadia danu idia hakapua totona, a?
Bible ena haheitalai haida ita tahua neganai ita diba Iehova Dirava be unai bamona iena taunimanima ia kara henidia lasi. Israel taudia dekenai Mose ena Taravatu ia henia neganai, Dirava ese do idia moalelaia dinadia iboudiai ia hamaorodia bona edena bamona unai taravatu idia badinaia danu ia hamaorodia. (Esodo 23:14-17; Levitiko 23:34-43) Iesu Keriso ia hereva lasi iena vara dinana do ita laloatao, to ena hahediba taudia ia oda henidia dina ta do ia laloatao totona. Nisan 14, 33 C.E. ena “hanuaboi, ia idia samania neganai,” Iesu ese paraoa bona vine ranuna ia gaukaralaia neganai, unai dina laloatao karana ia havaraia. Inai oda ia henia: “Inai bamona do umui karaia, lau do umui laloa totona.” (1 Korinto 11:23, 24) Unai kibi regena ese Lohiabada ena Anibou laloatao dalana bona dinana ia hiriria maoro bona ita abia kerere diba lasi. To Christmas be edena bamona? Bible lalonai oda ia henia lasi Iesu ena vara dinana do ita laloatao, bona ia hereva lasi edena dina bona edena bamona do ita laloatao.
‘Taunimanima Veria Totona’
Tokyo Zion Dubuna ena haroro tauna ta ia gwau: “Oibe, lau diba Christmas be tomadiho koikoi karana amo ia vara, to bema dubu dekenai idia mai taudia ese Keristen karadia be December 25 dinanai idia laloatao bona Tau Badana Iesu Keriso ena hadibaia herevadia idia diba totona idia mai, vadaeni Christmas be Keristen tomadiho lalonai ita karaia be namo.” Taunimanima momo be unai bamona idia lalohadai. To, oi laloa unai bamona lalohadai kerere idia abia dae bona Keristen kara idia haidaua be maoro, a?
Haida idia gwau Paulo danu be ena hereva bona kara ia haidaua taunimanima edia lalona veria totona. Ia gwau: “Taunimanima ibounai edia hesiai mai guia danu tauna lau lao noho, momo herea do lau veria mauri totona . . . Iuda lasi taudia danu lau noho neganai, lau be Taravatu laloa lasi tauna bamona lau lao, unai Iuda lasi taudia do lau veria mauri totona. . . . Sivarai Namona dainai inai kara ibounai lau karaia, iena mauri namona lalonai hanamoa do lau abia totona.” (1 Korinto 9:19-23) Inai hereva ese ia hahedinaraia tomadiho koikoi karana ta ita abia dae be namo Idau Bese Taudia be Keristen tomadiho idia abia dae totona, a?
Paulo be unai hereva danu ia gwauraia gaudia oi laloa namonamo. 1Ko 9Siri 21 dekenai ia hereva, ia gwau: “Dirava ena Taravatu lau utua lasi, badina be Keriso ena Taravatu lau badinaia noho.” Unai ia hahedinaraia, Keriso ena Taravatu idia utua lasi gaudia dekenai ena kara ia haidaua, to bema idia be Keristen taravatudia idia makohia lasi neganai, ‘Iuda lasi taudia bamona ia noho,’ edia kastom bona edia kara ia matauraidia.a
Unai oi laloa bona mani inai oi laloa danu: Bema tomadiho koikoi edia aria be “Keristen” tomadiho danu idia hakapua bona Christmas ena ladana idia henia, inai Bible taravatu ita duahia neganai unai kara be edena bamona: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? . . . Abidadama tauna bona abidadama lasi tauna ruaosi be idia hegeregere diba, a? . . . [Iehova ia hereva, ia gwau] ‘Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri. Vadaeni umui do lau abia dae.’ ” (2 Korinto 6:14-17) Ena be badina momo idia henia, to Keristen tomadiho be tomadiho koikoi edia aria danu idia hakapua be dala maorona lasi Hahemauri Tauna Iesu abia dae totona. Ia be maoro lasi Iesu be tanobada ai ia mai neganai, hari ia maoro lasi bona gabeai do ia maoro lasi, Iesu be King ai ia mai neganai Iehova ena kota karana do ia karaia totona. (Apokalupo 19:11-16) Momokani, tomadiho koikoi edia aria idia moalelaia taudia bona unai idia gwauraia “Keristen” karana, ese Iesu Keriso idia dadaraia reana.
“Hehuni Keristen Taudia” Idia Namo Lou Lasi
Japan dekenai, shogun lohia taudia edia nega lalonai, Katolik taudia dekenai ia vara gauna amo diba oi abia. Lagani 1614 lalonai, Japan dekenai Katolik dubu dagedage henia karana ia hamatamaia neganai, Japan ena Katolik taudia 300,000 edia dala be toi: edia tomadiho dainai do idia mase, eiava edia tomadiho karana do idia rakatania, eiava hehuni dalana ai edia tomadiho do idia badinaia noho. Hehuni dalanai edia tomadiho idia badinaia noho taudia idia gwauraia hehuni Keristen taudia. Edia tomadiho karadia idia hunia totona idia ese Buddhist bona Shinto tomadihodia edia kastom idauidau idia abia dae. Edia tomadiho guriguri idia karaia neganai, Maria Kannon idia gaukaralaia; ia be Maria, to Buddhist kaivakuku ta bamona idia karaia bona ena toana be natuna maragina ia rosia. Edia aria idauidau be Buddhist, Katolik bona unai tano edia sene taudia edia tomadiho karadia amo idia abia. Bema Buddhist edia mase hebouna ta dekenai idia lao, idia ese Keristen guriguri idia gwauraidia bona modoshi idia karaia, Buddhist edia tomadiho karana be anina lasi ai idia halaoa totona. Dahaka ia vara unai “Keristen” taudia dekenai?
The Hidden Christians bukana ia gwau: “Kirishitan [Keristen] taudia momo idia laloa Shinto bona Buddhist diravadia idia ura henidia karana ia bada bona unai dainai idia be unai diravadia idia rakatanidia be auka.” Unai dubu koua karana ia ore bona Katolik misinari taudia be Japan dekenai idia giroa neganai, unai “hehuni Keristen taudia” momo be unai tomadiho daladia rua hakapua tamona karana idia dogoatao noho.
To ia maoro Katolik Dubu be unai “hehuni Keristen taudia” idia samanidia badina idia ura lasi Roman Katolik tomadiho dekenai idia giroa lou dainai, a? Katolik Dubu danu be unai bamona Dirava idia diba lasi taudia edia hahediba hereva bona aria, Christmas danu, idia abia dae. Bema Katolik taudia bona Protestant taudia, ena be sibodia idia gwauraia Keristen taudia, be “Keristen” dalana idia hadikaia badina Dirava idia diba lasi taudia edia sene aria idia abia dae dainai, reana idia be Iesu Keriso idia dadaraia vadaeni, ani?
Keristen Dala Momokanina ai Idia Giroa
Setsuko, lagani 36 lalonai ia be Katolik tomadiho dekenai ia goada tauna, be unai lalo-parara ia davaria. Tanobada Ibounai Tuarina Iharuana murinai, ia be Katolik dubu ida ia gaukara hebou bona iena ura gaudia lauma dalana dekenai ia tahua. Iena dubu ena lalonai bona ena murimurina ai mai hairai Christmas audia ia itaia neganai, ia laloa, ‘Lalona ia hamoalea gauna!’ Ia gwau: “Aiemai hahairaia gaudia namodia dainai lau hekokoroku, idia be kahirakahira ai idia noho ma dubu haida edia hairai gaudia idia hereaia.” Ena be nega sisina lalonai ia be Sunday school dekenai ia hadibaia, to Setsuko be Katolik hahediba dekenai ia diba namonamo lasi. Unai dainai, ia ura ma dubu gaukara ia karaia neganai, iena pris tauna dekenai henanadai haida ia henia. Iena henanadai edia haere ia henidia lasi, to pris tauna ese ia hevasehalaia. Setsuko ia lalohisihisi, bena ia sibona be Bible ia stadilaia. Wiki rua murinai, Iehova ena Witness taudia ese idia vadivadi henia, bona Bible stadi ia hamatamaia.
Ia gwau: “Bible ena hereva momokani ese lauegu lalohadai gunadia tomadiho dekenai ia hanaia neganai, lau lalohisihisi. Lau be alopecia neurotica gorerena lau abia; unai gorere be lalohisihisi dainai huina ia boio. To sisina sisina, hereva momokani ena diari be lauegu kudouna ia hadiaria. Lau idia hadibaia Iesu be December ena keru bona medu negana ai ia vara diba lasi, unai neganai mamoe naria taudia be hanuaboi ai ororo dekenai edia mamoe idia naridia lasi dainai. Unai negai, lau hoa bada herea. (Luka 2:8-12) Lauegu lalohadai Iesu ena vara dekenai ia kokia, badina guna ai be mamoe bona mamoe naria taudia edia noho keru neganai sinou lalonai ai haheitalaia totona, ai be cotton wool ai gaukaralaia.
Bible ese ia hadibaia herevadia be ia sibona dekenai ia hamomokania murinai, Setsuko ia laloa Christmas do ia moalelaia noho lasi. Hari ia be lagani tamona lalonai nega tamona ai “Christmas moalena” ia hahedinaraia lasi, to ia be dina ta ta iboudiai lalonai Keristen moalena ena henia karana ia hahedinaraia.
Bema Keriso oi abia dae momokani, oi badu lasi Dirava idia diba lasi taudia be Christmas idia hadikaia karana oi itaia neganai. Idia be ena havaraia karana idia karaia lou sibona—ia be Dirava idia diba lasi taudia edia aria sibona. Christmas ese taunimanima ia hakaudia lasi Iesu Keriso idia abia dae totona; matana amo ita itaia lasi to hari ia giroa mai vadaeni bona ia be guba ena King. (Mataio, karoa 24 bona 25; Mareko, karoa 13; Luka, karoa 21) To, Keristen momokanidia be lagani ena dina ta ta iboudiai Keriso ena kara idia hahedinaraia, bona idia be Basileia ena sivarai namona idia harorolaia, Iesu be unai Basileia ena King ai ia lao vadaeni. Unai dala dekenai Dirava ia ura ita abia dae Iesu Keriso be iseda Hahemauri Tauna bona Basileia ena King.—Salamo 2:6-12.
[Footnotes]
a Paulo ena hereva rua peritome dekenai oi hahegeregeredia. Ena be ia diba “kopina utua o utua lasi be anina lasi,” to ia ida ia laolao tauna Timoteo, ena sinana be Iuda hahine ta, ia peritomea. (1 Korinto 7:19; Kara 16:3) To aposetolo Paulo ese Tito ia peritomea lasi badina Iuda edia kara idia abia isi momo taudia ida ia hepapahuahu bona ia ura lasi edia hereva dekenai idia kwalimu. (Galatia 2:3) Tito be Greek tauna bona ia be Timoteo bamona lasi; Timoteo be mai ena badina ta peritome ia abia totona. Tito be Idau Bese Tauna dainai bema peritome ia abia neganai, ‘Keriso ena gaukara ia dainai be anina lasi.’—Galatia 5:2-4.
[Picture on page 7]
Keristen momokanidia be lagani ena dina ta ta iboudiai Iesu idia matauraia