Christmas—Dahaka Dainai Japan Dekenai Momo Idia Ura Henia?

NATUDIA maragidia Buddhist-Shinto tomadiho idia badinaia tanona Japan dekenai ese Fada Christmas idia abia dae. Lagani 1989 ai, Japan natudia maragidia ese leta ibounai 160,000 idia siaia lao Santa World Sweden dekenai. Ma tano ta be unai bamona ia karaia lasi. Edia kudouna lalonai idia ura abia gaudia idia torea, hegeregere maragidia edia gadara kompiuta ladana “Graphic Computer” davana 18,000-yen (K136) eiava oi huaia loaloa diba video gadara gauna, davana be 12,500-yen (K95).

Japan kekeni matamatadia be Christmas ia mai lasi neganai, unai adorahi ai edia mero danu idia loaloa be mai anina bada idia dekenai. Niuspepa ta ladana Mainichi Daily News ia gwau, “Kekeni matamata dekediai henanadai haida idia henia neganai, 100 100 amo 38 38 idia haere idia gwau idia ese unai adorahi dekenai idia karaia gaudia be hua ta bamona lalonai idia hegaegaelaia guna.” Memero matamatadia edia ura be idau edia kekeni danu unai adorahi dekenai idia loaloa hebou neganai. Magasin ta ese memero matamatadia ia sisiba henidia ia gwau: “Lalohadai namona ta be emu kekeni ida umui guriguri hebou, gabu namona ta dekenai. Vadaeni, emui turana karana be haraga do ia namo ia lao bena do ia ura umui mahuta hebou.”

Japan headava tataudia be gaukara ia ore bona ruma dekenai idia lao neganai, Christmas cake idia hoia. Santa Claus ena kara idia karaia, hegeregere unai cake idia abia lao edia ruma bese dekenai. Idia laloa bema unai lagani lalonai ta ese iena ruma bese ia naria namonamo lasi, unai kara amo ena dika ia gwauatao.

Japan be Keristen tanona lasi, to Christmas ariana be Japan taudia ese idia abia dae momokani. Sitoa Badana ta ese stadi ta ia karaia neganai, ia davaria taunimanima 100 100 amo 78 78 be Christmas dainai, gau idauna ta idia karaia. Inai namba be bada bona ita hoalaia badina Japan dekenai taunimanima 100 100 amo tamona tamona sibona idia gwau idia be Keristen taudia. Ena be momo idia gwau idia be Buddhist eiava Shinto tomadiho idia badinaia to inai “Keristen” holide idia moalelaia. Shinto taudia edia Shinto Ise kalenda lalonai Japan taudia edia holide idauidau idia torea, bona December 25 idia torea “Keriso ena vara dinana.” To ita davaria, Christmas negana ai Keristen lasi taudia ese moale karadia idia goadalaia, bona unai dainai inai henanadai ia vara:

Christmas Dinana Moalelaia Karana be Daika Ena amo Ia Mai?

Hereva edia anina gwauraia hedinarai bukana ladana, Webster’s Ninth New Collegiate Dictionary ese Christmas be inai bamona ia gwauraia: “Keristen taudia edia aria December 25 dekenai . . . Keriso ena vara dinana ia hahelagaia.” Idia laloa unai neganai “Keristen taudia” be “nega tamona Keriso ena vara dinana idia moalelaia.”

Taunimanima momo be Christmas dinana ai moale karadia idia karaia, bona harihari gaudia idia henidia, to unai ese Christmas idia hahelagaia taudia ia habadudia bona reana idia laloa unai taunimanima ese Dirava ena ladana idia hadikaia. America tauna Japan dekenai ia noho, ia gwau: “Japan dekenai edia moni tahua goadagoada karana be idia hunia lasi, Keriso be lasi.” Ma tau ta ese Japan taudia edia Christmas aria karana dekenai ia gwau: “Nao taudia idia itaia Christmas kokoroku ia noho lasi, to unai be gau badana lasi, to ia noho lasi gauna ta be gau badana: Christmas ena anina be lasi.”

Vadaeni, Christmas ena anina momokani be dahaka? Ia be dubu ena Christmas anedia, holly raudia, kendolo, a? Momo ese unai gaudia idia gaukaralaia nega tamona sibona lagani ta lalonai, dubu dekenai idia lao dinana ai. Eiava Christmas ena anina be lalokau, moale, bona harihari gaudia henia karana unai, ese taunimanima ia veria hariharibada idia hahedinaraia totona? Eiava ia be tuari gabuna dekenai dina rua o toi lalonai tuari idia hadokoa bona tuari taudia ese “tanobada dekenai maino” ia vara dinana idia laloa lou totona, a?

Hoa gauna be inai Christmas kara ese maino ia havaraia lasi ruma bese lalonai. Lagani 1987 lalonai, England dekenai stadi ta idia karaia neganai idia davaria ruma bese 100 100 amo 70 70 lalodiai hepapahuahu idia vara diba unai lagani ena Christmas negana lalonai. Idia hepapahuahu ena badina badana ta be moni. Kekero muramura inua momo karana bona ta be ena ruma bese maduna ia huaia namonamo lasi dainai hepapahuahu momo idia vara bena heai ia vara danu.

Japan dekenai ia noho nao tauna ta ese ia hanai laganina ta ena Christmas dinana ai ena hanua ia vadivadi henia, ia gwau: “Lau daradara noho ita ese Christmas ena anina momokani ita reaia noho, eiava? December 25 ibounai, lau ura guna idia karaia Christmas aria karana lau karaia​—tomadiho koikoi dalana ai idia ese au idia tomadiho henidia bona pati dikadia idia karaia keru negana idia moalelaia totona. Ita be unai tomadiho koikoi edia kara iboudiai ita do dogoatao noho​—mistletoe, holly, fir audia bona ma gau haida danu​—to Keristen taudia ese Christmas karana idia henaoa bona tomadiho ariana ta ai idia halaoa bena ena anina idia haidaua vaitani.”

Christmas be tomadiho koikoi edia aria ta bona inai ita hunia diba lasi. Buka ta ladana The World Book Encyclopedia ia gwau, Keristen ginigunadia ese Christmas aria idia karaia lasi, “badina idia gwau ta ena vara dinana matauraia karana be tomadiho koikoi ena kastom ta.” Tomadiho koikoi edia aria badadia Saturnalia ariana bona New Year eiava lagani matamata ariana amo pati dikadia bona harihari gaudia henia karadia idia abia.

Bema Christmas ariana be tomadiho koikoi ena aria ta, Keristen taudia momokani ese inai henanadai idia laloa be namo: Keristen taudia ese Christmas idia karaia be namo, eiava? Namona be Bible ita itaia, Iesu ena vara dinana moalelaia karana dekenai, dahaka ia hereva.

[Box on page 4]

Christmas Ariana Ena Vara Dalana

Ena be Christmas ena vara dinana momokani ena deit ia boio, to gau momo ese idia hahedinaraia sedira Roma dubu taudia ese Christmas karana ta idia karaia lagani 336 C.E. ia do mai lasi neganai. The New Encyclopœdia Britannica ia gwau, “December 25 ena deit idia atoa badina ia ura dina diravana ena vara dinana idia moalelaia ariana idia hunia.” Unai nega lalonai, tomadiho koikoi taudia ese Roma Saturnalia bona Celtic bona German edia keru negana edia vara dinadia edia aria idia karaia bona idia moale bona idia inuinu kekero momo. The New Caxton Encyclopedia ia gwau, “Dubu oreadia ese dala idia karaia haraga, unai aria be tomadiho karana ai idia halaodia.”