Basileia Umui Naria Noho Mai Moale Danu!
“Lohiabada dekenai do umui naria noho mai moale danu. Dika neganai do umui gini goada.”—ROMA 12:12.
1. Badina be dahaka Iehova ida ita hebamo dainai moale ita davaria diba, bona aposetolo Paulo ese Keristen taudia ia hagoadaia dahaka idia karaia totona?
“DIRAVA moalena.” (1 Timoteo 1:11, NW) Unai be Iehova ia gwauraia namonamo! Badina be dahaka? Badina iena gaukara ibounai dainai ia moale. Iehova be gau namodia bona moale idia havaraia gaudia iboudiai edia badina, unai dainai ia ese ia havaraia mauri taudia iboudiai be ia danu idia hebamo dainai idia moale diba. Unai dainai ia maoro aposetolo Paulo ese Keristen taudia ia hagoadaia Iehova Dirava idia diba dainai unai idia moalelaia be namo; namona be Ia ese ia havaraia gau iboudiai dainai idia moale, bona idia dekenai lalokau bona hebogahisi Ia hahedinaraia dainai idia moale. Paulo be ma ia torea, ia gwau: “Nega ibounai do umui moale, Lohiabada lalonai umui noho dainai. Ma lau gwau lou: do umui moale.”—Filipi 4:4; Salamo 104:31.
2. Dahaka helaro ese moale bada ia havaraia, bona Keristen taudia idia hagoadaia unai helaro dainai edena bamona idia karaia be namo?
2 Keristen taudia be Paulo ena sisiba idia badinaia, a? Oibe, idia badinaia! Iesu Keriso ena lauma tadikakadia be idia dekenai Dirava ese ia kehoa helaro hereadaena idia moalelaia. (Roma 8:19-21; Filipi 3:20, 21) Oibe, idia diba Keriso ida iena guba Basileia lalonai do idia gaukara hebou neganai, idia ese idia mauri noho taudia bona idia mase vadaeni taudia do idia durua, idia naria noho mauri hereadaena do idia abia totona. Oi diba do idia moale bada idia be ia danu pavapava bona hahelaga taudia edia gaukara do idia karaia neganai! (Apokalupo 20:6) Idia be abidadama taudia idia durudia idia goevadae idia lao neganai bona tanobada be Paradaiso ai idia halaoa lou gaukarana do idia biagua, do idia moale bada herea! Momokani, Dirava ena hesiai taudia iboudiai edia “abidadama ese mauri hanaihanai ia havaraia noho. Inai mauri hanaihanai be tanobada ia do karaia lasi neganai Dirava ese ia gwauhamatalaia. Bona Dirava be koikoi diba lasi.” (Tito 1:2) Unai helaro namona dainai, aposetolo Paulo ese Keristen taudia iboudiai ia hagoadaia, ia gwau: “Lohiabada dekenai do umui naria noho mai moale danu.”—Roma 12:12.a
Moale Korikorina—Kudou Ena Kara Ta
3, 4. (a) Unai hereva “moale karaia” ena anina be dahaka, bona nega hida Keristen taudia idia moale be namo? (b) Moale korikorina be dahaka, bona moale ena badina be dahaka?
3 “Oi moale” ena anina be moale ena mamina oi abia bona oi hahedinaraia; ita gwau diba lasi ena anina be oi moale kava hanaihanai. Bible lalonai Heberu bona Greek gadodia dekenai kara gwauraia herevadia (verb) “moale,” “moale hereadae,” bona “moale karaia” ese moale ena mamina hahedinaraia karana idia gwauraia. Keristen taudia idia hagoadaia “do umui moale,” “nega ibounai do umui moale.”—2 Korinto 13:11; 1 Tesalonika 5:16.
4 To edena dala ai hanaihanai ita moale diba? Ita moale diba badina moale korikori be kudou ena kara ta, lalona ese ia havaraia karana ta, lauma karana ta. (Deuteronomi 28:47; Hereva Lada-isidia 15:13; 17:22) Ia be Dirava ena lauma ena huahua ta, bona Paulo ia torea neganai, lalokau ia torea guna, bena maoromaoro moale ia torea. (Galatia 5:22) Ia be lalona ese ia havaraia karana ta dainai tauanina ena murimurinai idia noho gaudia ese idia havaraia diba lasi, iseda tadikaka danu ese idia havaraia diba lasi. To Dirava ena lauma helaga ese ia havaraia. Bona hereva momokani oi diba dainai, Basileia helarona oi abia dainai bona Iehova hamoalea karadia oi karaia dainai oi moale diba. Unai dainai, unai bamona moale be ita vara neganai ita abia lasi; ia be “mauri matamata” ena karana ta, unai kara iboudiai dainai Iesu Keriso ia idau.—Efeso 4:24; Kolose 3:10.
5. Edena negai bona edena dala ai moale toana ia hedinarai diba?
5 Ena be moale be kudou karana ta, to reana ia be nega ta ta taunimanima vairanai hahedinaraia karana ta. Nega ta ta tauanina ese ia hahedinaraia moale karadia be dahaka? Reana unai be vairana ena toana manauna eiava ta be ia moale dainai ia roho. (1 Hanua Pavapavadia 1:40; Luka 1:44; Kara 3:8; 6:15) Anina be idia herevahereva momo lasi taudia eiava edia vairana be kiri toana ia hahedinaraia hanaihanai lasi taudia idia moale lasi, a? Lasi! Moale korikori be herevahereva momo amo, eiava kiri amo, eiava vairana moalena toana amo ia hahedinaraia lasi. Moale be dala idauidau amo ia hedinarai. Kingdom Hall dekenai moale sibona dainai lasi, to iseda tadikaka ura henidia karana eiava lalokau henidia karana dainai idia ura ita idia bamoa.
6. Badina be dahaka Keristen taudia be nega ibounai idia moale diba ena be moale lasi negadia idia davaria?
6 Moale karana be hanaihanai Keristen ena lalona ai ia noho, ia be mauri matamatana ena karana ta iena kudouna dekenai. Unai dainai hanaihanai ita moale diba. Momokani, nega haida gau ta dainai ita lalo-hekwarahi, eiava hekwakwanai ita abia. To iseda kudou lalonai ita moale diba. Keristen ginigunadia haida be igui hesiai taudia, bona haida edia biagudia idia hamoaledia be mai hekwarahi. Unai bamona Keristen taudia be hanaihanai idia moale diba, a? Oibe, badina edia kudou lalonai Basileia idia naria noho bona moale ia noho.—Ioane 15:11; 16:24; 17:13.
7. (a) Iesu be hisihisi negana lalonai ita moale noho karana edena bamona ia herevalaia? (b) Dahaka ese ita ia durua hisihisi negana ai ita gini auka totona, bona unai dekenai daika ese haheitalai namo hereana ia karaia?
7 Aposetolo Paulo be “Lohiabada dekenai do umui naria noho mai moale danu” ia gwauraia murinai, ia gwau: “Dika neganai do umui gini goada.” (Roma 12:12) Danu, Iesu be hisihisi negana lalonai ita moale noho karana ia herevalaia, ia be Mataio 5:11, 12 ena hereva ia gwauraia neganai, ia gwau: “Bema . . . idia hadikaia umui, bona idia hisihisi henia umui, bona koikoi dikana idia gwauraia umui dekenai . . . umui danu namo. Umui moale bada momokani, badina be emui davana guba dekenai ia bada.” Iniseniai ai gwauraia moalena bona moale dainai roho karana be tauanina ena toana amo ia hedinarai be gau badana lasi; ena anina badana be lalona ai ia noho moalena momokani taunimanima ta ese ia abia badina Iehova bona Iesu Keriso ia hamoalea hisihisi negana lalonai ia gini auka noho dainai. (Kara 5:41) Momokani, hisihisi negana lalonai moale ese ita ia durua ita gini auka totona. (1 Tesalonika 1:6) Inai kara dekenai, Iesu be haheitalai hereadaena ia hahedinaraia. Bible be ita ia hadibaia, ia gwau: “Ia diba guba ena moale be ia vairanai ia noho dainai ia ese satauro ena hemarai bona ena mase ia laloa lasi.”—Heberu 12:2.
Ena be Hekwakwanai Idia Noho to Helaro Dekenai Oi Moale Noho
8. Keristen taudia be reana dahaka hekwakwanai idia davaria, to dahaka dainai hekwakwanai ese Keristen moalena ia kokia lasi?
8 Ena be ta be Iehova ena hesiai tauna to hekwakwanai do idia noho. Reana hekwakwanai be ruma bese dainai, moni gaukaralaia dalana dainai, gorere dainai, eiava lalokau taudia idia mase dainai idia vara. Ena be reana unai gaudia ese lalohisihisi idia havaraia, to iseda moale Basileia helarona dekenai, iseda kudouna lalonai ia noho moalena, ena badina idia kokia diba lasi.—1 Tesalonika 4:13.
9. Abraham be dahaka hekwakwanai ia davaria, bona edena dala ai ita diba iena kudou lalonai moale ia noho?
9 Abraham ena haheitalai oi laloa. Nega haida iena mauri ia moalelaia lasi. Iena ruma bese be mai edia hekwakanai. Iena hahine, Hagara, bona iena adavana korikorina, Sara, idia noho hebou namo lasi. Idia hepapahuahu. (Genese 16:4, 5) Ismaela ese Isako ia hevasehalaia bona unai amo ia dagedage henia. (Genese 21:8, 9; Galatia 4:29) Bena, Abraham ena lalokau adavana, Sara, ia mase. (Genese 23:2) Ena be unai hekwakwanai ia davaria, to Abraham be Basileia Garana, Abraham ena Garana, ia dainai tanobada besedia iboudiai be sibodia do idia hanamoa, ena helaro dainai ia moale. (Genese 22:15-18) Mai ena kudou-moale ida, ia be lagani 100 lalonai iena hanua Uru ia rakatania murinai, Iehova ena hesiai gaukara ia karaia noho. Unai dainai, iena sivarai idia torea inai bamona: “Nega ibounai [Abraham] ese hanua badana ta ia naria noho. Unai hanua be mai ena nadi badina aukana bona mai goadana. Unai hanua be Dirava ese iena palani hegeregerena ia karaia, bona ia haginia danu.” Gabeai ia mai Mesia Basileiana dekenai Abraham ia abidadama henia dainai, Lohiabada Iesu be Dirava ese King ai do ia lao totona ia abia hidi vadaeni neganai, ia hereva diba, ia gwau: “[Abraham] be ia ura dikadika lauegu nega ia itaia, vadaeni ia itaia, mai moale danu.”—Heberu 11:10; Ioane 8:56.
10, 11. (a) Ita be Keristen taudia dainai, dahaka hekwarahi ita abia, bona dahaka ese ita ia hamauria? (b) Ita hegeregere lasi tauanina ena kara dika ita tuari henia totona, unai dainai dahaka ese ita ia durua?
10 Ita be goevadae lasi taudia dainai, iseda kara dika tauanina dainai ita hekwarahi danu, bona kara maorona totona ita hekwarahi dainai lalohisihisi ia havaraia diba. To ena be iseda manoka dainai ita hekwarahi ita gwau lasi anina be iseda helaro be lasi. Paulo be unai hekwarahi dainai ia lalohisihisi, ia gwau: “Lauegu tauanina ese lau ia hamasea noho, be daika ese lau do ia hamauria? Dirava lau tanikiu henia, ia ese lau ia hamauria, Iesu Keriso dekena amo.” (Roma 7:24, 25) Iesu Keriso ena amo bona ia ese ia henia boubouna dainai, ita be mauri ita abia.—Roma 5:19-21.
11 Keriso ena boubou davana dainai ita ia durua badina ita hegeregere lasi iseda kara dika ita tuari henia namonamo totona. Unai boubou dekenai ita moale diba badina lalona goevana ita abia diba bona iseda kerere gwauatao dalana ia kehoa. Heberu 9:14 dekenai, Paulo be “Keriso ena rarana” ia herevalaia, unai be mai ena siahu “iseda lalona do ia hagoevaia anina lasi boubou karadia dekena amo.” Unai dainai, namo lasi Keristen taudia be sibodia edia lalona idia samania dainai idia lalo-metau. Unai gau dainai bona ita abia helarona dainai, moale bada herea ia havaraia diba. (Salamo 103:8-14; Roma 8:1, 2, 32) Iseda helaro ita laloa dainai, ita ibounai be goada do ita abia kara dika ita tuari henia karana lalonai do ita kwalimu totona.
Nega Ibounai Iseda Helaro Ita Laloa
12. Horoa Keristen taudia be dahaka helaro idia laloa diba?
12 Gau badana be lauma ese ia horodia orena taudia bona mamoe idaudia be nega ibounai ‘hahemauri helarona’ idia laloa, bona kwarana naria gauna ta bamona idia karaia. (1 Tesalonika 5:8) Horoa Keristen taudia be guba dekenai mase diba lasi maurina ena dagi namona idia laloa diba, idia be Iehova Dirava dekenai idia lao diba, bona hairai ia abia tauna, Iesu Keriso, bona aposetolo taudia bona 144,000 taudia ma haida edia hebamo idia moalelaia diba, unai taudia be lagani sinahu momo lalodiai edia abidadama dekenai idia gini auka noho. Unai hebamo namo hereana dainai ena namo ita gwauraia totona ita hegeregere lasi!
13. Tanobada ai idia do noho horoa taudia be edia helaro edena bamona idia laloa?
13 Tanobada dekenai idia do noho horoa orena taudia be dahaka idia laloa edia Basileia helarona dekenai? Lagani 1913 ai bapatiso ia abia tauna ta, ladana F.W. Franz, Watch Tower Society ena presiden, ena hereva amo ita gwauraia diba, ia gwau: “Aiemai helaro be momokani do ai abia gauna, bona do ia guguru momokani seri maragi taudia 144,000 ta ta iboudiai dekenai, bona do ia guguru dalana be hari ita lalohadailaia diba lasi. Lagani 1914 lalonai ai noho orena taudia ai laloa unai lagani ai guba dekenai do ai daekau, bona ema bona hari ai be unai helaro ena anina ai laloaboio lasi. Inai helaro dainai ai goada noho guna ai goada hegeregerena, bona aiemai naria negana ia halataia noho lalonai, ena namo ai laloa bada noho. Ia be gau namona dainai ai naria be namo, ena be lagani milion milion do ai naria. Aiemai helaro be hari lau laloa bada, guna lau be unai bamona lau laloa bada lasi, bona lau ura lasi lauegu moale ia dekenai lau haboioa. Seri maragi ena helaro dainai ita diba mamoe idaudia hutuma bada herea taudia edia helaro be ita diba lasi dalana dekenai do ia guguru, bona do ia boio diba lasi. Unai dainai ita gini auka noho ema bona harihari, bona do ita gini auka noho ela bona Dirava ese ia hamomokania iena ‘gwauhamatalaia harihari gaudia namo hereadia’ be momokani.”—2 Petero 1:4; Numera 23:19; Roma 5:5.
Paradaiso Helarona Ita Moalelaia Hari
14. Hutuma bada herea be dahaka helaro idia laloa noho be namo?
14 Abidadama moalena be unai bamona idia herevalaia dainai mamoe idaudia hutuma bada be idia moale bada diba. (Apokalupo 7:15, 16) Unai bamona taudia be Aramagedono amo roho mauri helarona idia laloa noho be namo. Oibe, inai do idia vara gaudia idia naria noho be namo; Dirava ena Basileia ese Iehova Dirava ena lohiaia dalana gau iboudiai dekenai do ia hanamoa karana bona hisihisi badana do ia havaraia dalana amo iena ladana hairaina do ia hanamoa, unai kara amo kara dika taudia be tanobada amo do ia kokia oho, edia dirava be Diabolo. Unai hisihisi badana amo do idia roho mauri dainai moale bada herea do idia abia!—Daniel 2:44; Apokalupo 7:14.
15. (a) Iesu be tanobada dekenai ia noho neganai, dahaka gorere hanamoa gaukarana ia karaia, bona badina be dahaka? (b) Aramagedono amo do idia roho mauri taudia be dahaka idia abia be namo edia tauanina gorere dainai, bona edena dala ai idia be toreisi lou taudia amo idia idau?
15 Hutuma bada herea dainai, Apokalupo 7:17 ia gwau: “Mamoe ena Natuna . . . ese mauri ranuna, ia lohilohi gauna, dekenai idia do ia hakaua lao. Bona Dirava ese edia taitai ranu ibounai edia matana dekena amo do ia dahua ore.” Ena be lauma dalana dekenai unai peroveta hereva be hari ia guguru, to Aramagedono amo do idia roho mauri taudia be do idia itaia tauanina dalana dekenai do ia guguru. Edena dala ai? Iesu be tanobada ai ia noho neganai dahaka ia karaia? Ia ese aena dika taudia ia hanamodia, idia raka diba lasi taudia ia durudia idia raka totona, taia kudima taudia edia taiana bona matakepulu taudia edia matana ia kehoa, bona ia ese lepra gorerena, tauanina ia mase gorerena, bona ‘gorere idauidau iboudiai’ ia hanamodia. (Mataio 9:35; 15:30, 31) Hari inai negai Keristen taudia be unai idia abia be namo, ani? Hutuma bada herea be tanobada gunana amo idia abia goreredia bona manokadia be tanobada matamatana dekenai do idia abia vareai. Ita laloa Mamoe Natuna be dahaka do ia karaia do ia durudia totona? Aramagedono amo do idia roho mauri taudia ese do idia abia heduru be idau bona do idia toreisi lou taudia idia abia heduru be ma idau. Toreisi lou taudia be reana tauanina namodia bona goadadia dekenai do idia toreisi lou, to idia do goevadae lasi. Toreisi lou ena hoa karana dainai, idia be tauanina gunana ena gorere idauidau idia abia lou lasi. To, Aramagedono amo do idia roho mauri hutuma bada herea taudia momo be edia tauanina dikana dekenai idia roho mauri unai dainai hoa karana amo edia tauanina do idia hanamoa be namo. Iesu ese gorere hanamoa karadia ia karaia badina ia ura hutuma bada herea ia hagoadaia bena do idia roho mauri dainai idia moale sibona lasi to danu unai murinai edia gorere do ia haorea momokani dainai.
16. (a) Reana, edena negai Aramagedono amo do idia roho mauri taudia edia gorere be hoa dalana ai do idia namo, bona dahaka do ia vara? (b) Lagani 1,000 Negana lalonai dahaka helaro dekenai do ita moale noho?
16 Unai bamona gorere hanamoa hoa karadia be Aramagedono amo do idia roho mauri taudia dekenai do ia vara, Aramagedono ena nega sisina murinai bona toreisi lou ia do hamatamaia lasi neganai. (Isaia 33:24; 35:5, 6; Apokalupo 21:4; Mareko 5:24-29 itaia danu.) Unai neganai, taunimanima be matana galasi, raka durua itotohidia, wheelchair, isena koikoidia, taiana durua gaudia, bona unai bamona gaudia do idia negedia. Unai be moale havaraia gauna! Iesu Keriso be unai bamona ia hanamodia lou haraga dainai, unai be Aramagedono amo do idia roho mauri taudia edia gaukara do ia durua momokani badina idia be tanobada matamatana ena badina! Tauanina idia hadikaia goreredia do ia kokidia bena unai roho mauri taudia be do idia gaukara diba mai goada danu, bona idia vairanai Lagani 1,000 Negana lalonai do idia karaia gaukara namona do idia naria mai edia moale bada ida, bona tanobada gunana dekenai idia abia hisihisi gaudia ese do idia hadikaia noho lasi. Bona Lagani 1,000 Negana lalonai, do idia moale bada herea badina edia helaro be mauri goevadaena tanobada dekenai do idia abia vadaeni unai lagani 1,000 ena dokona ia mai neganai.
17. Paradaiso havaraia lou gaukarana do idia karaia noho lalonai, dahaka moale do idia noho?
17 Bema unai be oiemu helaro, tanobada be Paradaiso ai do idia halaoa lou ena gaukara ena moale oi laloa danu. (Luka 23:42, 43) Ita daradara lasi to ita diba Aramagedono amo do idia roho mauri taudia be tanobada hagoevaia karana do idia durua bona unai amo gabu namodia do idia hegaegaelaia unuseniai mase taudia do idia toreisi lou totona. Mase taudia guridia karana do idia karaia lasi to do idia toreisi lou taudia abia dae lou karadia do idia karaia, bona idia haida be iseda lalokau mase taudia. Bona gunaguna negadia amo abidadama tatau bona hahine ida do ita hebamo. Oi be daika oi ura momokani do oi hereva henia? Oi ura Abel, Enoka, Noa, Iobu, Abraham, Sara, Isako, Iakobo, Iosef, Mose, Iosua, Rahab, Debora, Samson, David, Elia, Elisaia, Ieremia, Esekiel, Daniel, eiava Ioane Bapatiso oi hereva henia, a? Unai helarona dekenai danu oi moale diba. Idia ida do oi herevahereva diba, idia dekena amo diba do oi abia diba, bona idia ida do oi gaukara hebou diba tanobada ibounai be paradaiso ai do umui halaoa totona.
18. Ma dahaka moale gaudia ita laloa diba?
18 Danu, oi laloa Iehova ese ia havaraia hegeregerena, aniani do ia namo, ranu do ia goeva, bona hodahoda do ia goeva, iseda tanobada kahana ibounai idia namo dainai. Unai neganai, mauri ena toana be goevadae tauanina moalelaia kava karana lasi, to mai goada ida taunimanima ese moale karadia do idia karaia diba. Oi laloa tanobada ibounai dekenai, taunimanima edia noho dalana dekenai taravatu utua karadia be lasi, hekokoroku be lasi, mama be lasi, hepapahuahu be lasi—to idia iboudiai be lalo-tamona oreana lalonai idia noho bona idia ibounai be lauma ena huahua idia habadaia bona idia hahedinaraia. Unai be moalelaia dikadika gauna!—Galatia 5:22, 23.
Helaro Dainai Mauri be Mai Anina
19. (a) Roma 12:12 dekenai ia herevalaia moalena be edena negai do ita abia? (b) Badina be dahaka iseda lalona ita hagoadaia be namo, mauri ena metau ese iseda helaro idia kokia garina?
19 Ita naria gauna ita abia neganai helaro be ia guguru vadaeni, unai dainai Roma 12:12 dekenai Paulo be ita ia hagoadaia ita abia moalena be hari ita abia gauna. (Roma 8:24) Dirava ena Basileia ese do ia havaraia hahenamo ita laloa neganai ita be hari unai helaro dekenai ita moale diba. Unai dainai oiemu lalona oi hagoadaia inai tanobada mirona lalonai idia noho mauri ena metau ese oiemu helaro namona idia kokia garina. Namo lasi oi hesiku bona gaukara oi rakatania, bena gabeai helarona oi laloaboio. (Heberu 12:3) Keristen dalana oi rakatania neganai oiemu hekwakwanai do idia ore lasi. Oi laloatao, bema hari ta be mauri ena metau dainai Dirava ena hesiai gaukara ia rakatania, unai metau be ia dekenai idia do noho, to iena helaro do ia haboioa bona iena dala be lasi gabeai mauri namona ia moalelaia totona.
20. Basileia helarona idia abia dae taudia dekenai dahaka ia vara, bona badina be dahaka?
20 Iehova ena taunimanima be mai badina momo edia mauri lalonai idia moale totona. Edia helaro ese idia ia hagoadaia dainai edia mauri be mai anina. Bona unai helaro moalena be idia sibona dekenai idia dogoatao lasi. Lasi, idia ura ma haida dekenai idia hadibaia. (2 Korinto 3:12) Unai dainai, Basileia idia naria noho taudia be lalo-goada taudia, bona dala idia tahua ma haida idia hagoadaia, unai dainai idia be Dirava ena sivarai namona idia harorolaia. Unai sivarai be idia abia dae taudia edia mauri dekenai taunimanima ese idia abia helaro namo hereana ia havaraia—unai helaro be Basileia be tanobada dekenai Paradaiso do ia havaraia lou. Bema taunimanima ese idia abia dae lasi, do ita moale noho badina ita dekenai unai helaro ia noho. Idia kamonai lasi taudia be gau namona idia reaia; to ita reaia lasi.—2 Korinto 4:3, 4.
21. Dahaka be kahirakahira do ia mai, bona edena bamona iseda helaro ita laloa be namo?
21 Dirava ena gwauhamata be inai: “Itaia! Harihari be gau ibounai lau karaia matamata inai.” (Apokalupo 21:5) Tanobada matamatana, mai ena hahenamo hairaidia bona idia doko lasi hahenamodia, be kahirakahira do ia mai. Iseda helaro—guba maurina eiava tanobada paradaisona dekenai ita mauri—be mai anina bada herea; oi dogoatao noho. Inai dina gabedia dikadia ai, namona be oi laloa ia be “lalona dogoatao gauna bamona. Ia be mauri gauna bona momokani gauna.” Iseda helaro be “noho hanaihanai nadina—idau negana amo Nadina,” Iehova, dekenai ia noho dainai, ita be mai badina goadana bona moalena hari ita vairanai ia noho ‘helarona dekenai ita moale totona.’—Heberu 6:19; Isaia 26:4.
[Footnotes]
a Lagani 1992 lalonai, tanobada ibounai dekenai Iehova ena Witness taudia edia lagani ena siri badana be inai: “Lohiabada dekenai do umui naria noho mai moale danu. . . . Guriguri do umui goadalaia nega ibounai.”—Roma 12:12.
Henanadai Haida
◻ Taunimanima ese dahaka gau badana idia naria noho?
◻ Moale korikorina be dahaka?
◻ Aramagedono amo do idia roho mauri taudia edia gorere be hoa dalanai idia ore be reana edena negai do ia vara?
◻ Badina be dahaka ia namo lasi mauri ena metau dainai iseda helaro ita negea?
◻ Tanobada matamatana dekenai dahaka moale gaudia totona oi naria noho?
[Picture on page 9]
Iesu ese ia karaia bamona gorere hanamoa karadia oi itaia dainai, oiemu kudou be do ia moale, ani?
[Picture on page 10]
Basileia helarona idia moalelaia taudia be ma haida idia hagoadaia unai helaro idia dekenai idia hadibaia neganai