Iehova Kahirakahira Ai Oi Noho

“Guriguri do umui goadalaia nega ibounai.”​—ROMA 12:12.

1. Guriguri karana dekenai Iehova ena ura be dahaka, bona aposetolo Paulo be guriguri karana dekenai dahaka hagoadaia herevana ia gwauraia?

IEHOVA be “helaro ia henia Diravana” iena abidadama taudia iboudiai dekenai. Ia be “Guriguri Ia Kamonai Henia Tauna” dainai, idia vairanai ia atoa helaro moalena idia abia totona heduru idia noia neganai, ia kamonai henidia. (Roma 15:​13, NW; Salamo 65:2) Bona Iena Hereva, Bible, ena amo ia ese iena hesiai taudia iboudiai ia hagoadaia idia ura neganai Ia dekenai idia mai. Nega ibounai ia noho, bona ia ura edia lalohadai iboudiai ia diba. Momokani, ia ese ia hagoadadia “guriguri do [idia] goadalaia nega ibounai” bona “nega ibounai do [idia] guriguri.”a (Roma 12:12; 1 Tesalonika 5:17) Iehova ena ura be Keristen taudia iboudiai be hanaihanai guriguri amo idia noinoi henia bona mai edia kudou ibounai danu idia hereva henia bona iena lalokau Natuna, Iesu Keriso, ena ladana ai idia karaia.​—Ioane 14:​6, 13, 14.

2, 3. (a) Badina be dahaka Dirava ese ita ia hagoadaia “guriguri [ita] goadalaia nega ibounai” totona? (b) Dahaka hereva dainai ita diba Dirava ia ura ia ita guriguri henia?

² Badina be dahaka Dirava be unai hagoadaia hereva ita dekenai ia henia? Badina mauri ena hekwarahi bona maduna ese ita idia hametaua momo dainai guriguri ita laloaboio diba. Eiava hekwakwanai be momo herea dainai reana helaro dekenai ita moale lasi bona guriguri karana ita hadokoa. Inai gaudia dainai, namona be ita ia hadibaia loulou bona unai ese ita ia hagoadaia ita guriguri, bona heduru bona hebogahisi ena badina, iseda Dirava Iehova, ena kahirakahira ai ita lao.

³ Hahediba tauna Iakobo ia torea, ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iakobo 4:8) Oibe, ena be ita be goevadae lasi taudia bona Dirava be atai momokanina, to ia daudau lasi bona ita do hereva hereva henia diba. (Kara 17:27) Ma danu, ia be iseda noho toana ia laloa. Salamo torea tauna ia gwau: “Iehova ese kara maoromaoro taudia ia itadia tao; edia taitai ia ese ia hakala henia.”​—Salamo 34:15; 1 Petero 3:12.

4. Iehova be guriguri dekenai ia kamonai karana be edena dala ai ita haheitalaia diba?

⁴ Iehova ia ura ita guriguri henia. Unai be taunimanima idia hebou bona idia herevahereva karana ida ita hahegeregerea diba. Oi noho bona ma haida edia herevahereva oi kamonai. Oi be edia herevahereva karana oi itaia. Bena ta be oi dekenai ia itaia, oiemu ladana ia gwauraia, bona oi dekenai ia hereva. Unai kara dainai oi ura kamonai henia. Unai hegeregerena, herevana edeseniai idia noho, to Dirava ese nega ibounai iena taunimanima ia lalodia. (2 Sisiga 16:9; Hereva Lada-isidia 15:3) Unai dainai, iseda hereva ia kamonai, hegeregerena ia be ita ia itaia mai ura bada bona ita ia naria. To, guriguri dekenai, Dirava ena ladana ita boiria neganai, ia ura bada ia kamonai, bona dala idauna dekenai ita ia raraia namonamo. Iena siahu karadia amo, Iehova be tau ta ena kudouna bona lalona ena anina momokani, uduna amo ia gwauraia lasi gauna, ia diba. Dirava be ita ia hadibaia idia be mai momokani dekenai iena ladana idia boiboi henia bona idia ura ia kahirakahira ai idia mai taudia dekenai do ia lao kahirakahira.​—Salamo 145:18.

Haere be Dirava Ena Ura Hegeregerena

5. (a) Inai sisiba, “guriguri do umui goadalaia nega ibounai,” ese dahaka ia hahedinaraia, ia be mai anina iseda guriguri karana dekenai? (b) Dirava be edena dala ai iseda guriguri ia haere henia?

⁵ Unai sisiba, guriguri goadalaia nega ibounai sisibana, ese ia hahedinaraia nega haida Iehova ia ura gau ta ita gurigurilaia nega sisina daudau lalonai ela bona iena haere ia henia. Reana gau ta be nega daudau lalonai ita gurigurilaia dainai, Dirava ena namo eiava lalokau hebogahisina ita noinoilaia karana do ita hesikulaia badina haere be ia mai haraga lasi. Unai dainai, Iehova Dirava ese ita ia hagoadaia ita hesiku lasi to ita guriguri noho. Iseda lalo-hekwarahi gaudia dainai ita noinoi henia noho be namo, bona namona be ita diba iseda guriguri ia matauraia bona ita laloa ita abia be namo gauna do ia henia lasi to ita ia durua momokani gauna do ia henia. Ita daradara lasi to ita diba Iehova Dirava be iseda noinoi be iena ura ida ia hahegeregerea. Haheitalai be iseda noinoi ese reana ma haida edia mauri ia haidaua diba. Reana unai be hegeregere tamana ta ena natuna ese baisikele abia totona ia noia. Tamana ia diba bema baisikele ia hoia unai natuna dekenai ia henia totona, iena natuna mero ma ta be baisikele ta do ia ura abia danu. Reana natuna ta ia maragi dainai ia hegeregere lasi baisikele ia abia totona, unai dainai tamana be unai negana ai baisikele ta ia hoia lasi. Unai hegeregerena, iena ura bona ia makaia negana ia laloa dainai, iseda guba Tamana ia diba dahaka be namo ita bona ma haida durua totona.​—Salamo 84:​8, 11; Habakuku 2:3 itaia danu.

6. Iesu be guriguri karana dekenai dahaka haheitalai hereva ia gwauraia, bona guriguri karana dekenai ita goada noho neganai dahaka ia hahedinaraia?

⁶ Iesu ese ia henia haheitalaina be mai anina. Iena hahediba taudia ia hamaorodia “nega ibounai do idia guriguri, do idia hesiku lasi totona.” Vabu ta be kota dekenai kota hereva namona ia abia lasi, to ia haheauka bona unai kota tauna dekenai ia noinoi loulou ela bona kota hereva maorona ia abia. Iesu be ma ia gwau: “Unai dainai, Dirava ese ia abia hidi taudia, . . . idia dekenai idia badu taudia edia davana do ia henia lasi, a? Do ia durudia haraga lasi, a?” (Luka 18:​1-7) Guriguri karana ita goadalaia noho neganai unai ese ia hahedinaraia ita be mai iseda abidadama ita hahedinaraia, Iehova dekenai ita tabekau, ita ura ia kahirakahira ai ita noho, bona ita noinoi henia neganai dahaka do ia vara be iena imana dekenai ita atoa unai kara do ia naria totona.​—Heberu 11:6.

Iehova Kahirakahira ai Idia Noho Taudia

7. Edena dala ai Iehova kahirakahira ai ita noho neganai, Abel ena abidadama ita tohotohoa diba?

⁷ Bible lalonai Dirava ena hesiai taudia ese idia gwauraia guriguri momo edia sivarai idia noho. Unai guriguri “be ita dekenai hadibaia totona idia torea, vadaeni do ita gini goada bona Dirava dekenai do ita naria mai haheauka danu.” (Roma 15:4) Iehova kahirakahira ai idia noho taudia edia haheitalai ita laloa neganai iseda helaro ia hagoadaia. Dirava ese Abel ena boubou ia abia dae, bona ena be iena guriguri ta idia torea lasi, to ita daradara lasi guriguri amo Iehova ia noia unai boubou ia abia dae totona. Heberu 11:4 ia gwau: “[Abel] ese Dirava ia abidadama henia, bona boubou gauna Dirava dekenai ia henia. Inai boubou gauna be namona, ia ese Kain ena boubou gauna ia hereaia. [Abel] ese Dirava ia abidadama henia, unai dainai Dirava ese kara maoromaoro tauna ia gwauraia.” Abel be Dirava ena gwauhamata Genese 3:15 dekenai ia diba, to unai neganai idia diba gaudia bona hari inai negai ita diba gaudia ita hahegeregerea neganai, iena diba be bada lasi. To, Abel be iena diba hegeregerena, kara ia karaia. Unai dainai, hari inai negai, Dirava ena hereva momokani idia kamonai matamata taudia haida edia diba be bada lasi, to idia guriguri bona idia diba gaudia idia gaukaralaia namonamo, Abel ese ia karaia hegeregerena. Oibe, abidadama dekenai idia karaia.

8. Badina be dahaka ita diba Abraham be Iehova kahirakahira ai ia noho, bona dahaka henanadai be ita sibona dekenai ita henia?

⁸ Dirava ena abidadama hesiai tauna ma ta be Abraham, “abidadama taudia iboudiai edia tamana.” (Roma 4:​11, NW) Hari inai negai, abidadama goada ita abia be namo, bona abidadama dekenai ita guriguri be namo, Abraham ese ia karaia bamona. Genese 12:8 ia gwau ia be boubou patana ia haginia bona ‘Iehova ena ladana dekenai ia boiboi.’ Abraham be Dirava ena ladana ia diba bona guriguri lalonai ia gwauraia. Nega momo mai ena momokani ida ia be guriguri dekenai ia goada noho, ia be ‘Iehova, ia noho hanaihanai Diravana, ena ladana’ dekenai ia boiboi. (Genese 13:4; 21:33) Abraham be taunimanima ese idia gwauraia momo badina abidadama amo Dirava ena ladana dekenai ia boiboi. (Heberu 11:​17-19) Guriguri ese Abraham ia durua Basileia helarona dekenai ia moale bada noho totona. Abraham ena haheitalai bamona, guriguri dekenai ita goada noho, a?

9. (a) Badina be dahaka David ena guriguri be hari inai nega lalonai Dirava ena taunimanima idia durudia? (b) Bema David bamona ita guriguri Iehova kahirakahira ai ita noho, reana dahaka do ia vara diba?

⁹ David be guriguri ia goadalaia karana dekenai ia goada bada, bona iena salamo toretoredia ese idia haheitalaia guriguri be edena bamona be namo. Hegeregere, Dirava ena hesiai taudia be inai gaudia totona idia guriguri diba: hahemauri o roho mauri abia totona (Salamo 3:​7, 8; 60:5), Dirava ia hakaudia totona (Salamo 25:​4, 5), ia naridia totona (Salamo 17:8), edia kara dika ia gwauatao totona (Salamo 25:​7, 11, 18), bona kudou goevana ia henidia totona (Salamo 51:10). David be hisihisi ia abia neganai, ia guriguri, ia gwau: “Emu hesiai tauna ena souli oi hamoalea.” (Salamo 86:4) Ita be kudou ena moale totona ita guriguri diba, bona ita diba Iehova ia ura iseda helaro dekenai ita moale. David be Iehova kahirakahira ai ia noho bona ia guriguri, ia gwau: “Lauegu souli be oi kahirakahira ai ia noho; oiemu imana idibana ese lau ia dogoatao namonamo.” (Salamo 63:8) David ese ia karaia bamona ita be Iehova kahirakahira ai do ita noho, a? Bema unai bamona ita karaia, ia be ita do ia abia isi danu.

10. Salamo torea tauna Asaf be nega ta dahaka lalohadai kereredia ia abia, to gabeai dahaka ia diba?

¹⁰ Iehova kahirakahira ai bema ita noho neganai, namona be kara dika taudia edia moale karadia bona kohu tahua momo mauri dalana dainai ita mama henidia lasi. Salamo torea tauna Asaf be nega ta ia laloa Iehova ena hesiai gaukara ia karaia be anina lasi badina kara dika taudia be “nega ibounai idia laga-ani.” To, ia diba iena lalohadai be kerere bona kara dika taudia be “tano ia marere gabuna ai idia raka.” Ia diba Iehova kahirakahira ai noho karana be hereadae, bona Dirava dekenai inai bamona ia hereva, ia gwau: “Lau be hanaihanai oi danu lau noho, oi ese egu imana idibana oi dogoatao. Badina be itaia! oi dekenamo idia noho daudau taudia do idia mase. . . . To lau be Dirava badinai lau noho be namo. Lohiabada Iehova be egu roho mauri gabuna ai lau halaoa vadaeni, emu kara iboudiai lau herevalaidia totona.” (Salamo 73:​12, 13, 18, 23, 27, 28) Kara dika taudia be helaro lasi taudia, bona edia moale karadia edia mauri dalana ai ita mamalaia be namo lasi, to namona be Asaf ita tohotohoa bona Iehova kahirakahira ai ita noho.

11. Badina be dahaka Iehova kahirakahira ai noho karana dekenai Daniel be haheitalai namona, bona edena dala ai ita tohotohoa diba?

¹¹ Ena be lohia taudia be guriguri karana idia taravatulaia bona Daniel ese ia kamonai henidia lasi dainai leona ena guri dekenai idia negea gwauraia, to ia be guriguri dekenai ia goada noho. Bena Iehova ese Daniel ia hamauria, “iena aneru ia siaia bona leona edia uduna ia koua.” (Daniel 6:​7-10, 22, 27) Daniel be guriguri dekenai ia goada noho dainai hahenamo momo ia abia. Iseda Basileia harorolaia gaukarana dekenai dagedage ita davaria neganai, ita be guriguri dekenai ita goada noho danu, a?

Iesu, Iseda Haheitalai

12. (a) Iena hesiai gaukara ia hamatamaia neganai, Iesu be guriguri karana dekenai dahaka haheitalai ia karaia, bona edena dala ai unai ese Keristen taudia ia durudia diba? (b) Iesu ena haheitalai guriguri lalonai dahaka ia hahedinaraia ia be mai anina guriguri karana dekenai?

¹² Iena tanobada hesiai gaukarana ena hamatamaia negana amo, Iesu ia guriguri. Ia bapatiso negana lalonai ia guriguri karana be haheitalai namona hari inai nega lalonai bapatiso idia abia taudia dekenai. (Luka 3:​21, 22) Dirava ena heduru totona ita guriguri diba ranu bapatiso ese ia laulaulaia gauna ita karaia totona. Iesu be ma haida ia durudia danu guriguri amo Iehova kahirakahira dekenai idia lao totona. Nega ta Iesu be gabu ta dekenai ia guriguri, bena gabeai, iena hahediba tauna ta ia hereva henia, ia gwau: “Lohiabada e, guriguri oi hadibaia ai dekenai.” Iesu be taunimanima momo ese idia gwauraia haheitalai guriguri ia hadibaia, bona ia gurigurilaia gaudia amo ia hahedinaraia namona be Dirava ena ladana bona ena ura ita gurigurilaia guna. (Luka 11:​1-4) Unai dainai, iseda guriguri lalonai namona be gau iboudiai ita hahegeregerea namonamo, ‘gau badadia’ do ita laloaboio lasi. (Filipi 1:​9, 10) Momokani, nega haida heduru bada ita abia be namo eiava hekwakwanai ta ita hanaia dalana ita tahua be gau badana. Iesu bamona, Keristen taudia be Dirava dekenai idia guriguri diba, goada ia henidia gaukara haida idia karaia totona eiava hekwakwanai haida eiava dika haida idia hanaia totona. (Mataio 26:​36-44) Momokani, ita sibona ita guriguri neganai, iseda mauri lalonai idia vara gaudia iboudiai ita gurigurilaidia diba.

13. Iesu be edena dala ai ia hahedinaraia ma haida totona ita guriguri be gau badana?

¹³ Iena haheitalai namona amo Iesu ia hahedinaraia ma haida totona ita guriguri be gau badana. Ia diba taunimanima be iena hahediba taudia do idia inai henia bona do idia dagedage henia, ia dekenai idia karaia vadaeni hegeregerena. (Ioane 15:​18-20; 1 Petero 5:9) Unai dainai, ia ese Dirava ia noia “Tau Dikana dekena amo idia do [ia] hamauria” totona. (Ioane 17:​9, 11, 15, 20) Bona Petro ena vairanai ia noho hetohona ia diba dainai, ia hamaoroa, ia gwau: “Lau guriguri vadaeni oi dekenai, emu abidadama do ia moru lasi totona.” (Luka 22:32) Bema iseda tadikaka totona guriguri dekenai ita goada noho neganai, ma haida ita lalodia bona ita sibona iseda hekwakwanai ita laloa lasi neganai, namo bada do ia havaraia!​—Filipi 2:4; Kolose 1:​9, 10.

14. Edena dala ai ita diba, iena tanobada hesiai gaukarana lalonai Iesu be Iehova kahirakahira momokani ai ia noho, bona edena dala ai ita tohotohoa diba?

¹⁴ Iena hesiai gaukara lalonai, Iesu be guriguri dekenai ia goada noho bona ia be Iehova kahirakahira momokani dekenai ia noho. (Heberu 5:​7-10) Kara 2:​25-28 dekenai aposetolo Petro be Salamo 16:8 ena hereva ia gwauraia bona ia gwau ia be mai anina Lohiabada Iesu Keriso dekenai. Ia gwau: “[David] be inai bamona Iesu ia herevalaia, ia gwau, ‘[Iehova] be nega ibounai lau vairana dekenai lau itaia. Badina be ia be lauegu idiba kahana dekenai, gau ta lau ia hamarerea lasi totona.’ ” Ita danu be unai bamona ita karaia diba. Ita guriguri diba Dirava be ita kahirakahira ai ia noho, bona ita hahedinaraia diba Iehova dekenai ita abidadama bema ia ita laloa hanaihanai. (Salamo 110:5; Isaia 41:​10, 13 itaia danu.) Bena ita be dika idauidau do ita koua, badina Iehova be ita do ia durua, bona do ita moru lasi.

15. (a) Guriguri dekenai ita goada noho neganai, dahaka kara ita laloaboio be namo lasi? (b) Iseda tanikiu henia karana dekenai namona be dahaka ita karaia lasi?

¹⁵ Namona be ita totona Iehova ese ia karaia gau namodia iboudiai ita laloaboio lasi, oibe, unai be “Dirava ena hariharibada namo herea momokani,” bona unai gau ta be iseda kara dika dainai iena Natuna ese ia henia boubou gauna. (2 Korinto 9:​14, 15; Mareko 10:45; Ioane 3:16; Roma 8:32; 1 Ioane 4:​9, 10) Momokani, Iesu ena ladana dekenai, “nega ibounai, gau ibounai ia henia dainai, Tamana Dirava do umui tanikiu henia.” (Efeso 5:​19, 20; Kolose 4:2; 1 Tesalonika 5:18) Namo lasi ita dekenai idia noho lasi gaudia eiava iseda hekwakwanai ita laloa momo dainai iseda tanikiu henia karana ita hadikaia.

Iehova Latanai Iseda Metau Ita Negea

16. Hekwakwanai ta ese ita ia hametaua neganai, dahaka ita karaia be namo?

¹⁶ Guriguri dekenai ita goada noho neganai, unai ese ia hahedinaraia Dirava ita badinaia momokani. Dirava ita noinoi henia neganai, haere be ia ena amo ia do mai lasi neganai, iseda mamina ia namo. Bema metau ta dainai ita lalo-hekwarahi, ita be Iehova kahirakahira ai ita noho diba bema inai sisiba ita badinaia: “Emu maduna be Iehova latanai oi tahoa kau, ia ese oi do ia abia isi.” (Salamo 55:22) Iseda metau ibounai​—lalo-metau, lalo-hekwarahi, lalohisihisi, gari, bona unai bamona gaudia​—be Dirava latanai ita negea neganai, bona ita abidadama henia momokani, ita be kudou ena maino ita abia diba, “Dirava ena maino ese taunimanima edia diba ia hanaia momokani.”​—Filipi 4:​4, 7; Salamo 68:19; Mareko 11:24; 1 Petero 5:7.

17. Edena dala ai Dirava ese ia henia mainona ita abia diba?

¹⁷ Unai maino Dirava ena amo be ita noia neganai maoromaoro do ita abia, a? Ena be reana heduru ita abia haraga diba, to Iesu be lauma helaga totona ita noinoi karana dekenai ia herevalaia dalana be inai gau dekenai danu ia momokani, ia gwau: “Do umui noinoi, do ia henia umui dekenai. Do umui tahua, do umui davaria. Do umui pidipidi, iduara do ia kehoa umui emui.” (Luka 11:​9-13) Lauma helaga be lalo-metau ita kokia dalana, unai dainai namona be Dirava ena maino abia totona bona iseda metau dainai ita ia durua totona ita noinoi karana dekenai ita goada noho. Ita diba bema guriguri dekenai ita goada noho, ita be kudou ena moale bona maino do ita davaria.

18. Bema ita diba lasi dahaka totona ita guriguri be namo, Iehova be dahaka ia karaia?

¹⁸ To bema ita diba lasi dahaka totona ita guriguri be namo, ita be edena bamona? Nega momo iseda lalona momokani dekenai ita hekwarahi bada gaudia ita gwauraidia lasi badina ita dekenai idia vara gaudia edia anina ita diba namonamo lasi, eiava ita diba lasi Iehova dekenai dahaka ita gwau be namo. Unai negai, lauma helaga be ita totona ia hereva diba. Paulo ia torea, ia gwau: “Lauma Helaga danu ia mai, ita goada lasi taudia ia durua noho. Ita be guriguri dala maorona ita diba lasi. Unai dainai Lauma Helaga ese ita totona ia noinoi Dirava dekenai, mai taitai bada danu. Iena noinoi herevadia be taunimanima idia gwauraia diba lasi gaudia.” (Roma 8:26) Edena bamona? Dirava ena Hereva lalonai be Dirava ese ia havaraia peroveta herevadia bona guriguri idia noho bona idia be mai anina iseda noho dekenai. Unai hereva dainai ita ia kamonai henia bamona. Ia karaia hegeregerena bema unai gaudia edia anina ita dekenai ita diba, unai gaudia totona do ita guriguri, bona unai hegeregerena ia hagugurua.

Guriguri bona Helaro Do Idia Noho Hanaihanai

19. Badina be dahaka guriguri bona helaro be do idia noho ela bona hanaihanai?

¹⁹ Guriguri karana iseda guba Tamana dekenai be do ita karaia ela bona hanaihanai; momokani, tanobada matamatana bona unai neganai do ita abia hahenamo iboudiai dainai ita tanikiu henia. (Isaia 65:24; Apokalupo 21:5) Helaro dekenai do ita moale noho, badina ela bona hanaihanai helaro ena kara haida do idia noho. (1 Korinto 13:13 itaia danu.) Ita diba lasi Iehova be dahaka do ia havaraia matamataia, ia sibona ia haginia Sabati laga-ani dinana do ia ore neganai. (Genese 2:​2, 3) Ela bona hanaihanai, iena taunimanima totona lalokau amo do ia karaia hoa gaudia ia hegaegaelaia, bona gabeai iena ura idia karaia neganai gau namo hereadia do idia abia.

20. Namona be iseda lalona ita hagoadaia dahaka do ita karaia totona, bona badina be dahaka?

²⁰ Ita vairanai unai helaro namona ia noho dainai, namona be ita ibounai be Iehova kahirakahira ai ita noho guriguri dekenai ita goada noho dainai. Namo lasi iseda hahenamo iboudiai dainai iseda tanikiu karana iseda guba Tamana dekenai ita rakatania. Nega sisina murinai ita naria gaudia do idia vara dainai do ita moale, unai gaudia be hari ita lalohadailaia diba lasi, badina Iehova “ena siahu be iseda lalona dekenai ia gaukara noho. Inai siahu be goada momokani, bona iseda noinoi bona iseda laloa ibounai ia hereaia diba.” (Efeso 3:20) Unai dainai, namona be Iehova, iseda Dirava, “Guriguri Ia Kamonai Henia Tauna,” ita hanamoa bona ita tanikiu henia ela bona hanaihanai!

[Footnotes]

Edena Bamona Do Oi Haere?

◻ Badina be dahaka guriguri dekenai ita goada noho be namo?

◻ Keristen taudia edia nega ia do mai lasi neganai idia guriguri taudia edia kara amo dahaka ita diba?

◻ Iesu ena haheitalai dainai dahaka ita diba guriguri dekenai?

◻ Edena dala ai iseda metau be Iehova latanai ita negea diba bona dahaka do ia vara diba?

[Picture on page 17]

Ena be leona edia guri dekenai idia negea gwauraia, to Daniel be guriguri dekenai ia goada noho