Oi Guriguri Neganai Dirava Ia Kamonai, A?

GAUKARA biaguna ese ena lalona ia hadaia gaukara ta do ia henia ma ta dekenai eiava ia sibona do ia karaia totona. Unai hegeregerena, guba bona tanobada edia Atai Herea Lohia Badana ese ena lalona ia hadaia kara ta do ia karaia eiava do ia karaia lasi totona. Bible ese ita ia hadibaia Dirava ena lalona ia hadaia iseda guriguri ia kamonai henidia totona, unai dainai ita ia hamaoroa iseda guriguri be ia dekenai ita siaia totona.​—⁠Salamo 66:19; 69:⁠13.

Dirava be unai bamona ia ura karaia dainai, ia hahedinaraia ia ura iena hesiai taudia edia guriguri ia kamonai henidia. Ia ese ena taunimanima ia koudia lasi, to idia ia hagoadaia edia lalohadai bona edia lalo-hekwarahi gaudia iboudiai ia dekenai do idia gwauraia hedinarai totona, ia gwau: “Nega ibounai do umui guriguri,” “guriguri do umui goadalaia nega ibounai,” ‘emui maduna be Iehova dekenai umui tahoa kau,’ “emui laloa hekwarahi gaudia ibounai [Dirava] imana dekenai do umui atoa.”​—⁠1 Tesalonika 5:17; Roma 12:12; Salamo 55:22; 1 Petero 5:⁠7.

Bema Dirava ia ura lasi iena hesiai taudia edia guriguri ia kamonai henia, ia ese dala do ia kehoa lasi bona idia do ia hagoadaia lasi ia dekenai do idia guriguri henia totona. Vadaeni, ia hedinarai goevagoeva Dirava ese edia dala ia kehoa dainai ita diba iena taunimanima idia guriguri henia neganai edia hereva ia kamonai henia. Oibe, iena hesiai taudia ta ta iboudiai edia guriguri herevadia ia laloa namonamo.

Bona laloaboio lasi, Bible ese ia hahedinaraia goevagoeva Dirava be iseda guriguri ia kamonai henidia. Hegeregere, aposetolo Ioane ia gwau: “Dirava ita abidadama henia dainai, ita diba momokani, bema gau ta iena ura hegeregerena ita noia neganai, ia ese ita dekenai do ia kamonai.” (1 Ioane 5:14) Pavapava David ese Iehova ia gwauraia “Guriguri Kamonai Henia Diravana” bona mai momokani danu ia gwau: “Ia ese lauegu gadona ia kamonai henia.”​—⁠Salamo 55:17; 65:⁠2.

Guriguri karana be mai ena namo; unai sibona lasi to danu Bible ese ia hahedinaraia kara maoromaoro tauna ia guriguri neganai kamonai tauna ia noho. Unai kamonai tauna be Dirava.​—⁠Iakobo 5:​16-18.

Ia Kamonai Henia Guriguridia

Bible lalonai Dirava ese taunimanima edia guriguri ia kamonai henia bona ia haere henidia sivaraidia be momo. Unai ese ia hahedinaraia goevagoeva guriguri karana ena namo be ta ia lalohadai namonamo o ena lalohadai ia gwauraia namonamo amo sibona lasi. Guriguri karana ena namo be taunimanima ta be sibona ena guriguri hegeregerena ia goada karaia amo sibona lasi.

Hegeregere, Absalom be Israel ena pavapava dagina ia abia toho karana ia hedinarai neganai, Pavapava David ena guriguri be inai: “Iehova e, oi lau noinoi henia, Ahitofel [Absalom ia durua tauna] ena hereva mani oi hakavakavaia!” Unai be noinoi hereva badana ta, badina “Ahitofel ena lalohadai ia gwauraia hegeregere ia be Dirava momokanina ena hereva ia gwauraia bamona.” Murinai, Absalom ese Ahitofel ena palani Pavapava David ia hamorua totona ia dadaraia. Dahaka dainai? “Iehova ese dala ia kehoa Ahitofel ena lalohadai aonegana do ia dadaraia Iehova ese Absalom do ia hadikaia momokani totona.” Ia hedinarai goevagoeva, Dirava ese David ena guriguri ia kamonai henia.​—⁠2 Samuel 15:31; 16:23; 17:⁠14.

Unai hegeregerena, Hesekia ese Dirava ia noinoi henia do ia hamasea gorere dikana ia hanamoa totona, bena murinai iena gorere ia ore. Hesekia be ia guriguri dainai iena lalona dekenai maino ia davaria dainai iena gorere ia ore, a? Lasi momokani! Peroveta tauna Isaia dekena amo Iehova ena hereva Hesekia dekenai be inai: “Oiemu guriguri lau kamonai henia vadaeni. Oiemu matana ranu lau itaia vadaeni. Hari lau be oiemu gorere lau hanamoa.”​—⁠2 Hanua Pavapavadia 20:​1-6.

Ena be Daniel ia laloa ena guriguri ena haere ia abia haraga lasi, to Iehova ena aneru ese ia hagoadaia, ia gwau: “Oiemu hereva ia kamonai henia vadaeni.” Taunimanima haida, hegeregere Hana, Iesu ena hahediba taudia, bona tuari kapitan Korenelio, edia guriguri ia kamonai henidia dalana be taunimanima edia heduru dalana amo lasi. Vadaeni, Bible ese ia hahedinaraia goevagoeva, bema taunimanima be Dirava ena ura hegeregerena idia guriguri neganai, Dirava ese edia guriguri ia abia dae, ia kamonai henidia, bona ia haere henidia.​—⁠Daniel 10:​2-14; 1 Samuel 1:​1-20; Kara 4:​24-31; 10:​1-7.

To, hari inai nega lalonai, Dirava ese iena abidadama hesiai taudia edia guriguri be edena bamona ia haere henidia?

Guriguri Edia Haere

Atai sivarai dekenai taunimanima edia guriguri be hoa dalana amo haere idia davaria. To namona be inai oi laloa, Bible ia sivarailaia taudia edia nega lalonai, taunimanima edia guriguri haerelaia karadia momo be idia hedinarai goevagoeva lasi. Badina Dirava ena hesiai taudia be dala maoromaorona ai idia raka noho totona, nega momo idia guriguri mauri ena kara goeva bona lalo-parara idia abia totona. Keristen taudia be nega momo lauma gaudia idia gurigurilaia bona hoa lasi dalana amo haere idia davaria.​—⁠Kolose 1:⁠9.

Unai dainai oi lalohisihisi lasi bema oi ura henia dalana dekenai oiemu guriguri ena haere oi abia lasi. Hegeregere, reana Dirava ese hetoho ta do ia kokia lasi, to oi dekenai “siahu badana” ia henia, unai hetoho oi haheaukalaia totona. (2 Korinto 4:7; 2 Timoteo 4:17) Unai siahu ena namo ita gwauraia maragi be namo lasi, bona namo lasi ita gwau Iehova ese iseda guriguri ia haerelaia lasi.

Namona be Dirava ena Natuna, Iesu Keriso, ena kara ita laloa. Iesu ia lalo-hekwarahi badina ia ura lasi Dirava hadikaia tauna bamona ia mase, unai dainai ia guriguri, ia gwau: “Egu Tamana e, oiemu lalona bema ia hegeregere inai kapusi be lau dekena amo do oi kokia.” Dirava ese iena guriguri ia abia dae, a? Oibe, Heberu 5:7 ese unai ia hamomokania. Iehova ese iena Natuna be hisihisi auna dekenai do ia mase karana ia koua lasi. To, “aneru ta guba dekena amo ia dekenai ia ginidae, ia dekenai goada henia totona.”​—⁠Luka 22:​42, 43.

Hoa dalana amo ena guriguri ia haerelaia, a? Momokani, ita dekenai unai be hoa gauna! To, unai siahu ena badina, Iehova Dirava dekenai, unai be hoa gauna ta lasi. Bona Iesu be guna guba dekenai ia noho dainai, ia diba gunanai nega haida aneru be taunimanima dekenai idia hedinarai. Unai dainai, aneru be Iesu dekenai ia hedinarai neganai, ia hoa lasi, ita hoa diba bamona. Vadaeni, unai aneru ese Iesu ia hagoadaia ia vairana dekenai ia noho hetoho do ia haheaukalaia totona, bona Iesu be guna guba dekenai ia noho dainai, reana unai aneru ia diba.

Hari inai nega lalonai, iena abidadama hesiai taudia edia guriguri ia haerelaia neganai, Iehova ese idia ia hagoadaia idia haheauka noho totona. Unai heduru be reana ita bamoa Keristen tadikaka edia hagoadaia hereva. Bema ita ia hagoadaia tadikakadia be ita davaria hetoho idia abia lasi, do ita gwau idia be hegeregere lasi ita idia durua totona, bona edia hagoadaia herevadia do ita dadaraia, a? Aneru be Iesu dekenai ia hedinarai neganai, unai bamona ia laloa diba. To, unai bamona ia laloa lasi, ia ese iena hagoadaia herevana ia abia dae, badina ia diba Iehova ese iena guriguri ia haerelaia, bona unai dainai mai abidadama ida ia ese ena Tamana ena ura ia hagugurua diba. Namona be Dirava ese iseda guriguri ia haerelaia ena hagoadaia herevadia ita abia dae danu. Danu, namona be ita laloatao, ita haheauka neganai, nega momo unai murinai hahenamo momo do ita abia diba.​—⁠Kohelete 11:6; Iakobo 5:⁠11.

Dirava be Momokani Ia Kamonai

Bema emu guriguri ia haerelaia haraga lasi, namo lasi emu abidadama guriguri ena namo dekenai oi haboioa. Bema oi guriguri lalohisihisi ta ia ore totona eiava oi guriguri Dirava ena hesiai gaukara ma haida oi abia totona, reana haere abia totona do oi naria ela bona Dirava ese do ia gwauraia nega korikorina bona nega namona. (Luka 18:​7, 8; 1 Petero 5:⁠6) Bema oi dekenai mai anina bada gauna ta oi gurigurilaia, namona be nega momo oi gurigurilaia, unai amo oi ese Dirava dekenai oi hahedinaraia unai gau oi laloa bada bona oiemu ura unai gau dekenai be ia goeva bona ia namo. Iakobo be unai bamona ia karaia, ia ese nega daudau aneru danu idia rosia daika do ia kwalimu neganai, ia gwau: “Lau be oi do lau dogoatao noho ia lao bona oi ese do oi hanamoa lau dekenai.” (Genese 32:​24-32) Ita danu unai bamona ita karaia be namo, bema nega momo ita noinoi henia, ita ese nega korikori dekenai hahenamo do ita abia.​—⁠Luka 11:⁠9.

Lalohadai dokona be inai. Tanobada bona guba edia Lohiabada ese iseda guriguri ia kamonai henia bona ia haerelaia be gau hereadaena momokani. Unai dainai, Iehova Dirava ese ena Hereva amo iena taravatu ita dekenai ia hadibaia neganai, namona be ita kamonai namonamo, ani? Iseda guriguri amo ita ia Havaraia Tauna kahirakahira dekenai ita lao diba, bona namona be ita ia hadibaia hereva iboudiai ita hakala henia namonamo.

[Picture on page 6]

Dirava ese guriguri ia kamonai henidia. Iena Hereva dekena amo ia ita kamonai henia, a?