Lalo—Hekwarahi mai Badu Mamina Oi Hanaia Diba!

LAGANI 23 tauna ta ena sivarai oi laloa. Iena sikuli be bada lasi bona gaukara amo moni sisina sibona ia davaria. Do ia headava bona mauri namona do ia abia be dala lasi reana. Iena sinana ia gwau: “Ia lalohisihisi bada bona lalohekwarahi mai badu mamina ia abia danu.” Unai tau bona taunimanima milion momo be unai bamona. Herevana edia mauri dalana be dahaka, badina idauidau dainai lalo-hekwarahi mai badu mamina idia abia danu.

Lalo-hekwarahi mai badu mamina danu ia vara badina “hanaihanai idia noho namonamo lasi bona idia gari, hagoadaia kara idia abia lasi, bona edia ura gaudia idia davaria lasi dainai idia lalohisihisi, idia lalo-hekwarahi, bona hekwakwanai ma haida dainai.” (Webster’s Third New International Dictionary) Bema ita hekwarahi bada gau ta do ita karaia hagugurua totona, to ita karaia guguru lasi, lalo-hekwarahi mai badu danu ia havaraia. Iseda mamina be gau momo ese ita idia koua bona ita be dala lasi unai kara ita hagugurua. Ita ibounai be unai mamina ita diba vadaeni.

Bema gaukara taudia idia laloa idia karaia gaukarana be anina lasi, reana sibodia do idia matauraia lasi. Bema taunimanima ese idia lalodia lasi bona edia gaukara dainai idia tanikiu henidia lasi, headava hahinedia eiava sinadia edia mamina be ia dika, hegeregere, idia hekwarahi bada dina ta ta iboudiai edia metau idia huaia totona bona ruma gaukara idia karaia totona, unai dainai, reana do idia laloa unai gaukara be anina lasi bona gau namona ta idia hagugurua diba lasi. Memero kekeni be idia ura edukeisini idia abia, to hekwakwanai idia davaria dainai idia abia diba lasi dainai lalo-hekwarahi mai badu mamina danu ia havaraia. Orea maragidia edia memba taudia reana do idia lalohisihisi badina idia laloa taunimanima ese idia dadaraidia bona unai be maoro lasi. Mai edia kara maoromaoro danu bisinesi idia karaia taudia do idia badu badina koikoi dalanai idia karaia bisinesi taudia ese edia bisinesi idia hadikaia dainai. Unai bamona kara bona ma kara haida danu ese badu ia havaraia bona taunimanima momo edia hemami be idia be dala lasi gau ta idia karaia guguru totona.

Idau negai ia noho aonega tauna ta be ena badu ia gwauraia hedinarai bona unai hereva ita lalo-pararalaia diba. Israel ena pavapava Solomon ia gwau: “Lauegu imana edia gaukara iboudiai bona lauegu hekwarahi iboudiai lau laloa namonamo; bena lau lalo-parara, ibounai be anina lasi, lai abia totona hekwarahi karana bamona, bona dina henunai gau namona ta be lasi. Tau ta ena gaukara iboudiai bona ena hekwarahi iboudiai dina ena henunai ena davana be dahaka? Badina ena dina iboudiai lalonai hisihisi amo ia honu, bona ena gaukara be lalo-hekwarahi gauna; hanuaboi dekenai danu ena lalona ia laga-ani lasi. Unai danu be anina lasi.” (Kohelete 2:​11, 22, 23) Solomon ena hereva ese taunimanima momo idia davaria lalohisihisi mamina idia hahedinaraia, edia lalo-hekwarahi dainai mauri namona idia abia diba lasi.

Lalo-hekwarahi mai badu mamina danu idia davaria taudia be idia dara doko diba. Lalo-hekwarahi bada idia davaria taudia haida ese mauri ena hekwarahi idia haheaukalaia lasi bona mauri dala idauna ta idia abia dae. Idia laloa gau haida idia abia be maoro, bona edia ura gaudia idia abia totona, idia haida ese raskol bona dagedage karadia idia karaia. Mauri ena hekwarahi momo ese headava bona ruma bese bamoa karadia ia hamakohidia.

Reana ita momo ita goada karaia lalo-hekwarahi mai badu mamina danu hanaia daladia ita tahua totona. To herevana dahaka ita karaia reana lalo-hekwarahi ia bada ia lao. Hereva Lada-isidia 13:12 ia gwau: “Helaro ia vara haraga lasi neganai, lalohisihisi ia havaraia.” Tauanina dalanai bona lauma dalanai ita ia hadikaia diba. Do ita hanaia dalana ia noho, eiava? Ita hegeregere lasi neganai eiava ita kerere neganai, lalo-hekwarahi mai badu mamina danu be ita abia hanaihanai davana, a? Kara namodia haida ita karaia diba lalo-hekwarahi mai badu mamina danu ita hanaia totona, bona mauri namona ita abia totona, a? Namona be hari ita tahua.

Lalo-Hekwarahi Mai Badu Mamina Danu Hanaia Daladia Haida

Hekwakwanai ta ita abia neganai bona sisiba ena heduru ita tahua neganai, ita ura aonega tauna dekenai ita lao, badina unai kara dekenai ia manada bona ita abidadama henia diba. Hereva Lada-isidia 3:​5, 6 ia gwau: “Iehova oi abidadama henia mai emu lalona ibounai ida; oi sibona emu diba dekenai oi tabekau lasi. Emu dala iboudiai dekenai ia ena hereva do oi abia dae, bena ia ese emu dala do ia hamaoromaorodia.” Oi ia durua sisiba namona be Dirava ena Hereva, Bible lalonai oi davaria diba. Iena heduru hereva namodia hari ita tahua be namo.

Mauri durua gaudia abia totona ita gaukara neganai unai ese lalo-hekwarahi mai badu mamina danu ia havaraia. Hegeregere, iseda moni gaukara ita moalelaia, to davana maragi ita abia dainai reana ita lalohisihisi. Iseda ruma bese taudia ita lalokau henidia dainai ita ura idia dekenai gau namodia ita henia. To hanaihanai ita lalo-hekwarahi ita abia gau iboudiai edia davana ita karaia totona. Reana moni gaukara hora ma haida do ita karaia bona moni gaukara rua do ita karaia. To kara haraga do ita abia mamina be inai: ita aniani, ita mahuta, bona ita gaukara, to unai kara ita hesikulaia. Bona, ita abia gaudia edia davana karaia be idia momo, abitorehai davana ia bada, unai dainai lalo-hekwarahi mai badu mamina danu ia bada ia lao.

Moni gaukara ita karaia ena badina badana ta be ita ura mauri durua gaudia ita abia. To mauri durua gaudia edia bada be edena bamona? Aposetolo Paulo ia gwau: “Gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo.” Gau momo ita tahua badina iseda dekena taudia be unai bamona gaudia idia abia eiava kara haida idia karaia diba dainai, a? Bema oibe, reana davana dikana do ita davaria, ita be lalo-hekwarahi mai badu mamina danu do ita abia. Paulo ia sisiba ia gwau: “Kohu momo idia ura henia taudia be hedibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura taudia do idia koia bona hadikaia. Badina be moni ura henia kara ese dika idauidau ibounai ia havaraia noho. Bona moni idia ura bada taudia haida ese Iesu abidadama kara idia rakatania vadaeni, bona mai lalohisihisi momo, edia mauri idia hadikaia ore vadaeni.” (1 Timoteo 6:​7-10) Ita abia vadaeni kohu ita laloa namonamo neganai, reana do ia hedinarai bema unai kohu haida ita abia lasi neganai iseda mauri durua gaudia idia do hegeregere. Bema iseda moni ita naria namonamo bona davana bada gaudia ita hoia lasi unai be heduru namona lalo-hekwarahi mai badu mamina danu ena kara ita hamaragia totona.

Vaia, taunimanima be edia ura idia hagugurudia diba lasi dainai, lalo-hekwarahi mai badu mamina danu ia havaraia. Hegeregere, kekeni ena ura be do ia headava, ia ura noho namo bona ruma bese ena moale ia davaria. Ia ese nega bada do ia negea bona do ia hekwarahi bada ena toana ia hahairaia totona, bona reana lalokau idia tahua taudia totona idia torea magasin edia sisiba herevadia do ia duahidia momo. Reana unai kekeni be moale karadia momo dekenai do ia lao tau namona ta ia davaria totona, to tau namona ta ia davaria lasi. Lagani haida idia ore murinai iena lalo-hekwarahi mai badu mamina danu do ia bada ia lao. Bona ia lalo-hekwarahi bada dainai reana ia laloa namona be hegeregere lasi tauna ta do ia adavaia. Eiava, lalokau do ia abia urana ia bada dainai, madi reana do ia sihari kava.

Kekeni ta be ia ura ia headava neganai, do ia haheauka bona tau namona ta do ia abia hidi be gau badana. Ia hegeregere lasi tauna ta do ia adavaia​—hegeregere Iehova ia abidadama henia lasi tauna ta​—be kerere badana. (1 Korinto 7:39; 2 Korinto 6:​14, 15) Sihari kava karana ese lalohisihisi bona lalo-metau do ia havaraia. (Hereva Lada-isidia 6:​32, 33) Bema sibona ena ura ia tahua namonamo, ia lalohadailaia namonamo, unai be heduru namona. Headava ia ura neganai, ena “laloa manau” karana be dala namonai tau namona ta ia veria totona, dabua mai sitailo eiava vairana penia karana amo do ia veria lasi. (1 Petero 3:​3, 4) Tanobada ena aonega taudia edia sisiba ia abia dae be hegeregere lasi, namona be headava ia Havaraia Tauna dekenai ia lao, bena do ia diba dahaka ia karaia gabeai adavana do ia lalokau henia bona do ia naria namonamo totona. (Hereva Lada-isidia, karoa 31) Namona be idia do headava lasi uhau bona ulato ese edia kara namo amo do idia hahedinaraia idia ura do idia adavaia tauna be unai kara namo ia karaia danu. Aonega dalana be Bible ena taravatu idia badinaia taudia ia bamodia. Bema iseda mauri lalonai unai taravatu ita badinaia, headava mai moalena do ita abia diba. Bona ena be ita headava haraga lasi, to bema iseda kara be Bible ena hereva hegeregerena, do ita moale bona iseda headava lasi maurina dekenai hahenamo do ita davaria.

Iseda maduna ia metau neganai, reana lalo-hekwarahi do ita abia diba. Ita lalo-hekwarahilaia gaudia be momo. Hegeregere, ruma bese ena mauri durua gaudia abia totona, reana iseda gaukara biaguna ese ita idia doria momo. Hekwakwanai ia vara negadiai iseda varavara idia ura ita durudia. Iseda metau gaudia be momo dainai, ita be nega lasi sibona eda ura gaudia haida ita naria totona. Iseda nega bona goada be dala idauidau dekenai ita henia nega tamona bamona. Kara haida ita karaia namonamo diba lasi dainai, lalo-hekwarahi mai badu mamina danu do ia vara bona reana ita ura unai gaukara ita negea. Unai dainai, dahaka ita karaia be namo?

Namona be iseda kara ita tahua bona mai anina bada gaudia ita karaia guna. Do ita karaia diba karadia be mai edia hetoana, taunimanima haida idia ura ita karaia karadia haida ita karaia diba lasi. Namona be “gau namodia edia toana do umui diba” guna. (Filipi 1:10) Badina “ia mauri sisiana be ia mase leona ia hereaia.” (Kohelete 9:4) Iseda maduna haida be mai anina bada bona idia ita reaia diba lasi, to iseda maduna ma haida be ita reaia diba gabeai do ita karaia totona. Reana ita ura maduna haida ita sibona ita huaia, to namona be ma haida ese ita idia durua unai maduna huaia totona. Bema iseda maduna haida be anina bada lasi, reana ita negedia be namo. Ena be anina lasi gaudia ita negedia hamatamaia neganai reana taunimanima haida do idia hekwarahi eiava do idia moale lasi, to namona be iseda tauanina ena goada bona iseda lalona ena goada edia hetoana ita diba.

Ita ia hamanokaia gorerena ta ese ita dekenai lalo-hekwarahi mai badu mamina danu ia havaraia diba, badina reana ita be dina haida eiava wiki haida iseda mahuta gedana dekenai ita hekure noho dainai. Hisihisi bada dainai iseda mamina be ia dika. Gorere hanamoa totona, reana ita be doketa idauidau dekenai ita lao henidia, eiava muramura idauidau eiava vitamin ita ania heduru sisina ita abia totona. To, bema hisihisi ita do ania noho, reana do ita laloa mauri ita hekwarahilaia be anina lasi.

Hekwakwanai haida do idia ore lasi ela bona Dirava ena tanobada matamatana ena nega lalonai. (2 Petero 3:13; Isaia 33:24 itaia danu.) Taunimanima be idia goevadae lasi dainai, doketa bona muramura edia heduru be sisina sibona. Nega haida heduru be lasi dainai hisihisi ita haheaukalaia sibona. Aposetolo Paulo ena tauanina dekenai “ginigini” ta ia noho, reana matana gorere eiava ena tauanina kahana ta dekenai gorere ia abia, bona hisihisi ia abia dainai nega momo ia guriguri unai hisihisi do ia ore totona. (2 Korinto 12:​7-10) To Dirava ese Paulo ena gorere ia kokia lasi, bona reana aposetolo tauna be ena gorere ia haheaukalaia ela bona ia mase. Mai hisihisi danu ia mauri noho, to taunimanima edia amo hebogahisi ia tahua lasi, bona ena moale ia haboioa lasi. (2 Korinto 7:4) Ena be kara maoromaoro tauna Iobu be hisihisi bada ia davaria, to ia abidadama noho Iehova dekenai, bona ena kara dainai hahenamo bada ia davaria. (Iobu 42:​12, 13) Bema ita be Dirava ena hesiai taudia, goada do ita abia ita haheauka noho totona, namona be ita ese unai haheitalai namodia ita lalodia tao bona Iehova dekenai ita guriguri heduru ita abia totona.​—Salamo 41:​1-3.

Idia Lalo-Hekwarahi to Idia Goada Noho

Ena be Iehova ena taunimanima be lalo-hekwarahi mai badu mamina danu idia davaria, to lauma dalanai idia goada noho diba. Hegeregere, ena be gorere ita haheaukalaia noho, to ‘abidadama dekena amo do ita gini goada diba,’ bema Dirava ese ita ia henia lauma durua gaudia ita gaukaralaidia. (Tito 2:​1, 2) Ena be ita lalo-hekwarahi badina reana tauanina dekenai ita ogogami, to lauma dalana dekenai ita taga bada herea diba.

Bema aonega bona goada ita abia totona Dirava dekenai ita tabekau, ruma bese lalonai idia vara karadia dainai lalo-hekwarahi mai badu mamina danu karana ita haheaukalaia diba. Hegeregere, Abigail, Nabala adavana oi laloa. Unai tau be “dagedage bona kara dika tauna,” bona ena ladana ena anina be “Kwarana Lasi; Kava Tauna.” Abigail be unai bamona tauna danu ia noho be reana ia lalo-hekwarahi bada! To, Abigail be “mai aonegana” bona ia lalo-metau lasi. Oibe, hekwakwanai badana ta ia vara neganai, mai hemataurai bada danu ia hereva bona ia karaia dainai, David ena lalohadai ia haidaua, ia gwau namo lasi Nabala dekenai davana ia henia iena hereva dikadia bona heabidae lasi karadia dainai rara ia bubua bona ena abidadama karana Iehova dekenai ia hadikaia.​—1 Samuel 25:​2-38.

Ena be Keristen kongregesen lalonai taunimanima ta ena kara dainai ita dekenai lalo-hekwarahi mai badu mamina danu ita abia, to Iehova ese ita ia henia goadana amo unai kara ita haheaukalaia diba. Diotrefe ena kara dika dainai reana lalo-hekwarahi mai badu mamina danu ia vara diba, to unai tau ena kara ese Dirava ia abidadama henia tauna, Gaio, ena kara namo ia koua lasi, bona ia moale bona lauma dalanai hahenamo momo ia davaria.​—Kara 20:35; 3 Ioane 1-10.

Kongregesen lalonai bema ita ura iseda tadikaka ita hesiai henidia totona dagi ena gaukara ita tahua, to, ita lasi, to ma tadikaka haida idia abia hidi elda bona hesiai dagina idia abia totona, reana lalo-hekwarahi mai badu mamina danu ita abia diba. To namo lasi ita lalohisihisi, namona be lauma dalanai ita goada karaia bona ita dekenai Dirava ena lauma huahuadia ita habadaia. (Galatia 5:​22, 23) Mose be lagani 40 Midian tanona dekenai ia noho neganai, Dirava ese ia durua manau, haheauka, bona kara namodia ma haida do ia manadalaidia totona, badina ia diba Israel besena do ia gunalaia neganai hekwakwanai bona lalo-hekwarahi mai badu mamina havaraia gaudia momo do idia vara ia haheaukalaidia totona. Unai hegeregerena, bema lauma dalanai ita goada noho bona lalo-hekwarahi mai badu mamina danu ita abia lasi, reana Iehova ese ita do ia hegaegaelaia gabeai gaukara dagina ta do ita abia totona.

Kahirakahira Lalo-Hekwarahi Do Ia Ore!

Herevana dahaka dainai lalo-hekwarahi mai badu mamina danu ita abia, to unai lalo-hekwarahi be do idia ore, a? Reana ita laloa do idia ore diba lasi, to iseda Havaraia Tauna, Iehova Dirava, be unai bamona ia laloa lasi. Ia be lalo-hekwarahi mai badu mamina danu ia abia lasi. Peroveta tauna Isaia dekena amo ia gwau: “Lauegu uduna amo ia lasi herevana be unai bamona do ia vara, lau dekenai do ia giroa mai kava lasi, to lauegu ura ibounai do idia hagugurua, badina lau siaia ena badina ena namo do ia habadaia.” (Isaia 55:11) Iehova be siahu ibounai bona dagi hereadaena ia abia dainai, gau ibounai ia karaia diba. (Mareko 10:27) Ia gwauhamata ena taunimanima totona hahenamo ela bona hanaihanai do ia havaraia, bona iena hereva do idia guguru.​—Iosua 21:45.

Daradara bona diba maoro lasi karadia be lalo-hekwarahi mai badu mamina danu havaraia gaudia badadia. To, “abidadama ena anina . . . [be] iseda lalona ia diba momokani inai gauna do ita abia.” (Heberu 11:1) Dirava ita abidadama henia neganai, Bible dekenai ia gwauhamatalaia helaro iboudiai ita abia dae, ita dekenai do idia guguru. Bible ena hereva badana ta be Iehova ena Basileia do ia lohia, iena siahu henunai tanobada be paradaiso gabu goevadaena ai do ia halaoa, bona ia lalonai taunimanima be kara maoromaoro bona mai moale danu do idia mauri ela bona hanaihanai. (Salamo 37:​11, 29) Dika kara iboudiai​—lalo-hekwarahi mai badu mamina danu—​do idia ore, badina Dirava ese ‘mauri gaudia iboudiai edia ura do ia henidia.’​—Salamo 145:16.

Unai hahenamo ita do naria noho lalonai, ita ibounai be reana nega haida lalo-hekwarahi mai badu mamina danu do ita abia. To Bible ese ia gwauraia helarodia ese ita idia hagoadaia bona ita idia durua unai metau ita haheaukalaidia totona. Bible lalonai ia noho sisiba namodia ese dala maorona abia hidi bona gau ta lalohadailaia namonamo daladia ita ia hadibaia, bona unai ese ita ia durua iseda mauri lalonai bona iseda kudouna dekenai maino ita abia totona. Ena be nega haida ita lalohisihisi, to “Dirava ena maino ese taunimanima edia diba ia hanaia momokani” gauna ita abia diba. (Filipi 4:​6, 7) Unai dainai lalo-hekwarahi mai badu mamina danu ita hanaia diba. Iehova ena heduru amo harihari ia noho metau gaudia ita haheaukalaidia diba bona dina vairai dekenai do idia ore momokani.

[Blurb on page 31]

Dirava ese Iobu, Mose, Abigail, bona Paulo ia durudia hegeregerena, oi ia durua diba lalo-hekwarahi mai badu mamina danu karana do oi haheaukalaia totona