Elda Taudia​—Gaukara Umui Haria!

IA BE mai ena haheauka bona manau tauna, iena diba mauri ena hekwakwanai dekenai be ia bada, bona hahemaoro maoromaoro kara ia ura henia bada. Unai dainai, tatau, hahine, bona natudia milion toi bona ma haida be daradara lasi dekenai iena sisiba idia tahua. Ia goada karaia idia ta ena lalona ia hahisia lasi totona. Daba kahanai ela bona hanuaboi kahanai, edia hekwakwanai idia herevalaia neganai ia kamonai henidia bona mai ena haheauka danu ia hadibadia, bena idia diba Dirava ena taravatu be edena bamona ia durudia diba. Oibe, lagani 3,500 bamona gunanai, nega sisina lalonai, tau tamona sibona ese Iuda bese ena iduhu 12 taudia ia hahemaoro henidia​—unai be Mose.

To, Mose ena ravana tauna, Ietero, be ia totona ia lalo-hekwarahi. Mose be unai bamona gaukara metau be edena bamona do ia karaia noho diba? Unai dainai Ietero ia gwau: “Oiemu kara be ia namo lasi. Oiemu goada be do ia ore, inai taunimanima danu edia goada be do ia ore. Badina be inai gaukara ia metau bada. Oi sibona do oi karaia diba lasi.” (Esodo 18:​17, 18) Dahaka ese ia hanamoa? Ietero ese Mose ia hamaoroa namona be iena gaukara maduna haida be ma taunimanima haida dekenai ia henia. (Esodo 18:​19-23) Unai be sisiba namo herea!

Hari inai negai, Keristen kongregesen lalonai, elda taudia momo be Mose hegeregerena, idia hekwarahi bada edia gaukara iboudiai idia karaia totona, to idia hegeregere lasi idia sibodia idia karaia totona. Idia ese hebou idia hegaegaelaidia, hereva idia henia totona idia hegaegae unai hereva do idia henia namonamo bona anina idia hahedinaraia totona. (1 Korinto 14:​26, 33, 40; 1 Timothy 4:13) Danu, elda taudia be kongregesen taudia ta ta iboudiai idia durudia. (Galatia 6:1; 1 Tesalonika 5:14; Iakobo 5:14) Idia be mai anina bada Basileia ena sivarai namona harorolaia gaukarana idia gunalaia. (Mataio 24:14; Heberu 13:7) Danu, idia hegaegae, buka bona magasin idia noho kongregesen taudia idia abia bona idia hariharilaidia totona.

Ma danu, elda taudia haida be sekit bona distrik hebouheboudia dekenai hereva idia henia. Idia be hebouhebou ena dipatmen idia naria bona hospital komiti gaukarana idia karaia. Idia haida be Kingdom Hall haginia gaukarana idia karaia. Bona idia be mai edia maduna edia ruma bese taudia dekenai, bona namona be sibodia edia lauma goadana idia naria danu. (Iosua 1:8; Salamo 110:3; 1 Timoteo 3:​4, 5; 4:​15, 16 itaia danu.) Unai Keristen tatau be edena bamona edia gaukara ibounai idia karaia diba? Mose bamona namona be heduru idia abia. Namona be idia diba gau badana be gaukara idia haria. Oibe, gaukara ia haria lasi tauna be gaukara hegaegaelaia namonamo lasi tauna.

Ma Haida Hadibaia Ena Namo

Gaukara haria ena badina haida idia noho. Iesu ia gwauraia moni parabolena lalonai, “biaguna” be gabu daudau ia lao henia gwauraia neganai, ia ese ena hesiai taudia ia boridia mai bona gaukara ta ta ia henidia. (Mataio 25:​14, 15) Unai dala amo biaguna ese gau idauidau ia karaia diba. Gau ginigunana be, ia noho lasi neganai, iena hesiai taudia be iena gabu idia abia dainai iena gaukara idia karaia gau ibounai ia heau namonamo totona. Gau iharuana be, hereva lasi to kara be mai anina bada, unai dainai biaguna do ia diba iena hesiai taudia edia aonega bona edia abidadama ia itaia diba. Gau ihatoina be, biaguna ese dala ia kehoa iena hesiai taudia be unai gaukara dekenai idia manada totona.

Hari inai nega lalonai, unai parabole herevana be mai anina ita dekenai. Iesu ese tanobada ia rakatania neganai, ia ese ena horoa hahediba taudia dekenai gaukara ia henidia. Unai hahediba taudia oredia be Basileia ena gaukara idia do naria noho. (Luka 12:42) Hari inai negai, ia hedinarai goevagoeva Iehova ena hahenamo be iena orea dekenai ia noho badina horoa taudia ese edia gaukara idia naria namonamo dainai. Unai dainai, gaukara ia bada ia lao momokani. Oibe, idia ore lagani ima lalodiai, matamata taudia milion tamona bona ma haida idia gwauhamata bona ranu dekenai bapatiso idia abia! Unai dainai kongregesen matamata tausen momo bona sekit matamatadia handred momo idia haginidia.

Iesu Keriso ese “hesiai tauna mai ena kamonai bona mai ena kara maoromaoro” oreana dekenai gaukara ia henia hegeregerena, idia ese kongregesen lalonai “mamoe idaudia haida” amo elda bona hesiai taudia dekenai gaukara idia henia. (Mataio 24:​45-47; Ioane 10:16) To, gaukara ia bada ia lao noho dainai, idia gwauhamata tatau ma haida idia abia be namo. Edeseniai do idia abia? Elda taudia ese idia do idia hadibadia be gau badana. Ena be haida idia hahedinaraia idia be hegeregere unai gaukara idia karaia totona, to bema elda taudia ese unai gaukara idia henidia lasi, edena bamona idia hadibadia diba? Elda taudia be edena dala ma ta amo uhau idia karaia diba gaudia bona edia abidadama kara idia diba?

Gaukara Haria Ena Anina be Dahaka?

Haida idia laloa, “gaukara haria” ena anina be edia gaukara maduna haida idia negea, idia reaia, idia karaia namonamo lasi, eiava idia henia hanai ma tau ta dekenai. To, “gaukara haria” namonamo neganai, unai be dala namona gaukara ibounai hagugurua totona. Unai English gado kara eiava verb gwauraia herevana “gaukara haria” ena anina be, “tau ta dekenai oi henia; tau ta oi abia hidi oiemu hereva tauna totona; maduna eiava siahu oi henia.” To, haria tauna be mai ena maduna unai gaukara idia karaia namonamo totona.

Reana haida idia ura lasi gaukara idia haria badina idia laloa unai gaukara idia biagua namonamo diba lasi. To, gaukara oi haria neganai oi biagua noho diba. Ena be guba dekena amo ia lohia bona ita itaia diba lasi, to Keriso Iesu ese Keristen kongregesen ia biagua noho. Danu, kongregesen naridia totona ia ese lo taudia edia imadia dekenai ia atoa.​—Efeso 5:​23-27; Kolose 1:13.

Ma haida idia ura lasi gaukara idia haria badina idia laloa unai gaukara be sibodia do idia karaia haraga diba. To, Iesu ia diba taunimanima ma haida idia hadibaia be gau badana. Taunimanima iboudiai amo Iesu be hadibaia tauna hereadaena. (Ioane 7:46) To, ena hahediba taudia 70 ia hadibadia murinai, ia siaidia lao haroro gaukara idia karaia totona. Ena be Iesu ia hadibaia dalana ena namo idia hanaia diba lasi, to mai moale danu idia giroa mai badina idia gaukara namonamo dainai. Iesu be idia danu ia moale bona edia gaukara dainai ia hanamodia, badina ia diba ia mase murinai unai gaukara do idia karaia noho, bona ia sibona ia karaia gaukarana ena bada do idia hanaia.​—Luka 10:​1-24; Ioane 14:12.

Danu, gaukara haria ena anina be gaukara ta oi karaia gwauraia neganai haida dekenai gaukara oi henia idia heduru totona. Iesu ia do mase lasi ena dina vairanai, Petro bona Ioane dekenai gaukara ia henidia iena Paseka ariana dokona do idia hegaegaelaia totona. (Luka 22:​7-13) Iesu ese mamoe, uaina, hatubua lasi paraoa, bona aniani reidia mai iditadia ia hoidia lasi; danu ia ese mereki, lahi audia, bona ma gau haida ia abidia lasi. Petro bona Ioane ese unai gaukara idia karaia.

Hari inai nega lalonai danu, bema elda taudia be Iesu ena kara idia tohotohoa unai bamona heduru idia davaria diba. Hegeregere, elda ese magasin bona buka ia naria tauna do ia hamaoroa hua ena henia gauna do ia oda henia, ia hegaegae kongregesen taudia do idia hariharilaidia totona. Reana buka bona magasin naria tauna do ia hamaoroa iena faila do ia sekea bona guna idia hariharilaia gaudia do ia diba. Danu, reana oda fom ia do torea lasi neganai, reana kongregesen ena teritori ena toana do ia laloa namonamo. Bena murinai unai oda fom do ia torea bona kongregesen seketere tauna dekenai do ia henia do ia sekea ia maoro eiava lasi totona. Magasin bona buka naria tauna be iena gaukara ia diba namonamo neganai, bema seketere ia laloa unai tau ia oda henia gaudia edia namba be idia hegeregere, ia ese guna idia karaia gaudia be reana do ia sekea lasi. Ia hedinarai goevagoeva, gaukara haria karana dekenai magasin bona buka oda henia karana be ia auka lasi bona iboudiai ese namo do idia davaria.

Unai bamona namo gaudia idia vara diba dainai, edena bamona gaukara idia haria namonamo diba?

Gaukara Haria Dalana

Gaukara oi gwauraia hedinarai. Gau ginigunana be, oi ura idia karaia gauna oi hahedinaraia. Iesu ena moni parabole lalonai, “Lohia” tauna be ena hesiai taudia dekenai ia gwau “do umui hoihoilaia ela bona do lau giroa mai.” (Luka 19:​12, 13) Biaguna ia ura iena hesiai taudia be iena moni idia gaukaralaia moni ma haida do idia abia totona, bena do ia giroa mai edia gaukara do idia gwauraia hedinarai ia dekenai. Idia diba dahaka do idia karaia. Hari inai nega lalonai, unai kara ena anina be dahaka Kingdom Hall hanamoa gaukarana dekenai? Hegeregere, guhi do ia hanamoa gaukarana idia henia tadikakana do idia hamaoroa bema medu ia diho lasi, dahaka kohu do ia gaukaralaia, edeseniai do ia abidia, bona edena negai unai gaukara do ia hamatamaia. Gaukara idia gwauraia hedinarai namonamo neganai, idia hegaegae namonamo diba.

Danu, gau badana be gaukara ena kahana iboudiai do idia gwauraia hedinarai, to unai sibona lasi, namona be idia hahedinaraia gaukara tauna be sibona ia abia hidi diba karadia be dahaka bona dahaka gaudia totona ma tau ta dekenai ia lao bona gwaumaoro ia abia. Mose ese ia abia hidi hahemaoro taudia ia hamaorodia hereva maragidia do idia tahua, to hereva badadia be ia dekenai do idia mailaia.​—Esodo 18:22.

Gaukara oi haria neganai, oi naria namonamo, namo lasi taunimanima rua dekenai gaukara tamona oi henia. Taunimanima rua eiava toi ese tau tamona ena gaukara tamona idia karaia neganai heiriheiri do ia vara. Mani oi laloa, bema Iehova ena Witness taudia edia hebouhebou ta dekenai, gabu Hagoevaia Dipatmen bona Aniani Hegaegaelaia Dipatmen idia hamaorodia aniani gabuna do idia hagoevaia, eiava Atendan Dipatmen bona Bapatiso Dipatmen idia hamaoroa bapatiso neganai raraia taudia idia naridia totona, heiriheiri do ia vara.

Tatau haida mai edia aonega danu oi abia hidi. Ietero ese Mose ia sisiba henia, ia gwau: ‘Tatau haida mai edia aonega danu oi abia hidi, Dirava dekenai idia gari taudia, bona moni abia hunia karana do idia ura lasi taudia. Taunimanima gunalaia taudia oi halaodia.’ (Esodo 18:​21) Ia hedinarai goevagoeva, unai gaukara karaia totona lauma dalanai taravatu idia badinaia guna be gau badana. ‘Mai ena aonega’ tauna ese gaukara ia karaia oi diba totona, namona be iena kara, iena aonega, iena diba, bona ia karaia diba gaudia oi laloa namonamo be gau badana. Hegeregere, bema Keristen tauna ta ena toana be manau, moale, bona heduru tauna, ia be hegeregere magasin naria eiava atendan gaukara ia karaia totona. Danu, kongregesen seketere durua tauna idia ura abia hidi neganai, idia ura diba ia be gau ibounai ia atoa namonamo tauna ta eiava lasi. Gaukara maragidia danu ia karaia maoro, gaukara ia reaia lasi, bona ia kamonai hehuni herevadia be ia hahedinaraia kava lasi tauna ta, eiava? (Luka 16:10) Unai bamona gaudia oi laloa neganai bona oi itaia lauma dalanai taravatu idia badinaia neganai, do oi diba edena taudia be idia hegeregere gaukara ta ta idia karaia totona.

Durua gaudia oi henia. Gaukara ia karaia tauna be kohu ia abia unai gaukara ia hagugurua totona be gau badana. Reana gaukara kohu, moni, eiava heduru ia abia be namo. Durua gaudia oi henia. Hegeregere, tadikaka ta idia hamaoroa Kingdom Hall do ia hanamoa totona. Vadaeni, do idia hamaoroa dahaka do ia karaia, to unai gaukara ia karaia totona reana kohu haida do ia hoia totona moni sisina ia abia be namo. Reana ia ura haida ese ia idia durua. Unai dainai elda taudia ese tadikaka haida do idia noidia ia idia durua totona, eiava kongregesen lalonai hereva do idia halasia, do idia gwau ‘Tadikaka ta be Kingdom Hall dekenai gaukara do ia karaia, bona umui haida do ia hamaoroa ia umui durua totona.’ Bema unai bamona oi hegaegae, gaukara ta oi henia kava lasi, to gaukara durua gaudia oi henia danu. Bisinesi haheaua dalana ia diba tauna ta ia gwau: “Gaukara kahana tamona sibona haria lasi.”

Gaukara maduna oi haria neganai, taunimanima oi hadibadia oi ese unai tau dekenai gaukara oi henia ia karaia totona. Bema oiemu gabu ia abia bona ia be mai ena siahu kara ta ia karaia totona, unai be heduru gauna ta. Iosua be dagi ia abia Israel besena ia hakaua totona, bona Mose ese hahegani ia abia “hebou taudia iboudiai vairanai . . . [iena] siahu amo do [ia] hasiahua” totona. (Numera 27:​18-23) Kongregesen lalonai, unai bamona do ia vara idia ese kongregesen ena notis bod dekenai gaukara idia abia taudia edia ladana bona edia gaukara idia torea hedinarai neganai.

Idia abia hidi dalana oi abia dae. Vadaeni, hari, gaukara ia abia tauna ia karaia diba. To, inai oi laloatao, bema unai gaukara tauna ia abia hidi dala namodia oi danu oi abia dae oi hagoadaia bada diba. Hegeregere, bema oi be elda tauna ta, reana Kingdom Hall dekenai oiemu ura maikrafon bona kohu atoa gabudia dekenai be ta, to unai gaukara ia abia tadikaka ia atodia gabudia be idau. To, bema oi koua lasi bena platfom ia naria tadikakana be iena ura hegeregerena ia karaia diba, iena gaukara do ia moalelaia bona ia karaia namonamo diba. Sedira, guna idia karaia karana do ia hanamoa. Bisinesi haheaua dalana ia diba tauna ta, ia gwau: “Gaukara oi haria, karaia dalana oi gwauraia lasi. . . . Nega momo, gaukara tauna ena diba unai gaukara karaia dalana dekenai do ia namo herea.”

Ma danu, unai gaukara ia karaia tadikakana ena diba unai kara dekenai be nega momo ia bada bona idia vara diba hekwakwanaidia ia diba. Hekwakwanai idia vara neganai ia hanaidia diba. Danu, reana raraia taudia idia diba lasi to idia vara hekwakwanaidia ia hamaoromaorodia noho. Unai dainai, Keristen naria tauna ta be ia durua tauna ia gwauraia inai bamona: “Bema ia gwau hekwakwanai haida idia vara, iena hereva lau abia dae.”

Oibe, Keristen elda taudia ese idia abia heduru namona be gwauhamata tatau bona hahinedia, idia be mai edia ura danu gaukara idia ura karaia idia hadibadia hegeregerena. Elda taudia e, namona be unai heduru gauna namona umui abia dae! Gaukara haria karana be hekokoroku lasi toana bona ia be heduru lalohisihisi bona lalo-hekwarahi mai badu mamina hamaragia totona. Unai neganai gaukara momo oi karaia diba, to unai sibona lasi, dala oi kehoa ma haida be unai gaukara dekenai diba idia abia totona.