Gau Matamatadia Ia Karadia!

KING Solomon ia gwau: “Gau matamatana ta ia noho lasi, dina henunai.” (Kohelete 1:9) Tanobada bona ena lalona gaudia dekenai unai be momokani, to Iehova ese lauma ai ia karadia gaudia be edena bamona? Solomon ia hereaia tauna, tanobada taudia iboudiai ia hereadia tauna, be tau matamatana ai ia lao. Unai be edena bamona ia vara?

Lagani 29 C.E. ai, Iesu be Ioridane Sinavaina ai ia lao, Ioane ese do ia bapatisoa totona. “Iesu ia bapatisoa, vadaeni ranu dekena amo ia daekau neganai guba be ia kehoa vadaeni, Iesu ese Dirava ena Lauma ia itaia, pune bamona ia diho, ia dekenai ia helai. Bona gado ta guba dekena amo ia boiboi, ia gwau, ‘Inai be lauegu Natuna, egu lalokau, lau moale bada ia dekenai.’ ” (Mataio 3:​16, 17) Unai amo Keriso Iesu be tau matamatana ginigunana ai ia lao bona Dirava ese ia horoa Iena ura do ia karaia totona. Gabeai, ena mauri be boubou gauna bamona ia henia neganai, ia be taravatu o kontraka matamatana ena Herohemaino Tauna ai ia lao, unai kontraka be Dirava ese ia karaia, ia abidia hidi taudia ida. Idia be ‘taunimanima matamatadia’ ai idia lao, Dirava ena lauma ese ia havaradia guba ai do idia mauri totona, bona edia helaro be Iesu ida do idia lohia iena guba Basileiana lalonai.​—2 Korinto 5:17; 1 Timoteo 2:​5, 6; Heberu 9:15.

Lagani handred handred lalodiai, Dirava ese ena lauma amo ia horodia bona ena lauma natuna ai ia halaodia taudia ia gogodia Keriso lalonai; idia be Keristen ekalesiana korikorina, Dirava ese ia karaia gauna matamatana. Petro ese ekalesia taudia ia tore henidia, ia gwau: “Dirava ese umui ia abia hidi vadaeni, umui be iena bese, umui be King ena boubou helaga karaia taudia, bese helagana, bona Dirava ena orea korikori taudia. Dirava ese umui ia abia hidi, iena hoa kara badadia do umui gwauraia hedinarai.” (1 Petero 2:9) Keriso Iesu hegeregerena, idia danu ese sivarai namona do idia harorolaia be namo. (Luka 4:​18, 19) Namona be ekalesia taudia 144,000 iboudiai ese ‘mauri matamata do idia atoa, dabua matamata idia atoa bamona. Inai mauri matamata dainai edia toana be Dirava ena toana bamona, ia ese ia karaia gauna.’ (Efeso 4:24; Apokalupo 14:​1, 3) Unai do idia karaia totona, namona be ‘lauma ena huahua’ do idia havaraia bona edia hesiai gaukarana do idia karaia mai edia momokani ida.​—Galatia 5:​22, 23; 1 Korinto 4:2; 9:16.

Hari inai negai hari gau matamatana be edena bamona? Lagani 1914 ai Apokalupo 11:15 ena hereva ia momokani: “Tanobada biagua siahuna be iseda Lohiabada [Iehova] bona ena Keriso idia abia vadaeni. Bona ia ese tanobada do ia biagua momokani ela bona hanaihanai.” Pavapava siahuna ia abia neganai, Keriso ese Satana mai ena aneru dikadia be guba amo ia negedia diho tanobada kahanai. Unai ese hisihisi tanobada ai ia havaraia, tanobada ibounai tuarina ginigunana bona ia dainai idia vara hisihisidia idauidau unai.​—Apokalupo 12:​9, 12, 17.

Unai ese Dirava ia karaia gauna matamatana, ekalesia unai, ena orena taudia tanobada ai ia hadibadia Iesu ena peroveta herevana ta do idia hamomokania be namo: ‘[Ia gini vadaeni] Basileiana ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.’ “Dokona” be dahaka? Iesu be ma ia gwau: “Unai dinadia lalonai hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi. Bema Dirava ese unai nega do ia hakwadogia lasi, taunimanima ta be do ia mauri diba lasi. To ia abia hidi taudia dekenai ia laloa dainai unai nega do ia hakwadogia.”​—Mataio 24:​3-14, 21, 22.

Iehova ena lauma ese ena gau matamatana ena horoa taudia ia doridia, haroro gaukarana bada hereana idia karaia totona. Lagani 1919 ai Basileia harorolaia taudia be 4,000 bamona, bena idia momo daekau ela bona lagani 1935 bamona ai idia be 50,000 bamona. Peroveta herevana hegeregerena, “edia gadona ena sivarai be tanobada ibounai dekenai idia gwauraia loaloa, bona edia hereva be tanobada ena dokona momokani dekenai idia lao.”​—Roma 10:18.

Ekalesia taudia oredia mo sibodia do idia gogodia, mauri do idia abia totona a? Lasi, Baibel ia gwau Dirava ena aneru ese hisihisi badana ena lai do idia koudia ela bona ‘hutuma bada herea, duahia diba lasi, bese idauidau, iduhu idauidau, kopina idauidau, bona gado idauidau amo’ do idia gogodia. Idia be ‘hisihisi badana amo do idia mai’ asi edia bero, bona tanobada paradaisona ai mauri hanaihanai do idia abia!​—Apokalupo 7:​1-4, 9, 14, NW.

Inai hutuma bada herea be tano 229 ai idia gogodia dainai, idia momo daekau ela bona 4,500,000 bamona. April 17, 1992 ai, taunimanima 11,431,171 be Memorial heboudia ai idia hebou, Iesu ena mase laloatao totona; unai ese ia hahedinaraia ma momo idia mai noho. Unai taunimanima 11,431,171 amo, 8,683 mo ese Memorial paraoana idia ania bona uainana idia inua, badina idia gwau idia be ekalesia matamatana ena orena taudia. Unai orea maragina taudia sibodia idia hegeregere lasi, unai haroro gaukarana bada hereana do idia hagugurua. Hutuma bada herea be idia ida idia gaukara idia hagugurua totona. (Sefania 3:9) Hutuma bada herea edia orea taudia haida, idia hadibadia namonamo vadaeni taudia, ese orea gunalaia dagidia idia abidia vadaeni bona lauma Israel ena Hakaua Oreana taudia ida idia gaukara hebou, gunaguna Israel lasi Nethinim taudia be hahelaga taudia ida idia gaukara hebou hegerererena.​—Nehemia 3:​22-26.

“Guba Matamatana bona Tanobada Matamatana” Ia Karadia

Taunimanima gogodia gaukarana ese moale bada ia havaraia, Iehova ia hereva hegeregerena; ia gwau: “Lau ese guba matamatana bona tanobada matamatana lau karadia inai; gau gunadia do idia lalodia lou lasi, do idia lalodia tao lasi. To umui moale, umui moale hanaihanai, lau karadia gaudia umui moalelaidia. Badina be Ierusalem lau karaia, moale gauna, bona ena taunimanima lau karadia, moale taudia. Lau ese Ierusalem do lau moalelaia, bona egu bese taudia danu do lau moalelaidia; ia lalonai taitai regedia do idia kamonai lou lasi, bona lalohisihisi regedia danu.” (Isaia 65:​17-19) Iehova ese ia karaia gubana matamatana anina be Keriso Iesu bona gau matamatana oreana taudia 144,000, lagani 1,900 lalodiai taunimanima bogaragidia amo ia hoidia, bona mase amo ia hatoredia isi lou. Unai guba matamatana ena hairai ese Ierusalem idia lohiaia vadaeni gavamanidia iboudiai edia ia hereaia. Ia lalonai be Ierusalem Matamatana, guba hanuana, Apokalupo karoa 21 ese ena hairai ia gwauraia gauna.

Ierusalem Matamatana be headava matamata hahinena, Keriso ena adavana, Dirava ese ia horodia taudia 144,000 unai. Idia mase bena lauma ai idia toreisi lou murinai, Keriso ida idia noho hebou guba ai. Apokalupo 21:​1-4 ia gwau ‘guba dekena amo idia diho mai,’ anina be idia edia amo Dirava ese tanobada taudia ia hanamodia. Unai dala ai inai hereva ena anina do ia vara: “Harihari Dirava ena noho gabuna be taunimanima edia huanai do ia noho, bona idia be iena bese taudia do idia lao. Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani.”

Dirava ese guba matamatana ia karaia dainai ita tanikiu henia bada! Unai guba gavamanina do ia noho hanaihanai. Unai gau matamatana taudia mai edia natudia, lauma dalanai idia havaradia taudia hutuma bada herea, ese Dirava ena gwauhamata ma ta idia moalelaia; ia gwau: “Badina be guba matamatana bona tanobada matamatana, lau ese do lau karaia gaudia, be lau vairanai do idia gini hegeregerena, emui natudia bona emui ladana be unai bamona do idia gini noho.”​—Isaia 66:22.

Unai guba matamatana ena horoa taudia edia natudia be “tanobada matamatana” ena badina ai do idia lao; idia be bese matamatana, Dirava garina idia gari taudia, tanobada ai. Hari inai negai, taunimanima idia inai heheni bona kara dikadia idauidau momo idia vara dainai, namona be unai ia senisi bona tanobada besena matamatana, guba matamatana ena hahekau henunai ia noho besena, ese tanobada do ia noholaia be namo. Iehova ena ura be unai. Guba matamatana ia karaia hegeregerena, tanobada matamatana danu ia karaia noho; taunimanima hutuma bada ia gogodia, tanobada besena matamatana mai mainona ena badina ai ia halaodia. Idia mo sibodia be “hisihisi badana amo” do ia hamauridia.​—Apokalupo 7:​14, NW.

Hisihisi badana murinai dahaka do ia vara? Iesu ese ena aposetolo, guba matamatana taudia ginigunadia, ia gwauhamata henidia, ia gwau: “Umui lau hamaoroa momokani, lauegu murina dekenai umui raka taudia, be gau ibounai karaia matamata ena neganai, Taunimanima ena Natuna ena terona diaridiari dekenai do ia helai neganai, terona 12 dekenai do umui helai.” (Mataio 19:28) Ierusalem Matamatana taudia 144,000 be Iesu ida taunimanima do idia hahemaoro henidia. Taunimanima ese sibodia edia namo do idia tahua lasi, to do idia kara heheni mai edia lalokau ida. Bese idauidau hapararadia gaudia do idia ore. Iseda lalokau taudia be mase amo do idia toreisi lou. Taunimanima mai edia kamonai bilion bilion be bese tamona ai do idia lao, mai edia lalo-tamona ida, bona mauri hanaihanai be tanobada paradaisona ai do idia abia.

Unai be nihi gauna lasi, to ia be do ia noho hanaihanai gauna. “Dirava ese ia gwauhamata vadaeni guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13) Oibe, unai be helaro namona. Dirava ena gwauhamata ma ta be: “Harihari be gau ibounai lau karaia matamata inai. . . . Inai hereva . . . be maoromaoro bona momokani.”​—Apokalupo 21:5.