Hisihisi Ania Hanaihanai—Dahaka Dainai Unai be Lalohisihisi Hahedibana?

“Lau kamonai emui haroro tauna umui lulua. Iena kerere be dahaka?”

“Hanaihanai ai ia hamaoroa hel dekenai do ai lao.”

“Haroro tauna matamatana be dahaka ia gwau?”

“Haroro tauna matamatana ia gwau hel dekenai do ai lao, danu.”

“Edia hereva ena idau be dahaka?”

“Ena idau be inai, haroro tauna gunana ese hel ia herevalaia neganai, mai moale danu ia herevalaia; to haroro tau matamatana ese ia herevalaia neganai, mai lalohisihisi bada danu ia herevalaia.”

UNAI hereva be mai ena laulau bukana ta dekenai ia noho, bona unai sivarai ese ia hahedinaraia Baibel idia hadibaia tisa taudia momo, bona dubu dekenai idia lao taudia momo, be hel ena hahediba herevana idia moalelaia lasi. Danu, Clark H. Pinnock ia gwau: “Lagani handred momo lalodiai dubu ena kara momo dainai taunimanima idia lalohisihisi, to idia lalohisihisilaia gauna badana ta be hel ena hahediba herevana, unai hereva ia gwau taunimanima be tauanina bona lalona dekenai panisia ena hisihisi do idia ania ela bona hanaihanai.”

Ena Anina Mauri Ena Kara Goeva Dekenai

Vadaeni, dahaka dainai taunimanima momo be Kerisendom ena laulau dekenai hel ena lahi bada sivaraina idia lalohisihisilaia? (Maua itaia.) Profesa Pinnock ia gwau: “Taunimanima be edia tauanina bona edia lalona dekenai hisihisi idia ania ela bona hanaihanai ena hereva be lalohisihisi bada gauna, bona Dirava ena imana amo unai hisihisi idia davaria ena hereva dainai lau laloa Dirava be ia lalokau lasi.”

Hegeregere, Katolik tomadiho stadilaia tauna Hans Küng ia gwau: “Umui laloa ia namo bema lalokau Diravana be . . . iena taunimanima do ia hahisidia ela bona hanaihanai, hisihisi idia ania noho, helaro lasi, hebogahisi lasi, lalokau lasi, bona edia tauanina bona lalona ia hahisia neganai do ia raraia noho sibona, a? . . . Umui laloa ia be kudou-auka momokani davana henia tauna, a?”a Oibe, Baibel lalonai Dirava ese ita ia hagania iseda inai taudia ita lalokau henidia totona, unai dainai iena inai taudia do ia hahisihisidia ela bona hanaihanai diba lasi, ani? (1 Ioane 4:​8-10) Vadaeni, taunimanima haida idia gwau, hel dekenai ia vara karana bona Dirava ena kara be idia idau, idia gwau unai hahediba herevana be mauri ena taravatu goevana hegeregerena lasi.

Unai hahediba herevana be edena bamona mauri ena taravatu goevana ia hadikaia? Criswell Theological Review bukana lalonai, Profesa Pinnock ia torea, ia gwau: “Hisihisi abia ela bona hanaihanai hahediba herevana be mauri ena taravatu goevana ia hadikaia, badina unai hereva ese ia hahedinaraia taunimanima haida idia mase lasi to Dirava be mai ena ura danu ia hahisidia, tuari neganai Auschwitz kamepa dekenai taunimanima idia hahisidia hegeregerena.” Profesa ia gwau: “Hebogahisi taudia be [hel ena hahediba herevana] idia laloa neganai, edena bamona idia lalo-manau diba? . . . Keristen taudia be edena bamona mai ena dagedage bona mai ena ura dikadika danu davana ia henia Diravana idia harorolaia diba?”

Unai hahediba herevana ena siahu dikana taunimanima edia kara dekenai ia gwauraia neganai, Pinnock ia gwau: “Lau laloa taunimanima be dagedage karadia momo idia karaia badina idia laloa Dirava ese ena inai taudia ia hahisidia.” Ma ia gwau: “Unai hahediba herevana be lalohisihisi gauna bona idia sikelia namonamo ia maoro eiava lasi be gau badana, ani?” Oibe, bema idia laloa Dirava ese hisihisi havaraia karadia ia ura karaia, ita hoa lasi dubu idia lao henia taudia be hel ena lahi hahediba herevana ia maoro eiava lasi idia tahua lou. Vadaeni, dahaka idia davaria? Hisihisi ela bona hanaihanai herevana dekenai hekwakwanai ma ta idia davaria.

Hel bona Hahemaoro Maoromaoro

Hel ena hahediba herevana idia abia dae taudia momo idia laloa Dirava be hahemaoro maoromaoro lasi amo ia kara, bona hahemaoro maoromaoro idia ura henia dainai edia lalona idia hisihisi. Edena dala amo?

Haere ta do oi davaria bema hisihisi ania hanaihanai hel dekenai ena hahediba herevana bona Dirava ia gwauraia hahemaoro maoromaoro karana oi hahegeregeredia neganai, ia gwau: “Mata ena davana be mata, ise ena davana be ise.” (Esodo 21:24) Inai hereva hahedinaraia namonamo totona, namona be hel ena lahi hahediba herevana bona idau negai Israel dekenai Dirava ese ia henidia taravatuna oi hahegeregeredia, unai taravatu ia gwau edia dika davana hegeregerena dika do idia abia. Bema kara dika taudia be hisihisi hanaihanai idia havaraia idia be hisihisi ela bona hanaihanai ena davana do idia abia be maoro. To, ena be taunimanima be (idia dika momokani) bona hisihisi bada idia havaraia diba, to unai kara idia karaia diba lasi ela bona hanaihanai, unai dainai hel ena lahi dekenai hisihisi idia abia ela bona hanaihanai be davana maorona lasi.

Unai bamona panisi idia abia be metau herea. Ia be “mata ena davana be mata, bona ise ena davana be ise” ena taravatu hegeregerena lasi. Bona Iesu ia gwau dika davana ita haloua be maoro lasi, unai dainai Keristen momokani taudia be hisihisi ania hanaihanai karana idia gwauraia be hahemaoro maoromaoro lasi karana.​—Mataio 5:​38, 39; Roma 12:17.

Unai Hahediba Idia Hamomokania Toho

To, abidadama taudia momo ese unai hahediba herevana ena maoro idia hamomokania toho. Edena dala amo? Britain ena toretore tauna ta Clive S. Lewis be ena buka The Problem of Pain lalonai ia gwau: “Bema lau dekenai siahu ia noho, unai hahediba herevana be Keristen ena hahediba amo lau kokia. To Baibel ese ia gwauraia bona Iseda Lohiabada ia gwauraia dainai unai bamona ita karaia diba lasi.” Vadaeni, unai hahediba herevana idia abia dae taudia idia gwau ena be hisihisi ania hanaihanai karana be dika momokani, to danu, idia gwau unai hereva idia do abia dae noho badina idia laloa unai be Baibel ena hahediba herevana ta. Pinnock ia gwau: “Idia gwau unai be lalohisihisi karana, to ia be Baibel ena hahediba herevana dainai namona be idia abia dae, unai amo edia abidadama Baibel dekenai bona unai hereva dikana be gari lasi dekenai idia abia dae idia hahedinaraia diba.”

Reana oi danu oi laloa Baibel ena hereva oi badinaia totona unai hahediba herevana oi abia dae be gau badana. To Baibel ena hereva be dahaka?

[Box on page 5]

OREA TOI IDIA LALO-TAMONA

Protestan taudia momo be Westminster Confession of Faith pepana ia gwauraia hahediba herevadia idia abia dae, ia gwau guba dekenai do idia lao lasi taudia be “hisihisi ela bona hanaihanai do idia ania, bona idia abia panisi be ela bona hanaihanai.” The Encyclopedia of Religion bukana ia gwau: “Roman Katolik ena Keristen tomadiho lalonai, idia gwau hel be panisi abia hanaihanai gabuna . . . unuseniai . . . lahi amo bona dagedage karadia ma haida amo hisihisi idia ania.” Unai encyclopedia bukana ma ia gwau “East kahana Otodoks Keristen tomadiho lalonai idia gwau panisi idia abia taudia be hel ena lahi dekenai do idia lao bona hisihisi do idia ania ela bona hanaihanai.”​—Volume 6, rau 238-9.

[Footnotes]