Keristen Taudia ese Burukadia Idia Durudia Diba Dalana

“AI BE hesiku diba lasi. Aiemai tauanina be idia bodaga lao noho, to aiemai lauma be dina ibounai idia matamata lao noho. . . . Matana idia itaia gaudia be ai laloa lasi, to matana idia itaia lasi gaudia ai laloa. Matana idia itaia gaudia be idia noho daudau lasi, to matana idia itaia lasi gaudia be nega hanaihanai do idia noho.” Aposetolo Paulo ena hereva unai.​—2 Korinto 4:​16-18.

Idaunegai, abidadama taudia ese mata idia itadia lasi gaudia, edia Dirava, Iehova ena gwauhamata ena anina ibounai danu, be idia itadia. Paulo ese ia gwauraidia namo​—edia abidadama idia dogoatao ela bona idia mase, bona idia haida edia mauri laganidia be momo herea. Ia hahedinaraia do ita tohotohodia be namo, ia gwau: “Edia abidadama lalonai inai tau gunadia ibounai idia mase. Dirava ena gwauhamata anina idia do davaria lasi. To daudau herea dekena amo unai gwauhamata gaudia idia itaia, bona idia moale bada.”​—Heberu 11:13.

Dirava ese unai gwauhamata do ia hamomokanidia negana be ia kahirakahira. To ita bogaragidiai gorere taudia bona buruka taudia idia noho, idia laloa reana do idia mauri lasi ela bona inai tanobada oromana dikana ena dokona do idia itaia. Reana idia haida danu be mai edia abidadama ida do idia mase guna, unai gwauhamata iboudiai edia anina hamomokania karadia idia do itadia lasi neganai. Paulo ena hereva 2 Korinto 4:​16-18 ai ese edia lalodia ia hagoadadia diba.

Iehova ese ia idia badinaia taudia iboudiai, gorere taudia bona burukadia danu, be ia lalodiatao. (Heberu 6:10) Baibel ese buruka taudia ia gwauraidia namo, bona Mose ena Taravatu ese matauraidia karana ia gwauraia. (Levitiko 19:32; Salamo 92:​12-15; Hereva Lada-isidia 16:31) Keristen taudia ginigunadia ese burukadia idia kara henidia mai edia hemataurai ida. (1 Timoteo 5:​1-3; 1 Petero 5:5) Baibel bukana ta ese hahine matamatana ta ena kara ena ravana hahinena burukana enai ia gwauraia; sibona ena ura haida ia dadaraia bena lalokau dalanai ia durua. Unai buka ena ladana be Ruta, hahine matamatana ena hegeregerena.

Ia Durua mai ena Lalokau Ida

Ia buruka ia lao hahinena, Naomi, ena noho ia dika. Doe dainai, ia mai ena ruma bese taudia ida ese edia turadia bona edia tano Iuda ai idia rakatanidia, idia lao Moab tanona, unuseniai idia noho. Moab ai Naomi ena adavana ia mase, bena ia bona edia memero ruaosi mo idia noho. Idia bada neganai idia headava, bena idia danu idia mase. Madi, Naomi be natuna lasi bona tubuna lasi, ia do idia naria.

Ia buruka dainai, natuna ma ta ia havaraia diba lasi, bona ena noho be anina lasi bamona. Sibona ena namo ia tahua lasi; ia ura ena natuna ruaosi edia vabu, Ruta bona Oropa, do ia siaidia lao edia sinadia edia ruma, adavadia matamatadia do idia abidia totona, bena ia sibona be ena tano korikorina do ia lou henia. Hari inai negai danu, burukadia haida idia lalo-metau, edia lalokau taudia idia mase vadaeni dainai. Naomi bamona, reana haida ese idia naridia be namo, to idia ura lasi ta do idia hametaua.

Ruta ese ena ravana ia rakatania lasi. Hahine burukana ia lalokau henia, bona Iehova, Naomi ese ia tomadiho henia Diravana, ia lalokau henia danu. (Ruta 1:16) Unai dainai, idia ruaosi idia lou lao Iuda. Iehova ena Taravatu hegeregerena, unai tano ai ogogami taudia be bali utua taudia murinai idia raka diba, bali anidia momorudia gogodia totona. Ruta ena lalona ia hegeregere unai gaukara do ia karaia, ia gwau: “Mani uma do lau lao.” Ia gaukara goada, idia ruaosi ubudia totona.​—Ruta 2:​2, 17, 18.

Ruta ena heabidadama bona ena lalokau Iehova enai ese Naomi ena lalona idia hagoadaia, bena lalohadai namodia ia abidia. Mose ena Taravatu ia diba bona unai tano taudia edia kastom danu, unai dainai ia ese Ruta ia hamaoroa, ena nakimi adavaia dalana amo edia bese edia tano do idia abia lou bona natuna merona ta do ia havaraia diba, edia bese do ia hesiriu totona. (Ruta, karoa 3) Ruta be haheitalai namona, gorere taudia eiava buruka taudia durudia totona sibodia edia ura idia dadaraia taudia ediai. (Ruta 2:​10-12) Hari inai negai, kongregesen ese gorere taudia bona buruka taudia be unai bamona idia durudia diba.

Durudia Dalana Lailaia

Aposetolo edia negai, vabu ogogamidia edia ladadia be Keristen kongregesen ena lisi ta ai idia toredia. (1 Timoteo 5:​9, 10) Unai hegeregerena, hari inai negai elda taudia ese gorere taudia bona buruka taudia, heduru ai idia dabu taudia, edia ladadia be lisi ta ai do idia toredia be namo reana. Kongregesen haida ai elda ta idia duanaia, unai gaukara do ia naria totona. Buruka taudia momo be Naomi bamona, idia ura lasi heduru do idia tahua, unai dainai namona be unai elda ese durudia dalana ia tahua namonamo, bona mai ena hemataurai ida ia sekea, haida ese durudia karadia idia karaia eiava lasi. Bema namo, inai bamona heduru daladia ia tahudia diba: Uilisea ena heau dalana karaia, Kingdom Hall ai do ia vareai totona, bona Kingdom Hall lalonai gabu hegaegaelaia uilisea taudia edia. Bona dala ia karaia diba, Kingdom Hall ai idia mai diba lasi taudia ese hebou edia program be kaset teipi amo do idia kamonaia totona.

Reana namona be elda taudia ese danu hebou laohaidia daladia do idia lailaidia. Taihu burukana ta ia hekwarahi, badina be Kingdom Hall be vaia ia laohaia tauna be dala lasi do ia laohaia. Hari taihu ese tadikaka momo ia rini henidia, ela bona ta ia davaria do ia udaia. Unai dainai ia laloa ia ese tadikaka ia hametaudia. Bema elda ta ese ena dala ia lailaia, ia be unai bamona ia hemarai lasi.

Unai elda ese danu famili haida ia noidia diba, ta ta ena nega ena nega ai buruka taudia do idia vadivadi henidia. Unai dala amo memero kekeni do idia diba, burukadia naridia karana be Keristen taudia edia kara korikorina ta. Unai maduna huaia karana do idia manadalaia be namo. (1 Timoteo 5:4) Sekit naria tauna ta ia gwau: “Lau davaria, memero kekeni bona uhau bona ulato ta ta mo be sibodia edia ura dainai burukadia bona gorere taudia idia vadivadi henidia.” Reana unai kara idia laloa lasi, eiava unai taunimanima kara henidia bona hereva henidia dalana idia daradaralaia; edia tamadia sinadia ese unai idia hadibadia be namo.

Burukadia momo idia ura do idia diba guna edena negai ta ese do ia vadivadi henidia, bena idia naria mai edia moale ida. Bema vadivadi taudia ese ti eiava aniani taina idia laohaia bena idia aniani hebou murinai mereki idia huridia, burukadia do idia hametaudia lasi. Tau burukana ta mai ena adavana, idia ruaosi idia do goada noho, ese dina ta idia abia hidi pura iboudiai edia kongregesen taudia burukadia ta ta ena nega ena nega ai do idia vadivadi henidia. Unai negadiai aniani taina idia laohaia danu. Burukadia ese edia vadivadi idia moalelaia bada.

Burukadia durudia totona, kongregesen momo be dina neganai Kongregesen Buka Stadi ta idia karaia. Kongregesen ta ese ruma bese haida bona headava lasi taudia haida idia noidia, burukadia edia buka stadi do idia lao durudia totona, bena unai grup ai burukadia bona matamatadia idia heduru heheni.

Ita ibounai ese gorere taudia bona buruka taudia durudia daladia ita tahudia be namo. Kingdom Hall ai ita hanamodia sibona lasi, to idia ida ita herevehereva danu be namo. Bema ita boiridia iseda ruma do idia mai aniani totona, eiava pikiniki ita laohaidia, do idia moale. Witness tauna ta be iena bisinesi gaukarana karaia totona gabu idauna ta ia lao negadiai, nega momo pablisa taudia burukadia be ena motuka ai ia udadia. Namona be burukadia ita durudia, mamina do idia abia noho idia be do mai anina kongregesen lalonai. Bema idia laloa idia be anina lasi, unai ese do ia haburukadia haraga eiava edia lalodia do idia boioboio haraga.

Memero kekeni danu, idia gorere o idia raka diba lasi taudia unai, ese heduru idia abia be namo. Witness tauna ta, ena memero toi be mai edia hanamoa diba lasi gorerena, be ia gwau: ‘Bema nega daudau ai ta ia gorere, kongregesen ese do ia durua noho be auka. Namona be memero kekeni haida, pablisa bona pioneer taudia unai, do idia duanaidia, dina iboudiai ta ta ena dina ena dina ai do idia lao ena mahuta patana ia rakatania diba lasi merona dekenai, ia ida dina ena siri do idia herevalaia bona Baibel ena karoa ta do idia duahia.’

Mase be Kahirakahira Neganai

Nega ibounai Iehova ena hesiai taudia ese mase garina idia gari lasi. To, gorere taudia be mamina idia abia kahirakahira do idia mase neganai, edia lalodia ai mamina idauidau idia abidia. Do idia mase murinai, edia varavara danu do idia lalohisihisi bena gabeai edia lalodia do idia hegeregere. Unai dainai, kahirakahira do ia mase tauna ese ena mase do ia herevalaia be namo, Iakob, David, bona Paulo idia kara hegeregerena.​—Genese, karoa 48 bona 49; 1 Hanua Pavapavadia 2:​1-10; 2 Timoteo 4:​6-8.

Doketa ta, Witness tauna unai, be ia gwau: “Mase herevana ita hunia be namo lasi. Lau davaria, bema ta lau hamaoroa lasi iena gorere be mase gorerena, unai ese ia durua lasi.” To, namona be inai ita lalo-pararalaia: Gorere tauna ia ura dahaka do ia diba bona ia ura edena negai unai do ia diba? Haida idia hahedinaraia idia diba kahirakahira do idia mase, bona edia lalohadai edia mase enai idia herevalaidia be namo. Ma haida ese edia helaro idia dogoatao, bona edia turadia be idia ida idia helaro noho be namo.​—Roma 12:​12-15 itaia.

Ena mase be kahirakahira tauna ena tauanina ia manoka herea eiava ia laloa namonamo diba lasi reana, unai dainai ia guriguri be mai ena hekwarahi. Bema ia diba ia “gwauraia diba lasi” herevadia be Dirava ia diba, unai ese ena lalona do ia hagoadaia reana. (Roma 8:​26, 27) Iehova be ena hisihisi bona ena hekwarahi ia diba.

Bema mai dalana neganai, gorere tauna ida umui guriguri be mai anina bada. Tadikaka ta ia gwau: “Egu sinana ena mase be kahirakahira neganai, ena goada be hegeregere lasi do ia hereva, to ena imana ia lokudia, toa ia karaia ia ura ia ida do ai guriguri. Guriguri murinai, Basileia anena ta ai abia, badina be sinagu be nega ibounai miusik ia ura henia bada. . . . Ia moalelaia bada. Siboda eda lalodia edia mamina ita herevalaia be auka, to ita Iehova ena Witness taudia eda mauri idia gwauraia anedia ese idia hahedinaraia.”

Kahirakahira do ia mase tauna ida umui herevahereva neganai, lalokau, gado-namo, bona hebogahisi be mai anina bada. Ena lalona bona ena abidadama do idia hagoadaia herevadia oi herevalaidia be namo, to maumau herevadia bona taunimanima edia hekwakwanai oi herevalaidia be dika. Bona gorere tauna ena manoka hegeregerena oi hereva henia daudau lasi be namo. Bema toana be ia mase rea, namona be oi laloatao hereva ia do kamonai diba reana. Unai dainai emu hereva oi naria namonamo.

Maduna Ita Huaia Hebou

Gorere taudia bona buruka taudia naridia karana be maduna metauna. Edia varavara be unai maduna idia huaia neganai, edia tauanidia bona edia lalodia ia hahekwarahidia. Kongregesen taudia oredia ese idia bogadia hisi bona idia durudia be namo. Ena be gorere taudia idia naridia taudia ese hebou haida idia readia eiava idia haroro momo lasi guna idia karaia bamona, to edia kara be maoro. (Timoteo Ginigunana 5:8 itaia.) Kongregesen taudia edia hebogahisi ese do ia hagoadadia. Reana nega ta ta ai tadikaka o taihu ta be hora haida lalodiai gorere tauna idia naria diba, bena hanaihanai ia naria tauna be mai ena dala, hebou do ia lao henia eiava haroro gaukarana do ia karaia.

Bema oi be gorere tauna, oi danu be kara haida oi karaia diba. Bema emu gorere dainai emu darana ia doko, unai ese emu lalona do ia hahisia, do oi badu, bena do oi ura lasi taunimanima do oi bamodia bona do idia ura lasi oi do idia bamoa. Namona be taunimanima oi tanikiu henidia edia heduru dainai bona idia ida oi gaukara hebou. (1 Tesalonika 5:18) Hisihisi idia ania taudia haida daidiai oi guriguri. (Kolose 4:12) Baibel ena hereva momokanidia oi haerodia, bona vadivadi taudia ida oi herevalaidia. (Salamo 71:​17, 18) Dirava ena orea ia goada ia lao sivaraidia oi kamonaia, unai ese emu abidadama do ia hagoadaia. (Salamo 48:​12-14) Iehova oi tanikiu henia unai sivarai namodia dainai. Bema unai gau oi haerodia, emu dina gabedia be mai edia hairai, dina ia diho ena hairai bamona.

Namona be ita ibounai ese iseda helaro, hekwarahi negadiai iseda lalodia ia gimaia gauna, do ita dogoatao toho. (1 Tesalonika 5:8) Toreisi-lou helarona bona ena badina aukana ita haeroa be namo. Nega vaira ita laloa mai eda moale ida, badina be unai neganai gorere bona buruka ena manoka do idia ore, bona taunimanima iboudiai do idia goada. Mase taudia do idia toreisi lou. (Ioane 5:​28, 29) Inai “matana idia itaia lasi gaudia” be eda abidadama bona eda lalodia edia matadia amo ita itadia. Do oi raraidia noho be namo.​—Isaia 25:8; 33:24; Apokalupo 21:​3, 4.