Inai Oi Laloatao, A?

Gima Kohorona, vanegai gaudia, edia hereva oi moalelaidia a? Bema oibe, inai hereva do oi lalodia lou mai emu moale ida:

▫ Dahaka dainai Israel ena spai taudia be ariara hahinena, Rahaba, ena ruma ai idia noho?

Idia ese Dirava ena taravatu idia badinaia, unai dainai iena ruma idia lao be heudahanai totona lasi. Reana idia laloa bema ariara hahinena ena ruma ai do idia noho, hanua taudia do idia laloa lasi idia be spai taudia. Rahaba ena ruma be hanua ena magu ai, unai dainai hanua idia heautania haraga diba. To gau badana be inai, Iehova ese ia hakaudia lao hari kara dika hahinena dekenai, badina be Dirava ese Israel taudia ia kara henidia sivaraidia ia kamonai dainai ia helalo kerehai bona ena kara dika ia rakatania.​—12/15, rau 24-5.

▫ Badu ese tauanina edena bamona ia hadikaia?

Badu haraga loulou karana ese tauanina ena kolesterol namona ia hamaragia diba bona ena kolesterol dikana ia habadaia diba, bena unai ese kudou bona rara varovarodia ia hadikadia diba.​—12/15, rau 32.

▫ Dahaka ese ita do ia durua, Gima Kohorona bona Noga! momo do ita hariharilaidia totona?

Gima Kohorona bona Noga! do ita lalohadailaidia; hereva haragadia do ita gwauraidia; do ita hegaegae, hereva idauidau herevalaidia totona; do ita laloa guna hida do ita hariharilaidia toho.​—1/1, rau 24-5.

▫ Dahaka dainai Mose ena kara do ita tohotohoa be namo?

Mose ese Iehova ena sisiba ia tahua. Sibona ena namo ia tahua lasi to Dirava ena ladana hahairaia dalana ia tahua. Ia be mai ena abidadama goadana, nega ibounai ia laloaboio lasi Israel besena Lohiana korikorina be Iehova.​—1/15, rau 11.

▫ Dirava ena hahediba ia kwalimu daladia haida be dahaka?

Iena orea taudia ia hadibadia dainai edia lalo-parara Baibel dekenai be ia bada ia lao. Taunimanima be lauma diarina lalonai ia hakaudia vareai, bona manau taudia be “lauma bona momokani” ai Dirava do idia tomadiho henia dalana be ia hadibalaidia. (Ioane 4:24) Unai hahediba ese danu hedibagani bona tanobada ia hadareredia.​—2/1, rau 11-13.

▫ Sisiba henia dalana maorona be dahaka?

Keristen tauna ese ta ia sisiba henia neganai, namona be ia hereva mai ena hebogahisi, mai ena goada, bona mai ena hemataurai ida danu.​—2/1, rau 28.

▫ Dahaka dainai Roman Katolik Oreana ese Maria be guba ai ia daekau herevana ia abia dae?

Iesu ia mase bena lagani handred rua bamona lalodiai Keristen taudia ese Maria be guba ai ia daekau herevana idia laloa lasi. To orea ese Toi Tamona Diravana herevana ia abia dae murinai, Maria ena dagi idia habadaia. Maria be guba ai ia daekau herevana idia abia dae vaitani lasi ela bona November 1, 1950. Pope Pius Namba 12 ia gwau unai hereva be “hahediba herevana momokanina ta, Dirava ese ia hahedinaraia herevana.”​—Munificentissimus Deus.​—2/15, rau 26-7.

▫ Ieremia karoa 24 lalonai, suke huahuadia namodia bona suke huahuadia dikadia ese dahaka dahaka idia laulaulaidia?

Namodia ese Iuda taudia idia laulaulaidia, Babulono idia laohaidia bena gabeai haida be Iuda idia lou henia. Huahua dikadia ese King Sedekia bona ena bamona idia laulaulaidia; ena be Iehova ena ladanai idia gwauhamata vadaeni, to Nebukadnesara idia gwau-edeede henia. Unai hegeregerena, hari inai negai, lauma Israel taudia oredia ese huahua namodia idia havaradia, to Kerisendom ena haroro taudia ese huahua dikadia idia havaradia.​—3/1, rau 14-16.

▫ Quartodeciman taudia be daidia, bona dahaka dainai ita lalodia be namo?

Aposetolo edia nega murinai, haida ese aposetolo edia kara hegeregerena, lagani ta ta amo Nisan 14 ai Lohiabada ena Anibou idia karaia. Idia gwauraidia Quartodeciman taudia, anina be “Namba 14 Taudia.” Unai ita laloa be namo, badina be ia hahedinaraia aposetolo idia mase murinai, haida ese Iesu ena mase laloa lou dalana maorona idia badinaia.​—3/15, rau 4-5.

▫ William Whiston be daika?

Ia be diba momo tauna ta England ai, Sir Isaac Newton ida idia gaukara hebou tauna. Ia be lagani 1667 ai ia vara. Whiston ese Keristen Greek Revarevadia ia toredia hanai, Toi Tamona Diravana herevana ia dadaraia, bona astronomi bona matematiks ia hahedibalaidia. Ia ese Iuda besena sivaraina torea tauna Flavius Josephus ena revareva be English gado ai ia toredia hanai.​—3/15, rau 26-8.

▫ Dirava ese taunimanima ia karaia, ia sibona ena laulau bamona, anina be dahaka? (Genese 1:27)

Tauninanima be mai ena dala, Dirava ena lalokau, hahemaoro goevagoeva, aonega, bona siahu, bona ena kara ma haida danu be do ia tohotohodia.​—4/1, rau 25.