Gilead Sikuli Taudia Idia Davaria “Henia Kara Ena Moale be Bada”

SUNDAY, March 6, 1994 ai, Iehova ena Witness taudia edia hedikwota badana ai idia gaukara taudia, Betele taudia unai, bona vadivadi taudia danu be idia hebou badina Watchtower Bible School of Gilead ena klas namba 96 taudia be edia kosi haorea pepadia do idia abidia. Program ena seamani, Karl F. Klein, lagani 20 bamona Iehova ena Witness taudia edia Hakaua Oreana ai ia gaukara tauna, ese hari sikuli taudia 46 ia hamaorodia, ia gwau: “Iesu ia gwau, henia kara ena moale be bada, abia kara ena moale be maragi. Unai dainai, emui misinari gaukarana be unai bamona​—bema umui henia badabada, do umui moale bada.”​—Kara 20:35.

Sisiba Gabena

Unai murinai, tadikaka idauidau ese sikuli taudia idia haroro henidia. Leon Weaver, Service Department Committee tauna ta, ena hereva ena sinado be “Haheauka ese Iehova Ia Hanamoa.” Ita ibounai be hetoho ita davaridia. (2 Korinto 6:​3-5) Tadikaka Weaver ia gwau: “Hetoho ita davaria neganai, reana ita be siboda dekenai ita tabekau.” To, sikuli taudia ia hamaorodia, ia gwau: “Herevana dahaka hetoho umui davaridia, Iehova ese unai ia laloa. Umui do ia naria, emui goada ia hanaia hedibaganina ta ese umui do ia pidia garina.”​—1 Korinto 10:13.

“Nega Ibounai Emu Gaukara Oi Laloa Bada” be murina hereva ena sinado; Lyman Swingle, Hakaua Oreana tauna ta, ese ia henia. Israel taudia be do idia noholaia gabuna bona do idia karaia gaukarana be nega haida idia sibodia idia abia hidi diba lasi. Tano idia haria bena iduhu ta ta be edia ahuna idia henidia, bona Levi taudia ese do idia karaia gaukarana idia henidia. Unai hegeregerena, hari inai negai misinari taudia bona Betele taudia be do idia noho gabuna bona do idia karaia gaukarana be sibodia idia abia hidi diba lasi. Edena bamona bema ta ia laloa ia hegeregere lasi idia henia gaukarana do ia karaia? Tadikaka Swingle ia gwau: “Iseda abidadama ia havaraia tauna, Iesu, bema oi raraia tao bona ena kara bema oi laloa namonamo, do oi manoka lasi.”​—Heberu 12:​2, 3.

Unai murinai Leonard Pearson, Watchtower Farms Committee tauna ta, ese hereva ta ia henia; ena sinado be “Itaia Namonamo.” Ia gwau: “Bema oi be mai emu kamera namo hereana bona oi ura hairai gauna ena laulau do oi abia to kamera ena matana be ia kerere​—kamera amo oi itaia namonamo lasi​—vadaeni laulau do ia namo lasi.” Kamera haida be gabu ena lababa badana ena laulau idia abia diba, unai bamona ita danu ese tanobada ena kahana ibounai ena haroro gaukarana ita itaia namonamo bona ena bada ita laloaboio lasi be namo. Tadikaka Pearson ia gwau: “Sibodia idia laloa o idia itaia taudia be edia gaukara ai do idia moale lasi. Iehova bona ia ese ia henidia gaukarana idia laloa o idia itaia namonamo taudia be do idia kwalimu.”

“Gau Momo Dainai Oi Moale Diba” be murina hereva ena sinado; John E. Barr, Hakaua Oreana tauna ma ta, ese ia henia. Ia gwau: ‘Iehova moalelaia karana oi negea lasi, bena emu lalona do ia hegeregere, herevana edeseniai oi gaukara.’ David ia moale dainai ia gwau: “Lau dainai hahetoho varodia ese gabu namodia idia makaia. Oibe, lauegu ahuna be namo herea.” (Salamo 16:6) Tadikaka Barr ia gwau: “Emu ahuna namona be Iehova kahirakahira dekenai oi noho. Bema oi laloa unai ahuna be namo herea bona oi moalelaia, Iehova ese oi emu amo do ia kokia lasi.”

Gilead hahediba tauna Jack Redford be unai murinai iena hereva ia henia. Hereva ena sinado be “Emu Malana be Edena Bamona Do Oi Gaukaralaia?” Hereva kava ese dika bada ia havaraia diba! (Hereva Lada-isidia 18:21) Vadaeni, mala biagua dalana be dahaka? Tadikaka Redford ia gwau: “Emu darana oi hadibaia guna, badina be emu malana ese emu darana bona emu lalona ai idia noho gaudia do ia gwauraidia hedinarai.” (Mataio 12:​34-37) Iesu ena haheitalai be hereadae; ena malana ia gaukaralaia Iehova ena ladana hahedibalaia totona. Tadikaka Redford ia gwau: “Hari inai negai Iehova ena hereva kamonai henia ai idia dabu. Unai hereva oi diba vadaeni. Emu malana be ‘idia hadibadia taudia edia maladia.’ Unai dainai namona be nega ibounai emu darana bona emu lalona, Iehova oi gwauhamatalai henia vadaeni gaudia unai, ese emu malana idia biagua.”​—Isaia 50:4.

Hereva ma ta ena sinado be “Iehova Vairanai Oi Raka Noho A?” Ia lalonai Ulysses Glass, sikuli taudia ladadia edia lisi torea tauna, ese ia hahedinaraia guriguri be mai anina bada. Ia gwau: “Bema tama ta ia gaukara goada ena bese ubudia totona to ia hereva henidia lasi bona ia hamaorodia lasi ia lalokau henidia, reana do idia laloa, ia lalokau henidia dainai lasi to unai be ena maduna dikana dainai ia gaukara. Unai be hegeregere ita dekenai. Reana Dirava ena gaukara ita goadalaia. To bema ita guriguri henia lasi, anina be gaukara sibona ita laloa, iseda Tamana lalokauna guba ai ita laloa lasi.”

Theodore Jaracz, Hakaua Oreana tauna ta, ena hereva ena sinado be “Inai Dainai Hutuma ese Dirava Ena Orea Taudia Idia Bamodia.” Lagani ta ta iboudiai taunimanima daha daha be Iehova ena orea ai idia vareai. (Sekaria 8:23) Dahaka ese ia hamomokania Iehova ena Witness taudia be Dirava ena orea taudia? Gau ginigunana be Baibel ibounai idia abia dae Dirava ena Hereva. (2 Timoteo 3:16) Iharuana be politik ai idia vareai lasi. (Ioane 17:16) Ihatoina be Dirava ena ladana idia hahedibalaia. (Ioane 17:26) Ihahanina be lalokau hereadaena idia hahedinaraia. (Ioane 13:35; 15:13) Unai kara dainai, dibura amo ita ia boiria ena diari hereadaena ai ita ia hakaua tauna ena kara namodia ita gwauraia hedinarai goadagoada diba.​—1 Petero 2:9.

Unai hahegoada herevadia murinai, sikuli taudia 46 ese edia kosi haorea pepadia idia abidia. Tano idauidau 16 do idia lao.

Adorahi Ena Program Oromana Idauna

Adorahi ai, Donald Krebs, Betele Komiti taudia ta, ese Gima Kohorona Stadi kwadogina ia naria. Unai murinai sikuli taudia ese program ta ladana “Aonega be Ariara ai Ia Boi Lolo” idia karaia. (Hereva Lada-isidia 1:20) Edia ekspiriens namodia, ariara ai bona bisinesi gabudia ai idia haroro negadia ai idia davaridia gaudia, idia haheitalaidia. Momokani, nega idaudia ai idia hedavari henidia taudia idia haroro henidia gari lasi taudia be Iehova ese ia hanamodia. Sikuli tauna ta ia gwau: “Lau laloa ita be ilapa bamona, utua gaukarana karaia anerudia edia imadia ai. Bema haroro gaukarana ita manadalaia momokani, aneru ese ita idia gaukaralaia diba gaukara bada do ita karaia totona.” (Apokalupo 14:6 itaia.) Hari program ai slaid piksa haida Bolivia, Malta, bona Taiwan amo idia halasidia. Inai klas taudia haida be unai tano toi dekediai idia siaidia lao.

Unai murinai, Wallace bona Jane Liverance​—misinari gaukarana be lagani 17 ai idia karaia taudia​—idia henanadai henidia. October 1993 ai idia boiridia mai Watchtower Farms. Unuseniai Tadikaka Liverance ese Gilead taudia ia hadibadia.

Program ena kahana ma ta be haheitalai hani; edia sinado be “Hemataurai Idia Abia be Maoro Taudia be Edia Buruka ai Oi Matauraidia.” Taunimanima idia buruka idia lao neganai, gaukara haida do idia karaia diba lasi dainai taunimanima ese do idia rakatanidia garina idia gari. (Salamo 71:9) Inai haheitalai amo idia hahedinaraia edena bamona kongregesen taudia iboudiai ese buruka taudia mai edia kamonai idia hagoadadia diba.

Hebou be ane bona guriguri amo idia koua murinai, Jersey City Assembly Hall bona ruma ma haida ai idia hebou taudia 6,220 edia lalodia idia goada lou. Sikuli taudia dainai ai guriguri, idia be edia gaukara gabuna matamatana ai, henia karana amo ia mai moalena do idia abia badabada noho.

[Box on page 26]

Klas Taudia Herevadia

Edia tano idauidau: 9

Idia lao henidia tanodia idauidau: 16

Klas taudia iboudiai: 46

Edia lagani edia averes: 33.85

Hereva momokani idia badinaia laganidia edia averes: 16.6

Ful-taim hesiai gaukarana idia karaia laganidia edia averes: 12.2

[Box on page 27]

Malta Idia Laloa

MALTA ai, lagani momo lalodiai Kerisendom ese Baibel ena hereva momokani idia koua. Lagani 1947 ai Gilead ena klas namba 8 taudia rua, Frederick Smedley bona Peter Bridle, idia siaidia lao Malta, to nega kwadogi murinai gavamani ese ia luludia, bona unai nega amo ma haida idia siaidia lao lasi. Lagani 1948 Yearbook of Jehovah’s Witnesses ia gwau: “Roman Katolik Tomadiho Oreana ena inai karana dainai, hari misinari taudia rua be kota ai bona gavamani taudia dekediai idia haoredia horadia be edia haroro gaukarana ai idia haoredia horadia hegeregeredia. Fada taudia idia gwau Malta be Katolik taudia edia, taunimanima idaudia idia siri be namo.” Unai nega amo lagani 45 mai kahana idia ore vadaeni bona hari, Gilead ena klas namba 96 amo misinari taudia hani idia siaidia lao Malta.

[Picture on page 26]

Watchtower Bible School of Gilead Ena Klas Namba 96

Inai lisi ai, laini edia namba be vairana kahana amo ia daekau murina kahana, bona laini ta ta ai idia gini taudia edia ladadia be lauri kahana amo ela bona idiba kahana. (1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.