Basileia Haroro Ripoti

Basileia Ena Sivarai Namona Do Idia Harorolaia

GUNAGUNA ema bona hari Dirava ena inai tauna bada, Satana Diabolo, ese politikol gavamani bona tomadiho koikoi ia gaukaralaidia tomadiho momokani ia bada dalana koua totona. To unai dala do ia koua diba lasi. Iesu ia gwau, “Basileia ena Sivarai Namona be tanobada ibounai dekenai do idia harorolaia [ia gwau lasi “sedira do idia harorolaia”, o “reana do idia harorolaia diba”].”​—Mataio 24:14.

Ia hedinarai, Satana be Greece dekenai ia kwalimu lasi. Unai tano dekenai Greek Otodoks Dubu ese Iehova ena Witness taudia edia Basileia ena sivarai namona harorolaia gaukarana idia koua toho. To do ai herevalaia haheitalai ese ia hahedinaraia, ena be dagedage ia vara, kudou namo taudia ese Baibel ena hereva momokani idia kamonai.

Lagani 30 idia ore lalonai, Greek Otodoks pris ta ese sivarai namona ia abia dae, bona ia gwau ia ura Iehova ena Witness tauna ai do ia lao. To iena varavara ese ena ura idia dadaraia bona Witness taudia danu do ia hebamo lasi totona idia hereva auka henia. Iena famili ia hamoalea totona, ena pris gaukara ia karaia noho; to ia abia dae Iehova ena Witness taudia ese idia durua hereva momokani ia diba totona, bona ia rakatania badina tomadiho koikoi lalonai dagi bada ia abia.

To herevana, nega haida bema mai ena dala neganai, Iehova ena Witness taudia ia gwauraidia namo. Nega haida, taunimanima ia hagoadadia bema idia ura Baibel ena hereva momokani idia diba, Witness taudia danu idia stadi be namo. Lagani momo lalonai, momo be ena hereva hegeregerena idia karaia.

Vanegai, unai pris tauna ia gorere dikadika bona ia laloa reana kahirakahira do ia mase. Hospital dekenai ia noho neganai, iena natudia ibounai ia boiridia bona ena bedi badinai idia hebou.a Bena idia dekenai ia hahedinaraia bema ia mase, do idia itaia lou diba. Idia dekenai Baibel ena hahediba Iehova ese taunimanima do ia hatoredia isi lou bona tanobada paradaiso ai do idia noho ia gwauraia; to bema idia ura unai ia vara idia itaia, idia ese Baibel ena hereva momokani do idia dibaia bona tomadiho koikoi do idia rakatania. Ia noidia goadagoada Iehova ena Witness taudia danu do idia hebamo totona, bona idia amo Keristen momokani taudia ai do idia lao dalana idia dibaia.

Daudau lasi murinai unai pris ia mase. To iena natudia dekenai ia henia sisiba ese gau namodia ia havaraia. Iena natuna kekeni bona iena varavara momo danu, be Iehova ena Witness taudia bona edia gaukara idia inai henia momokani. To ena tamana ia gorere noho lalonai, ena kudouna amo ia noinoi herevana ia dadaraia diba lasi, unai dainai Iehova ena Witness taudia ia hereva henidia bena Baibel ia stadilaia matamaia. Vanegai, ia be Witness hahinena ta ai ia lao, ena mauri ia gwauhamatalaia Iehova Dirava dekenai bona ranu bapatiso amo ena gwauhamata ia hahedinaraia.

Greece dekenai, bona ma tano 230 bona haida lalodiai, Iehova ena Witness taudia be Dirava ena lauma helaga ena siahu dekenai idia tabekau. Lauma helaga ena heduru ibounai amo idia ese Iesu ena peroveta herevana idia hagugurua: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinaraia Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”​—Kara 1:8.

[Footnotes]