Tomadiho Momokani Taudia Hutuma Bada Herea​—Edena Gabu amo Idia Mai?

“Lauegu matana lau negea, hutuma bada herea lau itaia, . . . Idia be bese idauidau, iduhu idauidau, kopina idauidau, bona gado idauidau. Idia iboudiai be helai gabuna vairanai bona Mamoe ena Natuna vairanai idia gini.”​—APOKALUPO 7:9.

1. Dahaka dainai ita ura Apokalupo ena peroveta matahanaidia edia anina hari inai negai ita diba?

LAGANI 100 C.E. kahirakahira ia ginidae neganai, matahanai haida lalonai, aposetolo Ioane ese Iehova ena ura hahedinaraia hoa gaudia namodia ia itaia. Unai matahanai lalodiai ia itaia gaudia haida be harihari idia guguru noho. Ma gau haida be kahirakahira do idia guguru. Unai matahanai iboudiai be Iehova ena ura, ena ladana mauri gaudia iboudiai vairadiai do ia hahelagaia, idia hahedinaria. (Esekiel 38:23; Apokalupo 4:11; 5:13) Ma danu, unai matahanai be mai edia anina ita ta ta ibounai eda mauri abia dalana dekenai. Unai be edena bamona?

2. (a) Ena matahanai namba 4 lalonai, aposetolo Ioane ese dahaka ia itaia? (b) Unai matahanai dainai dahaka henanadai haida do ita lalodia?

² Apokalupo ena matahanai namba 4 dekenai, Ioane ese aneru ia itadia dika bada do idia havaraia laidia idia dogoatao ela bona “iseda Dirava ena hesiai taudia” be edia baguna dekenai Dirava ena maka do idia abia. Murinai ia ese hoa bada gauna ia itaia​—“hutuma bada herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau,” mai lalo-tamona ida Iehova idia tomadiho henia bona iena Natuna idia hanamoa. Ta ese Ioane ia hamaoroa, unai taudia be hisihisi bada hereana amo do idia roho mauri. (Apokalupo 7:​1-17) Idia gwauraidia “iseda Dirava ena hesiai taudia” be daidia? Bona unai hisihisi amo idia roho mauri “hutuma bada herea” taudia be daika? Oi be idia ta ai do oi lao, a?

“Iseda Dirava Ena Hesiai Taudia” be Daidia?

³ Hua hani iena mase vairanai, Iesu ese sibona ia gwauraia “mamoe naria tauna namona” bona ia murinai idia raka taudia ia gwauraidia “mamoe,” idia dainai sibona ena mauri do ia henia taudia. Haheitalai ta ena mamoe serina lalonai ia davaria mamoedia bona murinai ia naridia namonamo ia gwauraidia bada. (Ioane 10:​1-18)a Mai ena lalokau ida, Iesu ese ena souli ia henia ena mamoe totona, unai amo edia kara dika bona mase amo ia ruhadia dalana ia kehoa.

⁴ To unai ia do karaia lasi neganai, Mamoe Naria Tauna Namona, Iesu, ese ena hahediba taudia ia haboudia guna. Ioane Bapatiso ese hahediba taudia ginigunadia ia hakaudia lao ia dekenai, ia be Iesu ena haheitalai dekenai “iduara naria tauna.” Iesu be ‘Abraham ena garana’ ai idia ura lao taudia ia tahudia. (Genese 22:18; Galatia 3:​16, 29) Edia kudou dekenai guba Basileia laloa bada karana ia habadaia, bona do ia lao bona edia gabu ta do ia hegaegaelaia ena guba Tamana ena ruma lalonai ia hamomokania idia dekenai. (Mataio 13:​44-46; Ioane 14:​2, 3) Ia hereva maoro, ia gwau: “Ioane Bapatiso ena haroro nega ia mai bona harihari Guba Basileia be taunimanima ese idia heatu henia noho, bona heatu taudia ese idia ura dogoatao momokani.” (Mataio 11:12) Unai idia tahua gauna idia abia totona, ia murinai idia raka taudia be Iesu ese ia gwauraia mamoe serina lalonai idia noho.

5. (a) Apokalupo 7:​3-8 ese ia gwauraidia “iseda Dirava ena hesiai taudia” be daidia? (b) Dahaka ese ia hahedinaraia ma taunimanima momo be lauma Israel taudia ida do idia tomadiho hebou?

⁵ Apokalupo 7:​3-8 dekenai, guba gabuna idia tahua bona idia davaria taudia ia gwauraidia “iseda Dirava ena hesiai taudia.” (1 Petero 2:​9, 16 itaia.) Unuseniai ia gwauraidia 144,000 taudia be Iuda bese taudia sibona, a? Iesu ena haheitalai dekenai mamoe serina lalonai idia noho taudia be Iuda taudia sibona, a? Lasi momokani; idia be Dirava ena lauma Israel oreana taudia, idia iboudiai be Keriso danu Abraham ena lauma garana oreana lalonai idia noho. (Galatia 3:​28, 29; 6:16; Apokalupo 14:​1, 3) Momokani, nega ta do ia ginidae, unai orea ena namba momokanina do idia hahonua. Murinai dahaka do ia vara? Baibel ese ia gwauhamatalaia bamona, ma haida​—idia be hutuma bada herea​—be lauma Israel taudia ida Iehova do idia tomadiho henia.​—Sekaria 8:23.

“Mamoe Idaudia” be Idau Bese Keristen Taudia, A?

⁶ Ioane 10:​7-15 lalonai Iesu ese mamoe serina ta ia gwauraia murinai, ma ta ia gwauraia, ia gwau: “Lau be mai egu mamoe idaudia haida danu idia noho. Idia be inai magu lalonai idia noho lasi. Idia danu do lau hakaudia mai, vadaeni egu gadona do idia kamonai, vadaeni orea do ia tamona, naria tauna danu do ia tamona.” (Ioane 10:16) Unai “mamoe idaudia haida” be daidia?

⁷ Kerisendom ena Baibel herevalaia taudia momo idia laloa unai mamoe idaudia be Idau Bese Keristen taudia bona mamoe serina lalonai idia noho guna taudia be Iuda taudia sibona, Taravatu gwauhamatana henunai idia noho taudia unai, bona idia gwau unai orea rua be guba dekenai do idia lao. To, Iesu be ia vara neganai ia be Iuda tauna bona ena vara dainai ia be Taravatu gwauhamatana henunai. (Galatia 4:4) Ma danu, idia gwau mamoe idaudia be Idau Bese Keristen taudia sibodia bona idia be guba maurina do idia abia taudia ese Dirava ena ura badana idia laloaboio. Iehova ese taunimanima ginigunadia ia havaradia bona Eden umana lalonai ia atodia neganai, ia hahedinaraia iena ura be taunimanima ese tanobada do idia hahonua, tanobada be paradaiso ai do ia lao bona ena naria taudia ese mauri hanaihanai do idia abia​—bema Havaraia Tauna idia matauraia bona idia badinaia.​—Genese 1:​26-28; 2:​15-17; Isaia 45:18.

7, 8. (a) Dahaka dainai haida idia gwau mamoe idaudia haida be Idau Bese Keristen taudia be kerere? (b) Dirava ena ura inai tanobada dekenai ese edena bamona ita idia durua mamoe idaudia be daidia ita diba totona?

⁸ Adam ia kara dika neganai, Iehova ena ura ia haidaua lasi. Mai ena lalokau ida Dirava ese Adam ena natudia edia dala ia kehoa Adam ese ia laloa bada lasi gauna do idia moalelaia totona. Iehova ia gwauhamata ia ese hamauria tauna, garana ta, do ia abia isi, unai amo tanobada besedia iboudiai ese hahenamo do idia abia diba. (Genese 3:15; 22:18) Unai gwauhamata ia gwau lasi tanobada taudia namodia iboudiai be guba dekenai do ia abidia dae. Iesu ese ia murinai idia raka taudia dekenai inai guriguri ia hadibaia: ‘Oiemu Basileia do ia mai, oiemu ura gauna tanobada dekenai do idia karaia, guba dekenai idia karaia bamona.’ (Mataio 6:​9, 10) Nega sisina gunanai, Ioane 10:​1-16 ena haheitalai ia do gwauraia lasi neganai, Iesu ese ena hahediba taudia ia hamaorodia ena Tamana ese ‘seri maragi’ sibona dekenai guba Basileiana ia henia gwauraia. (Luka 12:​32, 33) Unai dainai, iena haheitalai lalonai, Iesu be sibona ia gwauraia Mamoe Naria Tauna Namona, sibona ena souli ia henia ena mamoe dainai tauna ita duahia neganai, Iesu ena lalokau naria karana henunai ia hakaudia mai taudia, iena guba Basileiana henunai tanobada ai do idia noho taudia, ita laloa lasi be kerere.​—Ioane 3:16.

9. Guna, lagani 1884 dekenai, Bible Student taudia idia laloa mamoe idaudia be daidia?

⁹ Lagani 1884 ai, Watch Tower magasin ia hahedinaraia mamoe idaudia be mai edia dala tanobada dekenai do idia noho, unai be idaunegai Dirava ena ura hegeregerena. Unai Bible Student taudia gunadia idia lalo-parara unai mamoe idaudia haida be guna idia mauri bona idia mase, Iesu be tanobada dekenai ia do haroro lasi neganai. To, hereva haida idia laloa kerere. Hegeregere, idia laloa horoa taudia iboudiai be edia guba ahuna idia abia murinai, mamoe idaudia do idia gogodia. To, idia diba unai mamoe idaudia be Idau Bese Keristen taudia mo sibona lasi. Dala ia kehoa noho Iuda bona Idau Bese Taudia be mamoe idaudia ai do idia lao totona, herevana idia be edena bese bona edena iduhu amo.​—Kara 10:​34, 35 itaia.

10. Iesu ese ita ia gwauraia ena mamoe idaudia totona, dahaka ita hahedinaraia momokani be namo?

¹⁰ Iesu ese ia gwauraia hegeregerena, herevana idia be edena bese eiava edena iduhu amo idia mai, gau badana be mamoe idaudia idia abia dae Iesu Keriso be Mamoe Naria Tauna Namona. Unai ena anina be dahaka idia karaia? Namona be idia hahedinaraia idia manau bona idia ura ta ese ia hakaudia, unai be mamoe edia kara toana. (Salamo 37:11) Seri maragi taudia hegeregerena, namona be “iena [mamoe naria tauna namona ena] gadona do idia diba,” bona idia naria namonamo, edia lalona idia ania taudia ese idia hakaudia kerere garina. (Ioane 10:4; 2 Ioane 9, 10) Mamoe totona Iesu ese ena mauri ia henia karana idia laloa bada bona idia abidadama henia be gau badana. (Kara 4:12) Mamoe Naria Tauna Namona ese ia hamaorodia Iehova mo sibona dekenai hesiai gaukara helagana do idia karaia, Basileia do idia tahua guna, tanobada amo do idia gini siri, bona sibona ena ura ia tahua lasi lalokauna idia hahedinarai heheni neganai, namona be iena hereva do idia ‘kamonai.’ (Mataio 4:10; 6:​31-33; Ioane 15:​12, 13, 19) Iesu ese iena mamoe idaudia edia toana ia gwauraia hegeregerena oi karaia, a? Oi ura unai bamona do oi karaia, a? Iesu ena mamoe idaudia ai idia lao taudia iboudiai ese idia bamoa namonamo diba be gau namo hereana ta!

Basileia Siahuna Matauraia Karana

¹¹ Unai parabole herevana ia gwauraia bena hua haida murinai, Iesu be Ierusalem dekenai ma ia noho. Dubu helaga ataiai, Olive Ororona dekenai ia helai neganai, ia ese iena hahediba taudia dekenai ‘do ia giroa mai, bona tanobada dokona toana’ ena sivarai ia gwauraia. (Mataio 24:3) Ia ese mamoe haboudia karana ma ia gwauraia lou. Ia gwauraia herevadia ta be inai, ia gwau: “Taunimanima ena Natuna be mai ena hairai danu do ia mai, mai ena aneru helagadia danu, ena terona namo herea momokani latanai do ia helai. Vadaeni bese ibounai be iena vairana dekenai do idia haboua. Vadaeni ia ese idia do ia hapararaia, mamoe naria tauna ese mamoe bona nanigosi ia hapararaia bamona. Mamoe be ena idiba kahana dekenai do ia atoa, nanigosi be ena lauri kahana dekenai do ia atoa.” Unai parabole lalonai, Iesu ese ia hahedinaraia Pavapava ese ia hapararaia taudia be edia kara iena ‘tadikaka’ dekenai hegeregerena, do ia hahemaoro henidia. (Mataio 25:​31-46) Unai tadikaka be daidia? Idia be lauma helaga amo ia horoa Keristen taudia, unai dainai idia be ‘Dirava ena natudia.’ Iesu be Dirava ena vara guna Natuna. Unai dainai, idia be Keriso ena tadikaka. Idia be Apokalupo 7:3 ese ia gwauraia “iseda Dirava ena hesiai taudia,” taunimanima dekena amo ia abidia hidi bona Keriso ida iena guba Basileia lalonai do idia noho taudia unai.​—Roma 8:​14-17.

12. Dahaka dainai taunimanima ese Keriso ena tadikaka idia kara henidia dalana be mai anina bada?

¹² Taunimanima ese Basileia do idia abia taudia idia kara henia dalana be mai anina bada. Iesu Keriso bona Iehova ese idia lalodia hegeregerena oi lalodia, a? (Mataio 24:​45-47; 2 Tesalonika 2:13) Tau ta ena kara unai horoa taudia dekenai ese ena laloa Iesu Keriso bona iena Tamana, Guba bona Tanobada Pavapava Badana dekenai danu ia hahedinaraia.​—Mataio 10:40; 25:​34-46.

13. Lagani 1884 ai, Bible Student taudia edia diba mamoe bona nanigosi parabolena dekenai be dahaka?

¹³ August 1884, Watch Tower magasin lalonai, ia hereva maoro ia gwau unai parabole lalonai “mamoe” taudia be mauri goevadaena tanobada dekenai do idia abia diba. Danu, idia diba unai parabole hegeregerena do ia vara Keriso be ena guba terona hairaina amo ia lohia neganai. To, edena nega ai ia ese unai hapararaia gaukarana do ia hamatamaia, bona do ia karaia ela bona edena negai, be unai neganai idia do diba namonamo lasi.

14. Lagani 1923 ai, hebouhebou ena hereva ta be edena bamona Bible Student taudia ia durudia Iesu ia perovetalaia parabolena do ia guguru negana do idia diba totona?

¹⁴ To, lagani 1923 ai, hebouhebou ena hereva ta dekenai, J. F. Rutherford, Watch Tower Society ena presiden, ese mamoe bona nanigosi parabole herevana do ia guguru negana ia herevalaia. Dahaka dainai? Badina, unai parabole ese ia hahedinaraia Pavapava ena tadikaka​—haida—​be unai neganai tanobada dekenai idia do noho. Taunimanima huanai lauma helaga amo idia horoa taudia sibodia be iena tadikaka idia gwauraidia diba. (Heberu 2:​10-12) Lagani 1,000 Lohia Negana ibounai lalonai idia be tanobada dekenai do idia noho lasi dainai, taunimanima be Iesu ia gwauraia dalana amo do idia kara namo henidia diba lasi.​—Apokalupo 20:6.

15. (a) Dahaka danu ese unai Bible Student taudia ia durudia, bena Iesu ena parabole lalonai ia gwauraia mamoe be daika idia diba? (b) Mamoe taudia be edena bamona idia hahedinaraia idia be Basileia idia laloa bada?

¹⁵ Lagani 1923 ai, unai hereva lalonai, Lohiabada ia gwauraia mamoe bona nanigosi taudia idia gwauraidia hedinarai toho, to unai parabole ena anina ibounai do idia lalo-pararalaia diba lasi ela bona hereva ma haida do idia lalo-pararalaia guna. Lagani haida idia hanai lalonai, Iehova ese sisina sisina unai mai anina bada herevadia edia anina be iena hesiai taudia dekenai ia hahedinaraia. Haida be inai: Lagani 1927 ai, ia hedinarai goevagoeva “hesiai tauna mai ena kamonai bona mai ena kara maoromaoro” be tanobada dekenai lauma helaga amo idia horoa Keristen taudia oreana ibounai; danu lagani 1932 ai, mai gari lasi ida Iehova ena horoa hesiai taudia idia bamodia, Iehonadab ese Iehu ia bamoa bamona, be mai anina bada idia lalo-pararalaia. (Mataio 24:45; 2 Hanua Pavapavadia 10:15) Unai nega lalonai, Apokalupo 22:​17 ena hereva hegeregerena, unai mamoe bamona taudia idia hagoadaia taunimanima dekenai Basileia ena sivarai do idia harorolaia. Mesia ena Basileia idia laloa bada karana ese ia hasiahudia Lohiabada ena horoa taudia dekenai hebogahisi kara idia hahedinaraia sibona lasi, to Keriso dekena amo edia mauri Iehova dekenai do idia gwauhamatalaia, bona iena horoa taudia do idia bamodia momokani, bona mai goada ida do idia gaukara hebou. Unai bamona oi karaia noho, a? Idia karaia taudia dekenai, Pavapava do ia gwau: “Umui mai, egu Tamana ese ia hanamoa taudia e, basileia umui abia, tanobada ia karaia neganai ia ese ia karaia hegaegae umui emui.” Nega vairai, Basileia ena siahu henunai, mauri goevadaena ela bona hanaihanai be tanobada dekenai do idia abia diba.​—Mataio 25:​34, 46.

“Hutuma Bada Herea”​—Edeseniai Idia Lao?

¹⁶ Nega sisina lalonai, Iehova ena hesiai taudia idia laloa Apokalupo 7:​9, 10 ia gwauraia hutuma bada herea be Ioane 10:16 ia gwauraia mamoe idaudia, bona Mataio 25:33 ia gwauraidia mamoe amo ia idau. Badina Baibel lalonai ia gwau idia be ‘helai gabuna badana vairanai idia gini,’ bona idia laloa idia be guba dekenai do idia noho, terona dekenai do idia helai lasi, bona Keriso ida do idia lohia hebou lasi, to iena siahu henunai terona vairanai do idia gini. Idia laloa idia be abidadama bada lasi Keristen taudia, sibodia edia ura idia dadaraia momokani lasi taudia unai. Lagani 1935 ai unai lalohadai idia hamaoromaoroa.b Apokalupo 7:9 ena anina idia tahua Mataio 25:​31, 32 bona ma siri haida edia heduru amo, bona unai ese ia hahedinaraia goevagoeva taunimanima be inai tanobada dekenai idia noho neganai, idia be ‘helai gabuna badana vairanai’ idia gini. Danu, idia hahedinaraia Dirava abidadama henia karana ena taravatu be rua lasi. Ia lalo-namo henia taudia iboudiai be ia idia abidadama henia noho be gau badana.​—Mataio 22:​37, 38; Luka 16:10.

17, 18. (a) Lagani 1935 murinai, mauri hanaihanai tanobada dekenai ena helaro idia abia taudia idia momo herea ena badina be dahaka? (b) Unai hutuma bada herea taudia be mai edia goada ida dahaka mai anina bada gaukarana idia karaia noho?

¹⁷ Lagani momo lalodiai Iehova ena taunimanima ese Dirava ia gwauraia gwauhamatadia tanobada totona idia kikilaia momo. Lagani 1920 lalonai idia laloa do ia vara gauna dainai, idia gwau “Hari Idia Mauri Taudia Milion Momo Do Idia Mase Lasi.” To unai nega lalonai, Dirava ese ia kehoa mauri dalana idia abia dae taudia be milion momo lasi. Hereva momokani idia abia dae taudia kahirakahira ibounai dekenai lauma helaga ese guba maurina helarona ia havaraia. To, lagani 1935 murinai, kara idauna ia vara. Ita gwau lasi Watchtower magasin ese mauri hanaihanai tanobada dekenai ena helaro idia laloa lasi vaitani. Badina lagani momo lalodiai Iehova ena hesiai taudia ese unai helaro idia kikilaia momo, bona Baibel ia gwauraia taudia idia tahudia. To, Iehova ena nega korikori dekenai, dala ia kehoa idia sibodiai idia hahedinaraia totona.

¹⁸ Guna, ripoti ese idia hahedinaraia lagani momo lalodiai Memorial heboudia dekenai taunimanima momo ese paraoa idia ania bona uaina idia inua. To lagani 1935 murinai, lagani 25 idia do ore lasi neganai, Keriso ena mase laloatao Memorial heboudia dekenai idia lao taudia edia namba ia bada momokani, bona idia 100 100 bona ma haida amo 1 1 sibona ese paraoa idia ania bona uaina idia inua. Unai taudia be daidia? Idia be hutuma bada herea taudia ai idia lao gwauraia taudia. Ia hedinarai goevagoeva, Iehova ena nega ia ginidae ia haboudia totona, bona ia hegaegaelaidia kahirakahira do ia vara hisihisi bada herea negana amo do idia roho mauri totona. Peroveta hereva hegeregerena, idia be “bese idauidau, iduhu idauidau, kopina idauidau, bona gado idauidau” amo idia mai. (Apokalupo 7:9) Idia be mai edia goada ida Iesu ese ia perovetalaia gaukarana idia karaia, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.”​—Mataio 24:14.

[Footnotes]

Oiemu Haere be Dahaka?

◻ Dahaka dainai Apokalupo karoa 7 ena matahanai ita laloa bada?

◻ Dahaka dainai Ioane 10:16 ia gwauraia mamoe idaudia be Idau Bese Keristen taudia mo sibodia lasi?

◻ Baibel ese ia gwauraidia mamoe idaudia taudia ese dahaka kara idia hahedinaraia be namo?

◻ Mamoe bona nanigosi parabole ese Basileia ena siahu matauraia karana be edena bamona ia hahedinaraia?

◻ Dahaka ese ia hahedinaraia Apokalupo 7:9 ia gwauraia hutuma bada herea taudia haboudia negana ia ginidae vadaeni?

3. (a) Ioane 10:​1-18 dekenai Iesu ese ena kara ia murinai idia raka taudia dekenai edena bamona ia haheitalaia? (b) Ena boubou masena amo Iesu ese dahaka dala ia kehoa ena mamoe totona?

4. Iesu ese ia gwauraia hegeregerena, idia haboua guna mamoe bamona taudia be daidia?

6. Ioane 10:16 ese dahaka do ia vara gauna ia gwauraia?

11. (a) Ia giroa lou toana ia gwauraia neganai, Iesu ese mamoe bona nanigosi be edena bamona ia herevalaidia? (b) Iesu ese ia gwauraia tadikaka be daidia?

16. (a) Apokalupo 7:9 ese ia herevalaia hutuma bada herea taudia dekenai, Bible Student taudia edia lalohadai kereredia be dahaka? (b) Edena negai bona badina be dahaka edia lalohadai kerere idia hamaoromaoroa?