Hutuma Bada ese Hesiai Gaukara Helagana Idia Karaia
“Dina bona hanuaboi iena dubu helaga lalonai Dirava ena hesiai gaukara idia karaia noho.”—APOKALUPO 7:15.
1. Lagani 1935 ai, Baibel dekenai, dahaka idia lalo-pararalaia?
MAY 31, 1935 ai, Washington, D.C. dekenai, Iehova ena Witness taudia edia hebouhebou dekenai idia lao taudia idia moale bada. Unuseniai, Apokalupo 7:9 ese ia gwauraia hutuma bada be nega ginigunana idia hedinarai goevagoeva, bona unai be Baibel ena hereva ma haida bona idia vara hamatamaia gaudia hegeregeredia.
2. Dahaka ese ia hahedinaraia idia hutuma noho taudia idia lalo-parara Dirava ese ia boiridia lasi guba maurina do idia abia totona?
2 Unai nega ena pura 6 bamona vairanai, Iehova ena Witness taudia ese edia kongregesen dekediai Memorial Hebouna idia karaia neganai, idia hebou taudia 10,681 (6 6 amo ta ta) be paraoa idia ania lasi bona uaina idia inua lasi, bona idia 3,688 be Dirava ena Basileia harorolaia taudia. Dahaka dainai paraoa idia ania lasi bona uaina idia inua lasi? Badina Baibel dekena amo hereva idia lalo-pararalaia dainai, idia diba guba maurina do idia abia totona Dirava ese ia boiridia lasi, to Iehova ia kehoa lalokau dalana ma ta idia moalelaia diba. Unai dainai unai hebouhebou dekenai, hereva henia tauna ia gwau: “Mai edia helaro tanobada dekenai mauri hanaihanai do idia abia taudia mani umui gini toreisi” neganai, dahaka ia vara? Taunimanima tausen momo idia gini toreisi bona hebouhebou taudia be mai moale ida nega daudau idia boiboi.
3. Hutuma bada taudia be daika idia dibaia murinai, dahaka dainai unai diba ese edia haroro gaukara ia habadaia, bona Witness taudia edia hemami be edena bamona?
3 Unai hebouhebou dekenai idia lao taudia idia dibaia gaudia ese idia hagoadadia edia haroro gaukara idia goadalaia totona. Idia lalo-parara harihari, inai tanobada gunana ia do ore lasi negana lalonai, taunimanima tausen haida sibona lasi, to taunimanima hutuma bada ese Iehova ia kehoa hahemauri dalana dekenai do idia vareai diba, bena paradaiso tanobadana dekenai mauri hanaihanai do idia abia diba. Hereva momokani idia ura henia taudia dekenai unai sivarai idia hahedinaraia neganai edia kudou idia marere bada! Iehova ena Witness taudia idia diba haroro gaukara badana ia do noho—ia be moale gaukarana. Lagani momo murinai, John Booth, gabeai ia be Hakaua Oreana ena memba tauna ta ai ia lao, ia gwau: “Unai hebouhebou dekenai ai dibaia gaudia dainai ai moale bada.”
4. (a) Lagani 1935 murinai, hutuma bada taudia gogodia gaukara ena bada be dahaka? (b) Hutuma bada taudia be edena bamona idia hahedinaraia edia abidadama ia goada?
4 Murina laganidia ai, Iehova ena Witness taudia edia namba be ia bada daekau momokani. Tanobada Ibounai Tuarina Iharuana lalonai, ena be dagedage bada idia davaria, to lagani 10 lalodiai edia namba be kahirakahira nega toi amo ia bada daekau. Bona lagani 1935 dekenai idia haroro pablisa taudia be 56,153, to lagani 1994 ai, gabu idauidau 230 ai Basileia harorolaia pablisa taudia be 4,900,000 bona ma haida. Kahirakahira idia iboudiai idia ura dikadika, Iehova ia lalo-namo henia taudia ida tanobada paradaisona dekenai do idia mauri hanaihanai. Orea maragi danu ita hahegeregerea neganai, momokani idia be hutuma bada hereana ta. Idia be sibodia idia gwauraia mai edia abidadama to idia hahedinaria lasi taudia bamona lasi. (Iakobo 1:22; 2:14-17) Idia iboudiai be Dirava ena Basileia ena sivarai namona be taunimanima dekenai idia harorolaia. Oi be unai mai edia moale hutuma bada tauna ta, a? Witness gaukara oi karaia be toana ena kahana badana ta, to unai sibona be hegeregere lasi.
‘Helai Gabuna Badana Vairanai Idia Gini’
5 Aposetolo Ioane ese ia abia matahanai lalonai, ia itaia idia be “helai gabuna badana vairanai bona Mamoe ena Natuna vairanai idia gini.” (Apokalupo 7:9) Unai siri lalonai ia gwau Dirava ena helai gabuna vairanai idia gini ese ia hahedinaraia Iehova ena lohia siahuna idia abia dae momokani. Unai ena anina be gau haida idia abia dae danu, hegeregere: (1) Ena hesiai taudia idia gwau Iehova be mai ena maoro, idia dekenai dahaka be namo bona dahaka be dika ia abia hidi. (Genese 2:16, 17; Isaia 5:20, 21) (2) Iehova idia kamonai henia Iena Hereva amo ia hereva henidia neganai. (Deuteronomi 6:1-3; 2 Petero 1:19-21) (3) Iehova ese hakaua gaukarana ia henidia taudia idia kamonai henidia. (1 Korinto 11:3; Efeso 5:22, 23; 6:1-3; Heberu 13:17) (4) Ena be idia goevadae lasi, to mai goada ida tiokratik hakaua herevadia idia badinaia toho, idia maumau lasi, to mai edia lalona ibounai ida idia karaia haraga. (Hereva Lada-isidia 3:1; Iakobo 3:17, 18) Idia be helai gabuna vairanai idia gini Iehova dekenai hesiai gaukara helagana do idia karaia totona, badina ia idia matauraia bona idia lalokau henia bada. Unai hutuma bada herea be helai gabuna vairanai idia “gini” ese ia hahedinaraia helai gabuna dekenai ia helai Tauna ese ia lalo-namo henidia. (Apokalupo 6:16, 17 itaia.) Ia lalo-namo henidia ena badina be dahaka?
“Edia Dabua be Kurokuro”
6 Aposetolo Ioane ese hutuma bada herea ia itaia bona ia gwau unai taudia “edia dabua be kurokuro.” Unai dabua kurokuro ese ia hahedinaraia Iehova vairanai idia gini mai edia goeva bona mai edia maoromaoro ida. Edena bamona unai idia davaria? Ita itaia vadaeni, Ioane ena matahanai lalonai idia be “Mamoe ena Natuna” vairanai idia gini. Idia lalo-parara Iesu Keriso be ‘Dirava ena Mamoe Natuna, ia be tanobada ena dika kokia tauna.’ (Ioane 1:29) Matahanai lalonai, Dirava ena helai gabuna dekenai ia noho tau badana ta ena hereva Ioane ese ia kamonai, ia gwau: “Edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro momokani. . . . Bona unai dainai, Dirava ena helai gabuna badana vairanai idia gini noho” (Apokalupo 7:14, 15) Edia dabua idia huria ese Keriso ena boubou rarana idia abidadama henia ia laulaulaia. Baibel ena hahediba herevana mauri davana henia karana dekenai be idia diba sibona lasi. Unai kara idia laloa bada dainai edia lalona ia hamarerea momokani; unai dainai, mai edia “kudouna” ida abidadama karana idia karaia. (Roma 10:9, 10) Edia mauri lalonai do idia karaia gaudia dekenai ia be mai ena siahu. Mai edia abidadama ida, bona Keriso ia henia boubou karana dainai, edia mauri Iehova dekenai idia gwauhamatalaia. Ranu bapatiso amo edia gwauhamata idia hahedinaraia, edia mauri lalonai edia gwauhamata idia badinaia momokani, bona unai amo Iehova ena lalo-namo idia moalelaia. Unai be hahenamo ta—unai ita naria namonamo be gau badana!—2 Korinto 5:14, 15.
7, 8. Edia dabua idia miro garina, Iehova ena orea ese hutuma bada herea taudia be edena bamona ia durudia noho?
7 Mai ena lalokau ida edia noho namo ela bona hanaihanai ia laloa dainai, Iehova ena orea be hanaihanai ia hahedinaraia dahaka kara bona laloa daladia ese tau ta ena dabua lauma dalanai idia hamiroa, eiava idia hadikaia diba, bena herevana unai tau be dahaka ia gwau, to ia be Apokalupo 7:9, 10 ena peroveta herevana hegeregerena lasi. (1 Petero 1:15, 16) Guna Watchtower magasin dekenai idia torea bamona, lagani 1941 lalonai bona murinai danu nega momo idia hahedinaraia ia namo lasi bema ta ese taunimanima dekenai ia haroro bena, ia haroro lasi neganai, sihari kava eiava heudahanai karadia ia karaia. (1 Tesalonika 4:3; Heberu 13:4) Lagani 1947 ai idia hahedinaraia goevagoeva tano iboudiai dekenai Iehova ena Keristen taravatu headava dekenai idia badinaia be gau badana; herevana edia kastom ese idia gwauraia maoro karadia be dahaka, to adavana momo taudia be Iehova ena Witness taudia ai idia lao diba lasi.—Mataio 19:4-6; Tito 1:5, 6.
8 Lagani 1973 ai, tanobada hegegemadai, idia hahedinaraia Iehova ena Witness taudia be tauanina ia hadikaia kuku ania karana idia dadaraia momokani be gau badana, herevana idia be edeseniai—Kingdom Hall eiava haroro gaukara dekenai sibona lasi, to moni gaukara gabunai eiava taunimanima idia itaia diba lasi hehuni gabunai danu. (2 Korinto 7:1) Lagani 1987 ai, Iehova ena Witness taudia edia distrik hebouheboudia dekenai, Keristen memero kekeni dekenai sisiba auka idia henidia, idia gwau bema idia ura Dirava vairanai do idia goeva noho, gau badana be idia naria namonamo lalo-rua ai do idia raka garina. (Salamo 26:1, 4) Nega momo, Gima Kohorona magasin dekenai idia gwau tanobada ena lauma ese ia havaraia karadia dainai ita naria namonamo, badina “ekalesia karana goevagoeva bona momokani, Tamana Dirava ena vairanai” be “tanobada ena kara mirodia dekena amo do [ita] raka siri.”—Iakobo 1:27.
9. Hisihisi bada herea negana murinai daidia be mai maoromaoro danu Dirava ena helai gabuna vairanai do idia gini?
9 Edia abidadama dainai idia ura lauma dalanai bona tauanina dalanai idia do goeva noho hesiai taudia be hisihisi bada herea negana murinai, Dirava ese ia lalo-namo henidia dainai “helai gabuna badana vairanai” do idia gini noho. Unai taudia be Keristen ena kara idia badinaia hamatamaia sibona lasi, to mai edia abidadama danu idia karaia noho.—Efeso 4:24.
‘Edia Imana Dekenai Niu Rauna Idia Dogoatao’
10 Aposetolo Ioane ese ia itaia hutuma bada herea taudia edia toana idauna ta be, ‘edia imadia dekenai niu rauna idia dogoatao.’ Unai ena anina be dahaka? Unai niu raudia ia itaia neganai, reana Ioane ese Iuda taudia edia kalaga ariana ia laloa, Heberu taudia edia aria iboudiai amo unai aria idia moalelaia bada. Siahu negana ena uma anina idia gogoa murinai idia karaia. Taravatu ena hereva hegeregerena, niu raudia, bona au ma haida edia raudia amo kalaga rumadia idia karaia bona aria negana lalonai unuseniai idia noho. (Levitiko 23:39-40; Nehemia 8:14-18) Danu, dubu lalonai tomadiho taudia ese Hallel anena (Salamo 113-118) idia abia neganai unai raudia idia davea. Hutuma bada herea ese niu raudia idia davea ia itaia neganai, reana Ioane ese Iesu be doniki latanai Ierusalem dekenai ia vareai negana ia laloa, unai neganai hutuma bada herea be mai moale danu niu raudia idia davea bona idia boiboi, idia gwau: “Lohiabada ena ladanai ia mai tauna ita hanamoa! Ia be Israela ena King!” (Ioane 12:12, 13) Vadaeni, niu raudia idia davea ese ia hahedinaraia unai hutuma bada herea taudia be mai moale ida Iehova ena Basileia bona iena horoa Pavapavana idia hanamoa.
11. Dahaka dainai Dirava ena hesiai taudia be Iehova hesiai henia gaukarana idia moalelaia?
11 Hari inai negai, hutuma bada herea taudia be mai moale ida Iehova idia hesiai henia. To ita gwau lasi hekwarahi ta idia davaria lasi eiava idia lalohisihisi lasi eiava idia hisihisi lasi. To Iehova idia hesiai henia bona idia hamoalea karadia amo moale idia davaria, bona unai ese ia durudia hekwakwanai idia haheaukalaidia totona. Misinari hahine ta be Guatemala dekenai lagani 45 lalodiai ia bona ena adavana be misinari gaukara idia karaia. Ia gwau Indian taudia edia hanua lalodiai, haroro gaukara be ia auka bona edia laolao lalonai dika ia vara diba, to Basileia harorolaia gaukarana idia karaia. Ena hereva dokona be inai: “Unai nega lalonai ai moale bada herea momokani.” Ena be ia buruka bona gorere mamina ia abia, to sibona ena sivarai ia torea bukana dekenai ena hereva ginigabena be inai: “Ia be mauri namona, hahenamo momo lau davaria.” Tanobada hegegemadai, Iehova ena Witness taudia edia hemami, edia hesiai gaukara dekenai, be unai bamona danu.
‘Dina Bona Hanuaboi Hesiai Gaukara Helagana Idia Karaia’
12 Mai moale ida unai tomadiho taudia ese Iehova dekenai “dina bona hanuaboi iena dubu helaga lalonai Dirava ena hesiai gaukara idia karaia noho.” (Apokalupo 7:15) Tanobada hegegemadai, taunimanima milion momo ese unai hesiai gaukara helagana idia karaia. Tano haida lalodiai ia hanuaboi bona taunimanima idia mahuta neganai, ma tano haida lalodiai dina ia daekau vadaeni bona Iehova ena Witness taudia be idia haroro goadagoada. Dina bona hanuaboi lalonai tanobada be ia giroa giroa noho bona hanaihanai, Witness taudia ese Iehova ena ladana idia hanamoa. (Salamo 86:9) To Apokalupo 7:15 ese ia gwauraia dina bona hanuaboi hesiai gaukarana be mai anina bada ita ta ta dekenai.
13. Baibel lalonai, “dina bona hanuaboi” hesiai gaukara karaia ena anina be dahaka?
13 Hutuma bada herea lalonai idia noho taudia ta ta iboudiai be dina bona hanuaboi dekenai hesiai gaukara helagana idia karaia. Unai ena anina be idia karaia karadia iboudiai be hesiai gaukara helagana, a? Momokani, herevana dahaka idia karaia, namona be idia karaia Iehova ena ladana do idia hanamoa totona. (1 Korinto 10:31; Kolose 3:23) To, ‘hesiai gaukara helagana’ be Dirava tomadiho henia karana sibona lalonai ita karaia karadia ia herevalaia. “Dina bona hanuaboi” lalonai gaukara ta ita karaia neganai, ena anina be hanaihanai ita karaia eiava ita karaia noho mai iseda goada ibounai ida.—Iosua 1:8; Luka 2:37; Kara 20:31; 2 Tesalonika 3:8 itaia danu.
14. Dahaka ita karaia diba iseda haroro gaukara be “dina bona hanuaboi” hesiai gaukarana ita gwauraia diba totona?
14 Iehova ena lauma dubu badana ena tanobada kahana ariara dekenai hesiai gaukara idia karaia neganai, hutuma bada herea taudia be hanaihanai haroro gaukara idia karaia namonamo noho. Idia momo ese edia lalona idia hadaia pura ta ta iboudiai haroro gaukara idia karaia totona. Ma haida idia goada karaia regula painia eiava heduru painia gaukara idia karaia totona. Nega momo daba kahanai idia be dala dekenai bona sitoa lalonai idia haroro. Kamonai taudia be nega lasi dainai, Witness taudia haida be hanuaboi neganai idia dekenai Baibel stadi idia karaia. Aniani idia hoia neganai, idia laolao neganai, dina tubua ai, bona telefon amo idia haroro.
15. Haroro gaukara mo sibona lasi, to dahaka danu be iseda hesiai gaukara helagana?
15 Kongregesen heboudia dekenai ita lao bona haere be iseda hesiai gaukara helagana ena kara ta; Keristen taudia edia hebou gabudia haginidia bona naridia gaukarana danu. Bema ita hekwarahi lauma dalanai bona tauanina dalanai iseda Keristen tadikaka bona taihu ita hagoadadia Iehova ena hesiai gaukara do idia karaia noho totona, unai be iseda hesiai gaukara helagana danu. Iseda Hospital Liaison Committee taudia edia gaukara danu. Betele ena gaukara idauidau, bona hebouhebou dekenai volantia gaukara iboudiai be helaga hesiai gaukaradia. Oibe, iseda mauri ibounai lalonai bema Iehova tura henia karana ita karaia, iseda mauri be hesiai gaukara helagana amo ia honu. Baibel ena hereva hegeregerena, Iehova ena taunimanima be ‘dina bona hanuaboi hesiai gaukara helagana’ idia karaia, bona unai gaukara amo moale bada idia davaria.—Kara 20:35; 1 Timoteo 1:11.
‘Bese, Iduhu, Taunimanima, Bona Gado Iboudiai Amo’
16 Hutuma bada herea taudia be bese iboudiai amo idia mai noho. Dirava ese bese ta ia dadaraia lasi, bona Iesu Keriso ese ia henia mauri davana ese idia iboudiai ia durudia diba. Lagani 1935 ai, Revareva Helagadia amo hutuma bada herea taudia idia gwauraidia hedinarai neganai, Iehova ena Witness taudia be tano idauidau 115 lalodiai idia haroro. Lagani 1990 ia ginidae neganai, mamoe bamona taudia tahudia totona, haroro gaukara idia karaia tanodia edia namba be nega rua bona ma haida amo ia bada.—Mareko 13:10.
17. ‘Bese, iduhu, bona gado idauidau amo’ taunimanima idia durudia bena hutuma bada herea taudia ai do idia lao totona, dahaka idia karaia?
17 Hutuma bada herea taudia davaridia totona, Iehova ena Witness taudia ese bese idauidau sibona lasi, to unai bese idauidau taudia edia iduhu bona gado idauidau taudia danu idia lalodia. Unai taudia do idia durudia totona, Witness taudia ese gado idauidau 300 bona ma haida lalodiai Baibel ena hereva idia gwauraia bukadia idia karaia. Gado idia hahanaia namonamo taudia idia noho bona idia hadibadia, kompiuta masini idia henia gado hahanaia bona printaia gaukara totona danu. Idia ore vadaeni lagani ima lalodiai, taunimanima 98,000,000 ese idia gaukaralaia gado idauidau 36 be idia hahanaia gadodia ena lista dekenai idia atoa kau. Ma danu, Witness taudia idia goada karaia unai taunimanima ta ta iboudiai do idia haroro henidia totona bona idia durudia toho Dirava ena Hereva idia diba totona.—Mataio 28:19, 20.
‘Hisihisi Bada Hereana Amo’
18 Aneru ese Apokalupo 7:1 dekenai ia gwauraia dika havaraia laidia idia siaidia neganai, ‘Dirava ena horoa hesiai taudia’ sibona lasi, to tomadiho momokani lalonai idia bamodia hutuma bada herea taudia danu ese Iehova ena lalokau naria dalana do idia mamia. Aposetolo Ioane ia hadibaia, hutuma bada herea be ‘hisihisi bada hereana’ amo do idia roho mauri. Unai neganai idia be mai edia tanikiu bona hanamoa hereva amo do idia boiboi, do idia gwau: “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu”! Bona, nega tamona, guba dekenai Dirava ena abidadama hesiai taudia iboudiai do idia boiboi, do idia gwau: “Momokani! Iseda Dirava ita hanamoa bada, bona iena hairaina ita gwauraia hedinarai badabada be namo! Iena aonega bona iena laloa ibounai be namo herea dainai ita tanikiu henia, bona iena ladana ita hanamoa bada! Iena siahu bona goada be bada herea! Oibe, siahu ibounai be ia sibona ena, ela bona hanaihanai! Amen.”—Apokalupo 7:10-14.
19. Do idia roho mauri taudia be mai goada danu dahaka moale gaukarana do idia karaia?
19 Unai be moale negana momokanina! Idia mauri taudia iboudiai be Dirava momokanina tamona ena hesiai taudia! Idia iboudiai do idia moalelaia bada gauna be Iehova ena hesiai gaukara. Gaukara bada do idia karaia—moale havaraia gaukarana unai! Tanobada be Paradaiso gabuna dekenai do idia halaoa. Idia mase taudia milion momo be do idia toreisi lou bona idia dekenai Iehova ena dala do idia hadibaia. Unai gaukara do ita karaia be hahenamo mai moalena!
Oiemu Haere be Dahaka?
◻ Lagani 1935 ai, idia vara gaudia ese Iehova ena Witness taudia edia haroro gaukara dekenai dahaka ia havaraia?
◻ Hutuma bada herea be “helai gabuna badana vairanai” idia gini ena anina be dahaka?
◻ Mamoe ena Natuna ia bubua rarana ita laloa bada neganai, iseda mauri lalonai dahaka ita karaia?
◻ Niu raudia idia davea ena anina be dahaka?
◻ Hutuma bada herea taudia be edena bamona dina bona hanuaboi dekenai hesiai gaukara helagana idia karaia?
5. Hutuma bada herea be ‘helai gabuna badana vairanai idia gini’ ena anina be dahaka?
6. (a) Hutuma bada herea “edia dabua be kurokuro” ena anina be dahaka? (b) Hutuma bada herea be edena bamona mai kara maoromaoro ida Iehova vairanai idia gini diba? (c) Keriso ese ena rara ia bubua karana idia abidadama henia dainai, edena bamona hutuma bada herea taudia edia mauri ia haidaua?
10. Ioane ia itaia hutuma bada herea taudia edia imadia dekenai idia dogoatao niu raudia edia anina be dahaka?
12. Herevana dina ai eiava hanuaboi ai, tanobada dekenai Iehova ese dahaka ia itaia?
16. Hutuma bada herea be ‘bese idauidau ibounai amo’ idia mai be edena bamona ia guguru noho?
18. (a) Hisihisi bada herea negana ia vara matamaia neganai daidia do idia roho mauri? (b) Unai neganai, mai moale ida do idia boiboilaia herevadia haida be dahaka?
[Picture on page 17]
Edia hesiai gaukara helagana idia karaia hanaihanai, idia karaia namonamo, bona idia goadalaia