‘Lahi Siahuna Bamona Ia Gabua’ Dinana

“Dina be ia mai noho . . . lahi ese idia do ia gabua ore momokani.”​—MALAKI 4:1.

1. Malaki 4:1 ese dahaka henanadai ia havaraidia?

HARI dina gabedia lalonai, idia helalo-kerehai bena ena helalotao bukana ai Iehova ese edia ladana ia torea taudia idia moale. To unai hahenamo idia abia diba lasi taudia be edena bamona? Herevana idia be lohia taudia eiava dagi lasi taudia, bema idia ese Dirava ena Basileia sivaraina bona idia harorolaia taudia idia dadaraia, dahaka be idia dekenai do ia vara? Malaki ese dava henia dinana ia herevalaia. Mal Karoa 4, siri 1 ai, ia gwau: “Siahu Ibounai Lohiabada ia gwau, ‘Dina be ia mai noho, hekokoroku bona kara dika taudia ibounai be lahi ese do ia gabudia, rei kaukau ia gabua bamona. Unai dina dekenai lahi ese idia do ia gabua ore momokani, bona idia ta do ia noho lasi.’ ”

2. Esekiela ese Iehova ena hahemaoro ia herevalaia goevagoeva dalana be dahaka?

² Peroveta taudia ma haida ese Iehova be tanobada besedia hahemaoro henia karana bona lahi siahuna danu idia hahegeregerea. Momokani, Esekiela 22:​19-22 ese Dirava ena hahemaoro Keristendom mai ena orea koikoidia dekenai ia herevalaia! Ia gwau: “Bona lau Lohiabada Dirava ese idia lau hamaoroa noho, lau gwau: ‘Umui be momoru sibona dainai, lau ese umui ibounai . . . do lau haboua. Taunimanima ese siliva bona auri, bona auri metauna bona tini be lahi lalonai idia atoa, vadaeni lahi idia hasiahua bada, siliva do idia havevea totona, unai bamona danu lau ese egu badu mai ena siahu bada dekena amo umui do lau haboua, lahi lalonai umui do lau atoa vareai, umui do lau havevea. Io, lau ese Ierusalema dekenai umui do lau haboua, bona egu badu ena siahu bada dekena amo umui do lau havevea. Ierusalema lalonai umui do lau havevea, siliva be lahi lalonai idia havevea oho bamona, bona unai neganai, do umui diba lau Lohiabada ese egu badu be emui latanai lau bubua diho vadaeni.’ ”

3, 4. (a) Mai koikoi ida haroro taudia be dahaka idia gwau? (b) Tomadiho oreadia edia sivarai mirona be dahaka?

³ Unai hereva ena anina be bada! Haroro taudia, Iehova ena ladana hatoa urana idia ura lasi bona unai ladana helagana idia hadikaia taudia, be unai dina ai edia kerere ena davana do idia abia. Mai edia hekokoroku ida idia gwau idia bona edia turadia, politik taudia, ese Dirava ena Basileia be tanobada ai do idia haginia, eiava tanobada do idia hanamoa guna bena Basileia be do ia mai diba.

⁴ Keristendom, tomadiho momokani idia negea vadaeni taudia, ese politikol lohiadia idia durudia tuari dika rohorohodia lalonai. Gunaguna Kruseid tuaridia idia tuarilaia, bona Spain ai Inkwisisen amo taunimanima idia doria, Katolik taudia ai do idia lao totona. Lagani 1600 C. E. murinai, Lagani 30 Tuarina ai Europe taudia momo idia alaia mase, bona lagani 1936 amo ela bona lagani 1939 Spain ai idia tuari, Katolik tomadihona be unai tano ai do idia haginia auka totona. Vanegai, tanobada ibounai tuaridia ruaosi lalonai rara bada herea idia bubua. Katolik taudia, Protestan taudia, bona ma haida danu, ese sibodia edia tomadiho oreadia taudia bona tomadiho oreadia idaudia taudia danu idia alaia mase. Bona hari, Ireland ai Katolik taudia bona Protestan taudia idia ala-ala heheni, bona India bona Bosnia ai tomadiho oreadia idauidau idia ala-ala heheni. Tomadiho oreadia taudia ese danu Iehova ena Witness taudia tausen haida mai edia kamonai be idia alaia mase vadaeni.​—Apokalupo 6:9, 10.

5. Tomadiho koikoi ese dahaka hahemaoro do ia davaria?

⁵ Iehova ese Babulonia Badana, tanobada ibounai tomadiho koikoi oreana, mai ena durua taudia ida do ia hadikaia be maoro ita lalo-pararalaia. Apokalupo 18:​21, 24 ai unai hadikaia karana idia herevalaia: “Aneru goadana ta ese nadi badana ta, iena toana be uiti ia moia nadina bamona, ia abia. Inai nadi ia abia isi, davara dekenai ia negea diho. Vadaeni aneru ia gwau, ‘Babulonia hanua badana, unai bamona, mai dagedage danu, oi do idia negea diho, vadaeni taunimanima ese oi do idia itaia lou lasi. Oibe. . . ia ese peroveta taudia ia alaia mase. Ia ese Dirava ena helaga taudia edia rarana ia habubua, bona tanobada dekenai idia alaia mase taudia ibounai, edia rarana be, ia lalonai idia davaria vadaeni.’ ”

6. (a) Daidia be rei kaukau bamona ai do idia lao, bona dahaka dainai? (b) Dahaka hagoadaia herevadia idia noho Iehova gari henia taudia totona?

⁶ Momokani, kara maoromaoro idia inai henia taudia iboudiai, mai edia orea taudia ida, be gabeai, “rei kaukau” hegeregerena ai do idia lao. Iehova ena dina be idia bogaragidiai do ia ara bada, lahi lalonai bamona. Edia ramu bona edia rigi do ia haorea. Iehova ese edia davana do ia henia dinana ai, natu maragidia, rigi unai, be Dirava ese do ia kara henidia, ia ese edia ramu, edia tama sina, idia naridia taudia unai, ia hahemaoro henidia hegeregerena. Idia gwau-edeede tama sina dikadia edia natudia be lasi dainai, edia kara dikana do idia tohotohoa diba lasi. To Dirava ena Basileia idia abidadama henia taudia do idia hamarerea lasi. Unai dainai Heberu 12:​28, 29 be ita ia hagania: “Namona be Dirava do ita tomadiho henia, mai hemataurai bona mai gari danu. Namona be iena gaukara do ita karaia, iena ura dala hegeregerena. Badina iseda Dirava be lahi badana momokani bamona.”

Iehova be Dagedage Diravana ta, A?

⁷ Unai ena anina be Iehova be dagedage Diravana, a? Lasi momokani! Aposetolo tauna be 1 Ioane 4:8 ai hereva momokani badana ta ia gwauraia: “Dirava be lalokau.” Bena 1 Ioa 4 siri 16 lalonai unai hereva ia habadaia, ia gwau: “Dirava be lalokau. Tau ta bema lalokau ena dala dekenai ia noho, ia be Dirava ena lalona dekenai ia noho. Dirava danu be unai tau ena lalona dekenai ia noho.” Taunimanima ia lalokau henidia dainai, Iehova be dika ibounai tanobada amo do ia kokia. Iseda lalokau bona hebogahisi Diravana ia gwau: “Lau Lohiabada, mauri Diravana ese kara dika tauna ena mase lau moalelaia lasi. To dika tauna bema iena dika ia rakatania, vadaeni mauri ia davaria, unai kara dekenai do lau moale momokani.”​—Esekiela 33:11.

8. Edena daladia ai Ioane be Guba Boiboi Natuna ena kara ia karaia, to danu, ia ese lalokau ia herevalaia badabada?

⁸ Ioane ese a·gaʹpe, lalokau maorona, ia herevalaia momo, Evanelia torea taudia oredia ia hereaia, to Mareko 3:17 ai Mareko ese Ioane ia gwauraia ‘Guba Boiboi Natuna.’ Iehova ena lauma ese hari Guba Boiboi Natuna ia hasiahua dainai, ia ese Baibel ena buka ginigabena, Apokalupo, ia torea. Hari buka ese Iehova ia gwauraia kota henia Diravana, bona ia lalonai be davana henia herevadia momo; toi be inai: “Inai moia gabuna be Dirava ena badu, siahu dikadika”; “disi 7, Dirava ena badu toana”; bona “Siahu Ibounai Dirava ena badu, siahu dikadika.”—Apokalupo 14:19; 16:1; 19:15.

9. Iesu ese Iehova ena hahemaoro be edena bamona ia herevalaia, bona iena peroveta herevadia be edena bamona idia guguru?

⁹ Iseda Lohiabada Iesu Keriso be ita itaia diba lasi Diravana “ena toana hegeregerena,” bona tanobada ai ia noho neganai, Iehova ena hahemaoro herevadia ia gwauraia hedinarai mai ena goada ida. (Kolose 1:15) Hegeregere, Mataio karoa 23 lalonai be hahedika herevadia 7, Iesu ese iena negai tomadiho idia karaia koikoi taudia latanai ia gwauraia. Unai hahemaoro herevadia edia dokona ai ia gwau: “Ierusalema e! Ierusalema e! Peroveta taudia oi alaia mase, bona oi dekenai Dirava ese ia siaia taudia be nadi dekenai oi hodoa. Nega momo lau ura oiemu natuna lau haboua, kokoroku hahine ese iena natuna iena hanina dekenai ia koua bamona, to oi ura lasi! Inai, umui emui ruma be do ia noho kava anina lasi.” Bena lagani 37 idia ore murinai, Jeneral Tito henunai, Roma ena tuari oreana ese unai hahemaoro herevana ena anina idia karaia. Unai be hahegari dinana ta, gabeai do ia vara dinana ia perovetalaia. Unai dina gabena ese hahegari dina gunadia iboudiai do ia hereaia​—Iehova ena dina, kahirakahira do ia matamaia dinana, be unai.

“Dina” Ia Diari

¹⁰ Iehova ese hari kara maoromaoro taudia be Malaki 4:2 ai ia gwauraia, ia gwau: “To umui, lauegu hereva umui kamonai henia taudia, be lau ese umui do lau hamauria. Lauegu hamauria siahuna be bada herea, dina ena diari ena goada bamona.” Unai kara maoromaoro dinana be Iesu Keriso sibona. Lauma dalanai ia be “tanobada ena diari.” (Ioane 8:12) Edena bamona ia diari? Ia dae, mai ena hahemauri siahuna​—lauma hahemaurina, hari inai negai ita abia diba gauna, be guna, bena unai murinai, do ia mai tanobada matamatana lalonai, bese idauidau iboudiai be tauanina dalanai do ia hamauria. (Mataio 4:23; Apokalupo 22:1, 2) Laulau dalana ai, Malaki ia gwauraia bamona, ia hamauria taudia be ‘do idia moale bada, boromakau natudia edia magu dekena amo idia ruhaia nege bamona.’ Bona toreisi lou taudia, mauri goevadaena do idia abia diba taudia, do idia moale dikadika danu!

11, 12. (a) Kara dika taudia dekenai dahaka do ia vara? (b) Dirava ena bese taudia be edena bamona ‘kara dika taudia do idia moia diho’?

¹¹ To, kara dika taudia be edena bamona? Malaki 4:3 ia gwau: “ ‘Inai kara do lau karaia dinana dekenai, umui ese kara dika taudia dekena amo do umui kwalimu. Umui ese idia do umui moia diho, tano ena kahu bamona.’ ” Ia idia lalokau henia taudia ia naria noho negana, tuari ai iseda Dirava ese unai eda inai taudia tanobada ai do ia haorea vadaeni. Satani mai ena demoni ida be do ia koua vadaeni.​—Salamo 145:20; Apokalupo 20:​1-3.

¹² Dirava ena bese taudia ese dika taudia do idia hadikaia ore lasi. Unai dainai, edena bamona idia ese ‘kara dika taudia do idia moia diho’? Unai bamona idia karaia, kwalimu ariana badana lalonai idia vareai dainai. Esodo 15:​1-21 ese unai bamona ariana ia herevalaia. Farao mai ena ami taudia be Davara Kakakakana ai idia mase murinai ia vara. Isaia 25:​3-9 ia guguru neganai, ‘dagedage taudia’ idia kokia murinai, kwalimu ariana do ia vara Dirava ena gwauhamata bamona: “Ia ese danu mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore. Ia ese danu iena bese taudia edia hemarai, be tanobada ena kahana ibounai dekena amo do ia kokia, badina be Lohiabada be inai bamona ia hereva vadaeni. Unai dina dekenai, taunimanima ibounai do idia gwau, ‘Momokani, inai be iseda Dirava. . . . Inai be Lohiabada! Ita ese ita abidadama henia, bona hari ita moale bada noho, ia ese ita ia hamauria dainai.’ ” Haida be dika idia davaria idia moalelaia lasi, to idia moale bada badina Iehova ese ena ladana ia hahelagaia bona tanobada ia hagoevaia, taunimanima ese mai lalo-tamona ida maino dekenai idia noholaia totona.

Hadibaia Gaukarana Badana

¹³ Malaki 4:4 ai Iehova ese Iuda taudia ia sisiba henia ‘Mose ena taravatu do idia laloaboio lasi.’ Unai hegeregerena, namona be ita ese “Keriso ena taravatu,” Paulo ese Galatia 6:2 ai ia gwauraia taravatuna, be do ita badinaia. Keriso ese hahegani ma haida unai taravatu hegeregerena, be Aramagedono amo do idia roho mauri taudia do ia henidia. Reana unai hahegani be Apokalupo 20:12 ese ia gwauraia ‘bukadia’ lalodiai ia torea, toreisi lou neganai do idia kehoa bukadia unai. Unai mai anina bada dinana lalonai, mase amo do ia hatoredia isi lou taudia be do idia hadibadia, “tanobada matamatana” taudia edia noho dalana idia badinaia totona!—Apokalupo 21:1.

14, 15. (a) Hari ia hedinarai tauna Elia ita dibaia dalana be dahaka? (b) Elia oreana be dahaka maduna ia huaia?

¹⁴ Unai amo idia ese hahediba gaukarana, Iehova ese Malaki 4:5 ai ia gwauraia gaukarana, be do idia habadaia; ia gwau: “To unai dina do ia ginidae lasi neganai, lau ese peroveta tauna Elia do lau siaia umui dekenai guna.” Vadaeni, Elia, hari inai negai ia hedinarai tauna, be daika? Mataio 16:27, 28 ai, Iesu ese “ena Basileia danu do ia mai” negana ia herevalaia, ia gwau: “Taunimanima ena Natuna be ena Tamana ena diaridiari dekenai do ia mai, mai ena aneru momo danu, unai neganai taunimanima ta ta ibounai edia kara hegeregerena edia davana do ia henidia.” Bena dina 6 murinai, ia be Petero, Iakobo, bona Ioane ida ororo ta ai idia noho neganai, “idia edia vairana dekenai Iesu ena toana ia idau, iena vairana be diaridiari dina bamona, ena dabua ia kurokuro momokani diari bamona.” Unai mata hanai lalonai ia sibona ia hedinarai, a? Lasi, “Mose bona Elia be idia edia vairana dekenai idia hedinarai, Iesu danu idia herevahereva.”—Mataio 17:2, 3.

¹⁵ Unai ena anina be dahaka? Anina be inai: Idia perovetalaia Mose Badana be Iesu, hahemaoro totona ia mai neganai. (Deuteronomi 18:​18, 19; Kara 3:​19-23) Ia be Elia ida do idia gaukara hebou, gaukara mai anina bada, Iehova ena dina badana mai garina ia do ginidae lasi neganai tanobada hegegemadai Basileia sivaraina namona harorolaia gaukarana, be do idia karaia. Malaki karoa 4, siri 6 ese inai “Elia” ena gaukara ia herevalaia, ia gwau: “Bona Elia ese tamana taudia bona edia natuna taudia edia laloa do ia hatamonaia lou, vadaeni mai laloa tamona do idia noho. Unai bamona do idia karaia, lau ese mase herevana ta dekena amo emui tano do lau hadikaia ore garina.” Vadaeni, hari “Elia” be hesiai tauna mai ena kamonai bona mai ena kara maoromaoro oreana, horoa Keristani taudia edia orea; edia Biaguna, Iesu, ese ena kohu ibounai ia henidia do idia naria totona. Anina be abidadama taudia edia lauma anianina be nega korikori ai do idia henidia.​—Mataio 24:45, 46.

16. Elia oreana ena gaukara ese ia havaraia anina namodia be dahaka?

¹⁶ Hari inai negai unai ubua gaukarana ena anina namona be tanobada hegegemadai ita itaia diba. Gima Kohorona magasin 16,100,000 be nega ta ta iboudiai gado 120 ai idia printaia; unai gado 97 ai idia printaia gaudia edia hereva be hegeregere. Ia amo “Basileia ena Sivarai Namona” be tanobada hegegemadai idia halasia. (Mataio 24:14) Gado momo ai idia torea bukadia ma haida be Iehova ena Witness taudia ese idia gaukaralaia, edia haroro bona hahediba gaukarana lalonai. Elia oreana, hesiai tauna mai ena kamonai bona mai ena kara maoromaoro oreana, ese “idia diba lauma dalanai idia dabu taudia” ia ubua badabada. (Mataio 5:3, NW) Unai sibona lasi, to Basileia helarona idia abia dae bona ia dainai kara idia karaia taudia, be lalo-tamona namo hereana ai ia kwatudia hebou. Idia be “hutuma bada herea . . . bese idauidau, iduhu idauidau, kopina idauidau, bona gado idauidau” amo. (Apokalupo 7:9) Hari gaukara be Iehova ena ura hegeregerena do idia karaia guguru neganai, dokona do ia ginidae, Iehova ena dina badana mai garina lalonai.

17. Edena nega ai Iehova ena hahegari dinana do ia matamaia?

¹⁷ Unai hahegari dinana be edena negai do ia ginidae? Aposetolo Paulo ia haere: “Lohiabada ena Dina be do ia mai, henaoa tauna hanuaboi neganai ia mai bamona. Inai bamona hereva, ‘Maino bona gari lasi ita noho inai,’ taunimanima idia gwauraia noho neganai [reana dala idauna ai], karaharaga hisihisi dika momokani bona mase do ia ginidae! Rogorogo hahine ese mara ena hisihisi ia davaria haraga bamona unai hisihisi do ia ginidae. Bona unai taunimanima do idia roho mauri diba lasi.”​—1 Tesalonika 5:​2,3.

18, 19. (a) “Maino bona gari lasi ita noho inai” be edena bamona do idia boiboilaia? (b) Edena negai Iehova ena bese taudia ese laga-ani do idia davaria?

¹⁸ Unai peroveta herevana ese ia herevalaia “taunimanima” be daika? Idia be gavamani hakaua taudia bona idia gwau inai dagedage tanobadana ena kahana idauidau amo, mai lalo-tamona tanobada oreana matamatana idia haginia diba. Idia karaia gau badadia, League of Nations bona United Nations, be unai bamona oreana idia havaraia diba lasi. Iehova ena peroveta tauna ia perovetalaia hegeregerena, harihari “idia gwau, ‘Maino, maino,’ to maino be ia noho lasi.”​—Ieremia 6:14; 8:11; 14:​13-16.

¹⁹ Ela bona unai nega, Iehova ena orea taudia ese inai Dirava ia dadaraia tanobadana ena hekwarahi bona ena dagedage idia haheaukalaia. To Tesalonika Iharuana 1:7, 8 ena hereva hegeregerena, nega daudau lasi laga-ani do idia davaria “Lohiabada Iesu bona iena aneru mai siahu bada danu guba dekena amo do idia mai neganai. Mai lahi siahu bada danu, Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.”

20. (a) Sepanaia bona Habakuku be ‘lahi siahuna bamona ia gabua dinana’ dekenai, dahaka idia perovetalaia? (b) Unai peroveta herevadia edia sisiba bona hagoadaia herevadia be dahaka?

²⁰ Unai be edena negai do ia vara? Ita momo ita naria daudau vadaeni. Ita naria noho lalonai, do idia roho mauri manau taudia momo ese Sepanaia 2:2, 3 ena boiboi idia kamonaia: “Lohiabada do umui tahua mai noinoi danu. Kara maoromaoro do umui karaia, bona Lohiabada ena vairanai do umui manau. Unai neganai sedira iena badu dinana dekenai, Lohiabada ese umui do ia naria.” Bena Sepanaia 3:8 be ia hahegani: “Unai dainai Lohiabada ia gwau, ‘Lau totona do umui naria noho. Do lau toreisi, bona bese idauidau do lau samania dinana do umui naria. Badina dina ta lau ese bese idauidau do lau gogoa hebou, bona basileia ibounai do lau haboua, egu badu be idia edia latanai do lau bubua totona, egu badu mai ena siahu ibounai. Badina be egu mama ena badu, ena lahi dekena amo, lau ese tanobada ena kahana ibounai do lau gabua ore.’ ” Dokona be kahirakahira! Iehova ese unai dina bona unai hora be ia diba, bona do ia haidaua lasi. Ita haheauka noho. “To inai lau palania kara be harihari do ia vara lasi. Unai dainai ena anina do oi torea, ia noho. To ia be nega daudau lasi lalonai do ia vara. Lau koikoi lasi. Sedira oi laloa iena mai be haraga lasi, to do oi naria noho, ia be do ia vara momokani.” (Habakuku 2:3) Iehova ena hahegari dinana ia mai haraga noho. Inai umui laloa; unai dina be do ia leiti lasi!

Riviu Karaia Totona:

◻ Iehova ena hahegari dinana ai, lohia taudia bona idia lohiaia taudia dekenai dahaka do ia vara?

◻ Iehova be edena bamona Diravana?

◻ Dirava ena bese taudia totona, edena diba abia dalana idia gwauraia?

◻ Dokona ia kahirakahira dainai, Dirava ena peroveta taudia be dahaka idia hadibaia goadagoada ita dekenai?

7. Edena bamona Iehova ena hahemaoro be mai ena lalokau ida ia karaia?

10. “Kara maoromaoro dinana” be edena bamona Dirava ena bese taudia dekenai moale ia henia?

13. ”Tanobada matamatana” lalonai, dahaka hahediba gaukarana do ia vara?

[Picture on page 21]

Spain Taudia Edia Inkwisisen lalonai, momo idia doria Katolik taudia ai idia lao totona

[Picture Credit Line on page 21]

The Complete Encyclodedia of Illustration/J.G. Heck