“Dirava Hanamoa mai Moale Ida” Distrik Hebouhebouna, Iehova Ena Witness Taudia Edia
Dina toi lalodiai, oi ia durua Baibel hadibaia herevadia do oi kamonai diba. Papua New Guinea lalonai hebouhebou 9 do idia karaia, bona reana oiemu noho gabuna kahirakahira ai hebouhebou ta do idia karaia. Program be 9:40 a.m. Friday, ane amo do ia matamaia neganai, namona be oi noho.
Friday daba ai hanamoa herevadia do idia karaia bona hebouhebou ena hereva badana, “Tanobada Hegegemadai Dirava Idia Hanamoa mai Moale Ida” do idia henia. Adorahi program ai, matamata taudia, tama sina, bona edukeisini do idia herevalaia momo. Matamata taudia ese inai hereva “Lau Hegeregere Headava Totona, A?” do idia ura kamonai. Namona be tama sina taudia ese “Edia Natudia Idia Moalelaia Tama Sina” herevana do idia hakala henia namonamo. Adorahi ena hereva ginigabena be “Edukeisini—Oi Gaukaralaia Iehova Hanamoa Totona.” Unai hereva ese matamata taudia do ia durua sikuli lalonai idia kwalimu totona.
Saturday ena daba program ena anina bada gauna ta be bapatiso herevana, bona idia hegeregere taudia totona bapatiso do idia karaia. Adorahi ai, mai ena goada ida, hereva henia tadikaka ese idau negai ema bona hari Satani ena hedibagani ta, mahuta hebou urana, ia gaukaralaia taunimanima hamorua totona, do ia herevalaia. Hereva goadana “Diabolo Ena Tarapu Dadaraidia” do ita kamonai danu. Inai mai anina herevana “Dahaka Dainai Taunimanima be Dirava Ena Diba Idia Abia be Namo” amo Saturday ena program do idia haorea.
Sunday dabai, hereva toi edia kwara herevana, “Nega Dokona ai Dirava Idia Hanamoa mai Moale Ida” ese ita dekenai maoromaoro do idia vara kara badadia do ia kikilaia. Iesu ese Mataio 24:21 ai ia gwauraia “hisihisi bada herea” ia do vara lasi neganai, roho mauri gabuna dekenai ita heau lao do ia herevalaia.
Sunday daba ena program do idia hadokoa inai mai anina drama amo: “Aonega Taudia, Idia Buruka Neganai Oi Matauraia.” Bena, adorahi ai, pablik tok, “Noho Hanaihanai Pavapavana Hanamoa!” do idia henia. Unai be hebouhebou ena hereva badana ta.
Harihari, oi lao totona oi hegaegae. Oi kahirakahira hebouhebou do idia karaia gabuna davaria totona, oi lao Iehova ena Witness taudia edia Kingdom Hall dekenai, eiava inai magasin idia torea taudia edia adres oi tore henia. November 8 ena Awake! lalonai Papua New Guinea, New Zealand, Australia, bona Solomon Islands edia hebouhebou negadia bona gabudia ena lista do oi davaria.