Dahaka Dainai Dirava Ena Hesiai Oi Lao Henia?
“Lohiabada oiemu Dirava oi ura henia, mai oiemu kudouna ibounai, mai oiemu [souli] ibounai, mai oiemu lalona ibounai, bona mai oiemu goada ibounai.”—MAREKO 12:30.
1, 2. Haroro gaukarana lalonai dahaka gaukara badadia idia karaia?
MOTUKA ta ena namo korikori be ena toana sibona dainai idia gwauraia lasi. Reana ena kala bona ena oromana ese hoihoi tauna ena lalona do idia veria; to unai gau be mai anina maragi, bona idia hedinarai goevagoeva lasi gaudia be mai anina bada—gaudia be ena ensini, motuka ia haheaua gauna unai, bona ena taria gauna, bona unai bamona gaudia ma haida.
2 Keristani tauna ese Dirava ena hesiai ia lao henia gaukarana danu be unai bamona. Iehova ena Witness taudia ese Dirava ena gaukara momo idia karaia. Lagani ta ta iboudiai, hora bilioni ta mai kahana lalonai Dirava ena Basileia ena sivarai namona idia harorolaia. Bona, Baibel stadi milioni milioni idia karaia, bona taunimanima tausen momo idia bapatisoa. Bema oi be sivarai namona harorolaia tauna, oiemu gaukara ena ripoti—herevana toana be ia maragi—to ia be unai namba badadia lalonai ia noho. Bona oi diba “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi.”—Heberu 6:10.
3. Keristani taudia ese gaukara sibona lasi, to dahaka danu idia laloa be namo, bona badina be dahaka?
3 To, iseda gaukara—ita ibounai eda bona ita ta ta eda—ena namo korikori be namba sibona dainai idia gwauraia lasi. Iehova ese Samuela ia hamaoroa, ia gwau: “Taunimanima ese tau ena toana idia itaia, to Lohiabada ese tau ena kudouna ia itaia.” (1 Samuela 16:7) Oibe, iseda lalona be mai anina bada Dirava dekenai. Momokani, gaukara ita karaia be namo. Dirava badinaia karadia ese Iehova ena hahediba herevadia idia hahairaia bona taunimanima idia veria, hahediba taudia ai do idia lao totona. (Mataio 5:14-16; Tito 2:10; 2 Petero 3:11) To, iseda gaukara ese gau haida idia hahedinaraia lasi. Ena be Efeso kongregesen ese kara namodia idia karaia vadaeni, to Iesu ia toreisi lou murinai, unai kongregesen ia laloa momo be mai ena badina. Ia hamaorodia, ia gwau: “Oiemu kara lau diba . . . To inai gau tamona dekenai oi be kerere: Guna be lau oi lalokau henia bada, to hari be lasi.”—Apokalupo 2:1-4.
4. (a) Edena dala ai iseda hesiai gaukarana Iehova totona be reana hahegani sibona dainai ita karaia loulou karana ai ia lao diba? (b) Dahaka dainai iseda lalohadai ita tahua be namo?
4 Kerere ia vara diba. Dirava ena hesiai ita lao henia loulou dainai, lagani haida murinai reana unai gaukara be hahegani sibona dainai ita karaia. Keristani hahinena ta ese ena kara be inai bamona ia gwauraia: “Lau lao haroro, lau lao hebou, lau stadi, lau guriguri—to masini ta bamona lau karaia, mamina ta lau abia lasi.” Momokani, Dirava ena hesiai taudia, ena be ‘idia moru’ eiava “hisihisi idia abia” to idia gaukara goada neganai, ita hanamodia be namo. (2 Korinto 4:9; 7:6) To, iseda Keristani karadia, ita karaia loulou karadia, bema ita karaia kava sibona, namona be iseda lalona ita tahua, ta ese motuka ena ensini ia itaia namonamo hegeregerena. Motuka namodia danu idia sekea loulou bona idia hanamoa loulou; unai hegeregerena, Keristani taudia iboudiai ese sibodia edia lalona idia tahua loulou be namo. (2 Korinto 13:5) Taunimanima ese iseda gaukara idia itaia diba, to idia diba lasi dahaka dainai ita karaia. Unai dainai, namona be ita ta ta ibounai ese inai henanadai ita laloa namonamo: ‘Dahaka dainai Dirava ena hesiai lau lao henia?’
Lalohadai Maorona Koua Gaudia
5 Tau ta ese Iesu ia nanadaia, Dirava ese Israela taudia ia henidia taravatudia amo edena be taravatu badana. Iesu ese ia gwauraia taravatuna be mai anina taunimanima edia oromana dekenai lasi to edia lalona dekenai; ia gwau: “Lohiabada oiemu Dirava oi ura henia, mai oiemu kudouna ibounai, mai oiemu [souli] ibounai, mai oiemu lalona ibounai, bona mai oiemu goada ibounai.” (Mareko 12:28-30) Unai amo Iesu ese ia hahedinaraia namona be lalokau dainai Dirava ena hesiai ita lao henia.
6, 7. (a) Edena dala ai Satani ese ruma bese ia hadikaia hehuni toho, bona badina be dahaka? (2 Korinto 2:11) (b) Ta ia tubu daekau noho lalonai idia vara gaudia edia anina iena lalohadai Dirava ena siahu dekenai be dahaka?
6 Satani ia ura inai mai anina bada karana, lalokau, do ita goadalaia dalana ia koua. Unai do ia karaia totona ia gaukaralaia dalana ta be, ruma bese ia hadikaia toho. Badina be dahaka? Badina be iseda ruma bese lalonai iseda lalohadai ginigunadia lalokau dekenai ita abia, bena unai lalohadai idia noho hanaihanai. Satani ia diba, Baibel ia gwau ta ia mero neganai ia dibaia gaudia ese do idia durua diba ia bada neganai. (Aonega Herevadia 22:6) Ita maragi neganai, ia ese iseda lalohadai lalokau dekenai ia hagagevaia hehuni toho. Taunimanima momo idia tubu daekau lalonai, edia ruma dekenai lalokau be lasi, to heai, badu, bona hereva dikadia be momo; “inai tanobada ena dirava,” Satani, ese unai ia itaia neganai, ia laloa ena palani ia kwalimu.—2 Korinto 4:4; Efeso 4:31, 32; 6:4; Kolose 3:21.
7 Buka ladana Emu Ruma Bese Hamoalea Dalana ia gwau: “Bema tamana be Dirava ese ia henia gaukara ia karaia namonamo, unai ese natuna ia durua diba, ia bada neganai taunimanima badadia bona Dirava ia matauraia totona.”a Keristani tauna ta, ia tubu daekau negana lalonai ena tamana ese ia biagua auka tauna, be ia gwau: “Iehova lau kamonai henia be haraga; lau lalokau henia be auka.” Momokani, kamonai be gau badana, badina be Dirava vairanai “Lohiabada kamonai henia kara, ese boubou karadia ia hereaia.” (1 Samuela 15:22) To dahaka ese ita ia durua diba, Iehova lalokau henia karana do ita habadaia, bena kamonai sibona dainai lasi, to lalokau dainai danu do ita tomadiho henia?
“Keriso Ena Lalokau ese Ai Ia Biagua”
8 Iesu Keriso ena boubou, taunimanima davalaia boubouna, bema ita laloa bada, unai ese ita do ia hasiahua bada, ita be mai eda lalona ibounai ida Iehova do ita lalokau henia totona. “Dirava ese iena lalokau ita dekenai, be inai bamona ia hedinaraia: Ia ese iena Natuna tamona tanobada dekenai ia siaia, ia dekena amo mauri do ita abia totona.” (1 Ioane 4:9) Unai ita lalo-pararalaia bona ita laloa bada neganai, unai lalokau karana dainai ita lalokau henia. “Ita be mai iseda lalokau, bona ena badina korikori be inai: Dirava ese ita ia lalokau henia guna.”—1 Ioane 4:19.
8, 9. Edena dala ai Iesu ena boubou ese ita ia hasiahua be namo, Iehova do ita lalokau henia totona?
9 Dirava ese Iesu ia henia gaukarana, taunimanima hamauria gaukarana, be ia abia dae mai ena ura ida. “Lalokau ena toana, be inai kara dekena amo do ita diba: Keriso ese ita dainai iena mauri ia atoa diho.” (1 Ioane 3:16; Ioane 15:13) Iesu ena lalokau, sibona ena namo tahua lasi lalokauna, dainai, namona be ita hahedinaraia unai ita laloa bada. Sivarai hegeregerena ta be inai: Kahirakahira oi maloa neganai, bema tau ta ese oi ia hamauria, unai murinai do oi lao ruma, emu tauanina do oi hakaukaua, bena ia vara gauna do oi laloaboio, a? Lasi! Do oi laloa oi be mai emu abitorehai oi ia hamauria tauna dekenai, badina be ia dainai oi mauri. Ita be mai eda abitorehai unai bamona Iehova Dirava bona Iesu Keriso dekenai, ani? Bema Iesu ese mauri ena davana ia henia lasi, ita ibounai be kara dika bona mase lalonai do ita maloa bamona. To, unai lalokau karana badana dainai, ita be mai eda helaro, do ita mauri hanaihanai paradaiso tanobadana ai.—Roma 5:12, 18; 1 Petero 2:24.
10. (a) Ita ta ta ese Iesu ena boubou karana edena bamona ita laloa be namo? (b) Keriso ena lalokau ese ita edena bamona ia hasiahua?
10 Iesu ena boubou karana mani oi laloa namonamo. Ena anina oi dekenai oi laloa, Paulo ese ena anina ia dekenai ia laloa hegeregerena; ia gwau: “Inai mauri, egu tauanina lalonai ia noho gauna, be Dirava ena Natuna lau abidadama henia dainai lau mauri noho. Ia ese lau ia lalokau henia, bona lau dainai iena mauri ia atoa diho.” (Galatia 2:20) Unai laloa namonamo karana ese ura namona do ia havaraia emu lalona dekenai, badina be Paulo ese Korinto taudia be inai bamona ia tore henia: “Keriso ena lalokau ese ai ia biagua noho, badina be . . . taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.” (2 Korinto 5:14, 15) The Jerusalem Bible ia gwau Keriso ena lalokau ese “ai ia hadarerea.” Keriso ena lalokau ita laloa neganai, unai lalokau ese ita ia biagua, ita ia hasiahua, bona ita ia hadarerea. Iseda lalona ia hasiahua, kara do ita karaia totona. J. B. Phillips ese ia hahanaia Baibel lalonai unai siri ia gwau: “Emai kara edia badina korikorina be Keriso ena lalokau.” Bema gau idauna ta ese ita ia hasiahua, noho daudau huahuadia do ia havaraia lasi ita lalonai; Farisea taudia edia kara ese unai ia hahedinaraia.
“Farisea Taudia Bona Sadukea Taudia Edia Hatubua Muramura Dekenai Umui Naria Namonamo”
11 Farisea taudia ese Dirava tomadiho henia karana ena anina idia haboioa. Dirava lalokau henia dalana idia herevalaia momo lasi, to kara idia herevalaia momo; kara amo abidadama ena bada idia hahetohoa. Idia ese taravatu edia kahana maragimaragi iboudiai idia laloa bada, unai dainai edia murimuri toana be kara maoromaoro taudia edia bamona, to edia lalona be “mase edia turiana bona miro ibounai idia honu momokani.”—Mataio 23:27.
12. Iesu ese tau ta ia hanamoa murinai, Farisea taudia ese edena bamona idia hahedinaraia idia be lalo-auka taudia?
12 Nega ta Iesu ese tau ta ena imana dikana ia hanamoa mai ena hebogahisi ida. Guna ena lepera gorerena dainai ena tauanina bona ena lalona idia hisihisi, to Iesu ese karaharaga ia hanamoa neganai, ia moale dikadika! To, Farisea taudia be ia ida idia moale hebou lasi. Gau maragina ta dainai idia maumau—gauna be Sabati dinana ai Iesu ese ia durua. Farisea taudia ese sibodia edia lalohadai Taravatu ena anina dekenai idia laloa bada, unai dainai ena anina korikorina idia reaia vaitani. Unai dainai Iesu be mai “lalohisihisi danu ia itadia, badina edia lalona be auka”! (Mareko 3:1-5) Bona ena hahediba taudia ia sisiba henia, ia gwau: “Farisea taudia bona Sadukea taudia edia hatubua muramura dekenai umui naria namonamo.” (Mataio 16:6) Baibel ese edia kara bona edia lalohadai ia gwauraia hedinarai, ita ia sisiba henia totona.
13. Farisea taudia edia haheitalai ese dahaka ia hadibaia ita dekenai?
13 Farisea taudia edia haheitalai ese ita ia hadibaia, namona be iseda kara ita laloa maoromaoro. Momokani, iseda kara be mai anina, badina be “abidadama mai ena kara namodia lasi, be mase gauna.” (Iamesi 2:26) To, goevadae lasi taudia be vaia taunimanima edia kara sibona idia laloa bena idia gwau idia be edena bamona taudia, to edia kara edia badina eiava edia lalohadai be idia laloa lasi. Nega haida, ita be siboda unai bamona ita laloa. Reana iseda kara ita laloa bada; ita laloa bema gaukara momo ita karaia, anina be lauma dalanai ita goada. Reana ita laloaboio iseda lalohadai danu ita tohoa be gau badana. (2 Korinto 5:12 itaia.) Reana ita be taravatu bona hahegani badinaia goevagoeva taudia ai ita lao, ‘vasiahu dekena amo dimairi ita negea, to kamelo be ita hadonoa noho,’ bona taravatu ena hereva ita badinaia, to ena anina ita reaia.—Mataio 23:24.
14. Edena dala ai Farisea taudia be kapusi mirona o mereki mirona bamona?
14 Farisea taudia idia diba lasi gauna be inai: Bema ta ese Iehova ia lalokau henia momokani, Dirava badinaia karadia be vaia do ia karaia. Abidadama be ta ena lalona amo ia aru lasi murimuri dekenai. Farisea taudia be mai edia lalohadai kererena unai dekenai, unai dainai Iesu ese ia gwau henidia, ia gwau: “Taravatu hadibaia taudia bona Farisea taudia, kara koikoi taudia, dika do umui davaria momokani! Badina be umui ese kapusi bona mereki edia murina kahana sibona umui huria goevagoeva, to edia lalona kahana be dadia kara bona lebulebu kara dekenai idia honu momokani. Farisea taudia e, emui matana idia kepulu! Kapusi ena lalona kahana do umui hagoevaia guna, vadaeni ena murina kahana danu do ia goeva.”—Mataio 23:25, 26.
15. Sivarai haida oi gwauraia, idia hahedinaraia Iesu ese ta ena kara ena toana sibona ia laloa lasi.
15 Kapusi ta, disi ta, eiava ruma ta ena murina kahana ena toana ese gau haida ia hahedinaraia lasi. Iesu ena hahediba taudia ese Ierusalema ena dubu helaga ena hairai idia hoalaia, to ia lalonai idia vara gaudia dainai Iesu ese ia gwauraia “henaoa taudia edia noho ruma.” (Mareko 11:17; 13:1) Kerisendom ena sivarai ese ia hahedinaraia sibodia idia gwauraia Keristani taudia milioni milioni be unai dubu helaga bamona. Iesu ia gwau iena ladanai “hoa kara” idia karaia taudia haida do ia hahemaoro henia neganai, “dika karaia taudia” do ia gwauraia. (Mataio 7:22, 23) To vabu ta, dubu helaga ena maua lalonai moni maragimaragidia sibona ia udaia hahinena, be Iesu ese inai bamona ia gwauraia: “Unai vabu ogogamina ese ia udaia moni be bada, idia ibounai udaia moni be maragi. . . . Iena moni ibounai ia henia vadaeni, iena aniani hoia moni danu.” (Mareko 12:41-44) Ia hahemaoro henidia kerere, a? Lasi. Unai nega rua ai Iesu ese Iehova ena lalohadai ia hahedinaraia. (Ioane 8:16) Edia kara be dahaka dainai idia karaia be ia diba, bena unai hegeregerena ia hahemaoro henidia.
“Ta Ta Edia Diba Hegeregerena”
16 Bema mai eda lalohadai maorona ida ita gaukara, iseda gaukara be ma ta ena gaukara ida ita hahegeregerea loulou be anina lasi. Hegeregere, bema Keristani tauna ta be hora momo lalonai ia haroro bona ena haroro gaukarana amo anina bada ia havaraia, unai gau rua dekenai bema ia ida ita kara helulu, namo ita havaraia lasi. Iesu ia gwau Iehova oi lalokau henia mai emu lalona ibounai, mai emu darana ibounai, mai emu souli ibounai, mai emu goada ibounai ida—ma tau ta ena amo lasi. Taunimanima ta ta edia diba, edia goada, bona edia noho be idauidau. Bema emu noho be hegeregere, lalokau ese oi do ia hasiahua, hora momo lalonai haroro gaukarana do oi karaia—reana painia tauna ai do oi lao bena ful-taim do oi karaia. To bema gorere ta ese oi ia hametaua, ena be oi ura hora momo lalonai do oi haroro, to reana hora haida sibona lalonai do oi haroro diba. Namona be emu lalona ia manoka lasi. Ta ena abidadama Dirava dekenai ena bada be hora amo ia hahetohoa lasi. Bema emu ura be maoro, unai dainai oi moale diba. Paulo ia gwau: “Ibounai ta ta ena kara ena kara ia diba be namo. Bema iena kara be namo, ia sibona ia heagilaia diba. To bema iena kara be tau ta ena kara danu ia hahegeregerea, unai tau do ia gwauraia kerere totona, unai be namo lasi.”—Galatia 6:4.
17. Hereva momo lasi amo, Iesu ena moni parabolena be sibomu emu hereva amo oi gwauraia.
17 Iesu ena parabole ta Mataio 25:14-30 dekenai mani oi laloa. Tau ta gabu daudau ia lao gwauraia, bena ena hesiai taudia ia boiria, ena kohu ia henidia do idia naria totona. “Ta dekenai 5000 kina ia henia, ma ta dekenai 2000 kina ia henia, ma ta dekenai 1000 kina ia henia, idia ta ta edia diba hegeregerena.” Edia biaguna ia lou mai bona ena kohu ia nanadailaidia neganai, dahaka ia davaria? Kina 5,000 ia abia tauna be ena moni ia hoihoilaia, 5,000 kina ma ia abia. Unai hegeregerena, 2,000 kina ia abia tauna be ena moni ia hoihoilaia, 2,000 kina ma ia abia. To 1,000 kina ia abia tauna be tano ai ena moni ia guria, ia hoihoilaia lasi ena biaguna ena moni habadaia totona. Vadaeni, edia biaguna ese edia kara be edena bamona ia laloa?
18, 19. (a) Dahaka dainai hesiai taudia edia biaguna ese 2,000 kina ia abia tauna be 5,000 kina ia abia tauna ida ia hahegeregerea lasi? (b) Inai parabole ese ita dahaka ia hadibaia, taunimanima hanamodia bona hahegeregeredia karadia dekenai? (c) Dahaka dainai hesiai tauna ihatoina ena biaguna ese ia hahemaoro henia auka?
18 Ita ese 5,000 kina ia abia tauna bona 2,000 kina ia abia tauna mani ita laloa guna. Edia biaguna be idia ta ta dekenai ia gwau: “Namo herea! Oi be hesiai tauna namona, kara maoromaoro tauna.” Bema 5,000 kina ia abia tauna ese 2,000 kina sibona ia abia, unai bamona ia hereva henia, a? Reana lasi! To, 2,000 kina ma ia abia tauna dekenai be inai bamona ia hereva lasi: ‘Dahaka dainai 5,000 kina oi abia lasi? Be, emu bamona be lau totona ia abia monina oi itaia!’ Lasi, edia biaguna mai ena hebogahisi, Iesu ia laulaulaia tauna, ese ia hahegeregeredia lasi. Ia ese moni ia henidia, “idia ta ta edia diba hegeregerena,” bona ia ura idia haloua diba monina sibona do idia haloua. Ia ese maka tamona amo idia ruaosi ia hanamoa, badina be idia ruaosi be edia biaguna ena hesiai idia lao henia mai edia souli ibounai ida. Inai amo ita ibounai ese gau ta ita dibaia diba.
19 Momokani, hesiai tauna ihatoina be ena biaguna ese ia hanamoa lasi, to murimuri ena dibura ai idia negea. Kina 1,000 sibona ia abia dainai, ena biaguna ia laloa lasi moni momo herea, 5,000 kina ia abia tauna ena hegeregerena, do ia haloua be namo. To, biaguna ena moni ia habadaia toho lasi! Ena lalona be namo lasi, ia be “hesiai tauna dikana, lahedo tauna.” Unai amo ia hahedinaraia ena biaguna ia lalokau henia lasi, unai dainai ena biaguna ese ia hahemaoro henia auka.
20. Iehova ese ita idia koua o idia hamanokaia gaudia be edena bamona ia laloa?
20 Iehova ia ura ita ta ta ibounai be ita lalokau henia mai eda goada ibounai ida, to “ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona”! (Salamo 103:14) Unai ese iseda lalona ia hagoadaia, ani? Aonega Herevadia 21:2 ia gwau: “Lohiabada ese oiemu lalona gaudia ia tohoa noho”—emu gaukara ena ripoti lasi. Bema moni ai ita dabu, o eda tauanina o eda lalona idia manoka, o ma gau ta dainai eda gaukara ena bada be mai hetoana bona unai ita haidaua diba lasi, Dirava be unai ia lalo-pararalaia. (Isaia 63:9) To ia ura eda diba hegeregerena eda nega, eda siahu, bona eda moni ita gaukaralaia. Iehova ia goevadae, to ena tomadiho taudia mai edia goevadae lasi ia kara henidia neganai, edia goevadae lasi karadia ia maumauraia lasi. Ia kara auka henidia lasi, bona ia ura idia hegeregere do idia karaia diba karadia sibona do idia karaia.
21. Bema lalokau dainai Dirava ena hesiai ita lao henia, dahaka anina namodia do idia vara?
21 Iehova ita lalokau henia mai eda lalona ibounai, mai eda souli ibounai, mai eda darana ibounai, bona mai eda goada ibounai be namo, badina be unai ese “boubou karadia ibounai ia hereaia.” (Mareko 12:33) Bema lalokau dainai Dirava ena hesiai ita lao henia, mai eda goada ibounai ida do ita karaia. Petero ia gwau, bema Dirava ena lalokau bona ena kara namodia ma haida danu be “umui dekenai idia noho neganai, idia ese emui lauma do idia hagoadaia. Vadaeni inai goada umui abia dainai, bona Iesu Keriso iseda Lohiabada umui diba dainai, do umui noho kava lasi, to emui kara be mai anina.”—2 Petero 1:8.
[Footnotes]
a Watchtower Bible and Tract Society of New York, Inc. ese ia halasia.
Riviu
◻ Namona be dahaka ese ita ia hasiahua dainai Dirava ena hesiai ita lao henia?
◻ Keriso ena lalokau ese ita edena bamona ia hasiahua, Iehova ena hesiai ita lao henia totona?
◻ Farisea taudia ese dahaka idia laloa bada, to unai gau ita laloa bada lasi be namo?
◻ Dahaka dainai iseda hesiai gaukarana be Keristani tauna ma ta ena hesiai gaukarana ida ita hahegeregerea loulou be aonega karana lasi?
5. Iesu ia gwau taravatu iboudiai amo edena be bada?
11. Farisea taudia edia lalohadai tomadiho karadia dekenai mani oi gwauraia.
16. Dahaka dainai ita ese siboda eda gaukara be Keristani tauna ma ta ena gaukara ida ita hahegeregerea loulou be anina lasi?
[Picture on page 16]
Taunimanima ta ta edia diba, edia goada, bona edia noho be idauidau