Mama Tauna

HEBERU gado ai, “mama” ida idia hahegeregerea herevana be tamona. (Hadibaia Tauna 4:4) To, Greek gado be mai ena hereva haida, idia ida “mama” idia hahegeregerea. Unai hereva ta be zeʹlos, bona Heberu gado herevana hegeregerena, ia be mama namona ia gwauraia diba eiava mama dikana ia gwauraia diba. Greek gado herevana ma ta, phthoʹnos, be mama dikana sibona.

Idaunegai Greek gadona ai, inai hereva phthoʹnos be edena bamona idia gaukaralaia? The Anchor Bible Dictionary ia gwau: “Mai ena phthonos tauna be mataganigani tauna bamona lasi; reana ia ura lasi ma tau ta ena kohu do ia abia, to ia ura lasi unai tau be mai ena kohu. Ia be kara helulu tauna bamona lasi; kwalimu ia tahua lasi, to ma haida edia kwalimu dalana ia koua toho.”

Nega momo mama tauna ia diba lasi ena hekwakwanai edia badina korikorina be ia sibona ena lalohadai. Unai diksenari ia gwau: “Phthonos ena idau ta be sibona ena toana ia diba lasi. Bema phthoneros tauna idia hamaoroa sibona ena kara ena maoro do ia hamomokania, ia ese sibona bona ma haida do ia hamaoroa, haida edia kara dainai ia gwau henidia be maoro bona ia vara gauna be maoro lasi, unai dainai ia gwaugwau. Bema ta ese ia nanadaia dahaka dainai iena turana ta ia gwau henia, do ia gwau ena turana ena namo ia tahua dainai unai bamona ia kara henia.”

Evanelia torea taudia, Mataio bona Mareko, ese Greek gado herevana phthoʹnos idia gaukaralaia, Iesu idia alaia mase taudia edia kara ena badina gwauraia totona. (Mataio 27:18; Mareko 15:10) Oibe, mama dainai idia karaia. Mama dainai hereva momokani idia negea taudia ese edia tadikaka gunadia idia inai henia lalo-dika. (1 Timoteo 6:​3-5) Mama taudia be Dirava ena Basileia lalonai do idia vareai lasi be ita hoalaia lasi! Iehova Dirava ia gwau idia “mama” noho taudia be “do idia mase.”​—Roma 1:​29, 32; Galatia 5:21.

[Pictures on page 7]

Mama oi koua, emu mauri do ia hadikaia garina