Heiriheiri Tanobadana ai Maino Idia Davaria

INAI magasin ena kopina ai ia noho laulauna be Bosnia bona Herzegovina ai ia vara tuarina ena. Unai bamona gabuna ai maino ia noho diba, a? Oibe. Roman Katolik taudia, Eastern Otodoks taudia, bona Muslim taudia unai gabu ai be tano do idia abia totona idia tuari lalonai, taunimanima momo be maino idia ura henia, bona haida ese idia davaria.

Djorem ruma besena be guna Sarajevo ai idia noho bona idia be Iehova ena Witness taudia. Unai siti ai ia vara heiriheirina lalonai, vaia edia kara edia dekena taudia idia vadivadi henidia, Dirava ena Basileia ena sivarai namona hamaorolaidia totona. (Mataio 24:⁠14) Badina be dahaka? Badina be Djorem ruma besena idia diba unai Basileia be gau korikorina, guba ai ia gini vadaeni, bona ia be taunimanima edia maino havaraia dalana hereadaena bona tamona. Iehova ena Witness taudia ese aposetolo Paulo ia gwauraia gauna, “maino ena Sivarai Namona,” idia abidadama henia vaitani. (Efeso 2:⁠17) Bozo bona Hena Djorem hegeregeredia heduru idia henia taudia dainai, Bosnia bona Herzegovina ai taunimanima momo ese maino idia davaria noho.

Maino Korikorina be Gabeai

Djorem ruma besena sivaraidia ma ta be gabeai do ai gwauraia. To, hari, tau ma ta bona ena adavana, Dirava ena Basileia idia abidadama henia taudia, sivaraidia do ai gwauraia guna. Edia ladadia be Artur bona Arina. Guna idia bona edia natuna memerodia be ripablik ta ai idia noho, guna idia gwauraia Soviet Union tanona ta unai. Unai tano taudia idia tuari heheni matamaia neganai, Artur be orea ta totona ia tuari. To, nega daudau lasi, sibona ena lalona ai ia henanadai, ‘Badina be dahaka lau ese inai taunimanima, egu dekena taudia gunadia, lau tuari henidia?’ Unai tano ia rakatania, bena hekwakwanai momo ia hanaia murinai, ia bona ena ruma bese be Estonia ai idia ginidae.

Nega ta Artur be St. Petersburg ia vadivadi henia negana ai, Iehova ena Witness taudia ia hedavari henidia bona Dirava ena Basileia sivaraina ia kamonai neganai ia laloa bada. Iehova ena ura be, kahirakahira Dirava ena Basileia sibona ese taunimanima ibounai do ia lohiaia. (Daniela 2:⁠44) Unai neganai tanobada do ia maino, tano tamona taudia do idia tuari heheni lasi, bona bese idauidau do idia tuari heheni lasi. Isaia ese unai nega ia perovetalaia, ia gwau: “Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be [Iehova] ena diba maoro dekena amo do ia honu momokani, davara be ranu dekenai ia honu bamona.”​—⁠Isaia 11:⁠9.

Witness tauna ta ese do ia vara maino tanobadana ena laulau Baibel stadi bukana ta lalonai be Artur ia hahedinarai henia neganai, ia gwau guna ia noholaia gabuna ena toana be unai bamona. To hari, tuari ese ena toana ia hadikaia. Artur be Estonia ia lou henia bona unuseniai ia bona ena ruma bese be Iehova ena Witness taudia ida Baibel idia stadilaia, unai amo Dirava ena Basileia sivaraina ma haida idia dibaia.

Heiriheiri Bogaraginai Maino Ia Vara

Salamo 37:37 ia gwau: “Mai ena kerere lasi tauna do oi laloa. Kara maoromaoro tauna do oi itaia noho. Unai bamona tauna be mai maino danu do ia noho.” Oibe, Dirava matana ai ia kerere lasi bona ia kara maoromaoro tauna be nega vairai sibona lasi, to harihari danu maino ia abia diba. Edena bamona unai ia vara diba? Mani tau ta ladana Paul sivaraina oi laloa.

Paul be heau mauri taudia edia kamepa ta lalonai ia noho, Ethiopia ena sautwest kahanai, to ena hanua korikorina be unai tano ena badibadinai tanona ta ai. Sibona ena tano ai ia noho neganai, ia ese Iehova ena Witness taudia ta, oela kampani ta ai ia gaukara tauna, ia hedavari henia, bena unai tau ese Baibel stadi bukana ta ladana Mauri Ia Lao Henia Hereva Momokanina ia henia.a Unai murinai Paul ese unai Witness tauna ia davaria lou lasi, to unai buka ia stadilaia namonamo. Tuari dainai sibona ena tano ia rakatania, heau mauri taudia edia kamepa Ethiopia dekenai ia lao, bena ia dibaia gaudia be unuseniai idia noho taudia ia hamaorolaia. Idia haida ese ia gwauraia herevana idia abia dae, hereva momokanina. Idia dibaia herevadia hegeregeredia, nega daudau lasi idia be kamepa taudia ma haida idia haroro henidia.

Paul ese Watch Tower Society ena hedikwota ia tore henia, heduru noia totona. Addis Ababa amo haroro tauna ta idia siaia, bona ia ginidae neganai ia hoa, badina be taunimanima 35 ese ia idia naria, idia ura Dirava ena Basileia sivaraina ma haida do idia dibaia. Dala ia karaia, heduru do idia abia loulou totona.

Edena bamona ita gwau diba, Paul bamona taudia ese maino idia abia vadaeni? Edia noho be auka, to Dirava idia abidadama henia. Tanobada ena heiriheiri ese ia hahekwarahidia neganai, Baibel ena sisiba idia badinaia, ia gwau: “Gau ta totona do umui laloa hekwarahi lasi. To umui dekenai hegeregere lasi gaudia do umui abia totona, Dirava do umui noia. Bona umui noia negadia ibounai, mai tanikiu danu do umui guriguri henia.” Unai bamona idia karaia neganai, edia lalona idia hegeregere. Aposetolo Paulo ese Filipi kongregesen ia hamaorodia herevana be mai anina idia dekenai: “Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese emui laloa gaudia, bona emui kudouna idia mamia gaudia ibounai do ia gimaia namonamo.” Momokani, Iehova, ‘maino ia henia Diravana,’ tura henia momokani mamina idia abia.​—⁠Filipi 4:⁠6, 7, 9.

Hari Ia Noho Mainona

Dirava ena Basileia ena King dagina ia abia vadaeni tauna, Iesu Keriso, be Baibel ese “Maino ena Lohia” ia gwauraia. (Isaia 9:⁠6) Idaunegai peroveta tauna ese ia gwauraia, ia gwau: “Oiemu King ese bese idauidau edia huanai maino do ia karaia, bona ia ese tanobada kahana ibounai taudia do ia gunalaia, kone ta dekena amo ela bona kone ta, bona Euperate Sinavai dekena amo, ela bona tanobada dokona momokani.” (Sekaraia 9:⁠10) Dirava ena lauma ese ia havaraia herevadia unai bamodia ese tau ta ladana José ena mauri dalana ia haidaua vaitani.

José be nega ta dibura rumana ai ia noho. Ia be hagaria karadia karaia tauna bona pulisi edia bariki ta be bomu amo do ia hadikaia totona ia hegaegae noho lalonai, idia dogoatao. Ia laloa dagedage karana sibona ese gavamani do ia doria, iena tano taudia edia noho do idia hanamoa totona. Dibura rumana ai ia noho lalonai, Iehova ena Witness taudia be ena adavana ida Baibel idia stadilaia matamaia.

José be dibura rumana amo idia ruhaia murinai, ia danu ese Baibel ia stadilaia, bena daudau lasi Salamo 85:8 ena hereva ena anina be ia dekenai ia vara: “[Iehova] Dirava ena hereva lau kamonai noho. Ia gwau ia ese maino be ai dekenai, iena bese korikori taudia dekenai, do ia henia.” To, unai siri ena hereva dokona be inai: “Guna ai karaia kavakava karadia, be do ai karaia lou lasi.” Unai hegeregerena, Iehova ena maino ia tahua tauna ese sibona ena ura kava do ia karaia lasi bona Iehova ena ura dadaraia karana ta do ia karaia lasi.

Hari, José bona ena adavana be Keristani hesiai taudia. Idia ese ma haida idia hamaorodia, Iehova ena Basileia sibona ese hekwakwanai, guna José be sibona ese ia karaia bomudia amo ia kokia toho hekwakwanaidia, be do ia kokia. Idia ese Baibel ena hereva idia abidadama henia, ia gwau: “[Iehova] ese gau namodia ai dekenai do ia henia.” (Salamo 85:12) Vanegai José ese guna ia hadikaia gwauraia barikidia ia vadivadi henidia. Dahaka totona? Dirava ena Basileia sivaraina be unuseniai idia noho taudia hamaorolaia totona.

Maino Taudia

Salamo 37:​10, 11 dekenai, Baibel ia gwau: “Nega daudau lasi lalonai kara dika taudia do idia ore. Edia gabu do umui tahua, to do umui davaria lasi. To manau taudia ese noho gabuna tano do idia abia, do idia helai namonamo, mai moale bona mai maino danu.” Helaro hereadaena!

To, mani oi laloa, “manau taudia” sibodia mo ese Iehova ena maino idia abia diba. Maino idia tahua taudia be reana maino dalana do idia dibaia guna be namo. Keith, New Zealand ai ia noho tauna, be unai bamona tauna ta. Haida ese idia gwauraia “tauanina bona lalona goada tauna, heatu bona heai tauna.” Ia be gang oreana tauna ta bona ia noholaia rumana be mai ena magu aukana, bona magu lalonai gadi sisiadia toi idia loaloa, vareai kava gwauraia taudia koudia totona. Iena adavana, ena natuna 6 edia sinana, ese ia negea.

Keith ese Iehova ena Witness taudia ia hedavari henidia neganai, sivarai namona ese ena mauri dalana ia haidaua vaitani. Nega daudau lasi ia bona ena natuna be Witness taudia edia hebou idia lao henidia. Iena huina lata hereana ia pakosia bona Dirava ena Basileia sivaraina be guna ia bamodia taudia ia hamaorolaidia matamaia. Idia haida danu ese Baibel idia stadilaia matamaia.

Lalo-maoromaoro taudia milioni milioni tanobada hegegemadai hegeregeredia, Keith ese aposetolo Petero ena hereva ia badinaia matamaia: “Bema tau ta ese mauri ia ura henia, bona nega namodia ia ura itaia neganai, . . . dika do ia rakatania, bona kara namo do ia karaia. Maino do ia tahua, bona maino ena dala do ia badinaia noho.” (1 Petero 3:​10, 11) Keith ena adavana, guna ia ese Keith ia negea hahinena, ese Keith ia adavaia lou, bona hari Keith ese ‘maino ia tahua bona ena dala ia badinaia’ toho.

Iehova ena maino ese taunimanima momo ia hamauria; idia ta be guna heau helulu diba momo tauna, guna idia gwauraia U.S.S.R. tanona ai ia vara tauna. Hari tau be Olympic gadara ai medolo haida ia abia ena kwalimu davana, to gabeai ia moale lasi bena drag ia ania bona kekero muramurana ia inua matamaia. Lagani 19 lalodiai gau idauidau be ia dekenai idia vara​—⁠kota ena hahemaoro herevana dainai lagani toi leiba kamepa ta Siberia dekenai ia noho, bouti badana ta ai ia komu bena unai amo ia lao Canada, bona drag ia ania dainai nega rua kahirakahira ia mase. Unai murinai Dirava ia guriguri henia, ia noia do ia durua, mauri ena anina korikorina do ia davaria totona. Iehova ena Witness taudia, Russia gadona idia gadolaia taudia, ida Baibel ia stadilaia, bena unai ese ia durua, ena henanadai edia haere ia davaria totona. Hari, taunimanima milioni milioni hegeregeredia, unai tau be Dirava ida maino ia karaia vadaeni bona sibona ena lalona ia maino danu.

Toreisi Lou Helarona

Vadaeni, Bozo bona Hena Djorem, Sarajevo ai, do ita laloa lou. Idia be mai edia natuna kekenina ta, ena lagani be ima bona ena ladana be Magdalena. July 1995 ai, idia toiosi be haroro gaukarana karaia lou totona edia ruma idia rakatania lalonai, madi, buleti badana ta ia pou bena idia toiosi ia hamasedia. Taunimanima dekenai idia harorolaia mainona be edena bamona? Buleti ese ia hamasedia dainai, unai ese ia hahedinaraia unai be maino korikorina lasi, a?

Lasi! Hari inai nega lalonai, kerere idia vara. Bomu o buleti ese taunimanima idia hamasedia. Ma haida be gorere eiava aksiden dainai idia mase. Momo be buruka dainai idia mase. Dirava ena maino idia abia vadaeni taudia dekenai unai kerere idia vara diba, to unai ese edia helaro ia kokia lasi.

Iesu ese ena bamona Mareta ia gwauhamata henia, ia gwau: “Toreisi lou be lau inai, mauri danu be lau. Lau dekenai ia abidadama henia tauna, ia be do ia mase, to do ia mauri lou.” (Ioane 11:⁠25) Djorem ruma besena ese unai hereva idia abia dae, Iehova ena Witness taudia oredia hegeregeredia. Bona Djorem ruma besena be edia lalona ai idia abia dae bema idia mase, Dirava ese do ia hatoredia isi lou bena maino korikori tanobadana ai do idia noho. Iehova Dirava ese “matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—⁠Apokalupo 21:⁠4.

Iesu ena mase be kahirakahira neganai, ena orea taudia ia hamaoroa, ia gwau: “Lauegu maino lau henia umui dekenai. . . . Umui laloa hekwarahi lasi.” (Ioane 14:⁠27) Ita moale, badina be Djorem ruma besena be guna unai maino idia abia bona toreisi lou neganai do idia moalelaia guguru. Iehova, maino Diravana, idia tomadiho henia taudia iboudiai dainai ita moale. Unai bamona taudia edia lalona idia maino. Dirava ida maino idia karaia vadaeni. Taunimanima ida idia maino. Bona idia diba momokani, maino negana be gabeai do ia vara. Oibe, ena be heiriheiri tanobadana ai idia noho, to maino idia davaria. Momokani, Dirava be lauma bona momokani amo idia tomadiho henia taudia iboudiai ese maino idia moalelaia. Oi danu ese unai bamona mainona oi davaria be namo.

[Footnotes]

[Pictures on page 7]

Ena be heiriheiri tanobadana ai idia noho, to maino idia davaria vadaeni