Mai Eda Moale ida Ita Boiboi be mai Badina
“Do idia moale bada ela bona hanaihanai. Edia lalohisihisi bona taitai, be do idia ore momokani.”—ISAIA 35:10.
REANA oi itaia vadaeni, hari inai negai tanobada lalonai haida sibona idia moale momokani. To, Iehova ena Witness taudia be Keristani taudia korikoridia dainai, idia be mai edia moale. Bona Witness taudia ida idia hebou taudia ma milioni momo, idia do bapatiso lasi taudia, matamatadia bona burukadia, be mai edia dala unai moale do idia abia. Inai magasin ena hereva be hari oi duahia ese ia hahedinaraia unai moale oi abia vadaeni eiava oi abia diba.
2 Taunimanima momo be mamina idia abia edia mauri lalonai gau ta ai idia dabu. Oi be edena bamona? Momokani, reana kohu haida ai oi dabu. Taga taudia bona siahu taudia edia kohu ena momo ese oiemu ia hereaia momokani. Bona reana oi gorere sisina eiava oi goada momokani lasi. To, emu moale be ia bada bona ia goada, bona tanobada taudia bilioni bilioni edia ia hereaia. Edena bamona?
3 Iesu ena hereva mani oi laloa, ia gwau: “Inai bamona lau hereva vadaeni umui dekenai, lauegu moale be umui emui lalona dekenai do ia noho totona, vadaeni umui emui moale be do ia momokani.” (Ioane 15:11) “Emui moale be do ia momokani.” Hereva namona unai! Keristani dalana badinaia karana bema ita tahua dobu, eda moale ia momokani ena badina momo ita davaria diba. To harihari, mai anina bada herevadia Isaia 35:10 lalonai mani oi laloa. Idia be mai anina bada herevadia, badina idia be mai anina ita dekenai hari inai nega lalonai. Herevadia be inai: “Lohiabada ese ia hoia lou taudia do idia giroa mai. Siona dekenai mai ane abia, bona mai moale bada danu do idia mai. Idia be do idia moale ela bona hanaihanai. Edia lalohisihisi bona taitai, be do idia ore momokani.”
4 “Do idia moale ela bona hanaihanai.” Anina be edia moale be do ia doko lasi, badina be edia noho do ia namo dainai. Unai be hereva namona, ani? To, reana oi laloa, ‘Unai be anina lasi lau dekenai, to egu hekwakwanai bona lalo-hekwarahi, dina dina iboudiai gaudia, be mai anina lau dekenai.’ To idia vara gaudia ese idia hahedinaraia unai danu be mai anina oi dekenai. Isaia 35:10 ena peroveta gwauhamatana be mai anina oi dekenai hari inai nega lalonai. Unai do ita diba totona, inai karoa namona, Isaia 35, ena kahana ta ta do ita tahua. Momokani, do ita davaria gaudia be do oi moalelaia.
Idia Moale be Namo Taudia
5 Unai peroveta herevana ena anina do ita lalo-pararalaia totona, namona be Heberu peroveta tauna ese ia torea negana do ita laloa guna. Lagani 732 B.C.E. bamona ai ia torea. Unai be nega daudau ia do noho ela bona Babulonia ese Ierusalema ia hadikaia ore negana. Isaia 34:1, 2 ese ia hahedinaraia hegeregerena, Dirava ia peroveta, ia gwau bese idauidau edia dika davana do ia henidia, bona Isaia 34:6 ai ia gwau unai bese ta be Edoma. Gabeai ia ese Babulonia taudia amo unai ia karaia. Unai hegeregerena, Iuda taudia be Dirava dekena amo idia raka siri dainai, ia ese Babulonia taudia ia gaukaralaia, Iuda do idia hadikaia ore totona. Unai dainai dahaka ia vara? Idia ese Dirava ena bese taudia idia hakaua oho, bena edia tano be lagani 70 lalonai ia noho kava.—2 Sivarai 36:15-21.
6 To, Edoma taudia dekenai ia vara gauna be Iuda taudia dekenai ia vara gauna amo ia idau herea. Dirava ese Edoma taudia be panisi hanaihanai ia henidia; gabeai unai bese be ia boio vaitani. Oibe, Edoma taudia be guna idia noholaia to gabeai haida ese idia hadikaia ore hanuadia oi vadivadi henidia diba; idia ta be Petra. To hari inai negai, bese ta lasi idia gwauraia diba ‘Edoma besena.’ To Babulonia taudia ese Iuda tanona idia hadikaia momokani murinai, unai bamona ia noho mai ena moale lasi ela bona hanaihanai, a?
7 Isaia karoa 35 ena peroveta herevana be mai anina namona. Hanamoa lou peroveta herevana ita gwauraia diba, badina be ena anina ia vara negana ginigunana be lagani 537 B.C.E. ai, Iuda taudia be edia tano idia lou henia neganai. King ta ese Babulonia ai idia guia Israela taudia be gwaumaoro ia henidia, sibodia edia tano do idia lou henia. (Esera 1:1-11) To unai ia do vara lasi neganai, Babulonia ai idia do guia Iuda taudia be unai peroveta herevana Dirava ena amo idia laloa neganai, reana idia laloa daradara, edia tano, Iuda, do idia lou henia neganai, dahaka do idia davaria? Bona dohore edia noho be edena bamona? Unai henanadai edia haere ese idia hahedinaraia dahaka dainai ita be mai eda moale ida do ita boiboi be mai ena badina korikori. Mani ita tahua.
8 Iuda taudia idia kamonai idia be mai edia gwaumaoro edia tano do idia lou henia, to unai neganai danu idia laloa anina namona do idia davaria lasi. Lagani 70, uru ta ena lagani iboudiai, lalonai, edia tano ia noho kava vadaeni. Dahaka ia vara vadaeni edia tano dekenai? Guna idia birulaia tanodia, edia vain umadia, bona edia huahua audia momo gabudia, be ava kavakava idia tubu gabudia ai idia lao vadaeni. Guna idia dairia umadia be tano kaukauna ai idia lao vadaeni. (Isaia 24:1, 4; 33:9; Esekiela 6:14) Inai danu mani oi laloa: Uda boromadia momo be unuseniai idia noho. Idia haida be vamu ania gaudia, hegeregere laiona bona taiga. (1 King Taudia 13:24-28; 2 King Taudia 17:25, 26; Solomona ena Ane 4:8) Bea danu idia noho; idia ese tatau, hahine, o memero kekeni idia alaia mase diba. (1 Samuela 17:34-37; 2 King Taudia 2:24; Aonega Herevadia 17:12) Koria gaigaidia idauidau bona doadoa danu idia noho. (Genese 49:17; Deuteronomi 32:33; Iobu 20:16; Salamo 58:4; 140:3; Luka 10:19) Lagani 537 B.C.E. ai Iuda taudia be Babulonia amo edia tano idia lou henia neganai, bema oi be idia ida umui lao, reana oi ura lasi unai bamona gabuna ai do oi loaloa, ani? Idia ginidae neganai ia be paradaiso lasi.
9 To, Iehova ese ia idia tomadiho henia taudia ia hakaua lao edia tano dekenai, bona ia be mai ena siahu unai tano ena toana do ia haidaua vaitani. Oi abia dae Dirava be unai bamona ia karaia diba, ani? (Iobu 42:2; Ieremia 32:17, 21, 27, 37, 41) Vadaeni, edia tano idia lou henia Iuda taudia totona bona edia tano totona, dahaka ia karaia? Hari inai nega lalonai unai ena anina be dahaka Dirava ena orea taudia dekenai, bona ena anina be dahaka oiemu mauri lalonai—hari bona gabeai? Vadaeni, namona be idaunegai idia vara gaudia do ita tahua guna.
Edia Noho Idauna Idia Moalelaia
10 Kurese ese gwaumaoro be Iuda taudia ia henidia edia tano dikana do idia lou henia neganai, dahaka ia vara? Peroveta herevana namona Isaia 35:1, 2 ai mani oi duahia: “Taunimanima idia noho lasi tanona, bona tano kaukauna be do idia moale, bona palauapalaua be unai tano dekenai do idia tubu namonamo. Taunimanima idia noho lasi tano dekenai, palauapalaua do idia vara, bona mai moale bada danu ane do idia abia. Unai tano ena hairaina, be dohore Lebanona ena ororo bamona, bona tano ena goada be, Karamele bona Sarona edia goada hegeregerena. Taunimanima ibounai ese Lohiabada ena hairaina do idia itaia. Iena diaridiari badana, bona iena siahu do idia itaia.”
11 Baibel negadia ai, Lebanona, Karamele, bona Sarona be gabu mai hairaidia, edia tubutubu gaudia be momo dainai. (1 Sivarai 5:16; 27:29; 2 Sivarai 26:10; Solomona ena Ane 2:1; 4:15; Hosea 14:5-7) Isaia ese unai gabu ia gwauraia, Dirava ena heduru amo tano do idia haidaua murinai do ia abia toana ia gwauraia totona. To tano ena toana sibona do ia idau, a? Lasi!
12 Isaia 35:2 ia gwau tano be “mai moale bada danu ane do [ia] abia.” Ita diba tano bona tubutubu gaudia idia “moale bada” diba lasi. To, bema tano ia digara ia lao bona tubutubu gaudia ese anina bada idia havaraia, unai ese taunimanima ia hamoaledia bada diba. (Levitiko 23:37-40; Deuteronomi 16:15; Salamo 126:5, 6; Isaia 16:10; Ieremia 25:30; 48:33) Tano ena toana do ia idau hegeregerena, taunimanima edia mauri do ia idau, badina be inai peroveta herevana lalonai taunimanima be mai anina bada. Unai dainai ita abia dae Isaia ena hereva ese edia tano idia lou henia Iuda taudia edia mauri idauna ia herevalaia; edia moale ia herevalaia momo.
13 Unai hegeregerena, inai peroveta herevana, ita ia hagoadaia herevana, ena hereva ma haida do ita tahua, bena Iuda taudia be Babulonia amo idia ruhaia bona edia tano idia lou henia neganai unai hereva ena anina ia vara dalana be do ita itaia. Is 35 Siri 3 bona 4 lalonai, Isaia ese edia tano idia lou henia taudia edia mauri lalonai do idia idau gaudia ma haida ia herevalaia, ia gwau: “Edia imana idia manoka taudia do umui hagoadaia, bona edia tuina idia manoka taudia do umui durua. Gari bona laloa manoka taudia do umui hamaoroa, umui gwau, ‘Do umui goada, umui gari lasi! Dirava ia mai noho, umui do ia hamauria totona. Umui idia tuari henia taudia edia kerere davana do ia henia.’ ”
14 Bema ita laloa iseda Dirava, tano dikana be tano namona ai ia halaoa diba Diravana, ese ia idia tomadiho henia taudia ia laloa bada, unai ese ita ia hagoadaia, ani? Ia ura lasi idia guidia Iuda taudia edia lalona idia manoka, o nega vaira idia lalo-hekwarahilaia. (Heberu 12:12) Idia guia Iuda taudia edia noho mani oi laloa. Dirava ese edia nega vaira ia perovetalaia bona unai hereva dainai idia be mai edia helaro, to ma gau ta dainai idia lalo-goada be auka. Edia noho be dibura masemase rumana ai idia koua taudia edia noho hegeregerena, sibodia edia ura hegeregerena idia loaloa diba lasi bona Iehova ena hesiai idia lao henia diba lasi. Idia dekenai toana be idia be mai edia helaro namona ena diari lasi.—Deuteronomi 28:29; Isaia 59:10 itaia.
15 To, Iehova ese Kurese ena amo ia ruhadia, sibodia edia tano do idia lou henia totona neganai, edia noho ia idau! Baibel ese ia hahedinaraia lasi edia tano idia lou henia Iuda taudia bogaragidiai Dirava ese hoa dalana ai matakepulu taudia edia matana ia kehodia, o taia kudima taudia edia taiana ia kehodia, o aena dika taudia o aena tamona taudia edia aena ia hanamodia. Lasi. To, unai ia hereaia karana ta ia karaia. Idia lalokau henia tanona ai, diari bona ura kwalimu ia henidia lou.
16 Gau ta ese ia hahedinaraia lasi unai taunimanima idia laloa Iehova ese hoa dalana ai unai bamona do ia hamauridia. Idia diba Dirava be unai bamona ia karaia lasi Isako, Samson, bona Eli dekenai. (Genese 27:1; Gunalaia Taudia 16:21, 26-30; 1 Samuela 3:2-8; 4:15) To bema idia laloa Dirava ese edia noho be unai kara ese ia laulaulaia dalana ai do ia haidaua, edia helaro ena anina idia reaia lasi. Badina be Isa 35 siri 5 bona 6 edia anina be unai dala ai ia vara momokani. Isaia ia peroveta maoro, ia gwau: “Matakepulu taudia ese do idia itaia diba, bona taia kudima taudia, be do idia kamonai diba. Edia aena idia dika taudia be do idia roho bona mavaru, bona hereva diba lasi taudia, be mai moale bada do idia boiboi.”
Tano be Paradaiso Hegeregerena ai Idia Halaoa
17 Edia tano idia lou henia taudia be Isaia ese ia gwauraia gaudia dainai idia moale bada diba: “Tano kaukau dekenai, be sinavai do idia vara, bona edia ranu be, tano do ia heau hanaia lao. Miri tano mai ena siahu bada, be ranu gabuna do ia lao, bona tano kaukauna be gohu do ia lao. Uda sisia idia noho gabuna, be paripari momo gabuna, mai ena rei bona siriho do ia lao.” (Isaia 35:6b, 7) Ena be hari inai negai unai tano ibounai ena toana be unai bamona lasi, to gau haida ese idia hahedinaraia Iuda tanona ibounai be guna “animal edia rei gabuna namo hereana.”a
18 Iuda taudia haida, orea maragina, be Gwauhamata Tanona dekenai idia lou lao neganai idia abia moalena be mani oi laloa! Idia be mai edia dala, unai noho kava tanona, uda sisiadia bona uda boromadia ese idia noholaia tanona, ena toana do idia haidaua. Bema unai neganai oi noho bona unai tano hanamoa gaukarana lalonai Dirava ese emu hekwarahi ia hanamoa, unai gaukara oi moalelaia, ani?
19 To, Babulonia ai idia noho Iuda taudia haida sibodia be edia tano hanamoa totona idia lou henia diba. Dirava ese ia hahedinaraia edena bamona taudia mo idia hegeregere. Babulonia ena tomadiho karadia ese idia hamiroa taudia idia lou lao diba lasi. (Daniela 5:1, 4, 22, 23; Isaia 52:11) Bona mai edia kavakava ida dala kererena idia rakalaia taudia danu idia lou diba lasi. Unai bamona taudia iboudiai idia hegeregere lasi. To Dirava ena taravatu idia badinadia taudia, iena matana ai idia helaga taudia, be Iuda idia lou henia diba. Idia raka lao neganai, unai be hegeregere Helaga Kara ena Dala ai idia raka bamona. Isa 35 Siri 8 lalonai Isaia ese unai ia hahedinaraia goevagoeva, ia gwau: “Unai gabu dekenai, laolao dalana be do ia noho, iena ladana be do idia atoa, ‘Helaga Kara ena Dala.’ Kara dika tauna ta ese, unai dala dekenai do ia raka lasi, bona kavakava tau dikadia ese, unai dala idia raka gwauraia taudia do idia hakaua kerere lasi.”
20 Iuda taudia be dala ai idia lou lao neganai, uda boromadia bamona taudia eiava dadidadi oreadia ese do idia hadikadia garina idia gari be badina lasi. Badina be dahaka? Badina be Iehova ese unai bamona taudia ia koua, idia be ia hoia lou taudia ida unai Dala ai do idia raka hebou diba lasi. Unai dainai ena orea taudia be mai edia moale bona mai edia helaro namona ida idia laolao diba. Isaia ese ena peroveta herevana dokona ai unai ia gwauraia dalana be mani oi laloa; ia gwau: “Laiona be unuseni do idia noho lasi. Dagedage gaudia be unai gabu dekenai do idia loaloa lasi. Lohiabada ese ia hamauria taudia sibona, be unai dala dekenai do idia raka. Lohiabada ese ia hoia lou taudia do idia giroa mai. Siona dekenai mai ane abia, bona mai moale bada danu do idia mai. Idia be do idia moale ela bona hanaihanai. Edia lalohisihisi bona taitai, be do idia ore momokani.”—Isaia 35:9, 10.
21 Unai be peroveta laulauna namo hereana, ani? To namo lasi ita laloa unai be idaunegai gauna sivaraina mo bona ia be anina lasi iseda noho dekenai, hari inai nega lalonai eiava gabeai. Hereva momokani be inai: Unai peroveta herevana ena anina be hari inai nega lalonai Dirava ena orea taudia bogaragidiai ia vara, unai dainai ia be mai anina ita ta ta ibounai dekenai. Ia dainai, ita be mai eda moale ida ita boiboi be mai badina. Ena anina oiemu mauri lalonai hari inai negai bona gabeai danu be hereva gabena lalonai do ai herevalaia.
[Footnotes]
a Saiens tauna, Walter C. Lowdermilk, (U.N. Food and Agriculture Organization ena ladanai ia hereva tauna) ia gwau: “Guna unai tano be animal edia rei gabuna namo hereana.” Ma ia gwau “Roma ena nega amo” unai tano ai medu bona dina negadia idia idau lasi, to “anina bada be guna ia havaraia tanona be taunimanima edia kara dainai ‘tano kaukauna’ ai ia lao.”
Oi Laloatao A?
◻ Isaia karoa 35 ena anina be edena negai ia vara guna?
◻ Unai peroveta herevana ena anina ia vara guna neganai, dahaka ia havaraia?
◻ Iehova ese Isaia 35:5, 6 be edena bamona ia hamomokania?
◻ Iuda taudia be edia tano idia lou henia neganai, edia tano bona edia mauri be edena bamona idia idau?
[Study Questions]
1. Hari inai nega lalonai daidia idia moale be mai badina?
2. Keristani tauna ena moale bona taunimanima momo edia mamina be edena bamona idia idau?
3. Dahaka hereva mai edia anina bada ita laloa be namo, bona badina be dahaka?
4. Isaia 35:10 ese edena bamona moalena ia herevalaia, bona dahaka dainai unai ita laloa be namo?
5. Isaia ese karoa 35 ena peroveta herevana be edena negai ia torea?
6. Edoma taudia dekenai do ia vara gauna bona Iuda taudia dekenai do ia vara gauna be edena bamona idia idau?
7. Babulonia ai idia guia noho Iuda taudia ese Isaia karoa 35 ena hereva be reana edena bamona idia laloa?
8. Iuda taudia be Babulonia amo edia tano idia lou henia neganai, dahaka idia davaria? (Esekiela 19:3-6; Hosea 13:8 itaia.)
9. Badina be dahaka idia lou lao taudia be mai edia helaro bona edia lalona idia goada diba?
10. Isaia 35:1, 2 ia gwau dahaka do ia idau?
11. Isaia ia diba unai tano be edena bamona?
12. Badina be dahaka ita gwau diba inai peroveta herevana Isaia karoa 35 lalonai be mai anina taunimanima dekenai?
13, 14. Isaia 35:3, 4 ia gwau taunimanima be edena bamona do idia idau?
15, 16. (a) Ita diba Iehova ese idia lou lao taudia be edena bamona ia kara henidia? (b) Badina be dahaka idia lou lao taudia idia diba Dirava ese hoa dalana ai edia gorere amo do ia hamauridia lasi, to Isaia 35:5, 6 edia hereva hegeregerena, dahaka ia karaia?
17. Iehova ese unai tano ena toana be edena bamona ia haidaua?
18. Dirava ena hahenamo dainai idia lou lao Iuda taudia be edena bamona idia kara?
19. Dahaka dainai haida sibodia mo be hegeregere Babulonia ena igui amo edia tano do idia lou henia?
20. Iuda taudia idia lou lao neganai, dahaka garina idia gari be badina lasi, bona unai dainai dahaka idia karaia diba?
21. Isaia karoa 35 ena anina ia vara vadaeni; hari inai negai ita ese unai be edena bamona ita laloa be namo?
[Picture on page 9]
Petra hanuana gunana, Edoma taudia ese guna idia noholaia tanona ai
[Credit Line]
Garo Nalbandian
[Pictures on page 10]
Iuda taudia be Babulonia ai idia noho neganai, Iudea ena kahana badana be tano gagaena ai ia lao, bona bea bona laiona momo be unuseniai idia loaloa
[Credit Lines]
Garo Nalbandian
Bear and Lion: Safari-Zoo of Ramat-Gan, Tel Aviv