Dirava Oi Lalokau Henia Momokani Diba, A?
DIRAVA ia gwau: “Tau ta ese lauegu vairana ia itaia neganai, unai tau be do ia mase.” (Esodo 33:20) Danu, Baibel idia torea haorea murinai, toana be tau ta be Dirava maoromaoro dekenai idia hereva henia lasi. Oi laloa ia auka—hegeregere dala be lasi—oi itaia lasi bona iena gadona oi kamonai lasi tauna do oi lalokau henia momokani totona, a? Guba bona tanobada Havaraia Tauna ida lalokau tura henia karana ita moalelaia diba, a?
Ita daradara lasi be maoro, Iehova ita tura henia momokani diba. Deuteronomi 6:5 ai, Israela besena idia abia taravatu ta ita duahia: “Lohiabada oiemu Dirava do oi lalokau henia, mai oiemu kudouna ibounai, mai oiemu lauma ibounai, bona mai oiemu goada ibounai danu.” Iesu Keriso be iena hahediba taudia dekenai unai taravatu ia gwauraia lou, ma ia gwau: “Inai be taravatu bada herea momokani. Ia be ginigunana.” (Mataio 22:37, 38) Bema Dirava ida unai bamona hetura karana ita moalelaia diba lasi, Baibel ese ita do ia hagoadaia ia ita lalokau henia totona, a?
Iehova ia laloa ia do ita lalokau henia, badina be ita ia hagania sibona dainai, a? Lasi. Dirava ese tau bona hahine ginigunadia ia havaraia neganai, Dirava lalokau henia urana ia noho. Adamu bona Heva ia Havaraia Tauna ese ia doridia lasi ia idia lalokau henia totona. To idau, ia ese Dirava lalokau henia urana idia habadaia gaudia bogaraginai ia atodia. Dirava kahirakahira dekenai do idia lao eiava ia dekena amo do idia siri—idia sibodia idia abia hidi diba.
Adamu bona Heva ese gwau-edeede karana idia abia hidi. (Genese 2:16, 17; 3:6, 7) To, edia tubudia bona Iehova huanai, lalokau hetura karana hamatamaia dalana ia noho.
Dirava Momokanina ida Oi Raka
Unai hegeregere, Baibel lalonai ia gwau “Aberahamo be Dirava ena turana.” (Iamesi 2:23) To Aberahamo sibona lasi be Dirava ida hetura karana namona ia moalelaia. Baibel ia gwau ma goevadae lasi taudia momo ese Iehova idia lalokau henia bona “Dirava danu idia turana karaia noho.”—Genese 5:24; 6:9; Iobu 29:4; Salamo 25:14; Aonega Herevadia 3:32, NW.
Dirava ena idaunegai hesiai taudia be idia vara neganai, Dirava ura henia bona lalokau henia hemamina ia noho lasi. Gabeai unai hemami idia abia bona idia habadaia. Edena bamona? Iena ladana, Iehova, idia dibaia karana amo. (Esodo 3:13-15; 6:2, 3, NW) Iena noho bona iena dagi idia laloa. (Heberu 11:6) Nega momo iena lalokau karadia idia laloa dobu. (Salamo 63:6) Guriguri amo edia lalohadai hehunidia idia hahedinaraia Dirava dekenai. (Salamo 39:12) Iena kara namo idia hahedibalaia. (Sekaraia 9:17) Ia idia habadua garina idia gari matamaia.—Aonega Herevadia 16:6.
Dirava ena turana ta ai oi lao bona ia ida oi raka diba, a? Momokani, Dirava oi itaia diba lasi bona iena gadona oi kamonaia diba lasi. To, Iehova ese oi ia boiria iena ‘palai dekenai oi noho,’ ena turana ai oi lao totona. (Salamo 15:1-5, NW) Unai dainai, Dirava oi lalokau henia diba. To ia kahirakahira dekenai oi noho bona mai lalokau ida oi tura henia be edena bamona oi karaia diba?