‘Do Umui Helaga Badina Lau be Helaga’
“Do umui helaga, badina be lau Lohiabada, emui Dirava, lau be helaga vadaeni.”—LEVITIKO 19:2.
TANOBADA ena tomadiho orea badadia momo lalonai idia gwauraidia helaga taudia idia noho. Taunimanima momo idia laloa Katolik sisita ta, Mother Teresa, ia helaga, badina be ena mauri ia henia India dekenai idia noho ogogami taudia durua totona. Pope idia gwauraia “Tamana Helagana.” Hari iseda negai Katolik taudia haida idia laloa Katolik oreana ta, Opus Dei, ia haginia tauna, José María Escrivá, be “helaga karana ia haheitalaia” tauna. Hindu tomadiho be mai ena swamis, eiava helaga taudia. Gandhi be helaga tauna bamona ai idia matauraia. Buddha tomadiho be mai ena helaga monk taudia, bona Islam tomadiho be mai ena peroveta tauna helagana. To ta be helaga, ena anina momokanina be dahaka?
2 Inai hereva “helaga” ena anina be “1. . . . dirava ta ena siahu ida oi hatamonaia; ia helaga. 2. Taunimanima idia laloa ia be mai anina bada gauna dainai idia tomadiho henia o idia matauraia bada . . . 3. Tomadiho dalana o orea aukana ta ena taravatu hegeregerena ia mauri noho . . . 4. Idia atoa siri tomadiho lalonai idia gaukaralaia totona sibona.” Baibel lalonai, helaga karana ena anina be “tomadiho dalanai ia goeva eiava miro lasi; mai helagana.” Baibel stadilaia bukana, Insight on the Scriptures, ia gwau, “Heberu gado ai, helaga karana ena [hereva] qoʹdhesh ena anina be gau ma haida amo ia gini siri, gau tamona tomadiho henia, o Dirava dekenai hahelagaia karana, . . . idia atoa siri Dirava ena hesiai gaukara karaia totona.”a
3 Dirava ese Israela besena ia hagania idia helaga be namo. Dirava ena Taravatu be inai: “Badina lau be Lohiabada, umui emui Dirava, unai dainai do umui helaga, badina lau be helaga.” Daika be helaga ena Badina? Goevadae lasi Israela taudia be edena bamona idia helaga diba? Hari iseda negai, Iehova ena boiboi, do ita helaga boiboina, amo dahaka ita dibaia?—Levitiko 11:44.
Israela Taudia Edia Kara Helaga Ena Badina Tauna Dekenai
4 Israela taudia ese Iehova Dirava tomadiho henia lalonai idia gaukaralaia gaudia iboudiai idia hahelagaia bona idia matauraia be namo. Badina be dahaka? Badina be Iehova sibona be helaga karana ia havaraia bona ia be helaga ena badina. Mose ese dubu helagana bona hahelaga taudia edia dabua bona edia herahera gaudia idia hegaegaelaia karana ia kikilaia herevana be inai hereva amo ia hadokoa: “Bona umui ese golo namo herea dekena amo medolo ta do umui karaia. Medolo ena latanai inai bamona hereva do umui torea, ‘Helaga, Lohiabada Ena.’ ” Unai golo sibona amo idia karaia medolo be hahelaga tauna badana ena kwara kumia dabua ena vairana dekenai idia kwatua kau, bona ia hahedinaraia ia be gau ma haida amo ia gini siri, unai gaukara helagana sibona do ia karaia totona. Dina ese idia torea saini ia hadiaria neganai, Israela taudia ese Iehova ena helaga karana idia laloa loulou.—Esodo 28:36; 29:6; 39:30.
5 To Israela taudia be edena bamona do idia helaga diba? Iehova tura henia bona mai goeva ida idia tomadiho henia karana sibona amo. Mai helaga bona mai goeva ida tauanina dalanai bona lauma dalanai “Helaga Dirava” idia tomadiho henia totona, ia idia diba maoromaoro be gau badana. (Aonega Herevadia 2:1-6; 9:10) Unai dainai Israela taudia be mai edia ura goevana bona mai edia kudou goevana ida Dirava idia tomadiho henia be namo. Iehova ese ia idia tomadiho henia koikoi karana ia ura henia lasi vaitani.—Aonega Herevadia 21:27.
Iehova ese Israela Ia Gwauraia Dika Ena Badina
6 Israela taudia be dubu dekenai boubou dikadia idia mailaia mai edia kudou ibounai ida lasi neganai, Iehova ena lalohadai ita itaia. Iena peroveta tauna Malaki amo Iehova ese edia boubou ia gwauraia dika: “Lau be umui emui kara dekenai lau moale lasi. Bona lau dekenai umui mailaia boubou gaudia be do lau abia dae lasi. . . . To umui ese lau umui hanamoa lasi, badina umui laloa lauegu boubou patana be gau anina lasi, bona umui sibona umui ura lasi aniani be egu pata dekenai umui atoa. Umui gwau, ‘Ia, inai boubou henia kara dekenai ita hesiku vadaeni!’ Umui ese lau umui negea inai! Umui ese lau dekenai inai gaudia umui henia boubou totona: Boromakau o ubua gaudia mai edia bero, bona mai edia gorere, bona aena dika gaudia danu. Umui laloa lau ese inai gaudia do lau abia dae, a? Lasi momokani.”—Malaki 1:10, 12, 13.
7 Reana lagani 500 B.C.E. murinai, Dirava ese Malaki ia gaukaralaia Iuda taudia edia koikoi karadia ia gwauraia dika totona. Hahelaga taudia be haheitalai dikana idia karaia, bona edia kara ia helaga lasi. Israela taudia ese edia kara idia tohotohoa, Dirava ena hahegani idia badinaia lasi, unai dainai reana dirava koikoidia idia tomadiho henia kekenidia idia adavaia totona, edia headava idia hamakohia. Malaki be inai ia torea: “Lohiabada be ia diba oiemu uhau dinadia lalonai oi headava neganai, oi ese oiemu hahine oi gwauhamata henia, ia do oi rakatania lasi momokani. Inai gwauhamata oiemu adavana dekenai be Lohiabada ena vairana dekenai oi karaia. To oi ese unai gwauhamata oi makohia, oi badinaia lasi.b . . . Unai dainai umui ese do umui naria namonamo, umui headava neganai umui karaia gwauhamata do umui makohia lasi, to badinaia momokani. Lohiabada, Israela ena Dirava, be inai bamona ia hereva, ia gwau, ‘Headava hamakohia kara lau ura henia lasi momokani.’ ”—Malaki 2:14-16.
8 Hari iseda nega lalonai, headava hamakohia karana ia auka lasi tanodia momo ai, unai kara ia bada ia lao haraga. Keristani kongregesen lalonai danu unai be hekwakwanai ta. Taunimanima haida be hekwakwanai ta edia headava lalonai ia vara neganai, elda taudia edia heduru idia tahua lasi edia headava ia namo totona, to karaharaga edia adavana idia negea. Nega momo unai ena davana metauna be edia natudia idia lalohisihisi bada.—Mataio 19:8, 9.
9 Ita itaia vadaeni, Malaki ena nega ai Iuda edia noho lauma dalanai be dika herea dainai, Iehova ese edia anina lasi tomadiho karana ia gwauraia dika mai goada ida bona ia hahedinaraia tomadiho goevana sibona do ia abia dae. Unai dainai, namona be iseda tomadiho karana Iehova Dirava dekenai, guba bona tanobada edia Ataiai Lohiabada, helaga korikorina ena Badina, ita laloa namonamo, ani? Dirava dekenai hesiai helagana ita karaia momokani, a? Lauma dalanai ita goeva noho, a?
10 Ita gwau lasi inai ena anina be iseda kara be ma tau ta ena kara ida ita hahegeregerea, eiava ita karaia diba lasi gauna, goevadae karana, ita tahua. Lasi. To ena anina Keristani taudia ta ta dekenai be iena mauri dalana hegeregerena Dirava ia tomadiho henia mai ena goada ibounai ida. Unai be iseda tomadiho ena bada ia herevalaia lasi to ena namo. Iseda gaukara Dirava dainai ita karaia mai iseda goada ibounai ida—be gaukara helagana. Edena bamona ita karaia guguru?—Luka 16:10; Galatia 6:3, 4.
Kudou Goevadia amo Tomadiho Karana Goevana Ia Vara
11 Iesu ese ia hahedinaraia goevagoeva, tau ta be ena hereva bona ena kara amo do ia hahedinaraia dahaka ia noho ena kudou lalonai. Iesu be sibodia idia gwauraia kara maoromaoro taudia, to idia helaga lasi Farisea taudia dekenai ia gwau: “Gaigai edia natudia e! Umui be mai emui dika dainai, edena bamona hereva namodia do umui gwauraia diba? Tau ena lalona ia honu momokani gaudia dekena amo iena uduna ia hereva.” Gabeai ia hahedinaraia dika rohoroho karadia idia mai taunimanima edia kudouna o edia lalona ena lalohadai dikadia amo. Ia gwau: “Badina be tau ena lalona dekena amo idia mai gaudia be inai: Laloa dikadia, taunimanima alaia, heudahanai, matabodaga, henaoa, samania koikoi, hereva dikadia. Inai be taunimanima idia hadikaia gaudia.”—Mataio 12:34; 15:18-20.
12 Unai ese ita ia durua bena ita lalo-parara helaga lasi karadia be idia vara kava lasi. Idia vara badina be iseda kudouna lalonai lalohadai mirodia idia noho—hehuni ura dikadia bona reana lebulebu lalohadai. Unai dainai Iesu ia gwau: “Umui kamonai vadaeni, sene taudia dekenai idia hamaoroa, idia gwau, ‘Umui heudahanai lasi.’ To lau ese umui lau hamaoroa, bema tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” Unai dainai, sihari kava karana bona heudahanai karana idia do vara lasi neganai, unai lalohadai ia noho vadaeni ta ena kudouna lalonai. Bena, bema dala ia kehoa, helaga lasi lalohadai be helaga lasi karana ai ia lao. Heudahanai, sihari kava, bodaga karadia, henaohenao, hadikaia herevadia, bona hereva momokani rakatania karadia be unai helaga lasi lalohadai dainai idia hedinarai.—Mataio 5:27, 28; Galatia 5:19-21.
13 Dala idauidau ai unai ita haheitalaia. Gabu haida dekenai, laki gadara gabudia be momo herea hari, unai dainai laki gadara karaia daladia be momo. Reana ta be moni dalanai ia hekwarahi dainai, unai durua koikoi dalana ese ia dibagania ia tohoa totona. Lalohadai gagevagageva ese ia do ia hamanokaia Baibel ena hahegani ia laloa maragi o ia dadaraia totona.c Ma haheitalai ta be sihari kava o lebulebu karadia idia hahedinaraia gaudia, hegeregere TV, vidio, kompiuta, eiava buka idauidau ese Keristani tauna idia hakaua kerere diba, helaga lasi karana karaia totona. Bema lauma tuari dabuana ia naria namonamo lasi, karaharaga sihari kava karana ena tarapu lalonai ia moru diba. To nega momo, kara dika hamatamaia gabuna be ta ena lalona ai. Oibe unai bamona gaudia idia vara neganai, Iamesi ena hereva idia hamomokania: “To dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho. Vadaeni iena ura dikadia be idia rogorogo bamona, unai murinai kara dika ia havaraia.”—Iamesi 1:14, 15; Efeso 6:11-18.
14 Ita moale badina idia manoka dainai kara dika idia karaia Keristani taudia momo ese helalo-kerehai toana korikorina idia hahedinaraia, bona elda taudia be lauma dalanai unai taudia idia hagoadaia lou diba. Idia helalo-kerehai lasi dainai orea murimurinai idia atoa taudia momo danu be gabeai idia helalo-kerehai bona kongregesen ai idia vareai lou. Idia diba Satani be idia ia hamorua, badina be helaga lasi lalohadai be edia lalona ai idia kokia lasi.—Galatia 6:1; 2 Timoteo 2:24-26; 1 Petero 5:8, 9.
Hekwarahi Bada Gauna—Iseda Manoka Gaudia Ita Tahua
15 Namona be ita hekwarahi iseda kudouna ita diba momokani totona. Ita ura iseda manoka gaudia ita tahua, ita herevalaia, bena do ita hekwarahi ita hanaia totona, a? Ita ura mai ena momokani ida do ia hereva turana ta ena sisiba do ita noia, bena ena sisiba do ita kamonai henia, a? Bema ita ura ita helaga noho, iseda manoka gaudia ita hanamoa be gau badana. Badina be dahaka? Badina Satani ese iseda manoka gaudia ia diba. Ia ese iena koikoi karadia idauidau do ia gaukaralaia ita ia doria kara dika bona helaga lasi karadia karaia totona. Iena koikoi karadia amo, Dirava ena lalokau dekena amo ita ia hapararaia toho bena Iehova tomadiho henia totona do ita helaga lasi bona do ita karaia diba lasi.—Ieremia 17:9; Efeso 6:11; Iamesi 1:19.
16 Aposetolo Paulo be hetoho idauidau ia abia danu, Roma taudia dekenai ia siaia revarevana ai ia gwauraia bamona: “Lau diba egu lalona dekenai bona egu kudouna dekenai be namo ta ia noho lasi. Badina be lau ura kara namo do lau karaia, to karaia totona be lau hegeregere lasi. Kara namodia lau ura karaia neganai, be lau karaia diba lasi. Bona kara dikadia lau ura lasi karaia neganai, be lau karaia inai. . . . Momokani, egu kudouna be Dirava ena Taravatu dekenai ia moale bada. To lau davaria, egu lalona dekenai taravatu idauna ta ia gaukara noho. Inai taravatu ese egu lalona ia ura henia Taravatuna ia tuari henia noho. Vadaeni inai taravatu, egu lalona dekenai kara dika ia havaraia gauna ese lau ia guia noho.”—Roma 7:18-23.
17 Mai anina bada gauna be Paulo ese ena manoka gaudia ia herevalaia. Ena be idia noho, to ia gwau diba: “Momokani, egu kudouna be Dirava ena Taravatu dekenai ia moale bada.” Paulo ese kara namo ia ura henia bona kara dika ia inai henia. To gau haida dainai ia tuari noho, bona unai gaudia ita tuari henia noho danu—Satani, inai tanobada, bona iseda tauanina ena ura. Edena bamona ita kwalimu diba bona ita helaga noho bena inai tanobada bona ena lalohadai amo do ita gini siri?—2 Korinto 4:4; Efeso 6:12.
Edena Bamona Ita Helaga Noho Diba?
18 Bema iseda ura ita tahua guna, eiava hanaihanai ia auka lasi dalana ita abia hidi, do ita helaga diba lasi. Unai bamona tauna be hanaihanai iena kerere ia hunia toho bona do ia gwau ma ta ena kerere dainai ia vara. Namona be ita diba iseda kara biagua be siboda eda maduna. Namo lasi ita be ma haida bamona, idia gwau edia famili ena mauri dalana o ia henia tauanina ena manoka gaudia dainai edia kerere idia koua diba lasi. Tau ta ena kara ena badina be iena kudouna lalonai ia noho. Ia ese kara maoromaoro ia ura henia, a? helaga karana ia ura dikadika, a? Dirava ena hahenamo ia ura ia abia, a? Salamo torea tauna ia hahedinaraia goevagoeva helaga karana be gau badana, ia gwau: “Dika do umui rakatania, kara namo do umui karaia. Maino do umui tahua, bona maino kara do umui karaia noho.” Aposetolo Paulo ia torea, ia gwau: “Taunimanima umui lalokau henia koikoi lasi, to umui lalokau henia momokani. Dika do umui negea momokani, to namo do umui dogoatao momokani.”—Salamo 34:14; 97:10; Roma 12:9.
19 Ita be ‘namo do ita dogoatao momokani’ diba bema Iehova ena lalohadai ita abia bona bema Keriso ena laloa dalana ita abia. (1 Korinto 2:16) To edena bamona ita karaia? Dirava ena Hereva stadilaia loulou bona laloa dobu karana amo. Nega momo unai sisiba ita abia! To ita abia dae momokani, a? Unai hegeregerena, hebou dekenai oi do mai lasi neganai, inai magasin oi stadilaia guna, bona Baibel siridia oi itaia guna, a? Magasin stadilaia ena anina be hereva haida makaia sibona lasi. Miniti 15 lalonai ta ese do ia duahia bona makaia diba. To unai ena anina be unai hereva ita stadilaia momokani, a? Dala momokani be stadi herevana ta ta oi stadilaia bona lauma dalanai ena namo oi abia momokani totona, reana hora ta o rua do oi gaukaralaia.
20 Reana namona be iseda ura ita biagua bona wiki ta ta ai, hora haida lalonai, TV do ita itaia lasi, to iseda helaga karana do ita habadaia toho. Stadi loulou karana ese lauma dalanai ita ia hagoadaia, bona iseda lalona ia hakaua bena dala maorodia do ita abia hidi—iseda “kara ibounai do idia helaga” totona idia hakaua daladia.—2 Petero 3:11; Efeso 4:23; 5:15, 16.
21 Hari henanadai ta be inai: Edena gaukara ma haida bona kara ma haida lalodia ita Keristani taudia ita helaga be namo, Iehova ia helaga hegeregerena? Namona be hereva gabena ia hahedinaraia gaudia ita lalohadailaia.
[Footnotes]
a Watchtower Bible and Tract Society of New York, Inc. ese ia halasia volume rua bukana.
b Unai kara ena anina ia kikilaia herevadia oi abia totona, Awake!, February 8, 1994 gauna, rau 21, “What Kind of Divorcing Does God Hate?” itaia.
c Laki gadara be helaga lasi karana ia hamomokania herevadia ma haida oi diba totona, Awake!, August 8, 1994, rau 14-15, Watchtower Bible and Tract Society of New York, Inc. ese ia halasia gauna oi itaia.
Inai Oi Laloatao A?
◻ Israela lalonai helaga ena Badina be daika, bona edena bamona idia diba?
◻ Malaki ena nega ai, edena dala idauidau ai Israela taudia edia tomadiho karana ia helaga lasi?
◻ Helaga lasi karana ena hamatamataia gabuna be edeseniai?
◻ Bema ita ura ita helaga, dahaka ita diba be gau badana?
◻ Edena bamona ita helaga noho diba?
[Study Questions]
1. Tanobada taudia idia gwauraia helaga taudia haida be daika daika?
2, 3. (a) Inai hereva “helaga” bona “helaga karana” edia anina be dahaka? (b) Dahaka henanadai ita haerelaidia be namo?
4. Israela lalonai, edena bamona idia hahedinaraia Iehova be helaga?
5. Edena dala ai goevadae lasi Israela taudia idia helaga diba?
6. Malaki ena nega ai, Iuda taudia be Iehova ena boubou patana edena bamona idia kara henia?
7. Lagani 500 B.C.E. murinai, Iuda taudia be dahaka helaga lasi karadia idia karaia?
8. Hari iseda negai momo idia laloa hegeregerena, kongregesen lalonai Keristani taudia haida ese headava makohia karana be edena bamona idia laloa?
9, 10. Namona be Iehova ita tomadiho henia karana be edena bamona ita laloa?
11, 12. Helaga lasi karana be edeseniai amo ia hamatamaia?
13. Helaga lasi lalohadaidia be helaga lasi karadia ai idia lao ena haheitalai haida be dahaka dahaka?
14. Guna helaga lasi karadia idia karaia taudia haida be edena dala amo idia namo lou diba?
15. (a) Dahaka dainai iseda manoka gaudia ita tahua be namo? (b) Dahaka ese ita ia durua iseda manoka gaudia ita herevalaia totona?
16. Paulo ia tuari henia gauna be dahaka?
17. Badina be dahaka Paulo be iena manoka gaudia ia hanaia diba?
18. Edena bamona ita helaga noho diba?
19, 20. (a) Edena bamona iseda lalona ita hagoadaia diba? (b) Anina bada ia havaraia stadi karana ena anina be dahaka?
21. Dahaka henanadai do ita haerelaia?