Basileia Haroro Ripoti

Nega Iboudiai Basileia Ena Uhe Idia Hadoa

DIRAVA ena Hereva, Baibel, ese taunimanima ia hagoadaia idia gaukara goada totona. King Solomona ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.”​—Hadibaia Tauna 11:6.

Nega namodia ibounai, Iehova ena Witness taudia be “uhe” idia hadoa, Dirava ena Basileia ena sivarai namona idia harorolaia neganai. Tano bona motumotu 230 bona ma haida ai, idia ese “taunimanima idia hadibaia noho, bona Iesu Keriso ena Sivarai Namona idia gwauraia noho.” (Kara 5:42) Inai ekspiriens ese idia hahedinaraia Iehova ena Witness taudia idia haroro “noho.”

◻ Republic of Cape Verde ai, Iehova ena Witness hahinena ta be haroro neganai dibura rumana badinai amo ia raka hanaia. Dibura ena ariara dekenai, dibura taudia haida be au ta latanai idia noho. Idia ese Witness hahinena be henunai idia itaia neganai, idia ese magasin haida idia noia. Unai Witness hahinena ese Watchtower bona Awake! magasin haida dekenai nadi ta ia kwatua bona dibura ena magu lalonai ia negea vareai. Unai Baibel ura henia karana amo, Baibel stadi 12 idia hamatamaia. Unai dibura taudia toi ese edia mauri Dirava dekenai idia gwauhamatalaia bona idia bapatiso. Idia ta be lagani tamona mai kahana lalonai, ful-taim evanelia gaukarana, eiava painia gaukarana, ia karaia vadaeni. To, edena dala ai dibura lalonai haroro gaukarana idia karaia? Gau ginigunana be dibura rumana be teritori idauidau ai idia hapararaia. Bena unai Witness taudia toi huanai idia haria bona sel ta amo sel ta dekenai idia haroro. Unai Basileia harorolaia taudia ese kamonai taudia idia durua dalana be tanobada hegegemadai Iehova ena Witness taudia ese idia durua hegeregerena​—idia lou henia. To, gau ta ia idau, unai be Baibel stadi idia karaia negadia. Hora tamona bamona pura ta ta ai nega tamona o rua sibona idia stadi lasi, to dibura taudia haida be dina ta ta iboudiai idia stadi! Ma danu, dibura biaguna badana ese unai Witness taudia dekenai gwaumaoro ia henia kongregesen heboudia ibounai be dibura ruma lalonai idia karaia diba.

◻ Portugal dekenai, hahine ta ena tubuna hahine ia mase murinai, Watch Tower bukadia momo ia abia. Ia be Iehova ena Witness hahinena ta lasi dainai, ia ura lasi unai buka ia dogoatao. To danu, ia ura lasi hadikaia. Dina ta ai, Iehova ena Witness hahinena ta ese ruma-ta-ruma-ta gaukarana ai ia vadivadi henia neganai, unai buka idia noho ia hamaoroa. Witness hahinena ese ia nanadaia unai buka edia namo korikori ia diba, eiava. Unai hahine ia haere, ia gwau: “Momokani, edia namo korikori lau diba lasi, to edena dala ai do lau diba?” Unai hahine ese Baibel stadi ia abia dae, bona daudau lasi murinai ena tubuna hahine ena bukadia ia laloa bada matamaia. Hari ia danu be bapatiso Iehova ena Witness hahinena ta. Ma danu, ena natuna kekeni bona famili ena turana namona ta ese Baibel idia stadilaia. Ia abia bukadia edia namo be bada herea momokani, ani!