“Umui ese Lauegu Lalohadai Iehova Ena Witness Taudia Dekenai Umui Haidaua”
UNAI be dibura ruma ia naria Poland tauna ta ena hereva, ia ese October 15, 1998 ena Gima Kohorona lalonai Iehova ena Witness taudia edia gaukara ia hahedinaraia herevana ia duahia murinai unai hereva ia gwauraia. Unai magasin lalonai inai hereva, “Kudou Auka Taudia Idia Kamonai Neganai,” ese Wołów, Poland ai, Iehova ena Witness taudia edia gaukara dibura taudia huanai bona unai amo idia havaraia anina ia hahedinaraia.
Atai dekenai ai gwauraia Gima Kohorona magasin be taunimanima dekenai ai do halasia lasi neganai, spesel hebou ta be September 13, 1998 ai, Wołów ena dibura ruma badana dekenai idia karaia, dibura taudia dekenai unai magasin idia henia totona. Idia boiria taudia be unai gabu ena Witness taudia, idia bapatiso vadaeni bona idia ura kamonai dibura taudia, bona dibura ruma badana idia naria taudia haida. Henunai be idia mai taudia haida edia lalohadai.
Lagani ima mai kahana gunanai, dibura dekenai bapatiso ia abia Iehova ena Witness tauna ta, Jerzy, ia gwau: “Lau moale bada herea, badina hari lau duahia diba ai kahirakahira idia noho kongregesen amo idia mai tadikaka be idia hekwarahi bada ai idia durua totona.” Ma ia gwau: “Lau hekwarahi noho sibona egu kara lau hanamoa totona, bona lau itaia diba edena dala ai Iehova ese lau ia hadibaia noho.”
Ma dibura tauna ta, ena ladana be Zdzisław, ese dibura ai idia karaia haroro gaukarana ia herevalaia, ia gwau: “Hari, dibura taudia hani be idia hegaegae noho do idia bapatiso totona, bona kamonai matamata taudia be emai hebou gabuna dekenai hebou totona idia mai noho. Unai hereva ese ai ia hagoadaia momokani iniseniai gaukara ai habadaia totona.” Bema ita laloa Zdzisław be ma lagani 19 do ia noho dibura dekenai, ita lalo-parara ia ese lalohadai namo hereana ia hahedinaraia!
Wołów dibura ruma badana ena sivarai ia duahia murinai, dibura gabuna ia naria tauna ta ia gwau: “Ai be momokani idia matauraia bada. Guna lau laloa lasi tanobada lalonai gado 130 dekenai inai dibura ruma ena sivarai be unai bamona lalohadai maorona amo do idia halasia. Umui lau ura henia, bona emui hekwarahi dibura taudia totona lau laloa bada.” Ma dibura naria tauna ta ia gwau: “Umui ese lauegu lalohadai Iehova ena Witness taudia dekenai umui haidaua. Guna, lau laloa umui be tomadiho goadalaia kava taudia. Hari lau itaia umui be hakaua hereva maorodia badinaia taudia.”
Wołów dibura ruma ena dairekta tauna, Marek Gajos, ia kiri bona ia gwau: “Matamanai ai laloa emui gaukara ese anina sisina sibona do ia havaraia. Ai laloa umui be ma tomadiho ta sibona, mai emui ura goadana ida dibura taudia be Baibel amo umui durua, edia kara idia hanamoa totona. To, emui gaukara amo idia vara gaudia ai itaia dainai, emai lalona ai hadaia umui danu do ai gaukara hebou. Hari, lagani 9 lalonai iniseniai umui mai noho vadaeni, umui hesiku lasi, bona umui karaia vadaeni gaudia lau laloa bada.”
To, Wołów dibura ruma dekenai idia noho taudia ma haida ese unai magasin be edena bamona idia laloa? Dibura taudia ese unai magasin idia ura henia bada dainai, dibura ai idia noho Witness taudia edia magasin be idia ore. Dibura naria taudia danu idia hahedinaraia unai magasin idia ura henia bada bona idia sibona totona ma kopi 40 idia noia. Momo be idia ura dainai, unai gabu ena kongregesen ese heduru idia henia bona dibura ai idia noho tadikaka dekenai ma kopi 100 idia henia. Unai nega ai danu, dibura ai hebou lao henia taudia edia namba ia bada daekau.
Iehova ena Witness taudia danu ia gaukara hebou dibura naria tauna ta, Piotr Choduń, ia gwau: “Emai lalona ai hadaia inai dibura ruma badana lalonai emai notisbod ibounai dekenai inai magasin do ai atoa. Ai ura umui ida Baibel idia do stadilaia lasi dibura taudia ese inai magasin do idia duahia.”
Witness taudia edia haheitalai namona dainai bona haroro gaukara dekenai idia hekwarahi dainai, anina namona idia abia noho. Idia goada ela bona bapatiso idia abia dibura taudia 15 sibona lasi, to dibura naria taudia rua danu ese Iehova dekenai edia mauri idia gwauhamatalaia bona ma dibura naria tauna ta be Baibel stadi totona ia henanadai. To momokani, Wołów dibura ruma dekenai idia haroro tadikaka be anina idia havaraia dainai Iehova Dirava idia tanikiu henia.—1 Korinto 3:6, 7 itaia.
[Picture on page 28]
Dibura taudia edia hebou gabunai magasin idia henia neganai idia noho Witness taudia toi bona dibura tauna ta