Kerisimasi—Holide Dinana Eiava Dina Helagana?

CHINA lalonai ia idia gwauraia Kerisimasi Tau Burukana. United Kingdom ai, idia gwauraia Father Christmas. Russia ai, taunimanima ese ena ladana idia hatoa Bubu Paraka Tauna, bona United States ai, ena ladana idia hatoa Santa Claus.

Inai moale tauna burukana ena bogana be bada bona ena auki huina be kurokuro. Taunimanima momo idia laloa ia be Kerisimasi ena anina korikori. To taunimanima momo idia diba danu Santa Claus sivaraina be gori; ena badina be tau ta sivaraina. Lagani 300 C.E. murinai unai tau be Myra ena bisop (Turkey ai).

Sene karadia bona herevadia be nega ibounai mai edia siahu aria dinadia badinaia karana lalonai, bona Kerisimasi danu be unai bamona. Santa gorina be sene herevana ta; ia be mai anina taunimanima momo ese idia ura henia dinana ta dekenai. Ena be taunimanima haida idia gwau Kerisimasi karadia be Baibel lalonai idia torea sivaraidia amo idia vara, to unai kara momo edia badina korikori be Dirava momokanina diba lasi taudia edia kara.

Gau ma ta be Kerisimasi auna. The New Encyclopædia Britannica ia gwau: “Gunaguna Dirava momokanina diba lasi taudia Europe dekenai ese au idia tomadiho henia. Keristani taudia ai idia lao murinai unai kara ia doko lasi. Scandinavia taudia be vaia ruma bona aniani haboua rumadia be Lagani Matamata ai au rauraudia amo idia hahairaia diabolo hagaria totona, bona au ta idia haginia, Kerisimasi neganai manu do idia noholaia totona.”

Kerisimasi neganai taunimanima momo ese idia karaia karana ma ta be, holi audia o au idauidau rauraudia amo herahera gaudia kuborudia idia karaia. Unai kara danu be Dirava momokanina diba lasi taudia edia tomadiho karana amo ia vara. Saturnalia ariana neganai, keru negana huanai, idaunegai Roma Taudia ese biru diravana, Saturn, idia hanamoa dinadia 7 lalonai, edia dubu be holi rigidia amo idia hahairaidia. Unai aria sivaraina be bada, taunimanima idia lebulebu bona matabodaga karadia idia karaia dainai.

Taunimanima haida idia laloa Kerisimasi karana ma ta, miselto rigina (laulau ai ia hedinarai gauna) henunai uhau bona ulato idia kisi, be lalokau karana ta bamona, to ia be lagani 500 C.E. murinai idia karaia karana ta. Idaunegai Britain lalonai idia noho Druid taudia idia laloa miselto be mai ena babalau siahuna; unai dainai idia gaukaralaia, lauma dikadia, meamea karadia, bona gau dikadia idaudia edia siahu koua totona. Gabeai, momo idia laloa miselto henunai idia kisi uhau bona ulato be do idia headava. Hari inai negai taunimanima momo be Kerisimasi neganai unai kara idia do karaia noho.

Unai be hari inai negai idia karaia Kerisimasi karadia haida sibona, Dirava momokani diba lasi taudia edia hahediba herevadia amo idia vara. Reana oi daradara, unai be edena bamona ia vara. Unai holide, Keriso ena vara hanamoa negana idia gwauraia dinana lalonai, Keristani lasi karadia be edena bamona idia vara? Mai anina bada gauna be inai: Dirava ese unai kara be edena bamona ia laloa?

[Picture Credit Lines on page 2]

Page 3: Santa Claus: Thomas Nast/Dover Publications, Inc., 1978; mistletoe on page 3 and illustration on page 4: Discovering Christmas Customs and Folklore by Margaret Baker, published by Shire Publications, 1994