Dubu Oreadia ese Edia Dika Idia Gwauraia Hedinarai
“Pope ese Dubu Ia Kota Henia.” “Inkwisisen Bona Iuda Taudia Inai Henia Karana—Dubu be Iena Mea Culpaa Ia Hegaegaelaia Noho.” “Mea Culpa Holocaust Totona.” “Metodis Dubu be America Ena Indian Taudia Dekenai Ena Sori Herevana Ia Gwauraia.”
OI BE unai bamona hereva kwaradia oi duahia, a? Toana be hari nega momo, dubu oreadia be guna, lagani momo lalodiai, idia karaia dika edia maduna idia abia dae bona sori herevana idia gwauraia. Nius idia halasia taudia be hanaihanai pope ese ia karaia mea culpa matamatadia idia hahedinaraia noho.
Dika Gwauatao Totona Pope Ia Noinoi Neganai
Vatican ena sivarai ia torea tauna Luigi Accattoli be ena buka ladana Quando il papa chiede perdono (Dika Gwauatao Totona Pope Ia Noinoi Neganai) lalonai ia gwau, lagani 1980 bona 1996 huanai John Paul Iharuana ese nega 94 bamona ‘Dubu ese guna ia karaia kara dika edia maduna ia abia dae eiava dika gwauatao totona ia noinoi.’ Accattoli ia gwau, “Katolik Dubu lalonai, pope sibona be mai ena siahu mea culpa ia karaia totona.” Bona ia ese unai ia karaia, Katolik Dubu ena histori lalonai heiriheiri ia havaraia gaudia—Kruseid, tuari, dagedage lohia taudia durua karana, dubu ia parara karana, Iuda taudia inai henia karana, Inkwisisen, Mafia, bona bese idaudia inai henia karana—ia gwauraia. Lagani 1994 ai, John Paul Iharuana ese revareva ta (momo idia laloa unai be pope ese ia torea mai anina bada herevana) ia torea kadinal taudia dekenai bona ia lalonai ia ura “lagani 1000 lalonai idia karaia kara dika ibounai do idia gwauraia hedinarai.”
Bisop taudia haida ese pope ena kara idia tohotohoa. December 1994 ai, Italy ena niuspepa Il Giornale ia gwau: “America ena bisop taudia momo be televisen ai idia hedinarai bona taunimanima ibounai vairanai edia dika gwauatao totona idia noinoi.” Dahaka totona? Memero kekeni idia kara bodaga henidia pris taudia ena hekwakwanai idia laloa maragi, unai amo matamata taudia momo edia mauri idia hadikaia. January 1995 ai, niuspepa La Repubblica ese “inai nega ena Katolik Dubu ena histori lalonai guna ia vara lasi karana ta” ia ripotilaia—Holocaust karana dekenai Pope Pius Namba 12 be gau ta ia hereva lasi hekwakwanaina idia herevalaia. January 1995 ai, unai niuspepa tamona ia gwau German ena bisop taudia ese Nazi taudia edia kara dika idia durua Roman Katolik taudia edia “kara dika momo” totona gwauatao idia noinoi. Protestan dubu idauidau danu be sibodia edia kara dika idia gwauraia hedinarai.
Dahaka Dainai?
Baibel ese ita ia hagoadaia ita kara dika neganai, iseda dika gwauatao totona do ita noinoi, bona dubu oreadia be sibodia edia kara dika idia gwauraia hedinaraia neganai, momo ese unai kara idia abia dae mai moale ida. (Iamesi 5:16) To badina be dahaka dubu oreadia be unai bamona idia karaia? Unai kara dainai iseda lalohadai idia dekenai be edena bamona?
[Footnote]
a Ia be Latin gado herevana bona ena anina be “lau sibona egu kerere,” ia be Katolik taudia edia guriguri ta ena kahana (Confiteor eiava, “Egu kerere lau gwauraia hedinarai”), unai guriguri lalonai dubu memba taudia be unai hereva idia gwauraia loulou.