Eunike Bona Loi—Hadibaia Taudia Namodia

Ita be Iehova ena hesiai taudia dainai, ita diba iseda natudia be tomadiho dalanai ita hadibaia namonamo be mai anina bada maduna ta. Nega namodia ai danu, koua bona hekwarahi gaudia idauidau dainai unai maduna huaia dalana be ia auka. Unai be ia auka momokani, bema Keristani tama sina ta be tomadiho dalanai ia parara ruma besena lalonai unai maduna ia huaia. Unai bamona noho maurina be gau matamatana lasi. Baibel ese ita dekenai aposetolo edia negai unai bamona mauri ia noholaia sina ta ena sivarai ia gwauraia.

Unai hahine, Eunike, ena ruma bese be Lusitera, Lukaonia ena siti ta, Asia Minor ena saut kahana dekenai, idia noho. Lusitera be anina bada lasi siti maragina ta. Ia be Roma ese ia naria taoni ladana Julia Felix Gemina Lustra, Augustus Caesar ese ia haginia, unai gabu badinai idia noho henaohenao taudia edia kara ia koua totona. Eunike be Iuda Keristani hahinena ta, tomadiho dalanai ia parara ruma besena lalonai ia noho ena adavana, Greek tauna, ena natuna mero Timoteo, bona ena sinana Loi ida.​—⁠Kara 16:​1-3.

Reana Lusitera dekenai Iuda taudia haida sibona idia noho, badina Baibel be unuseniai dubu ta ia herevalaia lasi, to Ikonio dekenai Iuda taudia momo idia noho, unai siti ena daudau be kilomita 30 bamona. (Kara 14:19) Unai dainai Eunike ese ena tomadiho ia badinaia be reana ia auka sisina. Timoteo ia vara murinai ena kopina idia utua lasi dainai, diba taudia haida idia gwau reana Eunike ena adavana ese unai kara ia koua.

To, Eunike sibona be unai tomadiho dalana ia abia dae lasi. Toana be Timoteo ena sinana bona iena sinana ena sinana Loi ese “Buka Helagadia” amo idia hadibaia.a Aposetolo Paulo ese Timoteo ia hagoadaia, ia gwau: “To, oi ese oi dibaia bona emu lalona idia veria bona oi abia dae vadaeni gaudia oi badinaia noho, badina oi idia hadibaia taudia oi diba bona oi do maragi negana amo revareva helagadia oi diba, idia ese oi dekenai aonega idia henia diba, Keriso Iesu abidadama henia karana amo mauri oi davaria totona.”​—⁠2 Timoteo 3:​14, 15, NW.

Edukeisen​—⁠“Mero Maragi” Negana Amo

Paulo ia gwau Timoteo be ia do “mero maragi” neganai “Buka Helagadia” amo diba ia abia, anina be ia do beibi negana amo. Unai be ia gaukaralaia Greek herevana (breʹphos), nega momo beibi matamata idia herevalaia neganai idia gaukaralaia herevana ida ia hegeregere. (Luka 2:​12, 16 itaia.) Eunike be Dirava ese ia henia maduna ia laloa bada, bona nega ia halusia kava lasi to Timoteo be Dirava ena hesiai gaukara ia karaia tauna ai do ia lao dalana be maoromaoro ia hadibaia ia dekenai.​—⁠Deuteronomi 6:​6-9; Aonega Herevadia 1:⁠8.

Timoteo dekenai Baibel ena hereva momokanidia idia hadibaia, ‘ena lalona idia veria bona ia abia dae.’ Greek diksenari ta ia gwau, Paulo ese ia gaukaralaia herevana ena anina be gau ta “idia hadibaia goadagoada; idia hagoadaia.” Ita daradara lasi, nega bada idia atoa bona idia hekwarahi bada, Timoteo idia durua Dirava ena Hereva ia lalo-pararalaia bona ia abidadama henia totona, unai amo unai gaudia be iena kudouna lalonai idia vareai. Ia hedinarai goevagoeva, Eunike bona Loi idia gaukara goadagoada Baibel amo Timoteo idia hadibaia totona. Bona unai Dirava badinaia hahine ese hahenamo bada idia davaria! Paulo ese Timoteo be inai bamona ia herevalaia diba: “Oiemu abidadama lau laloa, ia be abidadama momokani. Inai bamona abidadama be oiemu tubuna hahine Loi bona oiemu sinana Eunike edia lalona dekenai ia noho. Lau diba momokani, harihari danu inai bamona abidadama be oiemu lalona dekenai ia noho.”​—⁠2 Timoteo 1:⁠5.

Eunike bona Loi edia kara be mai anina bada Timoteo ena mauri lalonai! Unai kara dekenai, toretore tauna David Read ia gwau: “Bema aposetolo tauna ia laloa gau ma ta be anina lasi to Timoteo ese sibona ena lalona ai hereva momokani ia abia karana be mai anina bada, maoromaoro ia ese unai ia gwauraia guna. To Timoteo ena abidadama ia herevalaia neganai, ia gwauraia gau ginigunana be, unai abidadama be ‘Loi . . . bona Eunike lalonai ia noho’ guna vadaeni.” Paulo ese Loi, Eunike, bona Timoteo edia abidadama ia herevalaia neganai, ia hedinarai ruma dekenai tama sina bona tubuna tau bona tubuna hahine danu be Baibel amo maragidia idia hadibaia ese gabeai unai matamata taudia edia tubu lauma dalanai ia lailaia. Namona be unai ese ruma bese taudia ia doria Dirava dekenai bona edia natudia dekenai unai maduna idia hagugurua totona, dahaka do idia karaia idia laloa bada, ani?

Reana Paulo be Loi bona Eunike ese idia havaraia ruma maurina ia laloa danu. Paulo be lagani 47/48 C.E. bamona ai nega ginigunana Lusitera dekenai ia noho neganai, reana edia ruma ia vadivadi. Unai hahine rua be reana unai nega ai Keristani tomadiho dalana idia abia dae. (Kara 14:​8-20) Reana edia ruma bese lalonai lalokau bona hebamo namona idia moalelaia karana ese Paulo ia doria Loi be Timoteo ena “tubuna hahine” ia gwauraia totona. Diba tauna Ceslas Spicq ia gwau, Paulo ese ia gaukaralaia herevana (mamʹme, be Greek gado gunana bona mai hemataurai herevana teʹthe amo ia idau) be “natu ena lalokau herevana” iena tubuna hahine totona, inai sivarai lalonai ia ese tubuna “ia diba bona ia lalokau henia karana” ia hahedinaraia.

Timoteo be Ena Gabu Ia Rakatania

Nega iharuana (lagani 50 C.E. bamona) Paulo be Lusitera ia vadivadi lou neganai, Eunike ena headava maurina be edena bamona be ita diba lasi. Aonega taudia momo idia gwau reana ia be vabu. To, iena sinana bona iena tubuna hahinena ese idia durua dainai, Timoteo be uhau mero namona ai ia lao, reana unai nega ai iena mauri lagani be 20 bamona. “Lusitera bona Ikonio dekenai, idia gwau Timoteo be tau namona.” (Kara 16:⁠2) Ia hedinarai momokani, Basileia ena sivarai namona harorolaia urana be Timoteo ena kudouna lalonai idia atoa, badina ia ese Paulo ena boiboi ia abia dae ia bona Sila edia misinari laolao ai ia bamodia totona.

Timoteo ia raka gwauraia neganai Eunike bona Loi edia mamina mani oi laloa! Idia diba Paulo be nega ginigunana edia siti ia vadivadi neganai, nadi amo idia hodoa bona idia rakatania bona idia laloa ia mase. (Kara 14:19) Unai dainai reana uhau Timoteo ia raka gwauraia neganai, idia lalohisihisi bada. Reana, edena negai do ia giroa mai bona ena laolao be do ia namo eiava lasi, idia laloa bada. Ena be unai gaudia idia lalo-hekwarahilaia, to ena sinana bona tubuna hahine ese idia hagoadaia Iehova do ia hesiai henia bada hahenamona do ia abia dae.

Ita Dibaia Gaudia Namodia

Eunike bona Loi edia kara ita stadilaia namonamo neganai gau momo ita dibaia diba. Abidadama ese idia ia doria Timoteo idia durua lauma dalanai ia tubu daekau totona. Buruka taudia be edia tubudia bona ma haida totona lauma dalanai lo karana bona Dirava badinaia karana idia hahedinaraia ese Keristani kongregesen ibounai ia durua diba. (Tito 2:​3-5) Eunike ena haheitalai ese sina taudia, edia adavadia be murimuri taudia ia hadibaia edia natudia dekenai lauma gaudia do idia hadibaia be edia maduna namona. Unai idia karaia totona nega haida gari lasi karana do idia hahedinaraia be namo, bema tama be ena adavana ena tomadiho dalana ia dagedage henia. Idia ese aonega idia hahedinaraia danu, badina Keristani hahine ese iena tau ena kwara dagina do ia matauraia be namo.

Timoteo be lauma dalanai ia goada ia lao ela bona misinari bona elda tauna namona ai ia lao idia itaia neganai, Loi bona Eunike edia abidadama, hekwarahi, bona sibodia edia ura dadaraia karana amo ahuna namona idia abia. (Filipo 2:​19-22) Unai hegeregerena, hari nega do ita atoa, ita haheauka, bona do ita hekwarahi, iseda natudia be Baibel ena hereva momokani ita hadibaia totona, to idia tubu namonamo neganai iseda hekwarahi amo moale bada do ita abia. Keristani matamata taudia namodia momo be lauma dalanai ia parara ruma bese lalonai edia Witness tamana o sinana ese ‘idia maragi negana amo Buka Helaga ena hereva ia hadibaia idia dekenai,’ bona idia ese edia Witness tama o sina dekenai moale bada idia mailaia. Bona inai aonega herevana be momokani, ia gwau: ‘Aonega tauna ia havaraia hahinena be do ia moale bada’!​—⁠Aonega Herevadia 23:​23-25.

Aposetolo Ioane ese iena lauma natudia be inai bamona ia herevalaia: “Bema lau kamonai, egu natuna Keristani taudia ese Dirava ena hereva momokani ena dala dekenai idia raka noho, vadaeni lau moale bada herea. Moale ta ese unai moale ia hereaia diba lasi.” (3 Ioane 4) Momokani, unai hereva ese ia gwauraia hemami be taunimanima momo, Eunike bona Loi, hadibaia taudia namodia rua bamona taudia, ese idia mamia danu.

[Footnote]