Aneru ta ese Oi Ia Naria, A?

OI LALOA aneru ta ese oi ia naria, a? Taunimanima momo be unai bamona idia laloa. Danu, haida idia gwau Canada ena west kahana dekenai hahine ta ese aneru dekenai diba idauna ia abia. Ia gwauhamata, bema ia dekenai oiemu ladana bona $200 oi henia, ena heduru dainai oi ia naria aneruna do oi davaria diba. Ia ese kandolo ena hururu ia raraia neganai, ia laloa dobu. Unai murinai, ia ese matahanai ia abia, ia lalonai oiemu aneru ese hereva ta ia siaia oi totona. Ma danu, unai hahine ese laulau ta do ia henia oiemu aneru ena toana oi diba totona.

Haida idia laloa, unai sivarai be France ena King Louis IX ena sivarai hegeregerena. Idia gwau ia ese Aneru Badana Mikaela ena apena amo idia moru davana bada huina ia hoia. Ena be momo ese unai sivarai idia daradaralaia, to unai Canada hahine ena kara idia abia dae momokani.

Aneru Idia Lalodia Bada

Vanegai laganidia lalonai, taunimanima be aneru idia lalodia bada. Televisen, muvini piksa, buka, magasin, bona pepapepa idauidau ese aneru, hegeregere gorere bona mase dainai idia lalohisihisi taudia idia hagoadaia, aonega idia henia, bona taunimanima idia hamauria anerudia, idia herevalaia. United States dekenai, taunimanima milioni 20 bamona ese pura ta ta ai aneru edia kara taunimanima edia mauri lalonai ia hahedinaraia televisen program idia raraia. Buka stoa ta dekenai aneru idia herevalaia bukadia edia namba be 400 ia hanaia.

Vanegai idia halasia buka ta lalonai, edia aneru ese tuari dekenai idia naridia dainai idia roho mauri tuari taudia edia sivarai idia hahedinaraia. Motuka dekenai idia atoa kau pepapepadia idia gwau aneru ta ese taria tauna ia naria. Orea, hebouhebou, bona kosi idauidau ese aneru stadilaia karana idia hagoadaia bona taunimanima idia durua aneru ida do idia herevahereva diba totona.

Eileen Freeman be aneru idia herevalaia bukadia toi ia torea bona aneru sibodia ia herevalaia magasin ia halasia hahinena ta. Ia gwau: “Lau laloa guba dekenai idia noho aneru ta ta hegeregerena, ma ta be Tanobada dekenai tau ta ia naria. Edia maduna be guba dekenai Dirava idia hanamoa sibona lasi, to taunimanima bona mauri gaudia ma haida Tanobada dekenai idia naria. Sinana ena bogana lalonai ita mauri matamaia negana ai ita totona aneru ta idia abia hidi bona ita ia naria bogana lalonai ita tubu neganai, ita vara neganai, bona tanobada dekenai ita mauri neganai, ela bona inai tanobada amo guba ena hairai dekenai ita ia hakaua.” Unai ese momo edia lalohadai taunimanima idia naria anerudia dekenai ia hahedinaraia namonamo.

Hari inai nega aukana lalonai, reana aneru ese ita ta ta idia naria lalohadaina ese ita ia hagoadaia. Dirava ena Hereva, Baibel, ese edena bamona unai ia herevalaia? Aneru ita hereva henia toho be maoro, a? Iseda kara bona tomadiho be mai anina idia dekenai, a? Edena bamona ita idia durua diba? Hereva gabena ese unai henanadai do ia haerelaia.