Ita Moale Badina Iehova ese Ita Dekenai Iena Dala Ia Hahedinaraia
“Dirava ena dala be maoromaoro. Iena hereva be momokani.”—2 SAMUELA 22:31.
1, 2. (a) Taunimanima ibounai ese dahaka idia abia be gau badana? (b) Daika ena haheitalai ita tohotohoa be namo?
TAUNIMANIMA ibounai ese hahekau idia abia be gau badana. Oibe, iseda mauri lalonai ita noho namonamo totona heduru ita abia be namo. Momokani, Iehova ese ita dekenai aonega bona lalona ia henia ita idia durua dahaka be maoro bona dahaka be kerere ita diba totona. To iseda lalona ese ita ia hakaua maoromaoro totona, ita hadibaia be namo. (Heberu 5:14) Bona iseda lalona be diba maorona ia abia be namo—unai diba ia laloa namonamo karana ia dibaia danu be namo—bema ita ura abia hidi namodia do ita karaia. (Aonega Herevadia 2:1-5) To, iseda mauri lalonai do idia vara gaudia ita diba lasi dainai, reana ita abia hidi gauna be iseda ura hegeregerena ai do ia vara lasi. (Hadibaia Tauna 9:11) Iseda vaira negana ai dahaka do ia vara ita dibaia dalana namona ta be lasi.
2 Unai bona badina ma haida dainai, peroveta tauna Ieremia ese inai ia torea: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ieremia 10:23) Iesu Keriso, tau hereadaena, be hakaua herevadia ia abia dae. Ia gwau: “Natuna be sibona kara ta ia karaia diba lasi, to ia ese iena Tamana ena kara ia itaia noho, vadaeni unai kara sibona ia karaia. Tamana ese ia karaia noho karadia be Natuna ese danu ia karaia noho.” (Ioane 5:19) Vadaeni, aonega karana be, Iesu do ita tohotohoa bona iseda raka dalana lalonai Iehova amo heduru do ita tahua! King Davida be inai ane ia abia: “Dirava ena dala be maoromaoro. Iena hereva be momokani. Ia be ia dekenai idia abidadama henia taudia edia kesi.” (2 Samuela 22:31) Bema Iehova ena dala dekenai ita raka bona ita sibona eda aonega ita dadaraia, hahekau goevadaena do ita abia. Dirava ena dala ita dadaraia neganai dika ita davaria.
Iehova ese Dala Ia Hahedinaraia
3. Iehova ese Adamu bona Heva be edena bamona ia hakaudia, bona vaira negana totona dahaka hahenamo ia henidia?
3 Mani Adamu bona Heva edia sivarai oi laloa. Ena be idia be goevadae, to hakaua hereva idia abia be gau badana. Iehova be ia gwau lasi Eden umana hairaina lalonai gau ibounai be Adamu sibona ese do ia palania. Lasi, to Dirava ese ena gaukara ia henia. Gau ginigunana be, Adamu ese animal dekenai ladadia do ia hatoa. Bena, Iehova ese Adamu bona Heva dekenai nega daudau lalonai do idia karaia gaukara ia henia. Idia ese tanobada do idia biagua, edia natudia amo do idia hahonua, bona tanobada ena animal do idia naridia. (Genese 1:28) Unai be gaukara badana, to dokonai tanobada ibounai paradaisona be goevadae taudia ese do idia hahonua bona animal ida maino ai do idia noho. Unai be vaira negana namo hereana! Danu, Adamu bona Heva be mai abidadama danu Iehova ena dala dekenai idia raka lalonai, idia be ia ida idia herevahereva diba. (Genese 3:8, NW itaia.) Unai be hahenamo badana—Havaraia Tauna idia tura henia hanaihanai diba!
4. Edena dala ai Adamu bona Heva idia hahedinaraia Iehova idia abidadama henia lasi bona idia badinaia lasi, bona unai ese dahaka dika ia havaraia?
4 Iehova ese taunimanima ginigunadia ruaosi ia taravatudia, Eden umana lalonai ia noho kara namo bona kara dika hadibaia auna ena huahua do idia ania lasi, bona unai ese idia dekenai dala ia kehoa edia kamonai karana—Iehova ena dala dekenai do idia raka urana—idia hahedinaraia totona. (Genese 2:17) Daudau lasi murinai, edia kamonai karana dekenai hahetoho idia davaria. Satani be mai ena koikoi herevadia danu ia mai neganai, gau badana be, Adamu bona Heva be edia kamonai karana idia dogoatao totona, Iehova badinaia karana idia hahedinaraia bona Iena gwauhamata idia abidadama henia be namo. To madi, idia ese badinaia bona abidadama karana idia hahedinaraia lasi. Satani ese Heva dekenai sibona biagua lalohadaina ia hahedinaraia bona Iehova be koikoi tauna ia gwauraia neganai, Heva be unai ia abia dae bona Iehova kamonai henia karana ia dadaraia. Adamu be Heva ia bamoa bona ia kara dika danu. (Genese 3:1-6; 1 Timoteo 2:14) Unai kara dainai gau momo herea idia haboioa. Bema Iehova ena dala dekenai idia raka bona iena ura idia karaia, idia moale bada diba. To hari, lalohisihisi bona hisihisi ese edia mauri idia hahonua ela bona idia mase.—Genese 3:16-19; 5:1-5.
5. Iehova ena palani, vaira negana ai do ia karaia gauna be dahaka, bona abidadama taudia be edena dala ai ia durudia, ia guguru negana idia itaia totona?
5 Ena be unai ia vara, Iehova ese iena palani, dina ta tanobada be paradaiso gabuna ai do ia lao bona goevadae taudia ese do idia noholaia, ia haidaua lasi. (Salamo 37:11, 29) Bona ia ese iena dala dekenai idia raka bona edia helaro be unai gwauhamata do ia guguru idia itaia taudia dekenai hahekau goevadaena ia henia hanaihanai. Ita kamonai diba taudia dekenai, Iehova ena gadona be iseda murina dekenai ia gwau: “Dala be inai, ia dekenai do umui raka lao.”—Isaia 30:21.
Haida be Iehova Ena Dala Dekenai Idia Raka
6. Idaunegai, edena tatau rua be Iehova ena dala dekenai idia raka, bona dahaka ia vara?
6 Baibel ia hahedinaraia hegeregerena, Adamu bona Heva edia natudia haida sibona be Iehova ena dala dekenai idia raka. Abela be unai taudia ginigunana ta. Ena be ia mase haraga, Iehova ese ia lalo-namo henia bona unai dainai Dirava ena nega korikorina ai ‘kara maoromaoro taudia idia toreisi lou’ neganai, ia danu do ia toreisi lou. (Kara 24:15) Iehova ena palani hereadaena tanobada bona taunimanima totona ia guguru negana do ia itaia. (Heberu 11:4) Iehova ena dala dekenai ia raka tauna ma ta be Enoka, iena peroveta herevana inai nega ena dokona totona be Iuda bukana lalonai ia noho. (Iuda 14, 15) Enoka danu be ia mauri daudau lasi. (Genese 5:21-24) To, ia hahedinaraia “Dirava ena ura ia badinaia momokani.” (Heberu 11:5) Ia mase neganai, Abela bamona, ia be mai ena toreisi lou helarona bona ia be Iehova ena palani do idia guguru idia itaia taudia huanai do ia noho.
7. Noa bona iena ruma bese ese Iehova badinaia bona abidadama henia karana be edena bamona idia hahedinaraia?
7 Abata ese ia do hadikaia lasi tanobadana ai kara dika be ia bada ia lao dainai, Iehova badinaia karana ia tohoa sibona lasi to edia kamonai karana ia tohoa bada danu. Unai tanobada ena dokona ai, orea maragina tamona sibona be Iehova ena dala dekenai ia raka noho. Noa bona iena ruma bese ese Dirava idia kamonai henia bona ia gwauraia gaudia idia abidadama henia. Mai abidadama ida ia henia gaukarana idia karaia ore bona unai nega lalonai idia vara kara dika lalonai idia vareai lasi. (Genese 6:5-7, 13-16; Heberu 11:7; 2 Petero 2:5) Mai edia kamonai danu Iehova idia badinaia bona abidadama henia dainai ita moale bada. Unai kara dainai, Abata amo idia roho mauri bona iseda tubudia ai idia lao.—Genese 6:22; 1 Petero 3:20.
8. Israela besena be Dirava ena dala dekenai idia raka totona, dahaka do idia karaia?
8 Gabeai, Iehova ese abidadama tauna Iakobo ena tubudia ida gwauhamata taravatuna ia karaia, bona idia be iena bese korikorina ai idia lao. (Esodo 19:5, 6) Torea Taravatuna, hahelaga taudia, bona peroveta herevadia amo, Iehova ese iena gwauhamata besena dekenai hahekau herevadia ia henia. To, Israela taudia ese sibodia edia lalona do idia hadaia unai hahekau herevadia idia badinaia totona. Iehova ena peroveta tauna ese Israela taudia ia hamaorodia, ia gwau: “Hari dina umui emui vairana dekenai hanamoa dalana bona hadikaia dalana lau atoa, edena do umui abia hidi? Bema Lohiabada emui Dirava ena Taravatu, hari dina umui dekenai lau henia gaudia umui kamonai henia neganai, hanamoa do umui davaria. To bema inai Taravatu umui kamonai henia lasi, bona idau dirava, umui diba lasi dirava, dekenai umui tomadiho henia neganai, hadikaia do umui davaria.”—Deuteronomi 11:26-28.
Haida be Iehova Ena Dala Idia Rakatania Ena Badina
9, 10. Dahaka ia vara dainai Israela taudia ese Iehova idia abidadama henia bona idia badinaia be gau badana?
9 Adamu bona Heva bamona, Israela taudia ese Iehova idia kamonai henia noho totona, namona be ia do idia abidadama henia bona idia badinaia. Israela be bese maragina bona kahirakahira idia noho besedia ese idia dagedage henia bada. Ena sautwest kahana dekenai be Aigupito bona Etiopia. Ena notist kahana dekenai be Suria bona Asuria. Ia kahirakahira momokani be Filistia, Amono, Moaba, bona Edoma idia noho. Idia ibounai be nega ta ta ai, Israela idia inai henia. Bona danu, idia ibounai be tomadiho koikoi idia badinaia, kaivakuku idia tomadiho henia, hisiu edia toadia idia tahua, matabodaga karadia idia karaia, bona natudia idia bouboulaia. Israela ena dekena taudia ese ruma bese badadia do idia abia, uma gabu ese anina momo do idia havaraia, bona tuari lalonai do idia kwalimu totona, edia dirava idia guriguri henidia.
10 Israela sibona be Dirava tamona, Iehova, ia tomadiho henia. Ia gwauhamata ruma bese badadia do ia henidia, edia uma gabu ese anina momo do idia havaraia, bona edia inai taudia amo do ia gimadia, bema idia ese iena taravatu idia badinaia. (Deuteronomi 28:1-14) Madi, Israela dekenai momo be unai idia karaia lasi. Bona Iehova ena dala dekenai idia raka taudia momo be edia badinaia karana dainai hisihisi idia davaria. Israela taudia ma haida, ese mai dagedage danu idia hahisidia, idia kirikirilaidia, idia kwadidia, dibura ruma lalonai idia koudia, bona nadi amo idia hododia. (Kara 7:51, 52; Heberu 11:35-38) Madi, unai ese abidadama taudia ia tohodia bada! To, badina be dahaka, momo be Iehova ena dala amo idia raka oho? Israela ena sivarai amo haheitalai rua ese ita do idia durua edia lalohadai kererena ita itaia totona.
Ahasa Ena Haheitalai Dikana
11, 12. (a) Suria ia ura Iuda besena ia tuari henia neganai, Ahasa ia ura lasi dahaka ia karaia? (b) Ahasa be dahaka gaudia rua dekenai ia lao heduru ia abia totona?
11 Ahasa be lagani 800 B.C.E. murinai, saut kahana basileiana, Iuda, ia lohiaia. Iena lohia negana be maino negana lasi. Nega ta, Suria bona not kahana basileiana, Israela, idia hebou bona idia mai ia idia tuari henia totona, bona “ia bona iena orea taudia idia gari bada herea. Gari dainai idia heudeheude.” (Isaia 7:1, 2) To, Iehova ia ura ia durua bona ia ese Ahasa ia noia ia do ia tohoa neganai, Ahasa be mai goada ida Iehova ia dadaraia! (Isaia 7:10-12) Unai dainai, Iuda besena be tuari dekenai ia lusi bona momo herea idia mase.—2 Sivarai 28:1-8.
12 Ena be Ahasa ia ura lasi Iehova ia tohoa, to Asuria ena king amo heduru totona ia noinoi be ia hemarai lasi. To, Iuda ena dekena besedia ese idia do hahisidia noho. Asuria danu be Ahasa “tuari henia totona ia mai” neganai, Ahasa ese “Damaseko dirava koikoi dekenai boubou gaudia ia henia” bona ia gwau “Suria diravadia ese Suria taudia idia durua, vadaeni bema inai dirava dekenai boubou lau henia neganai, idia ese lau do idia durua danu.”—2 Sivarai 28:20, 23.
13. Ahasa be Suria ena dirava dekenai ia lao neganai, dahaka ia hahedinaraia?
13 Gabeai, Iehova be Israela besena dekenai do ia gwau: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho. Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.” (Isaia 48:17, 18) Suria ena dirava dekenai ia lao karana amo Ahasa ia hahedinaraia ‘raka dalana namona’ dekena amo ia be daudau herea momokani. Bese idaudia edia laloa dalana ese ia idia veria kerere momokani, edia goada abia gabuna koikoina dekenai ia lao bona Iehova ia dadaraia.
14. Ahasa be dirava koikoidia dekenai ia lao neganai, badina be dahaka unai be maoro lasi?
14 Idau nega amo ia hedinarai bese idaudia edia dirava, Suria taudia edia danu, be anina lasi diravadia. (Isaia 2:8) Guna, King Davida ena lohia negana ai, Suria taudia be Davida ena hesiai taudia ai idia lao karana ese ia hahedinaraia Iehova ena siahu be Suria taudia edia dirava edia siahu ia hanaia. (1 Sivarai 18:5, 6) Iehova sibona, “dirava ibounai ia hereaia, siahu taudia ibounai danu ia ese ia hereaia. Ia be Dirava badana, ia be mai ena siahu bada bona ia be taunimanima ese idia gari henia Diravana,” ese heduru momokani ia henia diba. (Deuteronomi 10:17) To, Ahasa ese Iehova ia dadaraia bona bese idaudia edia dirava ia noidia ia idia gimaia totona. Unai ese dika bada ia mailaia Iuda besena dekenai.—2 Sivarai 28:24, 25.
Iuda Taudia, Ieremia ida Aigupito Ai
15. Ieremia ena negai, Aigupito dekenai idia noho Iuda taudia be edena dala ai idia kara dika?
15 Lagani 607 B.C.E. ai, Iehova ese Babulonia taudia ia koudia lasi bona idia ese Ierusalema bona ena dubu helagana idia hadikaia, badina iena taunimanima be ia idia dadaraia momokani. Iuda taudia momo be Babulonia dekenai idia abidia lao. To, haida idia rakatania, idia ta be peroveta tauna Ieremia. Gavana Gedalaia idia alaia neganai, unai taudia be Aigupito dekenai idia heau lao bona Ieremia danu idia abia lao. (2 King Taudia 25:22-26; Ieremia 43:5-7) Unuseniai, dirava koikoidia dekenai boubou idia karaia matamaia. Ieremia ese unai abidadama lasi Iuda taudia ia hereva henidia goadagoada, to edia lalona idia auka. Idia ura lasi Iehova dekenai idia giroa lou bona idia ura “guba ena kwini” dekenai bonana namo muramurana do idia bouboulaia noho. Dahaka dainai? Badina idia bona edia tubudia ese unai idia karaia ‘Iuda hanua ibounai dekenai, bona Ierusalema ena ariara gabudia dekenai. Badina be unai neganai aniani be momo, edia noho be namo bona, dika ta idia itaia lasi.’ (Ieremia 44:16, 17) Iuda taudia be mai badu danu idia gwau: “To guba ena kwini ena bonana namo muramura gabua kara, bona ena uaina bouboudia bubua kara ai hadokoa murinai, ai be gau namona ta ai davaria lasi. Aiemai bese be tuari bona hitolo ese ia haorea lao noho.”—Ieremia 44:18.
16. Badina be dahaka Aigupito ai idia noho Iuda taudia edia lalohadai be maoro lasi?
16 Idia ura gaudia sibona idia laloatao! Dahaka ia vara momokani? Momokani, Iuda taudia be Iehova ese ia henidia tanona ai dirava koikoidia dekenai boubou idia karaia. Nega haida, hegeregere Ahasa ena nega lalonai, tomadiho momokanina amo idia raka siri dainai hisihisi idia davaria. To, Iehova be iena gwauhamata taudia dekenai ia ‘badu haraga lasi.’ (Esodo 34:6; Salamo 86:15) Iena peroveta taudia ia siaia idia hamaorodia idia helalo-kerehai totona. Nega haida, king be kamonai karana ia hahedinaraia neganai, Iehova ese ia hanamoa, bona ena be taunimanima momo be idia kamonai lasi unai hahenamo amo namo idia davaria. (2 Sivarai 20:29-33; 27:1-6) Aigupito dekenai idia noho Iuda taudia idia gwau edia hanua dekenai idia davaria namo be edia dirava koikoidia amo idia abia be maoro lasi momokani!
17. Dahaka dainai Iuda besena ese iena tano bona dubu helaga ia haboioa?
17 Lagani 607 B.C.E. be do lasi neganai, Iehova ese Iuda besena taudia ia hamaorodia: “Idia ese lauegu hereva do idia kamonai henia, unai neganai lau be idia edia Dirava do lau lao, bona idia be lauegu bese do idia lao. Bona lau hamaorodia, lauegu oda hegeregerena do idia noho, vadaeni edia noho be do ia namo.” (Ieremia 7:23) Iuda taudia ese edia dubu helaga bona edia tano idia haboioa badina idia ura lasi ‘Iehova ena oda hegeregerena’ idia raka. Namona be ita ese unai kara kerere ita dadaraia.
Iehova ese Iena Dala Dekenai Idia Raka Taudia Ia Hanamoa
18. Iehova ena dala dekenai idia raka taudia ese dahaka idia karaia be namo?
18 Hari inai nega, guna hegeregerena, Iehova ena dala dekenai ita raka totona, gau badana be ia do ita badinaia—iseda lalona ita hadaia ia sibona do ita tomadiho henia. Gau badana be ia do ita abidadama henia—ita abidadama Iehova ena gwauhamata ibounai be do idia vara momokani. Iehova ena dala dekenai ita raka totona, gau badana be ia do ita kamonai henia—iena taravatu amo do ita raka siri lasi bona iena kara goeva do ita badinaia. “Lohiabada be mai ena kara maoromaoro, bona kara namodia ia ura henia noho.”—Salamo 11:7.
19. Hari inai negai taunimanima momo ese edena dirava idia tomadiho henidia, bona unai ese dahaka ia havaraia?
19 Ahasa be heduru totona Suria diravadia dekenai ia lao. Aigupito dekenai idia noho Israela taudia be “guba ena kwini,” idaunegai Middle East kahana dekenai momo ese idia tomadiho henia dirava hahinena ta, idia abidadama henia kohu momo ia henidia totona. Hari inai negai, dirava momo be kaivakuku korikori lasi. Iesu ia gwau namona be ita naria namonamo, “kohu momo” ita hesiai henia bona Iehova ita dadaraia garina. (Mataio 6:24) Aposetolo Paulo ia gwau “kohu momo ura dikadika kara be hegeregere kaivakuku tomadiho henia kara bamona.” (Kolose 3:5) Bona ia ese edia dirava be edia “tauanina ena ura” taudia ia herevalaia danu. (Filipi 3:19) Oibe, moni bona kohu be hari inai negai idia tomadiho henia dirava badadia. Momokani, momo herea—tomadiho oreadia idia badinaia taudia momo danu—‘be inai tanobada ena kohu idia abidadama henia.’ (1 Timoteo 6:17) Unai dirava idia hesiai henidia totona momo idia gaukara goadagoada, bona haida be hahenamo idia abia—ruma namodia ai idia noho, dava bada gaudia idia moalelaia, bona dava bada aniani namodia idia ania. To, iboudiai be unai bamona kohu bona moni momo maurina idia moalelaia lasi. Bona kohu bona moni momo idia abia taudia danu be gabeai unai gaudia idia moalelaia lasi. Unai gaudia dekenai ita tabekau be hegeregere lasi, idia dika diba, bona lauma dalanai iseda dabu gaudia do idia henia lasi.—Mataio 5:3, NW.
20. Edena lalohadai maorona ita dogoatao be namo?
20 Momokani, inai tanobada ena dina gabedia lalonai ita noho dainai, namona be aonega karadia do ita karaia. Iseda ruma bese be tauanina dalanai ita naria totona kara namodia haida do ita karaia be namo. To bema ita ese kohu momo maurina, moni tahua karana, eiava unai bamona gaudia ita laloa bada to Dirava ena hesiai gaukara ita laloa maragi, ita be kaivakuku tomadiho henia karana lalonai ita moru bamona bona Iehova ena dala dekenai ita raka noho lasi. (1 Timoteo 6:9, 10) To, edena bamona, bema ita gorere, moni hekwakwanai ita davaria, eiava hekwakwanai ma ta ita davaria? Namo lasi ita be Aigupito dekenai idia noho Iuda taudia bamona, idia gwau Dirava ena hesiai gaukara idia karaia dainai hekwakwanai idia davaria. To, namona be Iehova ita tohoa, Ahasa be unai ia karaia lasi. Mai abidadama ida hahekau totona Iehova Dirava dekenai ita lao. Hekwakwanai ibounai lalonai mai abidadama ida iena hakaua herevadia ita badinaia, bona goada bona aonega totona ita guriguri. Bena, mai abidadama danu Iehova ena hahenamo totona ita naria.
21. Iehova ena dala dekenai idia raka taudia be dahaka hahenamo idia davaria?
21 Israela taudia edia sivarai ibounai lalonai, Iehova ese iena dala dekenai idia raka taudia ia hanamoa bada. King Davida ese inai ane ia abia: “Lohiabada e, lau dekenai idia tuari henia taudia be momo herea. Unai dainai oiemu kara maoromaoro dalana, dekenai lau do oi hakaua.” (Salamo 5:8) Kahirakahira idia noho besedia ia tuari henidia neganai, Iehova ese Davida dekenai kwalimu ia henia, to unai bese be gabeai Ahasa idia dagedage henia. Solomona ia lohia neganai, Dirava ese Israela dekenai maino bona kohu bada ia henia, gabeai Iuda taudia be Aigupito dekenai idia noho neganai, unai nega idia laloa momo. Ahasa ena natuna Hesekaia ese bese goadana Asuria ia tuari henia neganai, Iehova ese kwalimu ia henia. (Isaia 59:1) Oibe, Iehova ena imana be ia kwadogi lasi iena abidadama taudia dekenai, idia be Dirava ena taravatu idia moalelaia bona “kerere taudia edia kara bamona idia karaia lasi.” (Salamo 1:1, 2) Unai be momokani hari inai negai danu. To, hari inai negai, edena bamona ita diba momokani ita be Iehova ena dala dekenai ita raka noho? Hereva gabena ese unai do ia herevalaia.
Oi Laloatao, A?
◻ Iehova ena dala dekenai ita raka totona, edena kara be mai anina bada?
◻ Badina be dahaka Ahasa ena lalohadai be maoro lasi?
◻ Aigupito dekenai idia noho Iuda taudia edia lalohadai be edena dala ai ia maoro lasi?
◻ Iehova ena dala dekenai ita raka noho totona, iseda lalona be edena bamona ita hagoadaia diba?
[Picture on page 13]
Ahasa be Suria ena dirava dekenai ia lao to Iehova ia dadaraia