Iehova Ena Dala Dekenai Ita Raka Noho
“Lohiabada dekenai do oi naria, iena dala dekenai do oi raka. Unai neganai ia ese oi dekenai ia henia tano, be do oi dogoatao diba.”—SALAMO 37:34.
1, 2. Iehova ena dala dekenai ia raka ena anina be dahaka King Davida dekenai, bona hari ita dekenai ena anina be dahaka?
“EGU lauma [“souli,” NW ] oi dekenai lau abia isi noho. Unai dainai egu lao dala namona, mani lau dekenai do oi hedinaraia.” (Salamo 143:8) Inai nega ena Keristani taudia be mai edia kudouna ibounai ida King Davida ena hereva idia gwauraia lou. Idia ura dikadika Iehova idia hamoalea bona iena dala dekenai idia raka. Unai ena anina be dahaka? Davida dekenai, anina be Dirava ena taravatu ia badinaia. Ia be bese idaudia dekenai ia tabekau lasi to Iehova ia abidadama henia. Oibe, anina be Iehova ia badinaia, kahirakahira ai idia noho besedia edia dirava ia abidadama henidia lasi. Keristani taudia dekenai, Iehova ena dala dekenai idia raka ena anina be kara ma haida do idia karaia danu.
2 Hari Iehova ena dala dekenai idia raka ena anina ta be Iesu Keriso ena mauri davalaia boubouna idia abidadama henia, bona idia abia dae ‘dala be ia, hereva momokani be ia, bona mauri danu be ia.’ (Ioane 3:16; 14:6; Heberu 5:9) Danu, “Keriso ena taravatu” do idia hagugurua, anina be ta ta dekenai lalokau do idia hahedinaraia. Iesu ena horoa tadikaka dekenai unai do idia karaia badabada. (Galatia 6:2; Mataio 25:34-40) Iehova ena dala dekenai idia raka taudia be iena hakaua herevadia bona hahegani idia ura henia. (Salamo 119:97; Aonega Herevadia 4:5, 6) Idia karaia Keristani haroro gaukarana be dava bada gauna bamona idia laloa. (Kolose 4:17; 2 Timoteo 4:5) Edia mauri lalonai guriguri karana be hanaihanai idia karaia gauna. (Roma 12:12) Bona ‘edia kara idia naria namonamo, aonega taudia bamona idia raka to kavakava taudia bamona lasi.’ (Efeso 5:15) Idia ese hari nega sisina lalonai idia noho kohu namodia o matabodaga karadia dainai, lauma kohudia idia negea lasi. (Mataio 6:19, 20; 1 Ioane 2:15-17) Danu, Iehova badinaia bona abidadama henia karana be mai anina bada. (2 Korinto 1:9; 10:5; Efeso 4:24, NW ) Dahaka dainai? Badina iseda noho be idaunegai Israela besena ena bamona.
Abidadama Bona Badinaia Karadia be Gau Badana
3. Dahaka dainai badinaia, abidadama, bona gwauhamata abia dae momokani karadia ese ita do idia durua Iehova ena dala dekenai ita raka noho totona?
3 Israela be bese maragina bona ena dekena besedia ese idia dagedage henia. Idia be kaivakuku diravadia idia tomadiho henia bona matabodaga karadia momo idia karaia besedia. (1 Sivarai 16:26) Israela sibona be matana dekenai ita itaia diba lasi Dirava momokanina tamona, Iehova, ena hesiai gaukara idia karaia, bona ia ura taravatu goevadia do idia badinaia. (Deuteronomi 6:4) Unai hegeregerena, hari taunimanima milioni haida sibona ese Iehova idia tomadiho henia, bona tanobada lalonai taunimanima bilioni 6 edia taravatu bona tomadiho dalana be idia edia amo ia idau. Bema ita be unai milioni haida sibona taudia huanai ita noho, dala kererena ese ita ia veria garina do ita naria namonamo. Edena bamona? Iehova Dirava ita badinaia, ita abidadama henia bona ita abia dae momokani ia gwauhamata gaudia ibounai do ia hagugurua ese ita do idia durua. (Heberu 11:6) Unai ese ita do ia koua bena tanobada ese ia abidadama henia gaudia do ita abidadama henia lasi.—Aonega Herevadia 20:22; 1 Timoteo 6:17.
4. Dahaka dainai Dirava diba lasi taudia “edia laloa be dibura”?
4 Aposetolo Paulo ese ia hahedinaraia Keristani taudia be tanobada amo idia idau be gau badana inai ia torea neganai, ia gwau: “Unai dainai, Lohiabada ena ladana dainai umui lau sisiba henia, harihari ia lao, Dirava diba lasi taudia bamona umui noho lasi. Idia edia laloa be anina lasi. Edia laloa be dibura. Dirava ena mauri be idia davaria diba lasi, badina be ia dekena amo edia laloa idia koua, bona iena dala idia diba lasi.” (Efeso 4:17, 18) Iesu be “Diari momokani.” (Ioane 1:9) Ia idia dadaraia o idia gwau ia idia abia dae to “Keriso ena taravatu” idia badinaia lasi taudia “edia laloa be dibura.” Iehova ena dala dekenai idia raka lasi to “Dirava ena mauri be idia davaria diba lasi.” Ena be idia laloa tanobada dalanai idia aonega momokani, to mauri ia lao henia dibana, Iehova Dirava bona Iesu Keriso dibaia dalana unai, “idia diba lasi.”—Ioane 17:3; 1 Korinto 3:19.
5. Ena be hereva momokani ena diari be tanobada lalonai ia hedinarai noho, dahaka dainai momo idia kamonai lasi?
5 To, hereva momokani ena diari be tanobada lalonai ia hedinarai noho! (Salamo 43:3; Filipi 2:15) “Kamonai! Aonega be ia boiboi noho, hanua ena huanai bona hoihoi gabudia dekenai.” (Aonega Herevadia 1:20) Vanegai lagani lalonai Iehova ena Witness taudia be hora bilioni tamona mai kahana lalonai Iehova Dirava bona Iesu Keriso idia herevalaia edia dekena taudia dekenai. Taunimanima handred tausen haida idia kamonai. To, momo herea be idia kamonai lasi dainai, ita hoa be namo, a? Lasi. Paulo ia gwau “edia laloa idia koua.” Haida idia kamonai lasi badina sibodia edia ura idia laloa o moni idia ura henia bada dainai. Haida edia lalona be tomadiho koikoi o hari inai negai ia bada ia lao karana, tomadiho laloa lasi karana ese ia veria. Momo be edia mauri lalonai hekwakwanai aukana idia davaria dainai Dirava idia dadaraia. Haida idia ura lasi Iehova ena taravatu goevadia idia badinaia. (Ioane 3:20) Unai gaudia ese Iehova ena dala dekenai ia raka noho tauna ena laloa idia koua diba, a?
6 Paulo ese ia hahedinaraia bamona, idaunegai Israela besena dekenai unai ia vara. Ia gwau: “Unai kara ia vara be ita dekenai toa ta bamona, gau dikadia do ita ura henia lasi, idia ese idia ura henia bamona. Kaivakuku danu do umui tomadiho henia lasi, idia haida idia karaia bamona. Buka Helaga lalonai ia torea bamona, ia gwau, ‘Taunimanima idia helai diho, idia aniani, muramura kekero idia inua, vadaeni idia toreisi, idia gadara kava, bona sihari kava.’ Sihari kava bona heudahanai karadia do ita karaia lasi, idia haida idia karaia bamona. Unai dina tamona lalonai ibounai 23,000 idia mase ore.”—1 Korinto 10:6-8.
7 Paulo be Israela taudia ese Sinai Ororona ena badinai golo boromakau idia tomadiho henia karana ia gwauraia guna. (Esodo 32:5, 6) Unai kara idia karaia neganai, idia ese pura haida sibona gunanai Dirava ese ia henidia hahegani herevadia, idia gwau do idia badinaia taravatuna idia utua. (Esodo 20:4-6; 24:3) Bena, Paulo ese Israela tatau be Moaba kekeni ida Bala idia tomadiho henia negana ia herevalaia. (Numera 25:1-9) Boromakau kaivakuku tomadiho henia karana lalonai sibona edia ura idia hamoalea bada, “idia gadara kava.”a Bala tomadiho lalonai matabodaga karadia idia karaia danu. (Apokalupo 2:14) Dahaka dainai Israela taudia be unai kara dikadia idia karaia? Badina edia kudouna ‘be gau dikadia idia ura henia’—kaivakuku tomadiho henia karana eiava unai kara lalonai idia karaia matabodaga karadia.
8. Israela besena ena haheitalai amo dahaka ita dibaia diba?
8 Paulo ia gwau unai gaudia amo diba ita abia be namo. Dahaka ita dibaia? Keristani tauna ta be golo boromakau ena kaivakuku o idaunega Moaba diravana ta do ia tomadiho henia lasi. To matabodaga kara o sibona ena ura tahua karana be edena bamona? Unai be hari idia vara momo gaudia, bona bema iseda kudouna lalonai unai gaudia ura henia karana ia tubu, unai gaudia ese Iehova amo ita do ia veria oho diba. Ia be hegeregere kaivakuku ita tomadiho henia bamona—Dirava amo do ita daudau. (Mani Kolose 3:5; Filipi 3:19 itaia.) Oibe, Paulo ese unai sivarai ia gwauraidia murinai Keristani tadikaka ia hagoadaia ia gwau: “Kaivakuku dekenai umui tomadiho henia lasi, umui rakatania.”—1 Korinto 10:14.
Heduru, Dirava Ena Dala Dekenai Ita Raka Totona
9. (a) Dahaka heduru ita abia Iehova ena dala dekenai ita raka noho totona? (b) Edena dala ta ai unai “gadona” ita kamonai?
9 Bema eda lalona ita haidaua Iehova ena dala dekenai do ita raka noho totona, heduru ia noho. Isaia ia peroveta ia gwau: “Bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ” (Isaia 30:21) Ita be edena bamona unai “gadona” ita kamonai? Hari inai negai ta ese gado regena korikorina ta ia kamonai lasi eiava Dirava ese ia dekenai hereva ta ia siaia lasi. Ita kamonai “gadona” ia mai daladia be hegeregere ita ibounai dekenai. Dala ginigunana bona badana be Dirava ena lauma amo ia havaraia Revareva Helagadia, Baibel, amo ia mai. Baibel ese Dirava ena lalohadai bona taunimanima ia kara henia daladia ia hahedinaraia. Dina ta ta lalonai ita be “Dirava ena mauri idia davaria diba lasi” gaudia amo, lalona veria herevadia momo ita kamonai dainai, lauma dalanai ita goada noho totona, hanaihanai Baibel ita duahia bona ita laloa dobu be namo. Unai ese ita do ia durua “anina lasi gaudia” ita dadaraia bona do ita ‘hegeregere momokani, vadaeni kara namodia ibounai do ita karaia diba, mai kwalimu danu.’ (Kara 14:14, 15; 2 Timoteo 3:16, 17) Ita do ia hagoadaia, bona ita do ia durua ‘iseda raka do ia namo’ totona. (Iosua 1:7, 8) Unai dainai, Iehova ena Hereva ese ita ia hagania: “Lauegu natuna tau e, harihari lau dekenai do umui kamonai. Lauegu dala do umui badinaia, vadaeni do umui moale. Lauegu hadibaia hereva do umui kamonai henia, vadaeni aonega do umui davaria. Lauegu hadibaia hereva do umui negea lasi.”—Aonega Herevadia 8:32, 33.
10. Edena dala iharuana amo unai “gadona” ita kamonai?
10 Danu, unai “gadona” be ita dekenai ia mai “hesiai tauna mai ena kamonai, bona mai ena kara maoromaoro” amo bona ia ese nega korikori ai aniani ia henia. (Mataio 24:45-47) Unai ia karaia dalana ta be Baibel idia herevalaia buka bona magasin amo, bona vanegai lagani lalodiai unai bamona aniani be bada herea. Hegeregere, Gima Kohorona magasin amo, iseda lalo-parara peroveta herevadia dekenai ita habadaia. Unai magasin ese ita ia hagoadaia haroro gaukara bona hahediba taudia halaoa gaukarana do ita karaia noho ena be momo idia ura lasi kamonai, ita ia durua hekwakwanai lalonai ita vareai lasi totona, bona ita ia hagoadaia Keristani kara namodia ita habadaia totona. Nega korikori ai unai bamona aniani ita abia karana ita laloa bada!
11. Unai “gadona” ita kamonai dalana ihatoina oi gwauraia hedinarai.
11 Hesiai tauna mai ena kamonai bona mai ena kara maoromaoro be nega ibounai ita karaia heboudia amo aniani ia henia danu. Idia be iseda kongregesen heboudia, sekit hebouhebou bona distrik hebouhebou badadia. Keristani taudia mai edia abidadama be unai bamona hebou idia laloa bada, ani? Idia be heduru gaudia badadia Iehova ena dala dekenai ita raka noho lalonai. Momo be abidadama tamona lasi taudia danu nega bada idia haorea, gaukara gabuna o sikuli dekenai, unai dainai Keristani heboudia be idia ia hamauria gauna bamona. Hebou be nega namona ‘ta ta ita durua bona lalokau dekena amo kara namodia ita karaia’ totona. (Heberu 10:24) Iseda tadikaka ita lalokau henidia, bona ita ura idia ita bamoa.—Salamo 133:1.
12. Iehova ena Witness taudia ese edia lalona idia hadaia dahaka idia karaia totona, bona vanegai edena bamona unai idia hahedinaraia?
12 Unai bamona lauma aniani ese idia durudia dainai, hari kahirakahira taunimanima milioni 6 be Iehova ena dala dekenai idia raka noho, bona milioni ma haida be unai kara idia dibaia totona Baibel idia stadi noho. Inai tanobada ena taunimanima bilioni momo ida ita hahegeregerea neganai idia be momo lasi dainai, idia lalo-manoka bona idia goada lasi, a? Lasi vaitani! Edia lalona idia hadaia unai “gadona” do idia badinaia noho, bona mai abidadama ida Iehova ena ura do idia karaia noho. Taunimanima vairanai unai ura idia hahedinaraia totona, lagani 1998/99 ena “Dirava Ia Gwauraia Mauri Dalana” Distrik bona Intenesenel Hebouhebou dekenai idia lao taudia ese mai edia lalona ibounai ida lalo-tamona herevana idia karaia. Henunai, unai lalo-tamona herevana ai torea.
Lalo-Tamona Herevana
13, 14. Iehova ena Witness taudia ese tanobada ena oromana be edena bamona idia laloa?
13 “Ita, ‘Dirava Ia Gwauraia Mauri Dalana’ Distrik Hebouhebouna dekenai ita mai Iehova ena Witness taudia, ese mai iseda kudouna ibounai ida ita abia dae Dirava ena dala be mauri dalana hereadaena. To, ita lalo-parara, hari inai negai taunimanima momo herea be unai bamona idia laloa lasi. Taunimanima besedia ese taunimanima edia aonega lalohadai bona tomadiho lalohadai idauidau idia badinaia, mauri dala hereadaena idia davaria totona. Taunimanima edia histori bona tanobada ena noho hari ita laloa namonamo neganai, ita itaia Dirava ena hereva be momokani, Ieremia 10:23 ai ia gwau: ‘Taunimanima ta lasi ese iena mauri ia biagua noho.’
14 “Dina iboudiai unai hereva idia hamomokania gaudia ita itaia. Kahirakahira taunimanima iboudiai ese Dirava ia gwauraia mauri dalana idia dadaraia. Taunimanima ese sibodia idia gwauraia maoro gaudia idia tahua. Unai amo dika bada ia vara—ruma bese maurina ia dika dainai, natudia ese heduru namona idia abia lasi; kohu idia tahua goadagoada dainai, idia moale lasi bona idia lalohisihisi; taravatu utua karana bona dagedage idia karaia kava dainai, dika idia davaria taudia edia namba ena bada ita duahia diba lasi; iduhu idau taudia hamasea karadia bona tuari dainai, taunimanima momo herea idia mase; matabodaga karadia dainai, pokese gorere idia bada herea. Unai be moale, maino, bona noho namo tahua karana idia hadikaia hekwakwanai badadia haida sibona.
15, 16. Iehova ena Witness taudia be Dirava ena mauri dalana dekenai, lalo-tamona herevana lalonai edia lalona idia hadaia dahaka idia karaia totona?
15 “Taunimanima edia mauri ia dika dainai bona ‘Siahu Ibounai Diravana ena Dina Badana ena tuari,’ ita gwauraia Aramagedono (Apokalupo 16:14, 16), be kahirakahira dainai, ita Iehova ena Witness taudia ese mai iseda lalo-tamona ida inai hereva ita abia dae:
16 “Namba 1: Ita ta ta ese eda mauri ibounai Iehova Dirava dekenai ita gwauhamatalaia dainai, ita laloa ita be Ia ena, bona Iehova ese ena Natuna, Iesu Keriso, amo ia karaia mauri davalaia boubouna do ita abidadama henia noho. Iseda lalona ita hadaia ita be Dirava ena mauri dalana dekenai do ita raka, ita be iena Witness taudia bona Iesu Keriso amo ia hahedinaraia lohia siahuna henunai ita noho.
17, 18. Iehova ena Witness taudia be edena dala ai kara maoromaoro bona Keristani tadikaka oreana do idia badinaia noho?
17 “Namba 2: Ita ese Baibel ena kara maoromaoro taravatudia bona lauma dalana ena hakaua herevadia do ita badinaia noho. Iseda lalona ita hadaia tanobada besedia edia anina lasi daladia dekenai do ita raka lasi. (Efeso 4:17-19) Ita ura momokani Iehova vairanai ita noho goeva, tanobada ena miro ita dadaraia.—Iamesi 1:27.
18 “Namba 3: Baibel ena hereva hegeregerena ita ese tanobada ibounai tadikaka oreana lalonai do ita noho. Tanobada ena bese bogaragidiai, Keristani gini siri karana ita rakatania lasi, idau tano, bese, eiava iduhu taudia inai henia karadia eiava hapararaia karadia lalonai ita vareai lasi.
19, 20. (a) Keristani tama sina be dahaka do idia karaia? (b) Keristani taudia korikoridia ibounai be edena bamona do idia hahedinaraia noho idia be Keriso ena hahediba taudia?
19 “Namba 4: Ita tama sina ese iseda natudia dekenai Dirava ena dala do ita hadibaia goada. Ita ese Keristani mauri dalana ena haheitalai namona do ita hahedinaraia, unai dainai Baibel duahia hanaihanai karana, famili stadi, bona Keristani kongregesen lalonai bona haroro gaukara lalonai mai iseda kudouna ibounai ida do ita gaukara.
20 “Namba 5: Ita ibounai ese Havaraia Tauna do ita tohotohoa, bona ena kara bona ena dala do ita badinaia toho, Iesu ia karaia bamona. (Efeso 5:1) Iseda lalona ita hadaia kara ibounai be mai lalokau ida ita karaia, bona unai amo ita hahedinaraia ita be Keriso ena hahediba taudia.—Ioane 13:35.
21-23. Iehova ena Witness taudia be dahaka do idia karaia noho, bona dahaka idia diba momokani?
21 “Namba 6: Ita ese Dirava ena Basileia ena sivarai namona harorolaia gaukarana do ita hadokoa lasi, hahediba taudia do ita halaoa, bona Dirava ia gwauraia mauri dalana ita hadibadia bona ita hagoadadia kongregesen ena hebou idauidau dekenai diba do idia abia noho.—Mataio 24:14; 28:19, 20; Heberu 10:24, 25.
22 “Namba 7: Ita ta ta bona iseda orea ese mauri lalonai Dirava ena ura do ita tahua noho guna. Ena Hereva, Baibel, ese ita ia hakaua, bona ia ita badinaia maoromaoro karana amo, ita hamomokania Dirava ena dala ese tanobada ena dala idauidau ia hereaia. Iseda lalona ita hadaia Dirava ia gwauraia mauri dalana do ita badinaia—maoromaoro bona mai eda goada ida, hari ela bona hanaihanai!
23 “Inai lalo-tamona herevana ita gwauraia, badina Iehova ena gwauhamata ita abia dae momokani, ia gwau Dirava ena ura ia karaia tauna be do ia noho ela bona hanaihanai. Inai lalo-tamona herevana ita gwauraia, badina ita diba momokani Baibel ena hakaua herevadia bona ena sisiba badinaia karana be mauri dalana hereadaena hari bona badina namona ia haginia vaira negana totona, unai dala ai ita ese mauri korikorina do ita abia diba. (1 Timoteo 6:19; 2 Timoteo 4:7b, 8) Bona gau badana be, inai lalo-tamona herevana ita gwauraia, badina Iehova Dirava ita lalokau henia mai eda kudouna, souli, lalona, bona goada ibounai ida!
24, 25. Unai lalo-tamona herevana be edena bamona idia haerelaia, bona Iehova ena dala dekenai do idia raka taudia edia lalona idia hadaia dahaka do idia karaia?
24 “Inai Distrik Hebouhebou dekenai umui mai taudia ibounai bema inai Lalo-Tamona Herevana umui abia dae, mani umui gwau OIBE!”
25 Tanobada hegegemadai steidiam bona gabu handred ma haida dekenai idia lao taudia idia boiboi badabada “OIBE!” Iehova ena Witness taudia idia daradara lasi idia be Iehova ena dala dekenai do idia raka noho. Idia be Iehova idia abidadama henia momokani bona idia diba iena gwauhamata do ia hagugurua. Herevana dahaka ia vara, ia idia abidadama henia noho. Bona edia lalona ibounai idia hadaia iena ura do idia karaia.
“Dirava ese Ita Ia Durua”
26. Iehova ena dala dekenai idia raka taudia be dahaka idia moalelaia?
26 Iehova ena Witness taudia be salamo torea tauna ena hahegoada herevana idia laloatao, ia gwau: “Lohiabada dekenai do oi naria, iena dala dekenai do oi raka. Unai neganai ia ese oi dekenai ia henia tano, be do oi dogoatao diba.” (Salamo 37:34) Idia ese Paulo ena heduru herevana idia laloaboio lasi: “Bema Dirava ese ita ia durua neganai, daika ese ita do ia hadikaia diba? Dirava ese iena Natuna tamona sibona ia vara ia dogoatao lasi, to ita ibounai totona ia henia, boubou gauna bamona. Oibe, iena Natuna ita dekenai ia henia vadaeni. Unai dainai ita diba, gau ibounai ita dekenai do ia henia momokani, ani?” (Roma 8:31, 32) Oibe, bema Iehova ena dala dekenai ita raka noho, ia ese “ita hamoalea totona, gau momo ita dekenai ia henia.” (1 Timoteo 6:17) Hari ita noholaia gabuna be gabu namo hereana—iseda tadikaka bona taihu namodia ida Iehova ena dala dekenai ita raka noho. Iehova be iseda badinai ia raka dainai, iseda lalona ita hadaia unuseniai do ita raka noho bona do ita haheauka noho ela bona dokona, bona ita diba momokani iena nega korikori ai, iena gwauhamata iboudiai do ia hagugurua negana do ita itaia.—Tito 1:2.
[Footnotes]
a Baibel edia hereva ia tahua tauna ta ia gwau Greek gado herevana idia hahanaia “idia gadara kava” be Dirava koikoi tomadiho henia taudia edia aria lalonai idia karaia mavaru ia herevalaia bona ia gwau: “Ita diba vadaeni hegeregerena, unai mavaru momo, be matabodaga karadia ena mamina idia havaraia totona idia karaia.”
Oi Laloatao, A?
◻ Keristani tauna be Iehova ena dala dekenai ia raka ena anina be dahaka?
◻ Dahaka dainai Iehova ita abidadama henia bona ita badinaia karadia ita habadaia be namo?
◻ Iehova ena dala dekenai ita raka lalonai, dahaka heduru idia noho?
◻ “Dirava Ia Gwauraia Mauri Dalana” Hebouhebouna dekenai idia karaia lalo-tamona herevana ena hereva badadia haida oi gwauraia.
6, 7. Ena be idia be Iehova Dirava idia tomadiho henia taudia, to Israela taudia be edena negai idia moru, bona dahaka dainai?
[Pictures on page 18]
“Dirava Ia Gwauraia Mauri Dalana” Distrik bona Intenesenel Hebouhebou dekenai mai anina bada lalo-tamona herevana idia karaia