Iboudiai be Hegeregere Lasi Ena Dika Idia Hamaragia
Nega sisina murinai, Havaraia Tauna ese taunimanima idia ura henia maurina, iboudiai do idia hegeregere maurina unai, do ia mailaia. To unai ita do naria noho lalonai, ita ese kara haida ita karaia diba iboudiai be hegeregere lasi dainai ita bona iseda ruma bese taudia dekenai idia vara dika idauidau ita hamaragia totona. Nelson Mandela, South Africa ena presiden gunana, ia gwau bamona, “ita abia gaudia lasi, to ita dekenai idia noho gaudia ita gaukaralaia dalana dainai, taunimanima ta be ma ta amo ia idau.”
TAUNIMANIMA edia sivarai ese ena hereva ia hamomokania. Tatau bona hahine momo be idia vara neganai, gau momo idia abia lasi, to idia dekenai idia noho gaudia idia gaukaralaia dalana dainai namo idia davaria bona edia nega ai idia noho gau momo taudia ma haida amo idia idau. Danu, taunimanima haida idia vara neganai gau momo idia abia to idia gaukaralaia namonamo lasi dainai idia negea kava bamona.
Oi Dekenai Idia Noho Gaudia Oi Gaukaralaia Namonamo!
Iehova ena Witness taudia idia ura bada Baibel stadi karana amo taunimanima idia durua, Dirava ena ura idia dibaia totona. To, idia lalo-parara taunimanima ese Baibel dekenai ia noho diba amo namo idia davaria totona, idia duahiduahi diba be namo. Unai dainai, Iehova ena Witness taudia ese taunimanima tausen momo dekenai duahiduahi bona toretore dalana idia hadibaia, unai taudia huanai be West Africa tanona ta ai idia hadibaia taudia 23,000 (lagani 1995 bamona lalonai). Iehova ena Witness taudia ese idia karaia taunimanima durua gaukarana ia herevalaia neganai, niuspepa ladana San Francisco Examiner ia gwau: “Oi gwau diba unai taudia edia kara be namo herea momokani. Idia be hanaihanai takisi moni idia henia, gorere taudia idia durua, bona idia hekwarahi duahiduahi bona toretore dalana idia hadibaia totona.”
Ma danu, taunimanima vairanai hereva henia kosina idia karaia hanaihanai dainai, Iehova ena Witness taudia ese taunimanima handred tausen momo idia hadibaia hereva henia namonamo taudia ai idia lao totona, bona hari taunimanima vairanai hereva idia henia namonamo diba. Unai taunimanima tausen momo huanai haida be guna idia hereva namonamo diba lasi. Mani South Africa tauna ta oi laloa, ia gwau: “Lau hereva namonamo lasi dainai, lau sibona lau noho, bona ma haida be lau ura gwauraia gaudia be lau totona idia gwauraia. . . . Lau be Haroro Sikuli lalonai lau vareai bona taunimanima haida edia vairanai Baibel duahiduahi lau karaia neganai . . . , lau duahia namonamo lasi bona idia henia negana lalonai egu duahiduahi lau haorea diba lasi. Hebou murinai [sisiba henia tauna] ese mai manau ida lau dekenai sisiba ia henia. Ia gwau namona be sibona lau noho neganai, do lau duahiduahi badabada loulou. Unai lau karaia, dina momo lalonai egu Baibel bona Gima Kohorona magasin lau duahia badabada.” Unai tau ena hereva karana ia namo ia lao bona hari ia be taunimanima handred momo, nega haida tausen momo, vairanai hereva ia henia.
Tadikaka Iboudiai be Hegeregere
Edukeisen, medikol heduru, kohu, bona dagi ita laloa neganai, ita itaia Iehova ena Witness taudia edia noho be idauidau. Unai dala idauidau dekenai edia noho be idauidau, badina hari tanobada dikana dekenai idia noho. To tomadiho oreadia haida amo idia idau, badina idia ese edia bese, dagi, bona kohu be idau taudia idia lalo-dika henia kava karana idia kokia momokani.
Unai ia vara badina idia hekwarahi, Baibel amo idia dibaia gaudia idia badinaia totona. Mai edia kudouna ibounai ida inai bamona Baibel ena hakaua herevadia idia abia dae: “Lohiabada ese gau ia itaia lasi, taunimanima ese idia itaia bamona. Taunimanima ese tau ena toana idia itaia, to Lohiabada ese tau ena kudouna ia itaia.” (1 Samuela 16:7) “Dirava ese taunimanima edia toana ia laloa lasi. To bese ibounai lalonai, Dirava dekenai idia gari, bona kara maoromaoro idia karaia taudia, be Dirava ese do ia abia dae.” (Kara 10:34, 35) “Bema tau ta ese umui dekenai ia kara dika henia neganai, iena kara dika davana do umui henia lasi, to taunimanima ibounai edia vairana dekenai kara namo sibona do umui karaia. Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.”—Roma 12:17, 18; mani 1 Timoteo 6:17-19; Iamesi 2:5, 9 itaia.
Lalo-tamona idia havaraia Baibel ena hakaua herevadia idia badinaia namonamo dainai, Iehova ena Witness taudia ese edia orea lalonai bese, dagi, eiava taga ese taunimanima idia hapararaia karana idia koua. Keristani kongregesen lalonai hesiai gaukara ena hahenamo abia totona taunimanima idia abia hidi neganai, unai gaudia be anina bada lasi. Dagi idauidau, hegeregere hadibaia bona gunalaia gaukara edia maduna be lauma dalanai idia goada taudia sibona dekenai idia henia.—1 Timoteo 3:1-13; Tito 1:5-9.
Tanobada lalonai iboudiai be hegeregere lasi dainai hisihisi idia davaria taudia be hari Havaraia Tauna vairanai ma haida ese tadikaka bona taihu bamona idia kara henidia dainai idia moale! Martina ese unai ia hamomokania diba. Ena tamana ese ena ruma bese ia rakatania murinai, ia be sinana sibona ia noho ogogami ruma besena lalonai ia tubu. Nega momo taunimanima ese ia idia kara dika henia, ia lalo-goada lasi, bona ma haida ia tura henia namonamo lasi. Ena mauri ia laloa bada lasi. To, Baibel ia stadilaia matamaia bona Iehova ena Witness ta ai ia lao murinai, ena mauri ia idau. Ia gwau: “Lalohadai kereredia koua totona lau do hekwarahi noho, to hari lau hegeregere unai hekwakwanai lau hanaia totona. Sibona lau matauraia diba, bona gari lasi ida lau hereva diba. Hereva momokani ese lau dekenai maduna huaia karana ia hadibaia. Hari lau diba Iehova ese lau ia lalokau henia bona lau laloa mauri be mai anina bada.”
Hari inai nega lalonai ia vara momo lasi, to Iehova ena Witness taudia be tano 230 lalonai idia noho Keristani taudia edia orea lalonai, idia iboudiai be hegeregere. Tomadiho oreana ma ta ese unai bamona ia gwau bona ena hereva ia hamomokania diba, a?
Momokani, Iehova ena Witness taudia ese mauri idia lalo-pararalaia namonamo dainai idia diba, tanobada dikana ai idia noho dainai, iboudiai be hegeregere lasi bona unai idia haorea diba lasi, hegeregere lagani handred momo lalonai taunimanima haida be unai idia karaia toho—to idia kwalimu lasi. To, idia moale bada, badina sibona edia orea lalonai, idia kwalimu unai dika idia hamaragia totona. Bona Dirava ena gwauhamata idia abidadama henia goadagoada dainai, idia ese kara maoromaoro tanobadana idia naria noho, unuseniai iboudiai be do idia hegeregere ela bona hanaihanai.
Oibe, nega sisina murinai Havaraia Tauna ena ura ginigunana do ia vara, kamonai taudia iboudiai be “hemataurai bona maoro” do idia abia. Unai be lalohadai namo hereana! Bona unai negai do ia guguru momokani!
[Picture on page 7]
Iehova ena Witness taudia idia hekwarahi taunimanima tausen momo dekenai duahiduahi bona toretore dalana idia hadibaia totona
[Picture on page 8]
Baibel ena hereva momokani ese edia bese, dagi, bona kohu be idau taudia idia lalo-dika henia kava karana ia kokia