Oi Itaia Diba Lasi Diravana Kahirakahira Oi Lao Diba, A?

Reana oi henanadai: ‘Edena dala ai lau itaia diba lasi tauna lau tura henia diba?’ Reana oi laloa unai be henanadai maorona. To, mani oi laloa:

LALOKAU bona noho daudau hetura karana ia vara totona, matana amo ita itaia karana be mai anina bada, a? Eiava, matana amo ita itaia diba lasi karadia be mai anina bada danu, eiava edia anina be bada herea, a? Oibe! Unai dainai taunimanima haida ese ma haida idia hetura henia namonamo, revareva idia torea loulou karana amo​​—⁠edia revareva lalonai, mai momokani ida idia ura henia gaudia, idia ura henia lasi gaudia, idia tahua gaudia, hakaua herevadia, kiri herevadia, bona kara eiava ura idauidau ma haida idia gwauraia hedinarai.

Danu, matakepulu taudia ese idia hahedinaraia ma tau ta ita hetura henia totona, matana amo ita itaia karana be gau badana lasi. Edward bona Gwen, matakepulu headava tau bona ena adavana, edia haheitalai mani ita laloa.a Matakepulu taudia edia sikuli ta dekenai, Edward ese Gwen ia davaria, unuseniai ia be kekeni badana ta. Edward ese Gwen ena kara, iena hereva momokani bona kara momokani bona iena lalohadai maorona gaukara dekenai, ia ura henia. Ma danu Edward ese Gwen ia ura henia, badina iena hereva lalonai ia gwau: “Lau idia hadibaia bona lau abia dae idia be mai anina bada karadia ibounai be ia ese ia hahedinaraia.” Edia hetura heheni karana ia matamaia, bona lagani toi murinai idia headava.

Edward ia gwau: “Ta ida oi noho hebou neganai, ia ida emui hetura karana oi hagoadaia lalonai matakepulu be koua gauna lasi. Reana ena be umui ta ta umui itaia heheni diba lasi, to emui hemami ia hehuni lasi.” Hari, lagani 57 ia hanaia vadaeni, to idia lalokau heheni noho. Idia gwau edia hetura karana namona lalonai, gau hani be mai anina bada: (1) ma ta ena kara namodia dibaia, (2) unai kara lalohadailaidia bona ura henia, (3) herevahereva namonamo karana hanamoa, bona (4) gau idauidau karaia hebou.

Hetura karadia namodia ibounai lalonai, turadia huanai, headava taudia huanai eiava, mai anina bada hetura karana taunimanima bona Dirava edia huanai, unai hereva badadia hani be mai anina bada. Hereva gabena dekenai do ita itaia edena bamona unai hereva badadia ita badinaia ese ita do idia durua, ena be Dirava ita itaia diba lasi, to ia ida do ita hetura namonamo.b

[Footnotes]