Gini Goada Bona Dirava Ena Ura Diba Namonamo

“Idia Karaia Gauna Hereadaena”

NEGA gunadia amo ema bona hari, Iehova ena Witnes taudia be Iesu Keriso ena peroveta herevana ta idia laloa bada, ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Lagani 1914​​—⁠“dina gabedia” ia matamaia negana​​—⁠ia kahirakahira neganai, lalo-momokani Bible Student taudia be Dirava ena ura idia diba namonamo dainai, Buka Helaga ese ia gwauraia tanobada hegegemadai hadibaia gaukarana idia karaia.​​—⁠2 Timoteo 3:​1, NW.

Unai Iehova hesiai henia taudia idia ura bada tanobada ibounai dekenai sivarai namona idia harorolaia dainai, idia ese dala matamatana, goadana, bona namona idia gaukaralaia. Unai dala ita diba totona, idaunegai sivaraidia ita laloa lou.

Sivarai Namona Harorolaia Dalana Matamatana

Unai nega be January, 1914. Mani oi laloa, oi be New York City dekenai, lamepa idia habodoa rumana ta lalonai taunimanima 5,000 bona ma haida huanai oi helai. Emu vairana kahana dekenai be muvini piksa halasia gauna badana ta ia noho. Unai piksa dekenai be huina ia kurokuro tauna ta ia hedinarai, kouti koremana ia hahedokilaia. Oi be muvini piksa mai ena regerege lasi oi itaia vadaeni, to unai tau ia hereva, bona iena hereva oi kamonai. Oi be masini amo idia gaukaralaia gauna matamatana ta oi itaia noho, bona ia gwauraia sivaraina be idau momokani. Hereva henia tauna be Charles Taze Russell, Watch Tower Society ena presiden ginigunana, bona unai laulau ladana be “Photo-Drama of Creation.”

C. T. Russell ia lalo-parara muvini piksa be dala namona taunimanima iboudiai ia hadibadia totona. Unai dainai, lagani 1912 ai, ia ese “Photo-Drama of Creation” ia hegaegaelaia matamaia. Unai amo, hora 8 slaid foto bona muvini piksa, mai ena kala bona regerege danu, ia karaia.

“Photo-Drama” ia karaia dalana be kahana hani ai do idia hahedinaraia, bona unai be Dirava ese gau ibounai ia havaraia negana bona taunimanima edia mauri sivaraidia amo ela bona Keriso ena Lagani 1000 Lohia Negana ena dokona ai Iehova Dirava ena ura tanobada bona taunimanima totona do ia guguru negana. Lagani momo idia hanaia murinai, taunimanima be moni momo karaia bisinesi lalodiai unai diba idia gaukaralaia. To, idaunegai taunimanima milioni momo be “Photo-Drama of Creation” idia itaia davana lasi!

“Photo-Drama” totona, miusiki rekodi namodia bona rekodi herevadia 96 idia hegaegaelaia. Slaid piksa edia laulau be idia penia namo herea, tanobada ena histori idia haheitalaia laulaudia unai. Danu, laulau matamatadia handred momo idia penia bona torea be namo. Slaid piksa bona muvini piksa haida mai edia kala be mai hekwarahi bada ida imana amo idia penia. Bona unai be idia karaia loulou, badina be gabeai, kahana hani ibounai 20 idia hegaegaelaia. Unai ese dala ia kehoa idia gwauraia hidi dinana ta ai “Photo-Drama” ena kahana ta be siti idauidau 80 dekenai idia hahedinaraia diba!

Piksa Idia Hahedinaraia Neganai Idia Vara Gaudia

“Photo-Drama” piksa idia hahedinaraia neganai, dahaka ia vara? Bible Student hahinena Alice Hoffman ia gwau: “Drama ia hamatamaia neganai Tadikaka Russell ia hedinarai. Iena laulau ia hedinarai bona ena uduna ia marere hamatamaia neganai, rekodi masini do idia gadaralaia matamaia . . . bona ai ese ena gadona ai kamonai mai moale ida.”

Zola Hoffman ese nega daudau lalonai ia vara gauna ta ena laulau idia hahedinaraia dalana ia herevalaia, ia gwau: “Unuseniai lau helai bona Dirava ese gau ibounai ia karaia negana ena laulau lau itaia neganai, lau hoa bada. Palaoapalaoa idia kehoa metairametaira dalana be emai matana dekenai ai itaia diba.”

Miusiki ia ura henia bada tauna Karl F. Klein, Iehova ena Witnes taudia edia Hakaua Oreana tauna ta, ia gwau: “Unai piksa idia hahedinaraia lalonai, miusiki namona idia gadaralaia, hegeregere miusiki namo hereadia Narcissus bona Humoreske bamona.”

Idia laloaboio diba lasi gaudia ma haida idia vara danu. Clayton J. Woodworth, Jr., ia gwau: “Nega haida kiri karadia haida idia vara. Nega ta, rekodi ese ia gadaralaia gauna be ‘Emu Ororo Dekenai Oi Heau Lao, Manu ia Roho Lao Bamona,’ bona laulau dekenai gigantosaurus bada hereana ta ena laulau ia hedinarai, Abata badana ia do vara lasi neganai idia noho animal bada hereadia unai.”

Unai “Photo-Drama of Creation” sibona lasi, to daudau lasi murinai, “Eureka Drama” idia halasidia danu. (Maua itaia.) Ta be rekodi herevadia bona rekodi miusiki gauna. Ma ta be rekodi bona slaid piksa gauna. Ena be “Eureka Drama” be muvini piksa bamona lasi, to taunimanima momo idia noho lasi gabudia dekenai idia hahedinaraia neganai, ia be anina namona ia havaraia.

Haroro Gaukara Ena Tulu Namona Ta

Lagani 1914 dokona ai, North America, Europe, bona Australia ai, “Photo-Drama” be taunimanima ibounai 9,000,000 mai kahana dekenai idia hahedinaraia vadaeni. Ena be Bible Student taudia be momo lasi, to unai gau matamatana amo sivarai namona do idia harorolaia ena lalo-goada ia bada. Idia ese moni idia atoa hebou gabudia namodia idia rentaia, unai laulau idia hahedinaraia totona. Unai dala amo “Photo-Drama of Creation” ese gaukara badana ia karaia, taunimanima dekenai Dirava ena Hereva bona ura ia hadibaia.

C. T. Russell dekenai revareva ia siaia tauna ta ia gwau: “Nega ginigunana emu Drama lau itaia neganai, egu mauri ia haidaua; eiava, namona be lau gwau, egu diba Baibel dekenai ia haidaua.” Ma ta ia gwau: “Lau be abidadama lasi karana ena kopukopu dekenai kahirakahira lau mutu bona lau mamia ‘Photo-Drama of Creation’ ese lau ia hamauria, vanegai siahu negana lalonai iniseniai umui hahedinaraia gauna unai. . . . Hari lau be tanobada ese ia havaraia diba lasi mainona lau abia bona lau ese iena kohu idauidau do lau abia lasi.”

Demetrius Papageorge, Society ena hedikwota dekenai ia gaukara daudau tauna ta, ia gwau: “Unai neganai Bible Student taudia be momo lasi bona idia dogoatao moni be bada lasi, unai ita laloa neganai, ‘Photo-Drama’ be idia karaia gauna hereadaena. Momokani Iehova ena lauma be unai gauna ia durua!”

[Box/Pictures on page 8, 9]

“Eureka Drama”

“Photo-Drama” piksa idia hahedinaraia bena hua 8 murinai, Society idia itaia unai laulau bamona ma ta, ladana “Eureka Drama” idia halasia be namo. Ena be “Photo-Drama” ibounai be siti badadia ai idia hahedinaraia noho, to “Eureka” be hanua badadia bona maragidia dekenai unai sivarai badana tamona ia halasia. Unai “Eureka Drama” ta idia gwauraia, haroro totona “taihu dekenai dala aukana ia kehoa.” Dahaka dainai? Badina unai maua mai ena rekodi momo ena metau be kilogram 14 sibona. Oibe, taunimanima dekenai idia hahedinaraia totona, rekodi masini danu idia abia lao be namo.