Mauri Sivaraina

Dina Ibounai Iehova ese Lau Ia Hagoadaia

FORREST LEE ESE IA SIVARAILAIA

Pulisi ese emai rekodi masini bona Baibel herevalaia bukadia idia abia. Tanobada Ibounai Tuarina Iharuana ese dagedage taudia edia dala ia kehoa, Canada ena gavana jeneral ena lalona idia veria bona Iehova ena Witnes taudia edia gaukara ia taravatua totona. Unai be July 4, 1940 ai ia vara.

IA VARA gauna dekenai ai gari lasi, ai ese buka bona magasin momo be ai haboua gabuna amo ai abia bona haroro gaukara ai karaia lou. Lau be hanaihanai Tamagu ena hereva unai negana ai lau laloatao, ia gwau: “Gaukara ita hadokoa haraga lasi. Iehova ese ita ia hagania do ita haroro.” Unai nega lalonai, lau be mauri lagani 10 merona goadana. To hari inai negai danu, Tamagu ena ura bona iena goada hesiai gaukarana dekenai be lau idia hadibaia loulou edena dala ai iseda Dirava, Iehova, ese ena kamonai taudia ia hagoadaia.

Ma nega ta, pulisi ese ai idia hastopua neganai, aiemai buka bona magasin sibona idia abia lasi to Tamagu danu idia abia lao dibura rumana dekenai, Sinagu be natuna hani ida ia noho. Unai be September 1940 ai, Saskatchewan dekenai ia vara. Nega daudau lasi murinai, lau be sikuli amo idia hadokoa badina Baibel ese egu lalona ia hadibaia karana lau badinaia dainai, pepe lau hanamoa lasi bona bese abia isi anena lau abia lasi. Egu sediual ia auka lasi badina sikuli kosi be ruma dekenai revareva amo lau karaia, bona mai goada ida haroro gaukara lau karaia.

Lagani 1948 ai, painia taudia, Iehova ena Witnes taudia edia ful-taim hesiai gaukara idia karaia taudia, idia noia Canada ena ist kone kahana dekenai do idia lao. Vadaeni, lau lao Halifax ai, Nova Scotia dekenai, bona Cape Wolfe ai, Prince Edward Island dekenai lau painia. Lagani ta murinai, lau ese Iehova ena Witnes taudia edia brens opesi Toronto dekenai pura rua lalonai do lau gaukara totona edia noinoi lau abia dae. Unai pura rua be hesiai laganidia namodia 6 ai idia lao. Gabeai, Myrna lau davaria, ia danu ese Iehova ia lalokau henia, bona December 1955 ai, ai headava. Ai be Milton ai, Ontario dekenai ai noho, bona nega sisina murinai kongregesen matamata be unuseniai ai haginia. Aiemai ruma ena henuna daiutuna be Kingdom Hall ai ia lao.

Emai Hesiai Gaukara Do Ai Habadaia Urana

Unai murina laganidia dekenai, natudia 6 be sisina haraga ai abia. Aiemai natuna kekenina Miriam be ginigunana. Unai murinai Charmaine, Mark, Annette, Grant, bona Glen be dokona. Nega momo gaukara amo ruma dekenai lau giroa lou neganai, lau davaria maragidia be lahi karaia gabuna kahirakahira foloa dekenai idia helai bona Myrna ese idia dekenai Baibel ia duahia, Baibel ena sivarai edia anina ia herevalaia bona edia kudouna dekenai Iehova lalokau henia karana korikorina ia hadibaia goada. Iena heduru namona dainai, emai natudia ibounai be idia maragi neganai Baibel ena diba namona idia abia.

Lauegu tamana ena ura bada hesiai gaukara dekenai be egu lalona bona kudouna ia hamarerea bona do lau laloaboio diba lasi. (Aonega Herevadia 22:⁠6) Unai dainai, lagani 1968 ai, Iehova ena Witnes taudia edia ruma bese ese Central bona South America dekenai haroro gaukara do idia durua totona idia noia neganai, emai ruma bese ese unai idia karaia. Unai neganai emai natudia edia mauri laganidia be 5 amo ia lao 13, bona ai ta lasi ese Spanish gado herevana ta ai diba. Hakaua herevana lau badinaia totona, tano idauidau dekenai lau lao bona taunimanima edia noho daladia lau itaia. Lau giroa lou murinai, ruma bese ida guriguri amo emai abia hidi gauna ai laloa namonamo bona emai lalona ai hadaia Nicaragua dekenai do ai lao.

Nicaragua Dekenai Ai Gaukara

October 1970 dekenai, ai be emai ruma matamatana lalonai ai noho, bona pura toi murinai kongregesen ena hebou ai, lau dekenai kahana maragina ta idia henia. Unai kahana dainai lau hekwarahi badina Spanish gado lau herevalaia namonamo lasi bona dokonai kongregesen taudia ibounai lau noia Saturday dabai 9:30 a.m., cerveza totona emai ruma dekenai do idia mai. Lau ura lau gwau servicio, haroro gaukara herevana, to momokani, bia totona idia lau boiria. Gado dibaia be mai ena hekwarahi!

Matamanai, lauegu imana dekenai haroro herevana lau torea bona iduara lau raka henia neganai lau herevalaia. Lau gwau: “Inai buka ida davana lasi Baibel stadi do oi abia.” Stadi ia abia dae tauna ta be gabeai ia gwau emai hebou dekenai ia mai badina ia ura egu hereva ena anina ia diba. Unai tauna be Iehova ena Witnes tauna ta ai ia lao. Ia hedinarai goevagoeva Dirava sibona ese hereva momokani ena huahua be idia manau taudia edia kudouna dekenai ia hatubua, aposetolo Paulo ia hereva bamona!​​—⁠1 Korinto 3:⁠7.

Managua ena siti badana dekenai lagani rua ai noho murinai, ai idia noia Nicaragua ena saut kahana dekenai do ai lao. Unuseniai Rivas kongregesen bona kahirakahira idia noho kamonai taudia edia grup ida ai gaukara. Abidadama Witnes tau burukana, Pedro Peña, ese lau ia bamoa unai grup ai vadivadi henia. Grup ta be Lake Nicaragua ena lahi ororona ena motumotu dekenai ia noho, unuseniai be Iehova ena Witnes taudia edia ruma bese tamona sibona ia noho.

Ena be unai ruma bese be tauanina dalanai idia ogogami, to idia hekwarahi aiemai vadivadi neganai edia heabidae karana idia hahedinaraia totona. Adorahi ai ginidae neganai, ai totona aniani idia hegaegaelaia. Pura ta ai noho, bona Baibel idia ura henia taudia momo ese edia aniani be ai dekenai idia henia. Ai moale badina Sunday ai, Baibel amo ai henia pablik tok dekenai taunimanima 101 idia mai.

Ma nega ta ai, Costa Rica ena hetoana kahirakahira ia noho ororo gabuna dekenai kamonai taudia edia grup ta ai vadivadi henia gwauraia neganai, mamina lau abia Iehova ena siahu ese lau ia hagoadaia. Do ai lao dinana dekenai, Pedro be lau abia totona ia mai neganai, bedi dekenai lau hekure noho badina malaria lau abia. Lau gwau: “Pedro, do lau lao diba lasi.” Iena imana be lauegu baguna dekenai ia atoa bona ia haere, ia gwau: “Oi be fiva dikana oi abia to oi mai be namo! Tadikaka idia naria noho.” Bena lau kamonai ia ese mai ena kudouna ibounai ida ia guriguri, unai bamona guriguri momo be guna lau kamonai lasi.

Unai murinai, lau gwau: “Oi lao oi sibona emu fresco (au huahua ranuna) oi abia. Miniti 10 lalonai do lau hegaegae.” Ai vadivadi henia gabuna dekenai be Witnes ruma bese rua idia noho, bona ai idia naria namonamo. Dina iharuana ai ena be fiva dainai lauegu tauanina ia manoka, to idia danu ai haroro. Sunday hebouna dekenai taunimanima handred mai kahana idia mai lau itaia neganai goada lau abia!

Gabu Ai Haidaua Lou

Lagani 1975 ai, emai natuna namba 7, Vaughn, be ia vara. Lagani ta murinai, moni ena hekwakwanai dainai Canada dekenai ai giroa lou. Nicaragua ai rakatania be ia auka, badina emai noho neganai Iehova ena goada siahuna ai mamia momokani. Unai gabu ai rakatania neganai, aiemai kongregesen teritori dekenai taunimanima 500 mai kahana be hebou dekenai idia mai.

Guna, aiemai natuna kekenina Miriam bona lau be Nicaragua dekenai spesel painia ai idia abia hidi neganai, Miriam be lau ia nanadaia, ia gwau: “Tamagu, bema nega ta Canada dekenai do umui giroa lou neganai, do lau noho diba, a?” Lau laloa Nicaragua do lau rakatania lasi, unai dainai lau gwau: “Oibe, do oi noho diba!” Vadaeni ai lao neganai, Miriam be ia noho ena ful-taim hesiai gaukarana do ia karaia noho totona. Gabeai, Andrew Reed ia adavaia. Lagani 1984 ai, Gilead klas namba 77, Iehova ena Witnes taudia edia misinari sikuli ai, Brooklyn, New York dekenai, idia lao. Hari Miriam be ena adavana ida Dominican Republic dekenai hesiai gaukara ia karaia noho, Nicaragua ena misinari goadadia ese idia havaraia urana ia hagugurua noho.

Unai nega lalonai, lauegu kudouna dekenai be Tamagu ena hereva, “gaukara ita hadokoa haraga lasi,” ia do goada noho. Unai dainai lagani 1981 ai, Central America dekenai do ai giroa lou totona ai haboua moni ia hegeregere neganai, unuseniai ai lao lou, hari Costa Rica dekenai. Hesiai gaukara ai karaia lalonai, ai idia boiria brens opesi matamatana haginia gaukarana do ai durua totona. To, lagani 1985 ai, emai natuna merona Grant be medikol heduru do ia abia totona Canada dekenai ai giroa lou. Glen be Costa Rica dekenai ia noho bona brens konstraksen dekenai ia gaukara, bona Annette bona Charmaine be spesel painia gaukarana idia karaia. Costa Rica ai rakatania taudia be nega ta ai laloa lasi do ai giroa lou lasi.

Hisihisi Hanaia Dalana

September 17, 1993 ai, dina ia diari. Emai natuna roboana, Mark, bona lau be ruma ena guhi ai hanamoa noho. Ai gaukara hebou bona hanaihanai ai karaia bamona lauma gaudia ai herevalaia. Bena lau gini kerere bona guhi dekena amo lau moru diho. Maserea amo lauegu lalona lau abia lou neganai, lau ese lamepa diaridia bona dabua kurokuro idia karaia taudia sibona lau itaia. Unai be hospital ena emergency daiutuna.

Baibel ese ia herevalaia gauna dainai, lauegu hereva ginigunana be: “Rara lasi, rara lasi!” (Kara 15:​28, 29) Lau moale badina Charmaine ena hereva lau kamonai, ia gwau: “Ia namo Tamagu. Ai ibounai be iniseniai.” Gabeai lau diba doketa ese lauegu medikol pepana idia itaia bona rara gaukaralaia karana be idia herevalaia lasi. Lauegu aiona lau hakwaidua bona lau marere diba lasi, lau sibona lau hahodi diba lasi danu.

Iehova amo goada lau ura momokani, badina lauegu tauanina lau hamarerea diba lasi. Opereisen lalonai lauegu aiona dekenai matu idia karaia hahodi tiubi ta idia atoa totona, unai dainai hodahoda be lauegu gadona varovarona dekenai ia vareai diba lasi. Bena lau hereva diba lasi. Taunimanima ese lauegu bibina idia itaia amo lau herevalaia gauna do idia lalo-pararalaia.

Medikol gaudia edia davana ia bada daekau haraga. Lauegu adavana bona natudia momo be ful-taim hesiai gaukara idia karaia dainai, lau laloa reana unai hesiai gaukara do idia rakatania bona do idia hekwarahi moni ena hekwarahi idia hamaoromaoroa totona. To, Mark be gaukara ta ia abia bona hua toi sibona lalonai unai davana ena kahana badana ia henia. Unai dainai, idia ibounai be ful-taim hesiai gaukarana idia karaia noho, to lauegu adavana bona lau be lasi.

Lauegu hospital daiutuna ena haba be tano idauidau 6 amo idia mai hahenamo kadi bona revareva handred momo ese idia koua. Iehova ese lau ia hagoadaia momokani. Lau be intensive care dekenai lau noho hua ima mai kahana lalonai, kongregesen danu ese lauegu ruma bese ia durua bona idia dekenai aniani idia henia. Dina ta ta ai, Keristani elda ta be lau ida ia noho bona lau dekenai Baibel bona Baibel bukadia ia duahia bona hagoadaia ekspiriens ia gwauraia danu. Lau be lauma aniani namona lau reaia lasi, badina lauegu ruma bese amo rua be lau ida kongregesen heboudia ta ta idia hegaegaelaia.

Hospital dekenai lau do noho neganai, dala idia karaia dina tamona hebouhebou dekenai lau lao totona. Hospital taudia idia hegaegae, diba bada sista ta bona hahodi masini ia naria hahinena ta be dina ibounai lalonai lau do idia naria. Lau moale badina lauegu Keristani tadikaka bona taihu ida lau hedavari lou! Tadikaka bona taihu handred momo idia gini hegaegae idia naria lau do idia hedavari henia totona bona unai do lau laloaboio lasi.

Lauma Dalanai Lau Goada Noho

Aksiden lau abia bena lagani ta murinai, lau hegeregere ruma dekenai lau giroa lou bona lauegu bese ida lau noho, ena be sista taudia ese hora 24 lalonai lau do idia naria be namo. Lau totona idia hegaegaelaia motuka dainai hebou dekenai lau lao diba, bona nega momo lau reaia lasi. To momokani, lau lao totona lau hekwarahi bada. Ruma dekenai lau giroa lou negana amo, lau be hegeregere distrik hebouhebou ibounai lau lao henidia.

Vadaeni, February 1997 ai, sisina lau herevahereva diba. Sista haida dekenai lauegu helaro Baibel amo lau herevalaia neganai idia kamonai namonamo. Sista ta ese Jehovah’s Witnesses​​—⁠Proclaimers of God’s Kingdom bukana ibounai bona Watch Tower bukadia ma haida be lau dekenai ia duahia. Taunimanima dekenai revareva lau siaia totona kompiuta be au amo lau gaukaralaia. Ena be unai dala ai lau taipia be mai ena hekwarahi, to hesiai gaukara lau karaia noho dainai moale lau abia.

Hisihisi bada lau davaria noho. To toana be bema ma haida dekenai Baibel ena hereva momokani lau herevalaia eiava idia duahia neganai lau kamonai, hisihisi ena mamina ia doko sisina. Nega haida, lauegu adavana namona ida dala dekenai haroro gaukara lau karaia, bema heduru lau ura neganai ia ese lauegu hereva do ia gwauraia. Nega haida heduru painia gaukara lau karaia diba. Keristani elda gaukarana ese lauegu lalona ia hamoalea, bona tadikaka be hebou dekenai lau dekenai idia mai eiava lauegu ruma dekenai lau idia vadivadi henia bona idia lau durua bona hagoadaia diba neganai, unai moale ia bada.

Lau gwau diba lau lalo-metau haraga. Unai dainai lau lalo-metau neganai, karaharaga lau guriguri moale do lau abia totona. Lau be hanuaboi bona dina lalonai Iehova lau guriguri henia lau do ia hagoadaia noho totona. Revareva ta eiava ta ena vadivadi karana ese lau ia hamoalea. Gima Kohorona eiava Awake! magasin ta duahia karana ese lauegu lalona be hagoadaia herevadia amo ia hahonua danu. Nega haida sista idauidau ese unai magasin be lau dekenai idia duahia. Lauegu aksiden murinai, lau ese kaset teipi dekenai Baibel ibounai be nega 7 lau kamonai. Unai be Iehova ese lau ia durua daladia idaudia haida.​​—⁠Salamo 41:⁠3.

Lauegu noho dalana ia idau karana ese lau dekenai nega bada ia henia, Iseda Hadibaia Tauna Badana, Iehova, ese mauri totona ita ia hadibaia daladia lau laloa namonamo totona. Ia ese ita dekenai iena ura bona palani dekenai diba maoromaoro, mai anina bada hesiai gaukarana, ruma bese ena moale havaraia dalana ena sisiba ia henia, bona laloa kehoa ia henia hisihisi lalonai dahaka do ita karaia ita diba totona. Iehova ese lau ia bamoa hahine namona amo lau ia hanamoa. Lauegu natudia be mai edia ura ida lau idia badinaia danu, bona lau moalelaia gauna be idia ibounai be ful-taim hesiai gaukarana idia karaia. Momokani, March 11, 2000 ai, emai natuna mero Mark bona ena adavana, Allyson, be Gilead sikuli ena klas namba 108 idia haorea bona Nicaragua dekenai idia siaia. Lauegu adavana bona lau be edia kosi haorea dinana dekenai ai lao. Do lau hereva momokani diba, hisihisi ese lauegu mauri ia haidaua to lauegu kudouna ia haidaua lasi.​​—⁠Salamo 127:​3, 4.

Iehova lau tanikiu henia badina ia ese lau dekenai aonega ia henia bona lau ia durua lau dekenai idia hadibaia lauma gaudia be lauegu ruma bese dekenai lau hadibaia diba. Lauegu natudia be egu tamana bamona edia Havaraia Tauna idia hesiai henia neganai, goada lau abia. Lauegu tamana ia gwau: “Gaukara ita hadokoa haraga lasi. Iehova ese ita ia hagania do ita haroro.” Momokani, dina ibounai lalonai Iehova ese lau bona egu ruma bese ia hagoadaia.

[Picture on page 24]

Tamana, egu kakadia memerodia bona taihuna badana, painia dinadia dekenai ai gaukaralaia treila badinai. Lau be idiba kahana dekenai

[Picture on page 26]

Lau bona egu adavana, Myrna

[Picture on page 26]

Hari ai abia ruma bese ena laulau

[Picture on page 27]

Lau be revareva amo lau do haroro noho