Basileia Haroro Ripoti

India—“Noho Dala Idauidau Taudia Idia Lalo-Tamona”

“NOHO Dala Idauidau Taudia Idia Lalo-tamona,” be India dekenai idia noho bese idauidau taudia idia noho hebou dalana idia gwauraia hedinarai totona idia gaukaralaia momo herevana. Unai tano badana lalonai edia kastom, gado, tomadiho, bese, dabua, bona aniani be idauidau dainai, lalo-tamona havaraia be mai ena hekwarahi bada. To, unai bamona lalo-tamona be India ai, Iehova ena Witnes taudia edia opesi dekenai idia itaia diba, ena be unuseniai idia noho bona gaukara volantia taudia be gabu idauidau bona gavamani ena teritori idauidau momo amo idia mai bona gado idauidau momo ai idia hereva.

• Rajrani​—⁠hahine matamata ta Punjab, India ena notwest momokani amo​—⁠mani ita laloa. Rajrani be sikuli ai ia noho neganai, ena klas turana ta be Iehova ena Witnes taudia ida Baibel stadi ia abia. Unai kekeni matamata be Baibel dekenai Rajrani ena lalona ia veria toho. Unai negai Punjabi gado ai Gima Kohorona be lasi bona ena klas turana be English gado ia diba namonamo lasi dainai, Rajrani ena heduru ia noia, ia dekenai unai magasin ena hereva ia hahanaia totona. Rajrani be Gima Kohorona dekenai ia duahia gaudia ese ena lalona idia veria bada, bona ena be ena tama sina ese idia dagedage henia, to lauma dalanai ia goada ia lao bona Iehova Dirava dekenai ena mauri ia gwauhamatalaia. Hari India Betele dekenai ia gaukara, bona hereva momokani dekenai iena matana ia kehoa gaukarana ia karaia noho. Keristani magasin bona buka be Punjabi gado dekenai ia hahanaia!

• Bijoe danu mani ita laloa, ia be India ena kahana ma ta amo ia mai​—⁠sautwest dekenai ia noho Kerala amo. Bijoe be bese abia isi karadia lalonai ia vareai lasi dainai, haisikuli amo idia kokia. Kota idia karaia sisina daudau, to dokonai tomadiho momokani ia kwalimu dainai, Bijoe ia giroa sikuli dekenai.a Koledi dekenai ia lao danu. To, unuseniai ia itaia kara dika ese ena lalona ia hahisia dainai, ena lagani ginigunana lalonai, koledi ia rakatania. Hari lagani 10 Betele dekenai ia noho murinai, ia mamia ia be edia kara be idauidau to lalo-tamona ai idia noho Betele famili taudia ta dainai, ia abia namo ese edukeisen badana tahua karana amo ia abia diba namo ia hanaia.

• Norma bona Lily edia mauri lagani be 70 ia hanaia bona idia ruaosi be lagani momo lalonai idia vabu. Idia ta ta be lagani 40 mai kahana lalonai ful-taim hesiai gaukara idia karaia vadaeni. Lily be lagani 20 bamona ai, brens dekenai Tamil gado hahanaia gaukarana ia karaia. Norma be lagani 13 gunanai ena adavana ia mase neganai Betele dekenai ia mai. Idia be gaukara idia laloa bada bona karaia goadagoada ena haheitalai namodia sibona lasi, to idia ese Betele famili taudia huanai lalo-tamona idia havaraia. Vadivadi taudia idia moalelaia, bona Betele famili ena matamata taudia edia hebamo idia moalelaia, lagani momo lalonai Keristani maurina amo idia abia moale be idia ida idia herevalaia. Bona matamata taudia be edia daiutu dekenai idia boiridia idia hebamo heheni totona bona heduru idia ura neganai idia durudia. Haheitalai namona momokani!

Unai volantia taudia India ena Betele famili lalonai be gabu momo dekenai lalohadai idauidau ese idia havaraia heai bona lalo-tamona lasi karadia idia hanaia vadaeni dainai, lalo-tamona ai idia gaukara hebou bona mai moale ida ma haida idia hesiai henia.​—⁠Salamo 133:⁠1.

[Footnote]

[Picture Credit Line on page 8]

Background: Mountain High Maps® Copyright © 1997 Digital Wisdom, Inc.