Basileia Ena Hahenamo Oi Abia Diba

KERISTANI aposetolo tauna Paulo be iena nega ai idia gaukaralaia gado badadia haida ia herevalaia namonamo diba. Ia abia dibana be hari iunivesiti sikulina dekenai idia abia dibana bamona. Ia be Roma taudia edia dagi ena namo bona maoro ibounai ia moalelaia. (Kara 21:​37-​40; 22:​3, 28) Unai dagi dainai, ia be taga eiava ladana bada ia abia diba. To, ia gwau: “Inai guna lau idia hanamoa gaudia, be harihari Keriso dainai, lau gwau idia be dika. . . . Lau laloa idia be momoru, Keriso do lau abia momokani totona.” (Filipi 3:​7, 8) Dahaka dainai Paulo be unai hereva ia gwauraia?

Guna, Paulo idia gwauraia Taso tauna Saulo, bona ia be “Iesu ena taudia” ia dagedage henia tauna, to matahanai amo ia toreisi lou vadaeni bona hairai ia abia tauna Iesu ia itaia murinai, ia be abidadama tauna ai ia lao. (Kara 9:​1-​19) Damaseko ena dala ai unai ia vara dainai, Paulo ia hamomokania Iesu be gwauhamata Mesiana, eiava Keriso, bona vaira negana lalonai gwauhamata Basileiana do ia lohia. Danu, unai ese Paulo ena mauri dalana ia haidaua momokani, mai ena goada ida ataiai ia gwauraia herevana ia hahedinaraia hegeregerena. Eiava ita gwau diba, Paulo be mai ena lalo-momokani bona mai lalo-maoro ida ia helalo-kerehai.​​—⁠Galatia 1:​13-​16.

Baibel dekenai, inai hereva “helalo-kerehai” be nega momo Greek gado herevana ta amo idia hahanaia, bona ena anina korikori be “idia vara gaudia amo diba ia abia,” to “do idia vara gaudia ia diba” be ena anina lasi. Unai dainai, helalo-kerehai ena anina be tau ta ena lalona, lalohadai, eiava palani ia haidaua, guna ia karaia karadia ia dadaraia badina be ia namo lasi. (Kara 3:​19; Apokalupo 2:⁠5) Paulo be Damaseko ena dala ai ia vara hoa karana ia laloa neganai, ia be hemami namona o tomadiho karana ta sibona lasi. Paulo ia hanogaia bamona, ia diba iena mauri dalana gunana, Keriso ia laloa lasi negana unai, be anina lasi. Danu ia lalo-parara, Keriso dibaia karana amo namo ia abia totona, namona be ena mauri dalana ia hanamoa.​​—⁠Roma 2:4; Efeso 4:​24.

Iena Kara Ia Haidaua Dainai Hahenamo Ia Abia

Guna, Paulo ena diba Dirava dekenai be Farisea taudia amo ia abia, badina ia be unai orea tauna ta. Edia hahediba herevadia lalonai taunimanima edia lalohadai bona sene karadia be momo. Paulo be tomadiho taudia ma haida ia inai henidia dainai, iena gaukara goadagoada karana be kerere. Ena be ia laloa Dirava ia hesiai henia, to ia ese Dirava ia tuari henia.​​—⁠Filipi 3:​5, 6.

To Paulo ese Keriso bona ena gaukara Dirava ena ura lalonai ia diba maoromaoro murinai, ia itaia namona be kara ta ia abia hidi: Farisea tauna ai ia noho bona dagi bada bona mataurai ia moalelaia noho be namo, eiava iena mauri dalana ia haidaua bona Dirava ena lalo-namo abia karadia ia karaia matamaia be namo? Moale gauna be inai, Paulo be abia hidi maorona ia karaia, ia gwau: “Lau be Sivarai Namona dekenai lau hemarai lasi momokani. Badina be Sivarai Namona be Dirava ena siahu, abidadama taudia ia hamauria, Iuda taudia guna, Iuda lasi taudia danu.” (Roma 1:​16) Paulo be Keriso bona Basileia ena sivarai namona ia harorolaia goadagoada tauna ai ia lao.

Lagani momo murinai, Paulo ese iena Keristani tadikakadia ia hamaoroa, ia gwau: “Lau laloa lasi, inai kwalimu ahuna lau abia vadaeni. To kara tamona lau goadalaia noho, lauegu kara gunadia lau laloaboio, bona vaira neganai gaudia do lau goadalaia. Unai dainai heau helulu ena dokona gabuna dekenai maoromaoro lau heau henia, kwalimu ahuna do lau abia totona. Inai kwalimu ahuna be guba dekenai mauri matamata, Dirava ese lau ia boiria totona gauna, Keriso Iesu dainai.” (Filipi 3:​13, 14) Paulo be sivarai namona amo namo bada ia abia, badina be Dirava amo ia hakaua kerere gauna ia negea mai ena ura ida bona mai ena lalona ibounai ida Dirava ena ura hegeregerena gaudia ia tahua.

Dahaka Do Oi Karaia?

Reana Basileia ena sivarai namona be vanegai sibona oi kamonaia. Paradaiso goevadaena lalonai oi mauri hanaihanai diba helarona oi ura henia, a? Reana oi gwau oibe, badina ita ibounai ita ura ita mauri, bona maino bona noho namona ita moalelaia. Baibel ia gwau Dirava ese iseda kudouna dekenai “nega hanaihanai” ia atoa. (Hadibaia Tauna 3:​11, NW ) Unai dainai bema ita ura taunimanima ese mauri hanaihanai bona maino bona moale do idia davaria negana ia mai, unai be namo. Bona Basileia ena sivarai namona be unai do ia henia.

To, unai helaro oi abia momokani totona, namona be sivarai namona ena anina oi tahua. Aposetolo tauna Paulo ia gwau: “Umui sibona dekenai do umui hamomokania Dirava ena ura namona bona umui abia dae diba gauna bona goevadaena be dahaka.” (Roma 12:​2, NW ) Paulo bamona, diba bona lalo-parara oi abia murinai, namona be dala ta oi abia hidi.

To, reana nega vaira dekenai lalohadai haida oi abia dae vadaeni. Mani oi laloatao, Saulo be aposetolo tauna Paulo ai ia do lao lasi neganai, ena lalohadai Dirava ena ura dekenai be idau. Namo lasi Dirava ena hoa karana ta ita naria noho, to hari unai lalohadai ita laloa namonamo be namo, ani? Sibona oi nanadaia: ‘Dirava ena ura taunimanima bona tanobada totona be lau diba momokani, a? Dahaka gaudia amo lau abia dae lalohadai lau hamomokania diba? Egu hamomokania gaudia be Dirava ena Hereva, Baibel, ena diari amo lau tahua neganai, idia be maoro, a?’ Unai dala ai emu tomadiho ia abia dae herevadia oi tahua namonamo neganai, namo do oi davaria. Momokani, namona be oi ura unai oi karaia, badina be Baibel ia gwau: “Hereva ibounai do umui laloa namonamo, idia be Dirava dekena amo idia mai o lasi, bona hereva namodia do umui dogoatao momokani.” (1 Tesalonika 5:​21) To, Dirava ena lalo-namo ita abia be gau badana, ani?​​—⁠Ioane 17:3; 1 Timoteo 2:​3, 4.

Reana tomadiho gunalaia taudia be mauri hanaihanai idia gwauhamatalaia. To, bema unai gwauhamata be Baibel ena hahediba amo ia mai lasi, unai ese ita do ia durua lasi Dirava ena Basileia ena hahenamo ita abia totona. Haroro Herevana Badana lalonai, Iesu be mai goada ida inai sisiba ia henia: “Idia gwau, ‘Lohiabada e, Lohiabada e,’ taudia momo be Guba Basileia lalonai do idia raka vareai lasi. To lauegu Tamana, guba dekenai ia noho ena ura idia karaia taudia, idia sibona do idia vareai.”​​—⁠Mataio 7:⁠21.

Iesu ena hereva mani oi laloa, ia hahedinaraia goevagoeva iena Tamana ena ura ia karaia tauna be Dirava ena Basileia ena hahenamo do ia abia. Eiava ita gwau diba, ena be kara haida edia toana be Dirava hamoalea karadia, to reana Dirava ese idia ia lalo-namo henia lasi. Iesu be ma ia gwau: “Unai Dirava ena Kota Dina ia ginidae neganai, taunimanima momo do idia hereva lau dekenai, do idia gwau, ‘Lohiabada e, Lohiabada e, oiemu ladana dekenai guna ai haroro, ani? Oiemu ladana dekenai lauma dika ai lulua, bona oiemu ladana dekenai hoa kara momo ai karaia, ani?’ Vadaeni lau ese do lau haere idia dekenai, do lau gwau, ‘Umui be lau diba lasi momokani. Idau gabuna dekenai umui lao, umui dika karaia taudia.’ ” (Mataio 7:​22, 23) Ia hedinarai goevagoeva, gau badana be Basileia ena sivarai namona ena anina ita lalo-pararalaia maoromaoro bona iena hereva hegeregerena ita kara.​​—⁠Mataio 7:​24, 25.

Heduru Ia Noho

Lagani 100 mai kahana lalodiai, Iehova ena Witnes taudia be Dirava ena Basileia ena sivarai namona idia harorolaia noho. Idia printaia bukadia bona magasin amo, bona edia uduna amo, idia ese tanobada hegegemadai taudia idia durua Basileia ena anina, dahaka hahenamo do ia mailaia, bona ena hahenamo abia dalana idia diba maoromaoro totona.

Ai ese oi ai hagoadaia, namona be Iehova ena Witnes taudia ese idia harorolaia sivaraina oi kamonai henia. Bema unai sivarai namona oi abia dae bona kara ta oi karaia, hahenamo hereadaedia be hari sibona do oi abia lasi, to vaira negana ai Dirava ena Basileia ese tanobada ibounai ia lohia negana ai danu.​​—⁠1 Timoteo 4:⁠8.

Hari kara ta oi karaia be namo, badina be Dirava ena Basileia ena hahenamo negana be ia kahirakahira!

[Pictures on page 7]

Idia printaia gaudia bona edia uduna amo, Iehova ena Witnes taudia be Dirava ena Basileia ena sivarai namona idia harorolaia