Basileia Haroro Ripoti

Dirava ese Kim Ena Matana Ranu Ia Dahua

IEHOVA ena taravatu bona hakaua herevadia hegeregerena edia mauri idia haidaua taudia ese hahenamo momo idia abia. Ena be edia mauri idia haidaua be nega momo ia auka, to heduru bona hagoadaia herevana idia abia haraga diba. (Salamo 84:11) Southeast Asia amo ia mai ekspiriens ese unai ia hahedinaraia.

France amo ia mai Witnes hahinena ta ese iena laga-ani negana ai sitoa biaguna ta ladana Kima dekenai Iehova ena ura tanobada totona ia herevalaia. Danu, Mauri Hanaihanai Paradaiso Lalonai bukana ta be Kim dekenai ia henia. Kim ese buka ia tahua lalonai, inai hereva ia itaia: “Ia ese matana ranu ibounai edia matana dekena amo do ia dahua.” (Apokalupo 21:⁠4) Kim ia gwau: “Unai siri ese egu lalona ia hamarerea bada. Dina ena hora ibounai lalonai, sitoa dekenai taunimanima ese idia itaia lau kiri bona lau herevahereva, to ta ia diba lasi adorahi ai egu ruma dekenai lau giroa neganai lau taitai ela bona lau mahuta.” Iena lalohisihisi ena badina ia gwauraia hedinarai, ia gwau: “Lagani 18 vadaeni, lau be tau ta ida lau noho hebou bona lau moale lasi badina be ia ura lasi lau ia adavaia. Lau ura unai bamona noho dalana lau hadokoa, to nega daudau ai noho hebou dainai, lau hegeregere lasi.”

Daudau lasi murinai, Kim ese Iehova ena Witnes hahinena ta ladana Linh ida Baibel idia stadilaia matamaia. Kim ia gwau: “Lau ura Baibel ena hahediba herevadia lau badinaia. Hegeregere, egu tubudia tomadiho henia karana lau hadokoa, ena be unai kara dainai egu ruma bese taudia amo dagedage lau davaria. Danu, lau ura taravatu hegeregerena do ai headava, to egu turana ia ura lasi. Unai nega aukadia ai, guna France amo ia mai Witnes taihuna ese Baibel bukadia be lau dekenai ia siaia noho, bona Linh ese lau ia hagoadaia bada. Unai taihu edia haheauka bona lalokau karana ese lau idia durua dainai, lau haheauka noho ela bona lau tura henia tauna ena kara lau itaia namonamo. Lau davaria ena ‘adavana ibounai’ be 5 vadaeni bona ena natuna ibounai be 25! Unai ese egu lalona ia hagoadaia dainai, ia lau rakatania.

“Ruma badana bona namona lau rakatania bona ruma maragina ta lau noholaia matamaia be auka. Danu, guna lau tura henia tauna ese egu lalona ia doria ai noho hebou lou totona, bona lau ia hagaria toho, ia gwau bema lau ura lasi, muramura dikana ta amo egu toana do ia hadikaia. Iehova ena heduru dainai, kara maorona lau karaia diba.” Lauma dalanai Kim ia goada ia lao noho ela bona April 1998 lalonai bapatiso ia abia. Danu, iena kakana kekenina bona tadina kekenina bona ena natuna merona be Iehova ena Witnes taudia ida Baibel idia stadilaia matamaia.

Kim ia gwau: “Guna lau laloa egu mauri be anina lasi. To, hari inai negai, lau moale bona hanuaboi ai lau taitai lasi. Iehova ese matana ranu be egu matana dekena amo ia dahua vadaeni.”

[Footnote]