Duahia Taudia Edia Henanadai
Iobu ena hisihisi negana ena daudau be edena bamona?
Taunimanima haida idia laloa Iobu ia abia hahetoho be lagani momo lalodiai idia vara, to Iobu bukana ese unai bamona nega daudauna lalonai ia vara hisihisina ia herevalaia lasi.
Ia hedinarai, Iobu ena hahetoho ena kahana ginigunana, ena ruma bese taudia bona ena kohu ia haboioa, be nega kwadogi lalonai ia vara. Ita duahia: “Dina ta, Iobu ena natuna tau bona hahine be vara guna natuna ena ruma dekenai idia aniani bona inuinu hebou.” Iobu ese ena gau idauidau—ena boromakau, ena doniki, ena mamoe, ena kamelo, bona unai animal idia naria hesiai taudia—ia haboioa sivaraina ta ia kamonai murinai ma ta ia kamonai. Toana be, unai murinai maoromaoro Iobu be ena natuna tau bona hahine, idia be “vara guna natuna ena ruma dekenai idia aniani bona inuinu hebou,” edia mase sivaraina ia kamonai. Toana be unai ibounai be dina tamona lalonai idia vara.—Iobu 1:13-19.
Iobu ena hahetoho ena kahana ma ta be reana nega sisina daudau lalonai ia vara. Satani be Iehova dekenai ia lao bona ia gwau Iobu do ia moru bema ia—iena tauanina—dekenai hisihisi ia henia. Bena “toto dika herea dekena amo Iobu ia hahisia, iena aena dekena amo ela bona iena kwarana.” Unai toto be ena tauanina ena kahana ibounai dekenai ia abia totona reana nega sisina daudau ia ore. Bona reana nega sisina daudau ia ore, unai “hisihisi” sivaraina be durua koikoi taudia, ia dekenai idia mai taudia, ese idia kamonai totona.—Iobu 2:3-11.
Elipasa be Edoma tanona dekenai ia noho hanuana Temana amo, bona Sopara be Arabia ena notwest kahana ena gabu ta amo ia mai, unai dainai edia noho gabudia be Iobu ena hanua Usu, reana Arabia ena not kahana dekenai ia noho, amo idia daudau lasi. To, Biledada be Suhi hanua tauna, bona ita diba iena taunimanima be Euperate badinai idia noho. Bema unai nega ai Biledada be ena hanua dekenai ia noho, reana pura o hua haida idia ore murinai, Iobu ena sivarai ia kamonai bona Usu dekenai ia lao. To momokani, Iobu ena hisihisi ia matamaia neganai, unai taudia toi be iena gabu kahirakahira dekenai idia noho diba. To herevana, Iobu ena turadia toi idia ginidae neganai, ‘dina 7 bona hanuaboi 7 lalonai, tano dekenai idia helai,’ bona hereva ta idia gwauraia lasi.—Iobu 2:12, 13.
Bena Iobu ena hahetoho ena kahana ginigabena ia vara, ena sivarai be Iobu bukana ena karoa momo ia hahonua. Turadia koikoidia be hepapahuahu herevadia bona hereva momo idia gwauraia, bona nega momo Iobu ia haere. Unai ia ore murinai, tau matamata Elihu be sisiba ia henia, bona guba amo Iehova ese Iobu ia hamaoromaoroa.—Iobu 32:1-6; 38:1; 40:1-6; 42:1.
Unai dainai, reana Iobu ena hisihisi bona ia ore negana ena daudau be hua haida eiava reana lagani ta ia hanaia lasi. Reana oi dekenai idia vara gaudia amo oi diba toana be hahetoho aukadia be idia noho daudau. To, namona be ita laloaboio lasi idia be do idia ore, Iobu ia davaria hahetoho idia ore hegeregerena. Herevana ita davaria hahetoho be nega daudau lalonai ia noho eiava lasi, to namona be Dirava ena heduru ita laloatao, unai heduru be inai lauma helaga ese ia havaraia herevadia lalonai ia hedinarai: “Badina be hari ai abia noho hisihisi be metau lasi gaudia, bona do idia noho nega daudau lasi. Oibe, inai hisihisi maragi idia ore murinai, Dirava ese ai do ia hanamoa bada herea momokani . . . ela bona hanaihanai.” (2 Korinto 4:17) Aposetolo Petero ia gwau: “Umui be nega sisina do umui hisihisi, vadaeni gabeai, hariharibada ibounai Diravana ese umui do ia hanamoa lou momokani, umui do ia haginia goada, bona emui abidadama do ia hagoadaia. Oibe, inai Dirava ese umui ia boiria vadaeni, iena noho hanaihanai hairaina Keriso Iesu danu do umui abia hebou totona.”—1 Petero 5:10.