Sivarai Namona ese Ia Havaraia Hahenamo Idauidau
“Lohiabada ese, lau ia abia hidi . . . ogogami taudia dekenai Sivarai Namona do lau haroro henia totona. . . . Kudouna idia makohia taudia do lau hanamoa lou, bona . . . taitai taudia ibounai do lau durua, bona hagoadaia totona.”—ISAIA 61:1, 2.
1, 2. (a) Iesu ia hahedinaraia ia be daika, bona edena dala ai? (b) Iesu ese ia harorolaia sivarai namona ese dahaka hahenamo idauidau ia havaraia?
IESU ena hesiai gaukara ena matamana lalonai, Sabati dinana ta ai Nasareta ena dubu dekenai ia noho. Baibel ia gwau ia dekenai “Isaia, peroveta tauna, ena Buka idia henia. Vadaeni ia kehoa, inai bamona ia torea gabuna dekena amo ia duahia, ia gwau: ‘Lohiabada ena Lauma ese lau ia hahonua. Ia ese lau ia abia hidi vadaeni, Sivarai Namona ogogami taudia dekenai do lau haroro henia totona.’ ” Iesu ese unai peroveta herevadia ia duahia noho. Gabeai ia helai bona ia gwau: “Inai umui kamonaia herevana, be hari dina ia momokani vadaeni.”—Luka 4:16-21.
2 Unai dala ai, Iesu ia hahedinaraia ia be idia perovetalaia evanelia tauna, sivarai namona ia harorolaia bona taunimanima ia hagoadaia tauna. (Mataio 4:23) Bona Iesu ese ia harorolaia sivaraina be namo herea! Ia idia kamonai taudia ia hadibaia: “Lau be tanobada ena diari. Lauegu murina dekenai do ia raka tauna be dibura lalonai do ia loaloa lasi, to mauri ena diari do ia abia.” (Ioane 8:12) Ma ia gwau: “Bema lauegu hadibaia hereva umui badinaia neganai, umui be lauegu diba tahua taudia momokani. Hereva momokani be do umui diba, bona hereva momokani ese umui do ia ruhaia.” (Ioane 8:31, 32) Oibe, Iesu ese “mauri hanaihanai herevadia” ia harorolaia. (Ioane 6:68, 69) Diari, mauri, ura kwalimu—unai hahenamo idauidau ita laloa bada momokani!
3. Iesu ena hahediba taudia ese dahaka sivarai namona idia harorolaia?
3 Pentekoste 33 C.E. murinai, hahediba taudia ese Iesu ena evanelia gaukarana idia karaia noho. Idia ese Israela taudia bona idau bese taudia dekenai “Basileia ena Sivarai Namona” idia harorolaia. (Mataio 24:14; Kara 15:7; Roma 1:16) Unai idia abia dae taudia ese Iehova Dirava dekenai diba idia abia. Tomadiho ese idia ia hametaua lasi bona idia be lauma bese matamatana, “Dirava ena Israela,” taudia ai idia lao, edia helaro be guba dekenai edia Lohiabada, Iesu Keriso, ida do idia lohia hanaihanai. (Galatia 5:1; 6:16; Efeso 3:5-7; Kolose 1:4, 5; Apokalupo 22:5) Unai be hahenamo namona momokani!
Evanelia Gaukara Hari Inai Negai
4. Edena dala ai sivarai namona harorolaia haheganina idia hagugurua hari inai negai?
4 Peroveta herevadia idia hahedinaraia gaukarana, Iesu ese ia abia guna gaukarana, be horoa Keristani taudia ese hari inai negai idia hagugurua noho bona “mamoe idaudia” taudia edia ‘hutuma bada herea’ ese heduru idia henia. (Ioane 10:16; Apokalupo 7:9) Unai dainai, sivarai namona idia harorolaia badabada, guna bamona lasi. Tano bona gabu 235 ai, Iehova ena Witnes taudia ese ‘ogogami [“manau,” NW ] taudia dekenai Sivarai Namona idia harorolaia . . . kudouna idia makohia taudia idia hanamoa lou, bona idia guia vadaeni taudia idia ruhaia. Ma danu, dibura ruma dekenai idia koua noho taudia, be edia dala idia kehoa. Lohiabada ese idia ia siaia vadaeni, iena nega namona ia ginidae vadaeni hereva idia gwauraia totona. . . . Iena bese taudia idia dagedage henia taudia, do ia halusia momokani ena sivarai danu, idia harorolaia. . . . Taitai taudia ibounai idia durua bona hagoadaia totona.’ (Isaia 61:1, 2) Unai dala ai, Keristani evanelia gaukarana ese taunimanima momo dekenai hahenamo ia havaraia bona “hisihisi idia abia noho taudia” ia hagoadaia momokani.—2 Korinto 1:3, 4.
5. Edena dala ai Iehova ena Witnes taudia bona Kerisendom ena dubu idauidau edia lalohadai sivarai namona harorolaia gaukarana dekenai be idau?
5 Kerisendom ena dubu idauidau ese dala haida ai evanelia gaukarana idia durua. Idia momo ese misinari taudia idia siaia, idau tano taudia be edia orea ena memba ai halaoa gaukarana idia karaia totona. Hegeregere, magasin ta (The Orthodox Christian Mission Center Magazine) ese Otodoks misinari taudia edia gaukara Madagascar, Africa ena saut kahana, Tanzania, bona Zimbabwe dekenai ia herevalaia. To, Otodoks Dubu, bona Kerisendom ena dubu ma haida, ena memba taudia haida sibona ese unai bamona gaukara idia karaia. To, Iehova ena gwauhamata Witnes taudia ibounai ese evanelia gaukara idia karaia. Idia lalo-parara, sivarai namona harorolaia gaukarana amo idia hamomokania diba edia abidadama ia momokani. Paulo ia gwau: “Iseda kudouna ena abidadama dekena amo Dirava ena vairanai do ita maoromaoro, bona inai abidadama be iseda uduna dekenai ita gwauraia hedinarai, be mauri do ita davaria.” Bema abidadama ese ta ia veria lasi kara ta ia karaia totona, unai abidadama ia mase vadaeni.—Roma 10:10; Iamesi 2:17.
Noho Hanaihanai Hahenamo Idauidau Ia Havaraia Sivarai Namona
6. Hari inai negai dahaka sivarai namona idia harorolaia?
6 Iehova ena Witnes taudia ese sivarai hereadaena idia harorolaia. Edia Baibel idia kehoa bona kamonai taudia dekenai idia hahedinaraia Iesu ese ena mauri ia henia karana amo taunimanima be Dirava dekenai idia lao, Dirava ese edia kara dika ia gwauatao, bona mauri hanaihanai helarona idia abia dalana ia kehoa. (Ioane 3:16; 2 Korinto 5:18, 19) Edia hadibaia herevana be Dirava ese guba dekenai ena Basileia ia haginia vadaeni bona ia horoa King, Iesu Keriso, ese ia lohiaia, bona kahirakahira ia ese tanobada amo kara dika ibounai do ia kokia bona Paradaiso do ia mailaia lou. (Apokalupo 11:15; 21:3, 4) Isaia ena peroveta herevana hegeregerena, edia dekena taudia idia hadibaia Iehova ena “nega namona,” taunimanima ese sivarai namona idia do kamonai diba negana, be hari. Danu, taunimanima idia hadibaia Iehova ese idia helalo-kerehai lasi kara dika taudia ibounai “do ia halusia momokani” dinana be kahirakahira.—Salamo 37:9-11.
7. Dahaka haheitalai ese Iehova ena Witnes taudia edia lalo-tamona ia hahedinaraia, bona dahaka dainai unai bamona lalo-tamona idia moalelaia?
7 Dika badadia idia vara tanobadana ai, inai sivarai namona sibona ese noho hanaihanai hahenamo idauidau ia havaraia. Unai sivarai idia abia dae taudia be idia lalo-tamona Keristani taudia edia tanobada ibounai tadikaka oreana lalonai idia vareai bona bese, iduhu, eiava kohu ena bada dainai idia parara lasi. Idia ese ‘lalokau be dabua bamona idia atoa, badina ia be hatamonaia gauna hereadaena.’ (Kolose 3:14, NW; Ioane 15:12) Unai be lagani gunana ai Africa ena tano ta dekenai ia hedinarai. Daba ta ai ipidi edia rege ese siti badana taudia ia hanogaia. Taunimanima ese gavamani idia hamorua toho. Iduhu idau taudia idia tuari henia matamaia neganai, Witnes ruma bese ta idia samania badina Witnes taudia idau iduhuna amo idia hunia bona naria. Unai ruma bese taudia idia gwau: “Emai ruma dekenai Iehova ena Witnes taudia sibona idia noho.” Idia dekenai, iduhu be gau badana lasi; idia laloa Keristani lalokau—idia dabu taudia durua karana—be gau badana. Edia Witnes lasi varavara ta ia gwau: “Tomadiho ibounai taudia ese edia dubu ena memba taudia edia ladadia idia henia. Iehova ena Witnes taudia sibona be unai bamona idia karaia lasi.” Unai bamona sivarai, tano taudia idia tuari heheni karana ese dika ia havaraia tanodia amo, idia hahedinaraia Iehova ena Witnes taudia ese ‘Keristani taudia ibounai idia lalokau henia’ momokani.—1 Petero 2:17.
Sivarai Namona ese Taunimanima Ia Haidaua
8, 9. (a) Sivarai namona idia abia dae taudia ese edena bamona edia mauri idia haidaua? (b) Dahaka haheitalai ese sivarai namona ena siahu idia hahedinaraia?
8 Paulo ia gwauraia ‘inai mauri bona do ita abia mauri’ dekenai sivarai namona be mai anina bada. (1 Timoteo 4:8) Ia ese vaira negana totona helaro namona ia henia sibona lasi, to ‘inai mauri’ ia hanamoa danu. Dirava ena Hereva, Baibel, ese Iehova ena Witnes taudia ia hakaua dainai, edia mauri idia haidaua bona Dirava ena ura hegeregerena do idia noho. (Salamo 119:101) Idia ese kara maoromaoro bona momokani idia habadaia neganai, edia kara ia matamata.—Efeso 4:24.
9 Franco ena haheitalai mani oi laloa. Ia be badu haraga tauna. Gau ta ia kerere neganai, ia badu dikadika bona gau idauidau ia makohia. Iena adavana ese Iehova ena Witnes taudia ida Baibel ia stadilaia, bona edia Keristani haheitalai ese sisina sisina Franco ia durua bona ia itaia ena kara ia haidaua be namo. Idia ida Baibel ia stadilaia bona gabeai lauma helaga ena huahua, maino bona sibona biagua karana, ia hahedinaraia diba. (Galatia 5:22, 23) Hesiai lagani 2001 lalonai, Belgium dekenai idia bapatiso taudia 492 amo ia be ta. Mani, Alejandro oi laloa danu. Unai tau matamata ese drag ania karana ia manadalaia dainai, ena mauri ia dika ia lao ela bona momoru negea gabuna dekenai ia noho, unuseniai ia davaria gaudia ia hoihoilaia ena drag ania karana ia durua totona. Ena mauri lagani be 22 neganai, Iehova ena Witnes taudia ese Alejandro dekenai Baibel stadi idia herevalaia, bona unai ia abia dae. Dina ta ta ai Baibel ia duahia bona Keristani heboudia dekenai ia lao. Ena mauri dalana ia hagoevaia haraga bona hua 6 idia do ore lasi neganai, evanelia gaukara ia karaia vadaeni—lagani gunana ai Panama dekenai idia bapatiso taudia 10,115 amo ia be ta.
Sivarai Namona—Hahenamo Manau Taudia Dekenai
10. Daidia ese sivarai namona idia abia dae, bona edena dala ai edia laloa dalana idia haidaua?
10 Isaia ia peroveta sivarai namona be manau taudia dekenai do idia harorolaia. Unai manau taudia be daidia? Idia be Kara bukana ia gwauraia “mauri hanaihanai idia ura kudou-maoro taudia.” (Kara 13:48, NW ) Idia be hereva momokani idia abia dae manau taudia mauri dala idauidau amo. Idia diba Dirava ena ura karaia karana amo idia mai hahenamo idauidau be inai tanobada ese ia henia diba gaudia ibounai idia hereaia. (1 Ioane 2:15-17) To, Iehova ena Witnes taudia ese edena dala ai evanelia gaukara lalonai taunimanima edia kudouna idia hamarerea?
11. Paulo ena hereva hegeregerena, edena dala ai sivarai namona idia harorolaia be namo?
11 Mani aposetolo Paulo ena haheitalai oi laloa, ia be Korinto taudia ia tore henia, ia gwau: “Lauegu varavara taudia e, umui dekenai lau lao neganai, lau be hereva namo herea o aonega herea lau gwauraia lasi, to Dirava ena hereva momokani lau harorolaia. Umui dekenai lau noho neganai lau be idau gauna ta lau laloa diba lasi, Iesu Keriso sibona mo. Oibe, Iesu Keriso satauro dekenai ia mase sibona lau laloa.” (1 Korinto 2:1, 2) Paulo ese ena diba amo kamonai taudia edia lalona ia veria toho lasi. Ia ese Dirava ia hamomokania gaudia sibona ia hadibaia, bona hari unai gaudia be Baibel dekenai idia noho. Danu, Paulo ena hagoadaia herevadia ia ida evanelia gaukara ia karaia tauna Timoteo dekenai oi laloa, ia gwau: “Sivarai Namona do oi harorolaia goadagoada.” (2 Timoteo 4:2) Timoteo ese Dirava ena “Sivarai Namona” ia harorolaia be namo. Paulo be Timoteo dekenai ma ia gwau: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.”—2 Timoteo 2:15.
12. Edena dala ai hari inai negai Iehova ena Witnes taudia ese Paulo ena hereva bona haheitalai idia badinaia?
12 Iehova ena Witnes taudia ese Paulo ena haheitalai bona ena hereva Timoteo dekenai idia badinaia. Idia abia dae Dirava ena Hereva be mai ena siahu bona edia dekena taudia dekenai helaro bona hagoadaia herevadia idia hahedinaraia neganai, Baibel idia gaukaralaia namonamo. (Salamo 119:52; 2 Timoteo 3:16, 17; Heberu 4:12) Momokani, idia ese Baibel idia herevalaia bukadia idia gaukaralaia namonamo danu, kamonai taudia ese idia ura neganai Baibel dekenai edia diba idia habadaia totona. To hanaihanai taunimanima dekenai Baibel ena hereva idia hahedinaraia toho. Idia diba Dirava ena lauma amo ia vara Herevana ese manau taudia edia kudouna do ia hamarerea. Bona unai dala ai Baibel idia gaukaralaia karana ese sibona edia abidadama ia hagoadaia danu.
‘Taitai Taudia Idia Durua Bona Hagoadaia’
13. Lagani 2001 ai, dahaka ia vara dainai taitai taudia momo ese hagoadaia herevadia idia kamonai be namo?
13 Lagani 2001 ai dika badadia idia vara, bona taunimanima momo ese hagoadaia herevadia idia kamonai be namo. September gunana ai unai bamona dika badana be United States dekenai ia vara, terorist taudia ese World Trade Center New York ai bona Pentagon Washington, D.C. kahirakahira ai idia hadikaia. Unai kara ese unai tano taudia ibounai ia hagaria! Unai bamona gaudia idia vara neganai, Iehova ena Witnes taudia idia gaukara goada, ‘taitai taudia hagoadaia’ haheganina idia hagugurua totona. Haheitalai haida ese do idia hahedinaraia edena dala ai unai idia karaia.
14, 15. Edena nega rua ai Witnes taudia ese taitai taudia hagoadaia totona Baibel idia gaukaralaia diba?
14 Ful-taim evanelia gaukarana ia karaia Witnes hahinena ta ese dala dekenai hahine ta ia hereva henia bona iena lalohadai unai terorist karana dekenai ia nanadaia. Hahine ia tai matamaia. Ia gwau ia lalohisihisi bona ia ura dala ta ai ma haida ia durua. Witnes hahine ese ia hadibaia Dirava ese ita ibounai ia laloa bada, bona Isaia 61:1, 2 ia duahia. Hahine ese unai Dirava ena lauma amo idia vara herevadia ia lalo-pararalaia bona ia gwau taunimanima iboudiai idia taitai noho. Pepapepa maragina ia abia dae bona unai Witnes hahinena ia boiria iena ruma dekenai ia do ia vadivadi henia.
15 Evanelia gaukara idia karaia Witnes taudia rua ese ena kohu atoa rumana dekenai ia gaukara tauna ta idia davaria. World Trade Center dekenai ia vara dika badana dainai idia ura ia dekenai Baibel amo hagoadaia herevadia idia hahedinaraia. Gwaumaoro ia henia dainai 2 Korinto 1:3-7 idia duahia, ena hereva haida be inai: “durua ita abia . . . Keriso dainai.” Unai tauna ena Witnes dekena taudia ese ma haida dekenai hagoadaia herevadia idia hahedinaraia karana ia laloa bada bona ia gwau: “Namona be Dirava ese umui karaia gaukara namona ia hanamoa.”
16, 17. Edena haheitalai rua idia hahedinaraia Baibel be mai ena siahu, dika badadia dainai idia lalohisihisi taudia do ia durua?
16 Guna idia kamonai taudia ia vadivadi lou Witnes tauna ta ese guna ia kamonai hahine ta ena natuna mero ia davaria bona ia gwau unai dika badana ia vara dainai, ia ura diba ena dekena taudia edia noho be edena bamona. Unai tauna ia hoa bada badina Witnes tauna ese ena nega ia gaukaralaia, taunimanima ia vadivadi bona edia noho ia tahua totona. Ia gwau unai dika badana ia vara neganai World Trade Center kahirakahira ai ia gaukara bona unai ibounai ia itaia. Dirava ese hisihisi ia koua lasi ena badina ia henanadai neganai, Witnes tauna ese Baibel ena siri haida ia duahia, idia ta be Salamo 37:39, ia gwau: “Kara maoromaoro taudia, be Lohiabada ese do ia hamauria, vadaeni hekwarahi o nega dika neganai, Lohiabada dekenai idia lao diba, badina ia be edia mauri davaria gabuna.” Unai tauna be Witnes tauna bona ena ruma bese edia noho ia nanadaia, do ia mai lou totona ia boiria, bona unai vadivadi ia laloa bada herevadia ia gwauraia mai ena kudouna ibounai ida.
17 Unai terorist karana murinai Iehova ena Witnes taudia ese idia hagoadaia taitai taudia tausen amo ma ta be edia dekena taudia idia vadivadi neganai idia davaria hahinena ta. Ia vara gauna dainai ia lalohisihisi bada bona Salamo 72:12-14 idia duahia neganai ia kamonai, unai siri idia gwau: “Ogogami taudia be ia dekenai idia boiboi neganai, ia ese do ia durua. Edia gau be lasi, bona edia durua be lasi taudia, be king ese do ia hamauria. Ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria. Bema unai ogogami taudia, be haida ese idia dagedage henia neganai, king ese unai ogogami taudia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.” Unai hereva be mai anina bada! Hahine ese Witnes taudia ia noia unai siri idia duahia lou bona ena ruma dekenai ia boiridia idia herevahereva noho totona. Unai herevahereva lalonai, Baibel stadi idia matamaia.
18. Witnes ta idia noia ena dekena taudia totona ia guriguri neganai, edena dala ai idia ia durua?
18 Witnes tauna ta be kohu momo taudia edia gabu ai aniani gabuna ta dekenai ia gaukara, guna unai gabu dekenai taunimanima momo be Basileia ena sivarai namona idia ura henia lasi. Terorist karana murinai, unai taunimanima idia laloa momo. Friday adorahi ai, unai dika badana murinai, unai aniani gabuna ena biaguna hahine ese iboudiai ia boiria, murimuriai do idia lao bona kandolo do idia dogoatao, regerege lasi negana kwadogina amo unai dika lalonai idia mase taudia idia laloa totona. Witnes tauna ese edia hemami ia matauraia dainai, murimuriai ia lao bona dala dekenai ia gini regerege lasi. Unai biaguna hahine ia diba ia be Iehova ena Witnes taudia edia haroro tauna dainai, unai regerege lasi negana murinai, unai Witnes tauna ia nanadaia bema guriguri do ia henia diba. Witnes tauna ia gwau oibe. Iena guriguri lalonai, gabu momo dekenai idia taitai taudia ia herevalaia to ia gwau namo lasi idia taitai mai helaro lasi. Unai bamona kara dikadia do idia vara lasi negana ia herevalaia bona ia gwau taunimanima iboudiai ese Baibel amo diba maorona idia abia diba bona goada ia henia Diravana kahirakahira idia lao diba. “Amen” ia gwauraia murinai, biaguna hahine be Witnes tauna dekenai ia mai, ia tanikiu henia, ia rosia, bona ia gwau unai guriguri ese guna ia kamonai guriguridia ibounai ia hereaia—bona unai aniani gabuna murimuriai idia gini taudia 60 bamona be unai idia karaia danu.
Edia Noho Gabuna Dekenai Namo Idia Havaraia
19. Dahaka haheitalai ia hahedinaraia taunimanima haida ese Iehova ena Witnes taudia edia kara namo idia itaia?
19 Hari inai negai, Iehova ena Witnes taudia ese edia gaukara idia karaia gabudia dekenai namo idia havaraia—momo ese idia gwauraia bamona. Oibe, maino, kara momokani, bona taravatu goevadia idia badinaia taudia ese namo do idia havaraia, ani? Central Asia ena tano ta ai, Witnes taudia ese guna gavamani ena sekuriti dipatmen ai ia gaukara ofesa ta idia davaria. Ia gwau guna ena gaukara ta be tomadiho orea idauidau ia tahua. Iehova ena Witnes taudia edia orea ia tahua neganai, edia kara momokani bona kara namona dainai ia hoa. Edia abidadama goadana bona idia hadibaia herevadia be Baibel amo ia laloa bada. Unai tauna ese Baibel stadi ia abia dae.
20. (a) Lagani gunana ai Iehova ena Witnes taudia idia karaia gaukara ena ripoti ese dahaka ia hahedinaraia? (b) Dahaka ese ia hahedinaraia gaukara bada ia do noho, bona iseda evanelia gaukarana be edena bamona ita laloa?
20 Unai bamona haheitalai be tausen momo, to inai hereva lalonai idia noho haheitalai haida amo ia hedinarai goevagoeva vadaeni, hesiai lagani 2001 lalonai Iehova ena Witnes taudia idia bisi bada.a Idia ese taunimanima milioni momo idia hereva henia, idia taitai taudia momo idia hagoadaia, bona edia evanelia gaukarana ese anina ia havaraia. Taunimanima 263,431 ese bapatiso amo edia gwauhamata Dirava dekenai idia hahedinaraia. Tanobada hegegemadai, evanelia gaukara idia karaia taudia edia namba be pesen 1.7 amo ia bada daekau. Bona lagani ta ta ai idia karaia Iesu ena mase ena Memorial dekenai idia mai taudia edia namba be 15,374,986 dainai, ita diba gaukara bada ia do noho. (1 Korinto 11:23-26) Namona be sivarai namona idia abia dae manau taudia ita tahua noho. Bona Iehova ena nega namona ia do noho lalonai, namona be “kudouna idia makohia taudia” ita hagoadaia noho. Ita abia hahenamo be bada herea! Ita ibounai ita ura Isaia ena hereva ita gwauraia, ‘ita moale bada noho, Lohiabada ese ia karaia vadaeni gaudia dainai.’ (Isaia 61:10) Iseda ura be Dirava ese ena peroveta herevana ia hagugurua lalonai, ita do ia gaukaralaia noho, unai peroveta herevana ia gwau: “Lohiabada Dirava ese iena bese taudia do ia hamauria momokani. Vadaeni bese idauidau taudia ibounai ese, Lohiabada do idia hanamoa.”—Isaia 61:11.
[Footnote]
a Rau 19 ia lao 22 dekenai ia noho lista ese hesiai lagani 2001 lalonai Iehova ena Witnes taudia idia karaia gaukarana ena ripoti ia hahedinaraia.
Oi Laloatao, A?
• Edena dala ai manau taudia ese Iesu ia harorolaia sivarai namona amo hahenamo idia abia?
• Iesu ena hahediba taudia ginigunadia edia evanelia gaukarana idia abia dae taudia ese dahaka hahenamo idauidau idia abia?
• Hari inai negai sivarai namona idia abia dae taudia ese dahaka hahenamo idauidau idia abia?
• Iseda evanelia gaukarana be edena bamona ita laloa?
[Chart on page 19-22]
IEHOVA ENA WITNES TAUDIA EDIA HESIAI LAGANINA 2001 ENA RIPOTI
(See bound volume)
[Pictures on page 15]
Iehova ena Witnes taudia idia laloatao hanaihanai edia maduna be evanelia gaukara idia karaia
[Pictures on page 17]
Sivarai namona idia abia dae taudia be ia lalo-tamona tanobada ibounai tadikaka oreana lalonai idia vareai