Haheauka Sibona Lasi to Dirava Badinaia Karana Oi Karaia Danu
“Unai dainai do umui abidadama sibona lasi, . . . to haheauka danu do umui abia. Ma haheauka sibona lasi, to Dirava badinaia kara danu do umui abia.”—2 PETERO 1:5, 6.
1, 2. (a) Taunimanima idia laloa natuna ta be edena dala ai do ia tubu? (b) Lauma dalanai ta ia tubu be mai anina bada, a?
NATUNA ta ia tubu daekau be gau badana, to tauanina dalanai ia tubu sibona be hegeregere lasi. Taunimanima idia laloa ia be lalona bona hemami dalanai do ia tubu danu. Gabeai, unai natuna be maragidia edia kara do ia rakatania bona tau eiava hahine badana ai do ia lao. Aposetolo Paulo ese unai ia herevalaia, ia gwau: “Lau mero neganai mero bamona lau hereva, mero bamona lau laloa, bona mero bamona hereva ena anina lau tahua. To hari lau be tau dainai mero ena kara lau rakatania vadaeni.”—1 Korinto 13:11.
2 Paulo ese lauma dalanai ta ena tubu karana dekenai mai anina bada herevana ia hahedinaraia. Keristani taudia be lauma dalanai beibi bamona idia noho lasi, to “laloa dobu gaudia totona, tau badadia bamona” idia laloa be namo. (1 Korinto 14:20) Namona be idia gaukara goada ‘Keriso ena bada hegeregerena danu idia abia.’ Bena idia be ‘natuna maragidia bamona do idia noho lasi. Koikoi taudia edia hadibaia hereva lai bamona, ese idia do ia doria lao, doria mai’ lasi.—Efeso 4:13, 14.
3, 4. (a) Dahaka ita karaia be namo, lauma dalanai tau badadia ai ita lao totona? (b) Edena bamona Dirava hamoalea karadia ita hahedinaraia be namo, bona edia anina be bada, a?
3 Edena dala ai lauma dalanai tau badadia ai ita lao diba? Tauanina be vaia do ia tubu ela bona ia bada, to lauma dalana ai ita tubu noho totona ita hekwarahi be gau badana. Matamanai, Dirava ena Hereva amo diba maoromaoro ita abia bona ita dibaia gaudia ita badinaia. (Heberu 5:14; 2 Petero 1:3) Unai ese ita ia durua Dirava hamoalea karadia ita hahedinaraia totona. Tauanina ena kahana idauidau idia tubu daekau hebou hegeregerena, nega momo Dirava hamoalea karadia idauidau be nega tamona ai do idia bada idia lao. Aposetolo Petero ia gwau: “Unai dainai do umui abidadama sibona lasi, to kara namodia do umui karaia danu. Ma kara namodia sibona lasi, to diba danu do umui abia. Ma diba sibona lasi, to umui ese emui tauanina edia ura do umui biagua namonamo. Ma tauanina biagua sibona lasi, to haheauka danu do umui abia. Ma haheauka sibona lasi, to Dirava badinaia kara danu do umui abia. Ma Dirava badinaia kara sibona lasi, to emui tadikaka dekenai bogahisihisi henia kara danu do umui karaia. Ma bogahisihisi sibona lasi, to taunimanima do umui lalokau henia danu.”—2 Petero 1:5-7.
4 Petero ena lista ai ia gwauraia karadia ta ta be mai anina bada, bona idia ta ita kokia diba lasi. Ma ia gwau: “Inai bamona kara namodia, bema umui dekenai idia noho neganai, idia ese emui lauma do idia hagoadaia. Vadaeni inai goada umui abia dainai, bona Iesu Keriso iseda Lohiabada umui diba dainai, do umui noho kava lasi, to emui kara be mai anina.” (2 Petero 1:8) Namona be haheauka sibona lasi, to Dirava badinaia karana ita karaia dalana do ita laloa danu.
Haheauka Ita Abia be Namo
5. Dahaka dainai ita haheauka be namo?
5 Petero bona Paulo ese Dirava badinaia karana be haheauka ida idia hakapua. (1 Timoteo 6:11) Haheauka ena anina be hekwakwanai ia vara neganai oi moru lasi eiava do oi gini goada sibona lasi. Ena anina ma haida be ta ese naria karana, boga-auka, bona gini auka karana ia hahedinaraia, herevana hahetoho, hekwakwanai, hedibagani, eiava dagedage idia vara, to ena helaro ia haboioa lasi. Bona ita diba “Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.” (2 Timoteo 3:12) Bema ita ura iseda lalokau Iehova dekenai ita hamomokania, bona hahemauri abia totona idia hegeregere karadia ita habadaia, namona be ita haheauka. (Roma 5:3-5; 2 Timoteo 4:7, 8; Iamesi 1:3, 4, 12) Bema ita haheauka lasi, mauri hanaihanai do ita abia lasi.—Roma 2:6, 7; Heberu 10:36.
6. Ita haheauka ela bona dokona ena anina be dahaka ita karaia?
6 Ena be matamanai iseda kara be namo, to mai anina bada gauna be ita haheauka. Iesu ia gwau: “Iena lalona do ia goada noho ela bona dokona, unai tauna be do ia mauri.” (Mataio 24:13) Oibe, do ita haheauka ela bona dokona be iseda mauri ena dokona eiava inai tanobada ena dokona. Herevana edena ia vara, to Dirava ita badinaia noho be namo. To bema ita haheauka sibona bona Dirava badinaia karana ita karaia lasi, Iehova ita hamoalea diba lasi, bona mauri hanaihanai do ita abia lasi. To Dirava badinaia karana be dahaka?
Dirava Badinaia Karana Ena Anina
7. Dirava badinaia karana be dahaka, bona ita ia hagoadaia dahaka ita karaia totona?
7 Dirava badinaia karana lalonai Iehova Dirava dekenai hemataurai ita hahedinaraia, ia ita tomadiho henia bona hesiai henia, bona iena lohia siahuna ita badinaia. Iehova ita badinaia totona diba maoromaoro, ia bona iena dala idauidau dekenai, ita abia be namo. Ita ura Dirava ita dibaia namonamo. Unai ese ita do ia hagoadaia mai eda kudouna ibounai ida ia do ita tura henia totona, bona iseda kara bona mauri dalana amo unai do ita hahedinaraia. Namona be ita ura ita be Iehova bamona—ena kara idauidau ita tohotohoa bona ita hahedinaraia. (Efeso 5:1) Momokani, Dirava ita badinaia neganai, ita ura ita karaia gaudia ibounai be Dirava idia hamoalea.—1 Korinto 10:31.
8. Dirava badinaia karana bona Dirava sibona tomadiho henia karana be edena dala ai idia gaukara hebou?
8 Dirava badinaia karana momokanina karaia totona, namona be Iehova sibona ita tomadiho henia, bona iseda kudouna dekenai gau ma ta ese iena gabu ia abia lasi. Ia be iseda Havaraia Tauna dainai, ia sibona ita tomadiho henia be maoro. (Deuteronomi 4:24; Isaia 42:8) To, Iehova ese ita ia doria lasi ia ita tomadiho henia totona. Ia ura mai eda ura ida ia ita badinaia. Dirava ita diba maoromaoro dainai ia ita lalokau henia, bona unai ese ita ia hagoadaia iseda mauri ita hagoevaia, ia dekenai iseda mauri ibounai ita gwauhamatalaia, bona unai ita badinaia noho.
Dirava Hetura Henia Karana Habadaia
9, 10. Edena dala ai iseda hetura karana namona Dirava ida ita habadaia bona ita dogoatao noho diba?
9 Bapatiso amo iseda gwauhamata Dirava dekenai ita hamomokania murinai, iseda hetura karana ia ida ita habadaia noho be namo. Ita ura unai ita karaia bona mai abidadama ida Iehova ita hesiai henia noho dainai, ita do ia hagoadaia iena Hereva ita stadilaia bona ita laloa dobu noho totona. Dirava ena lauma be iseda lalona bona kudouna dekenai ia gaukara neganai, iseda lalokau Iehova dekenai ia habadaia. Iseda hetura karana ia ida be iseda mauri ena mai anina bada gauna ai ia lao. Ita laloa Iehova be iseda Turana namona bona ita ura nega ibounai ia ita hamoalea. (1 Ioane 5:3) Iseda moale, iseda hetura karana namona Dirava ida do ia tubu, bona ia ita tanikiu henia badina mai lalokau ida ita ia hadibaia bona idia maoro negadiai ita ia matahakani henia.—Deuteronomi 8:5.
10 Bema hanaihanai iseda hetura karana namona Iehova ida ita hagoadaia lasi, do ia manoka diba. Bema unai ia vara, ia be Dirava ena kerere lasi, badina “Dirava be daudau lasi ita ta ta dekenai.” (Kara 17:27) Ita moale bada badina Iehova ita hereva henia diba, bona unai ita karaia totona dala aukana ia haginia lasi! (1 Ioane 5:14, 15) Momokani, ita gaukara goada iseda hetura karana Iehova ida ita dogoatao noho totona be namo. To, ita ia durua ia kahirakahira ita lao totona, ia ese heduru gaudia idauidau ia henia, unai amo Dirava badinaia karana ita habadaia bona ita dogoatao noho diba. (Iamesi 4:8) Edena dala ai unai mai lalokau ida ia henia heduru gaudia ibounai ita gaukaralaia namonamo diba?
Lauma Dalanai Oi Goada Noho
11. Iseda Dirava badinaia karana idia hahedinaraia gaudia haida be dahaka dahaka?
11 Iseda lalokau bada Dirava dekenai ese ita do ia hagoadaia iseda Dirava badinaia karana ena bada ita hahedinaraia totona. Unai be Paulo ena sisiba hegeregerena, ia gwau: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.” (2 Timoteo 2:15) Unai ita karaia totona, Baibel stadi, hebou lao henia, bona haroro gaukara karaia hanaihanai ena sediual namona ita badinaia. Iehova kahirakahira ita noho diba totona, ‘nega ibounai ita guriguri.’ (1 Tesalonika 5:17) Unai gaudia idauidau ese iseda Dirava badinaia karana idia hahedinaraia. Bema idia ta ita karaia namonamo lasi, reana lauma dalanai do ita gorere, bona dala ia kehoa Satani ena tarapu idauidau dekenai ita moru totona.—1 Petero 5:8.
12. Edena dala ai mai kwalimu ida hahetoho idauidau ita haheaukalaia diba?
12 Lauma dalanai ita goada bona ita gaukara noho ese ita ia durua danu ita dekenai idia vara hahetoho momo ita haheaukalaia totona. Hahetoho haida be ita idia hahisia bada diba. Iseda ruma bese taudia, varavara, eiava dekena taudia ese ita idia ura henia lasi, inai henia, bona dagedage henia neganai, unai ita haheaukalaia be auka herea. Iseda moni gaukara eiava sikuli gabudia ai, reana hehuni dalanai ita idia doria iseda Keristani hakaua herevadia ita dadaraia totona. Lalo-manoka, gorere, bona lalohisihisi ese tauanina dalanai ita ia hamanokaia diba bona unai dainai iseda abidadama idia tohoa gaudia ita haheaukalaia be auka. To, hahetoho ibounai be mai kwalimu ida ita haheaukalaia diba bema iseda ‘kara ibounai idia helaga, bona Dirava ita badinaia namonamo. Ma Dirava ena Dina ita naria noho, bona ia ginidae haraga totona ita gaukara goada noho.’ (2 Petero 3:11, 12) Unai bamona ita karaia neganai iseda moale ita dogoatao noho, bona ita diba Dirava ena hahenamo do ita abia.—Aonega Herevadia 10:22.
13. Dahaka ita karaia be namo bema ita ura Dirava ita badinaia noho?
13 Ena be Satani ese Dirava idia badinaia taudia ia tahua ia dagedage henia totona, to ita gari lasi be namo. Dahaka dainai? Badina “Iehova ia diba edena bamona Dirava badinaia taudia be hahetoho amo do ia hamauria.” (2 Petero 2:9, NW ) Hahetoho ita haheaukalaia bona unai hahemauri karana ita mamia totona, namona be “Dirava negea kara bona lebulebu kara do ita rakatania. Ita ia hadibaia danu, do ita noho namonamo, do ita kara maoromaoro, bona Dirava do ita matauraia.” (Tito 2:12) Ita be Keristani taudia dainai, namona be ita gima noho tauanina ena ura dikadia bona gaukara idauidau ese iseda Dirava badinaia karana idia hamanokaia eiava idia hadikaia lasi totona. Hari, namona be Dirava badinaia karana idia hadikaia diba gaudia haida ita laloa.
Dirava Badinaia Karana Idia Hadikaia Diba Gaudia Dainai Ita Naria Namonamo
14. Bema kohu ura henia karana ese iseda lalona ia veria, dahaka ita laloatao be namo?
14 Kohu ura henia karana be momo ia tarapua gauna ta. Reana ita sibona ita koia diba, ita laloa “Dirava badinaia kara be moni davaria dalana ta.” Unai dainai iseda tadikaka ese ita dekenai idia hahedinaraia abidadama karana be dala kererena ai ita gaukaralaia. (1 Timoteo 6:5) Reana ita laloa kerere, ita laloa taga Keristani tauna ta ita doria diba, do ita haloua diba lasi moni do ia heniatorehai totona. (Salamo 37:21) Dirava badinaia karana amo ‘inai mauri bona gabeai do ita abia mauri dekenai’ noho namona do ita abia, to kohu haboua karana amo do ita abia lasi. (1 Timoteo 4:8) “Gau ta tanobada dekenai ita abia mai lasi, bona gau ta danu do ita abia lao lasi” dainai, namona be ‘Dirava badinaia’ karana bona ‘iseda lalona be namo’ karana do ita tahua goadagoada bona “ita be mai iseda aniani bona dabua neganai, moni dekenai ita laloa momo lasi be namo.”—1 Timoteo 6:6-11.
15. Dahaka ita karaia diba bema moale tahua karana ese iseda Dirava badinaia karana ia koua gwauraia?
15 Moale tahua karana ese Dirava badinaia karana ia koua diba. Toana be karaharaga gau haida ita haidaua be namo, a? Momokani, tauanina hagoadaia karana bona moale karadia amo namo haida idia vara. To, mauri hanaihanai ida idia ita hahegeregerea neganai, idia amo ita abia namo be maragi sibona. (1 Ioane 2:25) Hari inai negai, taunimanima momo ese ‘lebulebu karadia idauidau idia ura henia bada, to Dirava idia ura henia maragi. Dirava badinaia kara be toana sibona idia hahedinaraia, to iena anina momokani idia negea,’ bona unai bamona taudia amo ita raka siri be namo. (2 Timoteo 3:4, 5) Dirava idia badinaia goadagoada taudia ese “edia badina namona idia abia hegaegae, vaira dinadia totona, unai amo mauri korikori do idia abia momokani.”—1 Timoteo 6:19, NW.
16. Dahaka ura dikadia dainai haida ese Dirava ena kara maoromaoro taravatudia idia badinaia lasi, bona edena dala ai unai ura dikadia ita hanaia diba?
16 Inuinu kekero bona drag ania karana, matabodaga karadia, bona ura dikadia ese iseda Dirava badinaia karana idia hadikaia diba. Bema ita moru bona unai gaudia ita karaia, ita ese Dirava ena kara maoromaoro taravatudia ita badinaia lasi. (1 Korinto 6:9, 10; 2 Korinto 7:1) Paulo danu ese ena goevadae lasi tauanina ena ura dikadia tuari henia noho karana ia haheaukalaia. (Roma 7:21-25) Mai eda goada ida kara haida ita karaia, ura dikadia ita kokia totona. Gau ta be, namona be iseda lalona ita hadaia kara goeva do ita badinaia noho. Paulo ese ita ia hamaoroa: “Tauanina ena ura kara, umui emui lalonai idia gaukara noho, be do umui hamasea. Gaudia be inai: Heudahanai, lebulebu, ura dikadia, matabodaga, bona kohu momo ura dikadika kara. Kohu momo ura dikadika kara be hegeregere kaivakuku tomadiho henia kara bamona.” (Kolose 3:5) Tauanina ena ura dikadia ita hamasea totona, iseda lalona ita hadaia unai gaudia do ita kokia momokani. Mai momokani ida Dirava ena heduru abia totona ita guriguri neganai, inai tanobada ena oromana dikana lalonai, ita do ia durua ura dikadia ita dadaraia bona kara maoromaoro bona Dirava badinaia karana do ita tahua totona.
17. Edena dala ai matahakani ita laloa be namo?
17 Lalo-manoka ese iseda haheauka karana ia hamanokaia diba bona iseda Dirava badinaia karana ia hadikaia diba. Iehova ena hesiai taudia momo ese lalo-manoka idia mamia vadaeni. (Numera 11:11-15; Esera 4:4; Iona 4:3) Lalo-manoka ese ita ia hadikaia diba bema ita badu badina ta ese ita ia sisiba henia auka eiava ia matahakani henia dainai. To, sisiba bona matahakani ita abia neganai, idia hamomokania Dirava ese ita ia laloa bada bona ia lalokau henia. (Heberu 12:5-7, 10, 11) Namo lasi ita laloa matahakani be panisia karana, ia be dala maoromaoro ai ita ia hadibaia karana ta. Bema ita manau, ita ese sisiba do ita laloa bada bona abia dae, badina ita diba “matakani be mauri dalana.” (Aonega Herevadia 6:23) Unai ese ita ia durua diba lauma dalanai ita goada ita lao bona iseda Dirava badinaia karana ita goadalaia totona.
18. Bema hekwakwanai ta ia noho ita bona ma ta huanai, iseda maduna be dahaka?
18 Lalohadai kereredia eiava ma haida ida hekwakwanai ita davaria neganai, iseda Dirava badinaia karana ia tohoa diba. Unai ese lalo-hekwarahi idia havaraia diba eiava haida idia doria aonega lasi dalana idia abia hidi totona, bona edia tadikaka bona taihu idia bamodia lasi. (Aonega Herevadia 18:1) Namona be ita laloatao, ma haida ita badu henia eiava ita inai henia neganai, iseda hetura karana Iehova ida ia hadikaia diba. (Levitiko 19:18) Momokani, “iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba?” (1 Ioane 4:20) Iesu ese ena Haroro Herevana Badana lalonai hekwakwanai hanamoa haraga daladia ia hahedinaraia. Ia ese kamonai taudia ia hamaoroa: “Unai dainai, oiemu harihari gauna pata helaga dekenai oi atoa gwauraia neganai be do oi laloa guna, oiemu tadikakana dekenai mai emu kerere. Bema unai bamona, oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.” (Mataio 5:23, 24) Mai hebogahisi lasi ida oi gwauraia herevadia eiava oi karaia karadia ena hisihisi hanamoa totona, sori herevana oi gwauraia be heduru gauna. Bema ta ita noia iseda dika do ia gwauatao totona bona ita gwau ita diba ita kerere, unai ese iseda hetura karana do ia hanamoa bona ia ida maino ita karaia lou diba. Iesu ese hekwakwanai hamaoromaoroa sisiba ma haida ia henia danu. (Mataio 18:15-17) Hekwakwanai be mai kwalimu ida ita hanamoa neganai, ita moale bada!—Roma 12:18; Efeso 4:26, 27.
Iesu Ena Haheitalai Tohotohoa
19. Dahaka dainai Iesu ena haheitalai ita tohotohoa be gau badana?
19 Momokani, hahetoho do ita davaria, to ita gwau lasi mauri hanaihanai ena heau helulu amo ita do idia hakaua kerere. Namona be oi laloatao, Iehova ese hahetoho amo ita ia hamauria diba. “Namona be ita idia hametaua gaudia ibounai . . . ita negea momokani” bona “iseda matana be Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua.” (Heberu 12:1-3) Iesu ena haheitalai ita tahua namonamo bona iseda hereva bona kara amo ia ita tohotohoa ese ita do ia durua Dirava badinaia karana ita habadaia bona ita hahedinaraia badabada totona.
20. Haheauka bona Dirava badinaia karana ita tahua neganai, dahaka anina namona idia havaraia diba?
20 Haheauka bona Dirava badinaia karana idia gaukara hebou, iseda hahemauri idia hamomokania totona. Unai kara namodia ita hahedinaraia neganai, iseda Dirava hesiai henia gaukara helagana do ita karaia noho mai abidadama ida. Ena be hahetoho ita davaria, to bema ita haheauka bona Dirava ita badinaia, do ita moale badina Iehova ena hebogahisi bona hahenamo do ita abia. (Iamesi 5:11) Danu, Iesu ese ita ia hagoadaia, ia gwau: “Do umui gini auka dainai, emui laumana [“souli,” NW ] do idia mauri.”—Luka 21:19.
Edena Bamona Do Oi Haere?
• Dahaka dainai haheauka be mai anina bada gauna?
• Dirava badinaia karana be dahaka, bona edena bamona ita hahedinaraia diba?
• Edena dala ai iseda hetura karana Dirava ida ita habadaia bona ita dogoatao diba?
• Iseda Dirava badinaia karana idia hadikaia diba gaudia haida be dahaka, bona edena bamona idia ita dadaraia diba?
[Pictures on page 6, 7]
Dirava badinaia karana be dala momo ai ita hahedinaraia diba
[Pictures on page 8]
Emu Dirava badinaia karana idia hadikaia diba gaudia dainai oi naria namonamo