Iehova Ena Dina Ia Mai Kahirakahira Lalonai, Taunimanima be Edena Bamona Ita Lalodia be Namo?
“Lohiabada . . . ese iena gwauhamata badinaia totona ia hesiku lasi, . . . to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”—2 PETERO 3:9.
1, 2. (a) Hari inai negai, Iehova ese taunimanima be edena bamona ia lalodia? (b) Ita sibona dekenai dahaka henanadai ita henia diba?
IEHOVA ena hesiai taudia be mai edia hahegani, unai be ‘bese ibounai be diba tahua taudia ai do idia halaoa.’ (Mataio 28:19) Unai gaukara ita karaia bona Iehova “ena dina badana” ita naria noho lalonai, gau badana be Iehova ese taunimanima ia laloa hegeregerena, idia ita laloa danu. (Sepanaia 1:14) Iehova ese taunimanima be edena bamona ia laloa? Aposetolo Petero ia gwau: “Lohiabada ia gwauhamata vadaeni, kara haida do ia karaia. Ia ese iena gwauhamata badinaia totona ia hesiku lasi, haida idia laloa bamona. Lasi, to umui totona ia haheauka noho. Badina be ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Dirava ia laloa taunimanima ta ta be idia helalo-kerehai diba. Ia “ura taunimanima ibounai ese mauri do idia davaria, bona hereva momokani do idia diba.” (1 Timoteo 2:4) Oibe, Iehova ia moale bada bema ‘kara dika tauna be iena dika ia rakatania, bona mauri ia davaria’!—Esekiela 33:11.
2 Iehova ena lalohadai taunimanima dekenai ita abia dae, a? Ia bamona, ita laloa kopina kala bona bese idauidau taudia ibounai be “iena mamoe” ai idia lao diba, a? (Salamo 100:3; Kara 10:34, 35) Mani sivarai rua ita itaia, idia hahedinaraia Dirava ena lalohadai ita abia be gau badana. Unai sivarai rua lalonai, kahirakahira dika bada do ia vara, bona Iehova ena hesiai taudia be idia diba vadaeni unai do ia vara. Iehova ena dina badana ita naria noho lalonai, unai sivarai rua be mai anina bada.
Aberahamo be Iehova Ena Lalohadai Ia Abia
3. Iehova ese Sodoma bona Gomora taudia be edena bamona ia lalodia?
3 Sivarai ginigunana be abidadama bese kwarana tauna Aberahamo bona hanua dikadia rua Sodoma bona Gomora. Iehova ese ‘Sodoma bona Gomora edia dika be bada herea’ ia kamonai neganai, unai hanua rua bona ia lalonai idia noho taudia ibounai be maoromaoro ia hadikaia lasi. Tahua gaukarana ia karaia guna. (Genese 18:20, 21) Sodoma hanuana dekenai aneru rua ia siaia, unuseniai kara maoromaoro tauna Lota ena ruma dekenai idia noho. Aneru idia ginidae hanuaboina ai, “Sodoma ena tatau ese ruma idia gini hagegea. Hanua ena tatau ibounai unuseni idia mai, uhau bona buruka,” idia ura unai aneru rua idia sihari henia. Ia hedinarai goevagoeva, unai hanua taudia edia kara be dika rohoroho dainai, Iehova ese ia hamasedia be maoro. To, unai aneru ese Lota idia hamaoroa: “Oiemu varavara haida ma idia noho iniseni, o lasi? Bema oiemu ravana, o oiemu natudia memero o oiemu varavara ta ia noho inai hanua dekenai, oi abidia, bona inai gabu umui rakatania.” Iehova ese dala ia kehoa unai hanua taudia haida idia mauri totona, to dokonai, Lota bona ena natuna kekeni rua sibona be unai dika amo idia heau mauri.—Genese 19:4, 5, 12, 16, 23-26.
4, 5. Dahaka dainai Aberahamo be Sodoma taudia totona Iehova ia noia, bona ena lalohadai taunimanima dekenai be Iehova ena lalohadai hegeregerena, a?
4 Iehova ese Sodoma bona Gomora hahemaoro henia totona ena ura ia hahedinaraia negana mani ita laloa lou. Unai nega ai Aberahamo ese Iehova ia noia, ia gwau: “Bema kara maoromaoro taudia 50 hanua dekenai idia noho, be hanua ibounai do oi hadikaia ore, a? Hanua dekenai do oi bogahisihisi diba, unai 50 hamauria totona? Kara maoromaoro taudia bona kara dika taudia nega tamona do oi alaia lasi, a? Kara maoromaoro taudia bona kara dika taudia, bema edia davana be tamona, be hegeregere lasi. Unai bamona be oiemu kara lasi. Tanobada ibounai ena kota biaguna be kara maoromaoro do ia karaia lasi, a?” Aberahamo ese inai hereva, “unai bamona be oiemu kara lasi” ia gaukaralaia. Aberahamo be ia dekenai ia vara gauna amo ia diba, Iehova ese kara maoromaoro taudia be kara dika taudia ida nega tamona do ia hadikaia ore lasi. Iehova ia gwau Sodoma hanua do ia hadikaia lasi “bema kara maoromaoro taudia 50 hanua dekenai idia noho,” Aberahamo ese unai namba ia hadihoa noho ela bona ten.—Genese 18:22-33.
5 Bema Aberahamo ia noia gauna be Iehova ena ura hegeregerena lasi, Ia ese Aberahamo do ia kamonai henia, a? Lasi. Aberahamo be “Dirava ena turana” dainai, Iehova ena lalohadai ia diba bona ia abia dae. (Iamesi 2:23) Iehova ese Sodoma bona Gomora hanua ia hadikaia gwauraia neganai, mai ena ura ida Aberahamo ena noinoi ia kamonai henia. Dahaka dainai? Badina iseda guba Tamana “ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.”
Iona Ena Lalohadai Taunimanima Dekenai be ia Idau
6. Iona ia harorolaia herevana dainai, Nineva taudia be dahaka idia karaia?
6 Mani sivarai iharuana ita laloa—unai be Iona ena. Inai sivarai lalonai, dika ia davaria gwauraia hanuana be Nineva. Peroveta tauna Iona ese oda ia abia unai hanua taudia do ia hamaoroa Iehova ese ena dika bada ‘ia itaia’ vadaeni. (Iona 1:2) Nineva lalonai hanua momo idia noho dainai ia be hanua badana, “bema tau ta ia ura kahana maguna ia lao kahana maguna dekenai do ia raka, ia be dina toi do ia raka.” Iona be Iehova ena hereva ia kamonai bona Nineva hanua lalonai ia vareai neganai, ia haroro ia gwau: “Dina 40 do idia ore, vadaeni Nineva hanua be do ia dika momokani.” Vadaeni, “Nineva dekenai idia noho taudia ese Dirava ena hereva idia abidadama henia. Unai dainai taunimanima ibounai ese aniani ania lasi taravatu idia gwauraia.” Nineva ena king danu ia helalo-kerehai.—Iona 3:1-6.
7. Iehova be idia helalo-kerehai Nineva taudia be edena bamona ia lalodia?
7 Edia kara be Sodoma taudia edia kara amo ia idau momokani! Iehova ese idia helalo-kerehai Nineva taudia be edena bamona ia lalodia? Iona 3:10 ia gwau: ‘Dirava ese iena lalona ia giroa, bona idia hadikaia kara, ia karaia gwauraia gauna, ia karaia lasi.’ Iehova ese ena “lalona ia giroa” anina be ia ura Nineva taudia dekenai ia karaia karana ia haidaua, edia kara idia haidaua dainai. Dirava ena taravatu idia idau lasi, to Iehova ese ena lalona ia haidaua badina ia itaia Nineva taudia idia helalo-kerehai.—Malaki 3:6.
8. Dahaka dainai Iona ia badu?
8 Iona ia itaia Nineva be Iehova ese do ia hadikaia lasi neganai, Iehova ena lalohadai hegeregerena idia vara gaudia ia itaia, a? Lasi, badina Baibel ese ita ia hamaoroa, ia gwau: “Iona ia moale lasi inai kara dekenai, ia be ia badu.” Iona be dahaka ia karaia danu? Baibel ia gwau: “Vadaeni ia guriguri, ia gwau, ‘Lohiabada e, lauegu hereva mani oi kamonai, lau be egu tano lau do rakatania lasi neganai, lau diba oi be inai bamona sibona do oi karaia. Unai dainai lau heau lao, Tarasisi do lau ginidae gwauraia. Lau diba oi be lalokau bona bogahisihisi ena Dirava. Oi be oi badu haraga lasi, bona oi be mai emu durua. Oiemu lalona oi giroa diba, bona nega momo taunimanima edia kerere davana oi henia lasi.’ ” (Iona 4:1, 2) Iona be Iehova ena kara ia diba. To unai negai, unai peroveta tauna ia badu bona Iehova ena lalohadai idia helalo-kerehai Nineva taudia dekenai ia abia dae lasi.
9, 10. (a) Iehova ese edena dala ai Iona ia hadibaia? (b) Dahaka dainai ita gwau diba Iona ese gabeai Iehova ena lalohadai Nineva taudia dekenai ia abia dae?
9 Iona be Nineva hanuana ia rakatania, ruma maragina ta ia haginia bona ena keruma henunai ia helai “ia ura dahaka ia vara Nineva hanua dekenai do ia itaia.” Iehova ese au maragina ta ia hatubua, unai amo dina ena siahu ese Iona ia gabua lasi. To murina dinana ai, unai au ia mase. Iona be unai au dainai ia badu neganai, Iehova ia gwau: ‘To oi be unai au totona oi bogahisihisi noho, ani? Unai bamona danu, lau be Nineva totona do lau bogahisihisi be namo. Ia be hanua badana momokani, bona ia lalonai be taunimanima 120,000 idia noho, boromakau momo herea danu.’ (Iona 4:5-11) Iehova ese taunimanima ia laloa karana dekenai, Iona ese gau ta ia dibaia!
10 Iehova ese Iona ia hamaoroa Nineva taudia ia hebogahisi henia neganai, Iona be dahaka ia hereva be Baibel ese ia gwauraia lasi. To ia hedinarai goevagoeva, unai peroveta tauna ese idia helalo-kerehai Nineva taudia dekenai ena lalohadai ia haidaua. Unai ita diba badina Iehova ese Iona ia gaukaralaia inai lauma amo ia vara sivaraina ia torea totona.
Edena Laloa Dalana Oi Hahedinaraia?
11. Bema Aberahamo be hari ia noho, inai negai idia noho taudia be edena bamona do ia lalodia?
11 Hari, dika badana ma ta be iseda vairanai ia noho—Iehova ena dina badana ai inai tanobada dikana do ia hadikaia ore. (Luka 17:26-30; Galatia 1:4; 2 Petero 3:10) Bema Aberahamo be hari ia mauri noho, inai tanobada ai idia noho taudia, kahirakahira do idia mase ore taudia unai, be edena bamona do ia lalodia? Toana be “Basileia ena Sivarai Namona” idia do kamonai lasi taudia dainai do ia lalo-hekwarahi. (Mataio 24:14) Aberahamo be Dirava ia noia loulou bema Sodoma hanua dekenai kara maoromaoro taudia haida idia noho. Satani ena siahu henunai ia noho tanobada ena kara do idia dadaraia taudia dekenai, bema dala ia kehoa idia helalo-kerehai bona Dirava do idia hesiai henia, idia do ita lalodia bada, a?—1 Ioane 5:19; Apokalupo 18:2-4.
12. Dahaka dainai ia auka lasi iseda haroro gaukara lalonai ita davaria taudia be Iona ese ia lalodia bamona ita lalodia totona, bona dahaka ita karaia diba unai lalohadai ita koua totona?
12 Ita ura dikadika gwau-edeede kara dikana do ia ore be maoro. (Habakuku 1:2, 3) To, ia auka lasi Iona ena lalohadai bamona ita hahedinaraia totona, idia helalo-kerehai diba taudia edia namo ita laloa maragi. Unai be do ia momokani bema edia ruma dekenai Basileia sivaraina ita abia lao bona iseda hereva idia laloa maragi, idia badu henia, eiava ita danu idia ura hepapahuahu taudia ita davaria. Bona reana Iehova ese inai tanobada dikana amo ia do haboudia lasi taudia ita laloa bada lasi. (Roma 2:4) Bema sibona eda kara ita tahua bona ita itaia iseda lalohadai be guna Iona ese Nineva taudia dekenai ia abia lalohadaina bamona, Iehova ita guriguri henia diba ita ia durua iena lalohadai ita abia totona.
13. Dahaka dainai ita gwau diba Iehova ese hari negai taunimanima ia lalodia bada?
13 Iehova be ia idia do hesiai henia lasi taudia ia lalodia, bona ia dekenai idia gwauhamata taudia edia guriguri ia kamonai. (Mataio 10:11) Hegeregere, ia ese edia guriguri dainai “kota maoromaoro do ia henia haraga.” (Luka 18:7, 8) Danu, Iehova ese ena gwauhamata bona ura ibounai be ena nega korikorina ai do ia hagugurua. (Habakuku 2:3) Unai ena anina be tanobada amo dika ibounai do ia kokia, Nineva taudia ese kara dika idia karaia lou murinai idia ia hadikaia ore hegeregerena.—Nahumu 3:5-7.
14. Iehova ena dina badana ita naria noho lalonai, dahaka ita karaia noho be namo?
14 Ela bona inai tanobada dikana be Iehova ena dina badana lalonai do ia ore, mai haheauka ida do ita naria noho, bona iena ura do ita karaia goadagoada noho, a? Iehova ena dina ia do mai lasi neganai, do ita karaia haroro gaukara ena bada be edena bamona, ita diba lasi. To ita diba gauna be inai, dokona ia do mai lasi neganai, Dirava ena ura hegeregerena Basileia ena sivarai namona be tanobada ibounai dekenai do ita harorolaia. Bona Iehova ese ena ruma be hairai amo ia hahonua noho lalonai, namona be ia do abidia vareai lasi “kohu namodia” ita lalodia bada.—Hagai 2:7.
Iseda Lalohadai be Iseda Kara amo Ita Hahedinaraia
15. Dahaka ese ita ia durua diba haroro gaukara laloa bada karana ita habadaia totona?
15 Reana ita noho gabuna dekenai taunimanima ese haroro gaukara idia laloa bada lasi, bona iseda noho dalana dainai Basileia harorolaia taudia be momo lasi gabuna dekenai ita lao diba lasi. Bema dokona ia do mai lasi neganai, taunimanima ten sibona be iseda teritori dekenai ita davaria, ita laloa unai taunimanima ten ita tahudia be namo, a? Iesu be taunimanima hutuma ia “hebogahisi” henidia “badina edia tauanina idia manokamanoka, bona idia lao idau gabu idau gabu dekenai, mamoe idia naria lasi bamona.” (Mataio 9:36) Baibel ita stadilaia bona Gima Kohorona bona Awake! lalonai idia noho sivaraidia ita duahia namonamo karana amo, inai tanobada dekenai idia vara gaudia dekenai iseda lalo-parara ita habadaia diba. Bona unai ese ita do ia durua danu sivarai namona harorolaia karana dekenai iseda laloa bada karana ita habadaia totona. Ma danu, “hesiai tauna mai ena kamonai, bona mai ena kara maoromaoro” ese ia henia Baibel idia herevalaia bukadia ita gaukaralaia namonamo karana, ese ita do ia durua ita karaia loulou teritori dekenai ita haroro noho totona.—Mataio 24:45-47; 2 Timoteo 3:14-17.
16. Edena dala ai iseda hesiai gaukarana lalonai anina ita havaraia diba?
16 Baibel ena hahemauri sivaraina idia do abia dae lasi taudia laloa bada karana ese ita do ia veria, iseda haroro gaukara lalonai nega bona dala idauidau ai ruma tauna ita hereva henia karana ita laloa totona. Ita haroro neganai taunimanima momo be edia ruma dekenai idia noho lasi, a? Bema oibe, namona be iseda haroro gaukara ena nega bona gabu ita haidaua, iseda haroro gaukara lalonai anina bada ita havaraia totona. Haoda taudia be gwarume idia abia diba negadiai idia lao. Lauma dalanai taunimanima haoda henia gaukarana lalonai unai bamona ita karaia diba, a? (Mareko 1:16-18) Oi tohoa bema adorahi ai eiava telefon amo oi haroro totona, bema taravatu ta ese unai ia koua lasi, ani? Taunimanima haida dekenai motuka atoa gabudia, maketi gabudia, petrol abia gabudia, bona sitoa be haroro gabudia namodia. Nega bona gabu idauidau dekenai ita haroro neganai, ita hahedinaraia iseda lalohadai taunimanima dekenai be Aberahamo ena bamona.
17. Edena dala ai misinari taudia bona idau tano dekenai hesiai gaukara idia karaia noho taudia ita hagoadaia diba?
17 Taunimanima milioni momo herea be Basileia ena sivarai idia do kamonai lasi. Haroro gaukara sibona lasi, to iseda ruma dekenai ita noho negadiai danu ita hahedinaraia diba unai bamona taudia ita lalodia bada, a? Tano idauna dekenai misinari eiava ful-taim hesiai gaukara idia karaia taudia haida ita diba, a? Bema oibe, reana idia dekenai revareva ita siaia bona ita hamaorodia idia karaia gaukarana ita laloa bada. Edena bamona unai ese ia hahedinaraia taunimanima ibounai ita laloa bada? Misinari taudia hagoadaia bona hanamoa revarevadia ita siaia neganai, unai ese idia ia durua edia misinari gaukara idia karaia noho totona, unai amo taunimanima ma momo idia durua diba hereva momokani ena diba maoromaoro idia abia totona. (Gunalaia Taudia 11:40) Misinari taudia bona tano ma haida dekenai hereva momokani totona idia hitolo taudia totona ita guriguri diba danu. (Efeso 6:18-20) Iseda laloa bada karana ita hahedinaraia dalana ta be, Iehova ena Witnes taudia edia tanobada hegegemadai gaukarana dekenai kontribusen monina ita henia.—2 Korinto 8:13, 14; 9:6, 7.
Gabu Ma Ta Dekenai Oi Lao Diba, A?
18. Keristani taudia haida be dahaka idia karaia, idia noho tanona dekenai Basileia gaukarana idia habadaia totona?
18 Basileia harorolaia taudia be momo lasi gabudia dekenai idia lao taudia ese sibodia edia ura idia dadaraia dainai, hahenamo momo idia davaria. Ena be Iehova ena Witnes taudia ma haida be edia tano idia rakatania lasi, to idia ese gado ma ta idia dibaia, unai amo gabu haida amo idia mai taudia be edia gado dekenai idia haroro henidia diba. Edia hekwarahi dainai ahuna namona idia abia. Hegeregere, Iehova ena Witnes taudia seven be Texas, U.S.A. ai idia noho China taudia idia durudia dainai, lagani 2001 ai, Lohiabada ena Anibou dekenai taunimanima 114 idia mai. Unai bamona grup idia durua taudia idia itaia, uiti ena anina utua negana ia ginidae vadaeni.—Mataio 9:37, 38.
19. Bema idau tanona dekenai Basileia harorolaia gaukarana durua totona oi laloa noho, dahaka oi karaia be namo?
19 Reana oi bona emu ruma bese taudia umui laloa Basileia harorolaia taudia be momo lasi gabuna dekenai do umui lao. Momokani, gau ginigunana be ‘guna do umui helai diho’ bona unai do umui lalohadailaia namonamo. (Luka 14:28) Unai be mai anina bada bema ta be idau tanona dekenai ia ura ia lao. Unai bamona gaudia ia lalohadailaia tauna ese ia sibona dekenai inai henanadai ia henia: ‘Lau hegeregere moni dalanai egu ruma bese taudia lau durua totona, a? Visa maorona lau abia diba, a? Lau lao henia tanona ena gado lau diba vadaeni, eiava lau ura lau dibaia, a? Unai gabu be siahu eiava keru, bona ena kastom lau laloa vadaeni, a? Unai tano ai idia noho tadikaka do lau hametaua eiava idia do lau “durua bada” diba, a?’ (Kolose 4:10, 11) Oi lao henia tanona amo gau ma haida oi dibaia totona, namona be unai tano dekenai haroro gaukara ia naria Iehova ena Witnes taudia edia brens opesi oi tore henia.a
20. Edena dala ai Keristani tauna matamatana ese ena tadikaka bona ma haida tano idauna dekenai ia durudia?
20 Japan dekenai Kingdom Hall konstraksen gaukarana ia karaia Keristani tauna ta ia kamonai, Paraguay dekenai tomadiho gabuna ta haginia totona, gaukara idia karaia namonamo taudia idia tahua noho. Ia do headava lasi bona ia be matamata bona mai ena goada dainai, unai tano dekenai ia lao bona hua 8 lalonai ia sibona be ful-taim gaukara ia karaia. Unai gabu dekenai ia noho neganai, Spain gado ia dibaia bona Baibel stadi haida ia karaia. Ia itaia unai tano dekenai Basileia harorolaia taudia dekenai idia dabu. Ena be Japan dekenai ia giroa lou, to daudau lasi murinai Paraguay dekenai ia giroa lou bona taunimanima ia durudia unai Kingdom Hall ena hebou dekenai idia lao totona.
21. Iehova ena dina badana ita naria noho lalonai, dahaka ita laloa bada bona iseda lalohadai be edena bamona be namo?
21 Dirava do ia itaia haroro gaukara be do ita karaia guguru, iena ura hegeregerena. Hari inai negai, lauma dalanai anina utua gaukarana ia haharagaia noho. (Isaia 60:22) Vadaeni, Iehova ena dina ita naria noho lalonai, mai eda ura bada ida unai anina utua gaukarana ita karaia bona namona be Dirava ese taunimanima ia lalodia hegeregerena, idia danu be unai bamona ita laloa.
[Footnote]
a Sibona emu ura dainai haroro gaukara idia koua eiava idia taravatua tanona dekenai oi lao be heduru gauna lasi. Bema unai bamona oi karaia, reana unai bamona noho dalana henunai aonega dalanai idia gaukara noho Basileia pablisa taudia edia gaukara oi hadikaia diba.
Oi Laloatao, A?
• Iehova ena dina ita naria noho lalonai, taunimanima be edena bamona ita lalodia be namo?
• Sodoma hanuana dekenai idia noho kara maoromaoro taudia dekenai, Aberahamo ena lalohadai be dahaka?
• Iona ena lalohadai be dahaka, idia helalo-kerehai Nineva taudia dekenai?
• Iehova ena lalohadai sivarai namona idia do kamonai lasi taudia dekenai, be edena bamona ita hahedinaraia diba?
[Picture on page 14]
Aberahamo ese taunimanima ia laloa Iehova ese ia lalodia bamona
[Picture on page 15]
Iona be gabeai Iehova ena lalohadai, idia helalo-kerehai Nineva taudia dekenai ia abia dae
[Pictures on page 16]
Taunimanima laloa bada karana ese ita ia veria, sivarai namona harorolaia gaukarana be nega bona dala idauidau ai ita karaia totona